Luk 13

Manata akele fasia ta'aalaa mada sa a'i 'oki mae

1Aia tei imole ki na kera too la'u bo'o kula 'eri, 'ana si manga 'eri keka fa'arongoa tha Jisas, tha Paelat 'e thaungia tei to'a fasi Galili kada keki falea 'ada si afufua kera 'i laa Bi'u Abu tha God. 2Ma tha Jisas ka ba'e 'una 'eri, “Mulu sosa 'amalu'a to'a na 'i Galili kera abula ta'aa ka talua la'u tei imole ki 'i Galili, na keka thaungida 'una 'eri? 3'E a'i la'u! Sui mada sa 'e a'i musi manata akele fasi ta'aalaa kamalu'a ki, muki mae la'u bo'o. 4Mada na taafulu ma kwalu imole baa ki na bi'u ba'ita ba 'i Silom 'e 'asia faafida, mulu sosa 'amalu'a kera ta'aa ka talua imole ki na kera too 'i Jerusalem? 5'E a'i! Sui mada sa 'e a'i musi akele fasia na ta'aalaa kamalu'a ki muki mae la'u bo'o.”

Tarifula sulia na waawa'o na a'i si fungu

6Sui tha Jisas ka fa'arongo kera 'ana si tarifula ne'e: “Te'e wane 'e fasia 'ana te'e thakwari#13:6 Thakwari Fig 'i laa o'ole'e 'ai nia, ma nia ka lae ka lio ura ta fa fo'e doo 'ana 'ai 'eri, ma ka a'i si rikia ta fo'e doo. 7Aia ma nia ka fa'arongoa wane na 'e lio sulia o'ole'e 'ai 'eri, ‘Nau ku lae mai ura liolaa ura ta fa fo'e doo 'ana thakwari ne'e fana ulu fa ngali na'a neri, ma 'e a'i kwasi rikia bo'o ta fa fo'e doo. Kasia 'amu'a! Ura taa na kai fa'athaeferaa bana tha'egano 'eri?’ 8Sui wanenira 'eri ka sore'a, ‘wane'inoto 'ae, alua ka toto'o si 'ana sulia ta te'e fa ngali si la'u, nau kwai 'ilianona kwa fa'ata'ea si la'u. 9Mada sa ka fungu fa ngali lo, ka le'a, mada sa 'e a'i, kuki kasia.’”

Tha Jisas 'e fa'a'akwaa te'e kini 'ana sabat

10'Ana te'e fa sabat Jisas 'e to'odoo 'ana laa na te'e bi'u abu ni to'odoo, 11ma te'e kini na ano'edo ta'a 'e thaungia sulia taafulu fa ngali ma kwalu fa ngali 'e too la'u bo'o. Nia 'e lolosi ma ka dora 'ania thagasulilaa. 12Si manga tha Jisas 'e rikia, ka 'ailia mai ma ka sore'a 'i sana, “'O 'akwaa na'a fasia na mata'ia na thaungi 'oe.” 13Sui ka alua 'abana faafi nia, ma si manga 'eri 'uu bo'o kini ba ka thagasuli bona'a ma ka tangoa tha God. 14Ma si manga na wane'inoto 'ana bi'u abu ni to'odoo ba 'e rikia Jisas 'e fa'a'akwaa 'ana sabat, nia ka rake'iri 'asia na'a ma ka sore'a sana figua 'eri, “Ono fa thato 'e too fana raalaa. Moki lae mai 'ana fa bongi 'eki ura fa'a'akwaalaa, a'i la'u 'ana sabat.”

15Ma tha Lord ka lu'u nia 'una 'eri, “Mulu lole'e too 'ana kokotolaa! Kamalu'a 'ana sabat, musi lukea bo'o buluka mada dongki kamalu'a fasia bi'u ni toolaa nia, ura talailana uria ku'ulaa? 16Kini ne'e na kwalafana tha Abraham na tha Saetana 'e kani faafi nia sula taafulu fa ngali ma kwalu fa ngali. 'E a'i si tala'ana na nia kai luke, doo'anitaa ka sabat mena?” 17Kada tha Jisas 'e sore'a si doo 'eri, to'a ki na kera lalakwata'i nia se'eda ka noni 'asia na'a, sui ma imole ki sui keka se'ethaathala 'asia na'a 'ana si doo ki na 'e ilia.

Na tarifula sulia mige'e doo fa'ekwa bia na iisi

(Matiu 13:31-33; Mak 4:30-32)

18Sui tha Jisas ka soeto'ona, “Taa na 'inotoa tha God 'e 'uria? Taa na kwai to'olangania 'ania? 19Nia 'e 'uria te'e mige'e doo na 'e fa'ekwa 'asia na'a na kera 'alangia 'ana mastad, nga te'e wane 'e ngalia ma ka fasia 'i laa na o'ola nia. Ka ta'e 'ana te'e 'ai na 'e ba'ita, ma tha'aro ki sui keka raa 'ana nu'i kera 'ana thaara.”

20Ma nia ka soe la'u 'una 'eri, “Taa na kwai to'olangania na 'inotoa tha God 'ania? 21Nia 'e 'uria na iisi na te'e kini 'e ngalia ma ka alua 'i laa fulaoa 'e ba'ita, na ka longasia te'efau 'i laa fulaoa ba.”

Maa na 'e sisikofi uria 'inotoa tha God

(Matiu 7:13-14,21-23)

22Tha Jisas ka tatha uri Jerusalem 'i laa na ma'etoaa ba'ita ki ma ma'etoaa fa'ekwa ki, ma 'e to'odoo ka tatha 'i ma'alutada. 23Te'e imole ka soeto'ona, “Wane'inoto, 'una 'eri ma ange'e imole bo'o na tootoo keki maruki?” 24Ma nia ka fa'arongo kera, “Muka susu'u uria kotholaa 'ana 'olofolo na 'e sisikofi, uria imole 'oro keki iili ura kotholaa ma ka a'i. 25Manga wane 'ana luma 'e tata'e ma ka fonoa 'olofolo, kamalu'a muki takwe 'i maa ma muka kiikidi ma muka ba'e 'una 'eri, ‘wane'inoto, 'o 'ifinia mai maa 'i famili'a.’ Sui nia ka lu'uda 'una 'eri, ‘'E a'i kwasi thaito'omalu'a mada fei na mulu lae mai fasia.’ 26Sui muka sore'a, ‘mili fanga ma mika ku'u bii 'oe, ma 'oko to'odoo 'i laa toaa kamali'a ki.’ 27Ma nia 'e lu'uda ka ba'e 'una 'eri, ‘Nau kwasi thaito'omalu'a mada fei na mulu lae mai fasia. Lae kau fasi nau to'a na mulu ilia doo ta'a ki!’

28“Ma angilaa ma didilifolaa kai fuli si manga muki rikia tha Abraham, Aesak ma Jakob ma profet baa ki sui na'a 'i laa 'inotoa tha God, sui ma kamalu'a keki 'uu 'ani kamalu'a 'i maa. 29Imole 'oro keki lae mai fasia 'i laa fanua nai iano, fasia ta'elana ma suulana thato, noto'i ma muutana, ma keki 'ono 'ana faafangaa 'i laa 'inotoa tha God. 30Muki rikia, to'a na kera lae 'aru buri mai tootoo keki tatha 'i na'o, ma to'a na kera taatatha 'i na'o keki 'aru buri.”

Jisas 'e liodila ura Jerusalem

(Matiu 23:37-39)

31Si manga 'eri la'u bo'o tei Farasi ki, kera lae mai sana tha Jisas ma keka sore'a 'i sana, “lae fasi kula ne'e, 'oko lae 'amu'a ta kula 'ee'eta sulia tha Herod 'e thathami thaungi 'oe.”

32Ma nia ka lu'uda 'una 'eri, “Lae muka fa'arongoa kui kwasi 'eri, tara'ena mai 'usungedi kwai taria ano'edo ta'aa ma kwai fa'a'akwaa imole ki, ma 'ana ulu fa thato kwai fa'asuia raa nau ki. 33Ka 'una 'eri mena, nau kwai susu'u bona'a 'i tara'ena, mai 'usungedi, mai fafone. Sulia 'e a'i ta profet si mae 'i thara fasia Jerusalem!”

34Jisas ka ba'e la'u 'una 'eri, “Jerusalem, Jerusalem, 'oe ma'etoaa na 'o thaungia 'aina profet ki ma 'oko 'uu fauna to'a na God faleda kau 'i femu. Si manga 'oro na ku thathamia kwai ofua wela 'oe ki mala na kukua 'e ofua kaela ki faara kukubarana, sui 'osi ala bo'o faafia. 35Rikia fasi na bi'u 'oe 'e gwa'u. Ku sore'a 'i samu, 'oe sa 'oko riki nau la'u 'e a'i laalae ka fula 'ana si manga na 'oki sore'a, ‘Le'a ka tatha fana wane 'eri na 'e lae mai 'ana thatana tha Lord.’ ”

Currently Selected:

Luk 13: MLU

Highlight

Copy