खास चेलों 4

1जब पतरस अर यूहन्‍ना लोगु मा या बात बोन्‍ना ही छा, कि तबरि पुरोहित अर मन्दिर का सिपयों का अधिकारी अर सदूकी लोग ऊंका पास ऐ गैनी। 2अर वु लोग भौत गुस्सा मा छा किलैकि पतरस अर यूहन्‍ना यीशु को उदारण देके लोगु तैं सिखौणा छाँ, अर इन परचार कैरिके बतौणा छा कि उ मुरदो मा बटि ज्यून्द ह्‍वे गै। 3तब ऊं लोगु न यों दुईयों तैं पकड़ी दिनी अर दुसरा दिन तक जेलखाना मा रखी, किलैकि रुमुक#4:3 किलैकि रुमुक होण का बाद न्याय करण यहूदी लोगु का नियम-कानून का खिलाप मा च। ह्‍वे गै छै। 4पर जथगा लोगु न वचन तैं सुणी ऊंमा बटि भौत सरा लोगु न बिस्वास कैरी, अर ऊं लोगु मा बैखों की संख्या ही लगभग पांच हजार छै।

न्याय समिति का लोगु का समणि पतरस अर यूहन्‍ना

5अर दुसरा दिन इन ह्‍वे कि यरूशलेम नगर मा यहूदी लोगु का अधिकारी, अध्यक्ष अर शास्‍त्री लोग इकट्‍ठा ह्‍वेनि। 6अर ऊंका दगड़ा मा महा पुरोहित हन्‍ना, काइफा अर महा पुरोहित का कुटुम्ब बटि यूहन्‍ना, सिकन्दर अर ऊंका कुटुम्ब का कुछ लोग और भि छा। 7अर ऊं लोगु न पतरस अर यूहन्‍ना तैं बीच मा खड़ु कैरिके ऊं बटि पूछी, तुमुन वे लंगड़ा भिकारी तैं कै का नौ से अर कै की दिईं ताकतळ खूब कैरी? 8तब पतरस तैं पवित्र आत्मा की पूरि ताकत मिली अर वेन ऊंकू बोलि कि, 9“मेरा अधिकारी अर अध्यक्ष लोगु, आज तुम लोग ये अपंग मनखि का दगड़ा मा करीं भलै का बारा मा हम बटि जाँच-पड़ताल कना छाँ, कि उ कनकै खूब ह्‍वे गै, 10त मि तुमतै अर सब इस्राएली लोगु तैं बतै देन्दु, कि नासरत गौं का यीशु मसीह का नौ से यू मनखि तुमरा समणि तन्दुरुस्त खड़ु च। अर ये ही यीशु तैं तुमुन क्रूस पर चड़ै दिनी, पर परमेस्वर न वेतैं मुरदो मा बटि ज्यून्द कैरी। 11अर वे ही यीशु का बारा मा इन लिख्यूं च कि,

# भजन 118:22 “‘यू उई ढुंगो च जैतैं तुम मिस्‍त्रियों न फुंन ढुळ्यु समझि

पर उई कुणों को खास ढुंगो बणि गै।’

12“अर यीशु का अलावा कुई दुसरो बचै नि सकदु, किलैकि आसमान का मूड़ी अर लोगु का बीच मा कुई भि दुसरो नौ नि दिये गै, जैका द्‍वारा हमतै बचयै जौ।”

13अर यों लोगु न पतरस अर यूहन्‍ना तैं बड़ी हिम्मत से बुलण देखि, अर जब यों तैं पता चलि की यू अनपढ़ अर साधारण मनखि छिन, त यू लोग ताजुब मा पोड़ि गैनी। तब वु लोग यों तैं पछ्याण गैनी कि यू उई छिन जु कि यीशु का दगड़ा मा रौन्दा छा। 14अर ऊंन वे अपंग मनखि तैं जु खूब ह्‍वे छौ, ऊंका दगड़ा मा खड़ु होयुं देखि, त वु लोग यों दुईयों का खिलाप मा कुछ नि बोलि सकिनी। 15इलै ऊंन पतरस अर यूहन्‍ना तैं अपणी न्याय समिति मा बटि भैर जाण को हुकम देई, अर फिर ऊ आपस मा बात-चित करण लगि गैनी। 16अर ऊंन आपस मा बोलि कि, “हम यों दुईयों का दगड़ा मा क्या जि कैरा? किलैकि यों का द्‍वारा सच्‍चि मा अदभुत चमत्कार दिखये गै, अर ईं बात का बारा मा यरूशलेम नगर का सब निवासी लोगु तैं पता चलि गै अर हम ईं बात तैं नकारी नि सकद्‍यां। 17अर कखि इन नि हो की खूब होण की या बात लोगु का बीच मा और भि जादा फैली जौ, इलै आ इन करद्‍यां कि हम ऊंतैं हड़कौन्द्‍यां, ताकि फिर ऊ कभि यीशु नौ की चर्चा कै का दगड़ा मा नि कैरा।”

18तब ऊंन पतरस अर यूहन्‍ना तैं बुलै अर ऊंतैं हड़कै के बोलि, “कन्दूड़ खोली के सुणा, यीशु नौ की चर्चा फिर नि कर्यां अर ना ही कुछ सिखयां।” 19अर ऊंन ऊंतैं जबाब दिनी, “चला, अब तुम ही बता, कि परमेस्वर की नजर मा क्या ठिक च। क्या परमेस्वर का छौन्द, हम वेकी बात तैं माणा या तुमरि? 20देखा अब इन त ह्‍वे नि सकदु, कि हमुन जु देखि अर सुणी च वेका बारा मा हम कुछ नि बोला।” 21तब ऊं लोगु न ऊंतैं फिर से धमकै के छोड़ि दिनी, किलैकि वु लोगु से डऽरदा छा अर यों लोगु तैं दण्ड देणु खुणि कुई दुसरो बाना नि मिली। अर यू सब त इलै ह्‍वे किलैकि अपंग मनखि का दगड़ा मा जु कुछ भि ह्‍वे छौ, वेतैं लेके सब लोग परमेस्वर की बडै कना छा। 22अर लोग परमेस्वर की बडै इलै करणा छा, किलैकि यू मनखि जु पतरस अर यूहन्‍ना का द्‍वारा चमत्कार कैरिके खूब ह्‍वे छौ, उ चालीस साल से मथि छौ अर पैदा होण का बगत बटि ही लंगड़ा छौ। 23तब यू दुई उख बटि छुटी के बिस्वासी लोगु का पास ऐ गैनी।

बिस्वासी लोगु की प्रार्थना

अर जब पतरस अर यूहन्‍ना अपणा बिस्वासी लोगु का पास पौंछिनी, त यों न ऊंतैं वु सब बात बतैनि, जु कुछ मुख्य पुरोहितों अर अध्यक्षों न ऊंकू बोलि छै। 24अर जब ऊंन सुणी, त एक मन ह्‍वेके ऊँची आवाज मा परमेस्वर बटि प्रार्थना कैरिके बोलि, “हे हमरा प्रभु, तुमुन ही आसमान, या धरती अर समुन्दर बणै। अर जु कुछ भि यों मा च उ सब कुछ भि तुमुन ही बणै। 25अर प्रभु, तुमुन ही पवित्र आत्मा से अपणा सेवक हमरा पितर दाऊद का द्‍वारा इन बुलवै छौ कि,

# भजन 2:1-2 “‘जु यहूदी जाति का नि छिन ऊंन किलै वेका खिलाप मा घपरोळ मचै?

अर बेकार की बात बणै के वेका खिलाप मा किलै योजना बणै?

26प्रभु अर वेका द्‍वारा चुण्यां मसीह का खिलाप मा धरती का राजा खड़ा होला,

अर अधिकारी लोग इकट्‍ठा ह्‍वेके वेका खिलाप मा बुलला।’

27“अर सच्‍चि मा इन्‍नि ह्‍वे कि राजा हेरोदेस अन्तिपास अर गवर्नर पुन्तियुस पिलातुस न भि इस्राएली लोगु अर ऊं लोगु का दगड़ा मा मिली के जु यहूदी जाति का नि छां, तुमरा पवित्र सेवक यीशु मसीह का खिलाप ये नगर मा इकट्‍ठा ह्‍वेनि, जैतैं तुमुन चुण्यूं छौ। 28अर इन त इलै ह्‍वे, किलैकि तुमुन यू सब पैलि बटि ही अपणी इच्छा अर सामर्थ से ठैर्युं छौ, ताकि इन्‍नि हो। 29अर प्रभु हम तुम बटि बिन्ती करद्‍यां कि, तुम ही ऊंकी यों धमकियों तैं सुणा, अर अपणा सेवकों की मदद कैरा, ताकि यू हिम्मतळ तुमरो वचन तैं सुणै सैका। 30अर अपणा हाथ बढै के ऊंतैं ताकत द्‍या, ताकि ऊ तुमरा पवित्र सेवक यीशु मसीह का नौ से लोगु तैं खूब कैरी सैका, अर बड़ा-बड़ा चमत्कारिक कामों तैं अदभुत तरीके से कैरी सैका।”

31अर जब ऊंन इन प्रार्थना कैरी दिनी, त जख ऊ सब लोग इकट्‍ठा होयुं छा वा जगा हिली गै, अर वु सब पवित्र आत्मा से भरपूर ह्‍वे गैनी। अर येका बाद वु सब लोग फिर से परमेस्वर का वचन तैं बड़ी हिम्मतळ सुनौण लगि गैनी।

बिस्वासी लोगु को जीवन

32अर बिस्वास करण वळा सब लोग एक दिल अर एक मन ह्‍वेके रौन्दा छा। इख तक कि ऊंमा बटि कुई भि अपणी जैजाद तैं अपणु नि बुल्दु छौ, अर वु अपणी सब चीजों को आर-सार एक-दुसरा का दगड़ा मा करदा छा। 33अर खास चेला प्रभु यीशु का मुरदो मा बटि ज्यून्द होण की गवै का बारा मा बड़ी सामर्थळ बतौन्दा छा। अर ऊं सभ्यों पर परमेस्वर की बड़ी किरपा छै। 34अर ऊं लोगु मा कैतैं भि कैं बात की कमी नि छै, किलैकि जौं लोगु का पास जमीन या घौर होन्दा छा वु वेतैं बेचि के मिली रकम, खास चेलों का हाथों मा दे देन्दा छा। 35अर खास चेला वीं रकम तैं जरुरतमन्द लोगु तैं ऊंकी जरुरत का मुताबिक ऊंमा बांटि देन्दा छा।

36अर साइप्रस टापू को एक बिस्वासी मनखि जैको नौ यूसुफ छौ, यू लेवी गोत्र को छौ, अर खास चेलों न वेको नौ बरनबास रखी (जैको मतलब च दिलासा देण वळु)। 37अर वेका पास एक पुंगड़ु छौ, जैतैं वेन बेचि अर ज्वा रकम वेतैं मिली वा वेन खास चेलों का हाथों मा दे दिनी।

Currently Selected:

खास चेलों 4: GBM

Highlight

Copy