Иоанн 7
7
7 бетӀер
ГӀисаги гьесул вацалги
1Гьелдаса хадув ГӀиса Галилеялъул росабалъе ва шагьаразде хьвадана. Ягьудиялде ине гьесие бокьичӀо, – гьев чӀвазе хӀаракат бахъулеб букӀиндалха ягьудияз. 2ЖугьутӀазул Хъощал раялъул байрам тӀаде щолеб букӀана. 3Жиндирго вацаз ГӀисада абуна:
– Гьаниса вахъун Ягьудиялде а дуца гьарулел ишал дурго муридаздаги рихьизе. 4Гьунар бугев чияс гьеб бахчуларо, гӀадамазда бихьизабула. Гьединал хӀикматал ишал гьаризе бугеб дурго гьунар гӀаламалдаго бихьизабе.
5(Жиндирго вацалгицин божулел рукӀинчӀо ГӀисада.)
6ГӀисаца гьезда абуна:
– Дир заман жеги тӀаде щун гьечӀо, амма нужее бокьараб заман данде ккола. 7ГӀаламалда нуж рихине рес гьечӀо, амма дун гӀаламалда рихун вуго. Дица нугӀлъи гьабулеб бугелъул гӀаламалъулго квешал ишазе. 8Байрамалде а нужго. Амма гьеб байрамалде дун вачӀинаро, дир заман жеги тӀаде щун гьечӀо.
9Гьедин гьездаги абун, ГӀиса Галилеялдаго чӀана.
ГӀиса Иерусалималде байрамалде вачӀуна
10Амма вацал байрамалде индал, гӀадамазда вихьиларедухъ, балъгого ГӀисаги вахъана гьезда хадув къватӀиве. 11Ягьудияз ГӀиса валагьулев вукӀана гьеб байрамалда.
– Дов чи кивдай вугев? – ан гьикъулеб букӀана гьез. 12ГӀадамазул руккалилъги гӀемер бицунеб букӀана гьесул хӀакъалъулъ. ЛъикӀав чи вугилан цояз абулеб букӀана, гӀадамал махсароде кколев чи вугилан цогидаз абулеб букӀана. 13Амма балъго-гӀатӀго гурони ГӀисал цӀар бахъизе ягьудиязул чӀухӀби-хӀакимзабазукьа хӀинкъулел рукӀана гьел.
14Байрамалъул чанго къо индал, ГӀиса Мукъадасаб Рокъове лъугьун вачӀана ва вагӀза-насихӀат гьабизе байбихьана. 15Лъиданиги аскӀове ун гӀелму лъазабичӀев чиясда ТӀухьдузда бугеб кисандай лъанаян хӀикмалъун рукӀана ягьудиял. 16ГӀисаца гьезда абуна:
– Гьаб гӀелму дир гуро, дун витӀарав Аллагьасул буго. 17Аллагьасул амру тӀубазабизе бокьарав чиясда лъала гьаб гӀелму дицаго ургъун бахъарабищ яги Аллагьасдасан бачӀарабищали. 18Жинцаго ургъун бахъарабгун цеве вахъунев чиясул мурад букӀуна жиндиего цӀар-рецц гьаби. Жив витӀарасе цӀар-рецц гьабизе бокьарав чи ритӀухъав вукӀуна, гьереси гьесул букӀунаро. 19Мусаца гурищ нужее къанун тараб? Амма нужер цонигияс цӀунулеб гьечӀо къанун. Щай нужеца дун чӀвазе къасд гьабулеб бугеб?
20ГӀадамаз ахӀулеб букӀана:
– Мун жундуз ккун вуго. Мун чӀвазе къасд гьабулев чи щив вугев? – ан.
21ГӀисаца абуна гьебмехалъ:
– Дица цохӀо мугӀжизат бихьизабуна, нуж киналго абуни жеги-жеги гьелда гӀажаиблъун руго. 22Мусал къануналъ малъулеб буго сунат гьабеян. (Гьебги Мусадасан бачӀараб гӀадат гуро, гьесде щвезегӀанго умумузул букӀараб буго.) Шамат къоялъги гьабулагуриха нужеца сунат. 23Мусал къануналъ изну кьола нужее шамат къоялъцин сунат гьабизе. Шамат къоялъ чи дица тӀуванго сахлъизавунилан щай нуж диде ццидалъ ругел? 24ТӀасан балагьун кьоге къимат, хӀакъикъатги цӀехон кье.
МасихӀ кколевищ ГӀиса?
25Гьебмехалъ Иерусалималдаса цо-цо гӀадамаз абуна:
– ЧӀухӀби-хӀакимзабаз чӀвазе валагьулев вугев чицин гурищ гьадав? 26Балагье, халкъалда цеве вахъун кӀалъалев вуго, лъицаниги щибниги абулебги гьечӀо гьесда. ЧӀухӀби-хӀакимзабазда лъалеб батила хӀакъикъаталдаги дов МасихӀ вукӀин. 27Амма нилъеда лъалагури дов кисаяли. ХӀакъикъияв МасихӀ вачӀараб мехалъ, лъиданиги лъалеб рагӀуларо гьев кисаяли.
28Мукъадасаб Рокъоб вагӀза-насихӀат гьабулаго, ГӀисаца халкъалде ахӀана:
– Нужеда дун лъала. Дун кисаялиги лъала. Амма дунго лъикӀав лъугьун вачӀарав чи гуро дун, хӀакъав Аллагьас витӀана дун. Нужеда Гьев лъаларо. 29Амма дида лъала Гьев: Гьесда аскӀоса вачӀана дун. Гьес витӀана дун.
30Гьебмехалъ ГӀиса кквезейилан лъугьана гьел, амма лъиданиги кӀвечӀо гьесда квер хъвазе. Гьелъие болжал щун букӀинчӀо. 31Халкъалъул руккалилъ рукӀаразул гӀемерисел божана ГӀисада. Гьез абулеб букӀана:
– МасихӀ вачӀараб мехалъ, гьесгицин рихьизарилищ нилъеда гьадигӀан гӀемерал мугӀжизатал?
32ГӀисал хӀакъалъулъ гьедин абулеб рагӀана фарисеязда. Гьебмехалъ чӀахӀиял кашишзабазги фарисеязги Мукъадасаб Рукъалъул хъаравулзаби ритӀана ккун вачун гьевгун рачӀайилан.
33ГӀисаца абуна:
– ГӀемераб заман хутӀун гьечӀо дие нужеда цадахъ вукӀине, кватӀичӀого ина дунго витӀарасда аскӀове. 34КигӀан валагьаниги, ватиларо гьебмехалъ нужеда дун. Нужеда рачӀине кӀолеб бакӀ гуро доб дун унеб бакӀ.
35Гьеб рагӀидал, ягьудияз цоцазда гьикъулеб букӀана:
– Киве инедай гьасие бокьун бугеб? Нилъеда гьев ватулареб бакӀгӀаги щибдай? Греказул шагьаразда ругел дол нилъеразда аскӀове инецин гуродай гьасда ракӀалда бугеб, добаги жиндирго дин малъизе? 36«КигӀан валагьаниги, ватиларо гьебмехалъ нужеда дун. Нужеда рачӀине кӀолеб бакӀ гуро доб дун унеб бакӀ» – ан гьес абиялъул магӀна щибдай?
«ЧӀаголъиялъул лъадал лъарал чвахила»
37Байрамалъул ахирисеб бищунго хирияб къоялъ ГӀисаца, халкъалде хитӀаб гьабун, ахӀана:
– Къечарав чияс дида аскӀовеги вачӀун, къеч буссинабе. 38ТӀехьалда хъван бугебги ритӀухълъун, диде иман лъурасул рекӀелъан чӀаголъиялъул лъадал лъарал чвахила.
39Жинде иман лъуразде рещтӀине бугеб Илагьияб РухӀалъул бицунеб букӀана ГӀисаца. Амма Илагьияб РухӀ жеги рещтӀун букӀунаро, ГӀиса жеги жиндирго кӀодолъиялде щун вукӀинчӀелъул.
ГӀисада тӀасан дагӀба-рагӀи ккана гӀадамазул
40Гьел рагӀаби рагӀидал, цо-цо гӀадамал гаргадизе лъугьана хӀакълъун гьав чи авараг вугилан. 41Цогидаз абулеб букӀана гьав МасихӀ вугилан. Галилеялда МасихӀ вахъуневищилан абулел чагӀиги рукӀана. 42ТӀехьалда бугин абулеб букӀана гьез, Давудил наслуялда вахъинин МасихӀ ва Давудил росулъ – Бетлегьемалда – гьавилин гьев. 43Гьедин ГӀисал бицун дагӀба-рагӀи ккана гьел гӀадамазда гьоркьоб. 44ГӀиса ккун вачун жанив тӀамизе бокьаралги рукӀана гьенир. Амма гьесда квер хъвазе кӀвечӀо лъиданиги.
ЧӀахӀиял хӀакимзабазул халкъалда ццин бахъуна
45ЧӀахӀиял кашишзабазухъеги фарисеязухъеги Мукъадасаб Рукъалъул хъаравулзаби тӀадруссун рачӀараб мехалъ, ГӀиса щай вачинчӀевилан гьикъана гьезда. 46Хъаравулзабаз жаваб кьуна:
– Додин кӀалъалев чи жеги киданиги рагӀичӀо нижеда, – ян.
47– Унго нужгийищха гьес гуккарал? – ан абуна фарисеяз. – 48ЧӀухӀби-хӀакимзабазулги фарисеязулги цониги чи досда божун рихьанищ? 49Досда божула къануналъул хӀакъалъулъ жидеда щибниги лъаларел жагьилал гӀадамал, нагӀана батагийин гьезие!
50Гьезда гьоркьов вукӀана добмехалъ ГӀисахъе ун вукӀарав Никодемги. Гьес абуна:
51– Нилъер къануналда рекъон чиясда гӀайиб чӀвазе бегьулебищ, ахӀун аскӀовегун цин гьес бицунелъухъ гӀенеккичӀого ва гьесул ишалъул цӀех-рехги гьабичӀого?
52– Мунги Галилеялдаса ватила, – ян абуна гьесда гьез. – Цониги авараг Галилеялъул ракьалда вахъинилан хъван гьечӀолъи дудаго бихьизе ТӀухьдул цӀале.
[53Цинги гьел рикьа-риххун рокъо-рокъоре ана.
Currently Selected:
Иоанн 7: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
