खास चेलों 24

गवर्नर का समणि पौलुस पर इळजाम लगौण

1अर यों सब बातों का ठिक पांच दिन बाद महा पुरोहित हनन्याह कुछ अध्यक्षों तैं अर तिरतुल्‍लुस नौ का एक वकील तैं अफ दगड़ि लेके कैसरिया नगर मा ऐ। अर वु गवर्नर फेलिक्स का समणि पौलुस पर इळजाम लगौण लगि गैनी। 2तब पौलुस तैं बुलये गै तब वकील तिरतुल्‍लुस न वेका खिलाप मा गवर्नर का समणि इळजाम लगै के बोलि, “साब, तुमरि वजै से हम बड़ी शान्ति से रौणा छां, अर तुमरा अच्छा सासन की वजै से हमरा लोगु मा भौत सा सुधार होणा छिन। 3इलै हम तुमरो धन्यवाद करद्‍यां, अर यों सब बातों तैं हरेक जगा स्वीकार करद्‍यां। 4इलै श्रीमान फेलिक्स, मि तुमरो जादा बगत नि लेण चान्दु, मि तुम बटि बिन्ती करदु कि किरपा कैरिके हमरि दुई-चार बात सुण ल्या।

5“साब, असल मा बात इन च कि ये मनखि को हम खुणि मुण्डरु कैरिके रख्युं च, अर हमुन येतैं पूरि दुनियां का यहूदी लोगु तैं भड़कौन्द अर घपरोळ करद पै। अर नासरत गौं का सिखौण वळा का पिछनै जु लोग चलदिन यू वे नया धरमी दल को एक मुखिया च। 6अर येन मन्दिर तैं अशुद्ध करण चै, मगर हमुन येतैं पकड़ी दिनी। (अर हम येको न्याय अपणा नियम-कानूनों का मुताबिक करण चन्द्‍यां 7मगर सेनापति लूसियास न येतैं हमरा हाथ बटि जबरन अपणा अधिकार मा ले लिनी, अर इळजाम लगौण वळो तैं आज्ञा दिनी कि तुमरा समणि हाजिरा हो) 8अर तुम अफि वे बटि ऊं सब बातों का बारा मा पूछताछ कैरी ल्या, जौं बातों को इळजाम हम वे पर लगौणा छां, तब तुमतै सच्‍चै को पता चलि जालु।” 9तब उख अयां यहूदियों न भि वेकी तरफदारी कैरिके बोलि, “हाँ-हाँ, साब यू ठिक बोन्‍नु च अर या बात च।”

पौलुस द्‍वारा गवर्नर फेलिक्स तैं जबाब देण

10तब गवर्नर फेलिक्स न पौलुस तैं बोन्‍नु खुणि इसारा कैरी, अर वेन जबाब देई, “साब, मि जणदु छौ कि तुम कई सालों बटि इखा लोगु को न्याय कना छाँ, इलै मि खुशी से तुमरा समणि अपणा बचौ खुणि बुल्दु।

11“साब, मि परमेस्वर की भक्‍ति करणु खुणि यरूशलेम नगर मा अयूं अर अभि मितैं बारह दिन ही ह्‍वे छा, अर ईं बात को पता तुम अफि लगै सकद्‍यां। 12अर नऽ त यों न मितैं मन्दिर मा, ना प्रार्थना भवन मा, नऽ त नगर मा कैतैं भड़कौन्द देखि, अर ना ही यों न मितैं इख कै का दगड़ा मा वाद-विवाद करद देखि, 13अर यू लोग ऊं बातों तैं सच्‍च भि साबित नि कैरी सकदिन, जौं बातों को इळजाम यू मि पर तुमरा समणि लगौणा छिन। 14मगर मि तुमरा समणि ईं बात तैं स्वीकार करदु, कि जु बात नियम-कानूनों अर रैबर्यों की किताबों मा लिखीं छिन, मि ऊं सब बातों पर बिस्वास करदु। अर जै बाटा पर मि चलणु छौं, वेका मुताबिक ही मि अपणा पितरों का परमेस्वर की भक्‍ति कनु छौं। अर साब, ये बाटा कू ही यू लोग गळत बोन्‍ना छिन। 15अर मि भि परमेस्वर पर अपणी आस रखदु, जन कि यू लोग खुद भि रखदिन, कि धरमी अर अधरमी लोग मुरदो मा बटि ज्यून्दा होला। 16इलै मेरी पूरि कोसिस रौन्दी कि मि परमेस्वर, अर मनखियों खुणि अच्छा सोच-विचार रखूं। 17अर भौत सालों का बाद मि अपणा गरीब लोगु मा दान-दकछिणा देणु खुणि, अर परमेस्वर खुणि बलिदान चड़ौणु कू इख ऐ छौं।

18“अर जब मि यू काम कनु छौ, त आसिया मुलक का कुछ यहूदी लोग मितैं मन्दिर मा मिलिनी, अर वे बगत तक त मिन अफ तैं शुद्ध कैरियाली छौ। अर उख मेरा दगड़ा मा कुई भीड़ नि छै, अर ना ही उख कई दंगा ह्‍वे, 19अर अगर ऊ मेरा खिलाप मा कुछ बोन्‍न चाणा छा, त इख ऐके तुमरा समणि मि पर इळजाम लगौन्दा। 20य त यू लोग खुद ही बता, कि जब मि यहूदी न्याय समिति का लोगु का समणि खड़ु किये गै छौ, त वे बगत ऊं लोगु न मि मा क्या दोष पै? 21हाँ, मि मणदु छौं कि मिन ऊं लोगु का बीच मा खड़ु ह्‍वेके ऊँची आवाज मा बोलि छौ, #खास चे 23:6‘मि मुरदो मा बटि ज्यून्द होण को बिस्वास करदु, बस ईं बात का खातिर ही मि पर मुकदमा चलणु च। अर अगर ईं बात का अलावा मि पर अगर कुई दुसरो इळजाम लग्यूं च त यू मितैं बता।’” 22मगर गवर्नर फेलिक्स प्रभु यीशु का बाटा का बारा मा अच्छी तरौं से जणदु छौ, इलै वेन ईं बात तैं टाळि दिनी, अर इन बोलि कि, “जब पलटण को सेनापति लूसियास आलु, तब ही तुमरा मुकदमा को फैसला सुणये जालु।”

23तब वेन सुबेदार तैं आदेस दिनी कि, ये मनखि तैं पैरेदारी मा रखै जौ, मगर कुछ बातों की वेतैं छुट दियै जौ। अर सुणा, येका दगड़्यों मा बटि कैतैं भि येकी सेवा करण से नि रुक्यां।

गवर्नर फेलिक्स अर वेकी घरवळी का समणि पौलुस

24अर कुछ दिन का बाद गवर्नर फेलिक्स अपणी घरवळी द्रुसिल्‍ला तैं अफ दगड़ा मा लेके ऐ, अर या यहूदी जनानि छै। तब वेन पौलुस तैं बुलवै, अर यीशु मसीह पर बिस्वास करण का बारा मा वे बटि सुनण चै। 25अर जब पौलुस धरमी जीवन जीण का बारा मा, अर खुद तैं अपणा वश मा रखण का बारा मा, अर औण वळा न्याय का बारा मा बतौणु छौ, त फेलिक्स डौऽरी गै अर वेन बोलि, “अभि तू इख बटि चलि जा, अगर मौका मिललु त मि तुमतै बुलाणु खुणि रैबार भेजि द्‍यूलु।” 26अर गवर्नर फेलिक्स पौलुस तैं अपणा पास बार-बार बुलान्दु छौ अर वेसे बात-चित करदु छौ, किलैकि वेतैं पौलुस से कुछ रुपया पौण की उम्मीद छै।

27अर इन करद-करद दुई साल ह्‍वे गैनी। अर येका बाद गवर्नर फेलिक्स की जगा पर पुरकियुस फेस्तुस नौ को मनखि गवर्नर का पद पर ऐ, मगर फेलिक्स यहूदियों तैं खुश करण चान्दु छौ, इलै वेन पौलुस तैं जेलखाना मा ही छोड़ि दिनी।

Currently Selected:

खास चेलों 24: GBM

Highlight

Copy