Иоанн 6
6
6 бетӀер
ГӀисаца щуазарго чи гӀорцӀизавула
1Цо заманаялдасан ГӀиса Галилеялъул (Тибериадаялъул) ралъдал добцояб рахъалде ана. 2ГӀемераб халкъ бачӀана гьесда хадуб гьенибеги, унтарал сахлъизарун гьесдасан загьирлъарал мугӀжизатал рихьулел рукӀиндал. 3ГӀиса цо магӀарде вахана ва жиндирго муридазда цадахъ гьенив чӀана. 4ЖугьутӀазул Пасхаялъул байрам тӀаде щолеб букӀана.
5Сверухъ валагьидал, гӀемераб халкъ жинда аскӀобе бачӀунеб бихьун, ГӀисаца Филиппида гьикъана гьавгощинав чи кваназавизе чед кисадай нилъеца босилебан. 6(Филиппил хӀалбихьизе гьикъана ГӀисаца гьедин. Гьесда лъалеб букӀана щиб гьабилебали.) 7Филиппица абуна кӀинусго динаралде босараб чедгицин гӀеларин гьал гӀадамал кваназаризе, кигӀан гьитӀинаб мочӀу кьуниги. 8Симон Пётрил вац Андрейица абуна ГӀисада 9гьаниб цо васасухъ бугин пурчӀинадул ханждал щуго чедги кӀиго гьитӀинабго ччугӀаги, амма гьаб халкъалъе гьеб кисайин гӀелебилан.
10ГӀисаца абуна гьел киналго гӀодор чӀезарейилан. ЦӀакъ хер керчаб бакӀ букӀана гьеб. Гьенир харда тӀад гӀодор чӀана щуазаргогӀанасев бихьинчи. 11ГӀисаца чед цебе босана, тӀаде дугӀаги гьабун, бек-бекун бикьана кваназе гӀодор чӀарал гӀадамазе. БокьарабгӀан чедги ччугӀаги щвечӀев чи хутӀичӀо гьенив цониги. 12Киналго гӀорцӀараб мехалъ, ГӀисаца муридазда абуна, гӀадада хвезе течӀого, кванан хутӀарал чадил кескал ракӀарейилан. 13ПурчӀинадул ханждал щуго чадил нахъе хутӀун ратана анцӀила кӀиго гьегь цӀурал кескал. 14ГӀисадасан загьирлъараб гьеб мугӀжизат бихьидал, гӀадамаз абуна:
– ХӀакълъунго гьав чи вуго дуниялалде вачӀине кколев вукӀарав авараг.
15Ккун вачун, гьез жидерго парччахӀлъун гьавизехъин вукӀин лъайдал, ГӀиса нахъеги магӀарде ана, щивниги цадахъги вачинчӀого.
ГӀиса лъеда тӀасан вилълъун вачӀуна
16Бакъанимехалъ муридал ралъдал рагӀалде ана. 17Росодаги рекӀун, гьел ралъдал добцояб рахъалда бугеб Капернаумалдехун ралагьун ана, дуниял рукӀкӀунеб мехалъги ГӀиса вачӀинчӀелъул. 18Ралъдада кутакаб гьури пуйзе байбихьана. 19Гьедин рагӀалдаса щуго-анлъго километралъ жанирегӀан щвараб мехалъ, лъеда тӀасан вилълъун вачӀун росода аскӀове щолев вихьана гьезда ГӀиса. ГӀасиго хӀинкъана гьел.
20– ХӀинкъуге, дун вуго, – ян абуна ГӀисаца гьезда.
21Гьевги росониве лъугьинавизе бокьун букӀана гьезие, амма гьебсагӀатго раса ралъдал рагӀалде щун батана.
ГӀадамал ГӀиса валагьизе рачӀуна
22Ралъдал добаб рагӀалда хутӀун рукӀарал гӀадамаз нахъисеб къоялъ бицана, нолъ гьаниб цо гурони расаги букӀинчӀин, жиндирго муридазда цадахъ ГӀиса росода рекӀуневги вихьичӀин, гьесул муридал жалго анин. 23Тибериадаялдаса, русбузда рекӀун, гӀемерал гӀадамал рачӀана, тӀаде дугӀаги гьабун, ГӀисаца чед гӀемерлъизабураб бакӀалде. 24Амма гьенир я ГӀиса, яги гьесул муридал ратичӀеб мехалъ, русбуздаги рекӀун, Капернаумалде ана гьел, ГӀиса валагьизе.
«Дун вуго гьеб чӀаголъи кьолеб чед»
25Ралъдал добцояб рагӀалда гьев ватараб мехалъ:
– Я, Рабби, мун кин гьаниве вачӀарав? – ан гьикъана гьез.
26ГӀисаца гьезда абуна:
– ХӀакълъун абулеб буго дица нужеда: дир мугӀжизатал ричӀчӀидал гуро нуж гьанире рачӀун ругел, доб чед кванан, гӀорцӀидал рачӀун руго. 27ТӀагӀунеб-холеб квен тӀалаб гьабичӀого, нужеца тӀалаб гьабе абадияб гӀумруялде нуж рачине бокьун ГӀадамил Лъимаца нужее кьолеб бугеб тӀагӀунареб-холареб квен. Жиндирго Инсул – Аллагьасул баркаталъул мугьру буго ГӀадамил Лъимада.
28Аллагь разилъизе жидеца щиб гьабизе кколебилан гьикъана гьез ГӀисада. 29ГӀисаца жаваб кьуна:
– Аллагь разилъизе нуж божизе ккола гьес нужехъе витӀарав чиясда.
30– Ниж дуда божулеб кинаб гӀаламат дуца нижеда бихьизабилеб? Щиб дуда гьабизе кӀолеб? – ан гьикъана гьез ГӀисада. 31– ГӀицӀаб авлахъалде ккедал, нилъер умумуз кваналаан зобалаздасан рещтӀараб нигӀмат. «Зобалаздасан рещтӀинабун чед кьуна гьес гьезие», – абун хъван буго гьелъул хӀакъалъулъ.
32ГӀисаца абуна:
– ХӀакълъун абулеб буго дица нужеда: Мусаца гуро нужее зобалаздасан чед кьураб, амма дир Инсуца нужее кьолеб буго унго-унгояб зобалазулаб чед. 33Аллагьасдасан бачӀараб чед ккола зобалаздасан рещтӀараб ва гӀаламалъе чӀаголъи кьолеб чед.
34Гьез абуна:
– Я, БетӀерчӀахъад, кидаго кье гьединаб чед.
35ГӀисаца абуна:
– Дун вуго гьеб чӀаголъи кьолеб чед. Дихъе вачӀарав киданиги вакъизе гьечӀо, дида божарав киданиги къечезе гьечӀо. 36Амма дица нужеда абичӀищ, гӀаламат бихьаниги, нуж дида божун гьечӀилан. 37Инсуца дихъе кьуравщинав чи дихъе вачӀина, дихъе вачӀарав цониги чи дица нахъе гъеларо. 38Диего бокьараб гьабизе гурелъул дун зобалаздасан вачӀун вугев, дун витӀарав Аллагьасул амру тӀубазабизелъидал. 39Гьесул амру буго духъе кьуразул цонигияв вилизе-тӀагӀине виччагейилан. Къиямасеб къоялъ дица гьев чӀаголъизавизе ккола. 40Дир Инсуе бокьун буго Вас вихьаравщинав ва гьесда божаравщинав чиясе абадияб гӀумру насиблъизе. Къиямасеб къоялъ дица гьев чӀаголъизавизе вуго.
41Ягьудиял ГӀисаде ццин бахъун гаргадизе лъугьана жив зобалаздасан бачӀараб чед кколин абунин гьесилан. 42Гьез цоцазда абулеб букӀана:
– Юсупил вас ГӀиса гурищ гьав чи? Нилъеда лъикӀго лъалагури гьасул эменги эбелги. Гьале жив зобалаздасан вачӀанилан вуго.
43– Щай нуж ццин бахъун гаргадулел? – ан абуна ГӀисаца гьезда. 44– Цониги чи дида аскӀове вачӀине рес гьечӀо, дун витӀарав дир Инсуца гьев дихъе щвезавичӀони. Дица гьев къиямасеб къоялъ чӀаголъизавизе ккола. 45Аварагзабазул ТӀухьдузда буго: «Гьезда киназдаго Аллагьас малъила», – ян. Дир Инсуца малъараб босаравщинав чи дида аскӀове вачӀуна. 46Дица абулеб гьечӀо Эмен лъиданиги вихьанилан. Аллагьасдасан вачӀарасда гурони, цо лъиданиги вихьичӀо Эмен. 47ХӀакълъун абулеб буго дица нужеда: иман лъурасе абадияб гӀумру буго.
48Дун вуго чӀаголъи кьолеб чед. 49Нужер умумуз доб гӀицӀаб авлахъалда квана зобалаздасан рещтӀараб нигӀмат, амма гьел хвана. 50Гьанже зобалаздасан рещтӀун буго гьеб кварав чи киданиги холареб чед. 51Дун вуго зобалаздасан рещтӀараб ва чӀаголъи кьолеб чед. Гьеб чед кварав чи абадул абадиялъ чӀаго вукӀина. Дица гьесие кьезе бугеб чед – гьеб буго гьаб гӀалам чӀаго букӀине гӀоло кьезе бугеб дир Черх.
52Гьебмехалъ ягьудиязда гьоркьоб кӀудияб дагӀба ккана жиндирго черх кинин гьас нилъее кваназе кьолебилан. 53ГӀисаца гьезда абуна:
– ХӀакълъун абулеб буго дица нужеда: ГӀадамил Лъимадул Черхги квинчӀони, гьесул Биги гьекъечӀони, нужер гӀумру букӀине гьечӀо. 54Дир Черхги кварав, дир Биги гьекъарав чиясе абадияб гӀумру буго. Къиямасеб къоялъ дица гьев чӀаголъизавила. 55Дир Черх буго хӀакъаб квен, дир Би буго хӀакъаб жа. 56Дир Черх кванарав ва дир Би гьекъарав чи дилъ вукӀине вуго, дунги гьесулъ вукӀине вуго. 57Щайгурелъул ЧӀагояв Эмен – Аллагьас витӀарав дун гьесдалъун чӀаго вугев гӀадин, дир Черх кванарав чи дидалъун чӀаго вукӀина. 58Гьеле гьединаб буго зобалаздасан рещтӀараб чед. Нужер умумуз кванана чед ва гьел хвана. Амма гьаб чед кванарав чиясе абадияб гӀумру буго.
59Гьеб хабар ГӀисаца бицана Капернаумалъул синагогаялъуб.
«Дуцалъидал рицунел ругел хӀакъал рагӀаби»
60Гьеб рагӀидал, ГӀисал гӀемерисел муридаз цоцазда абуна:
– Гьединаб жо букӀине рес гьечӀо! Лъица гьеб къабул гьабилеб? – ан.
61Жиндир хабаралъ муридал гьедин гаргадизе тӀамун рукӀин лъайдал, ГӀисаца гьезда абуна:
– Гьадаб дир хабаралъ къварид гьарун ругоха нуж. 62Цеве живго вукӀараб бакӀалде ГӀадамил Лъимер тӀадвуссун унев вихьараб мехалъ щибдай нужеца абилеб? 63РухӀалъ кьола чӀаголъи. Амма инсанасул мунагьаб напсалъ чӀаголъи кьоларо. Дир рагӀабазулъан бачӀуна нужехъе рухӀги чӀаголъиги. 64Амма нужеда гъорлъ руго гьелда божуларелги. (ГӀисада цебеккунго лъалаан щив жинда божулев гьечӀевали, щив жиндие хилиплъилевали.) 65ГӀисаца абуна:
– Гьединлъидал гурищ цебеги дица нужеда абураб, лъиданиги кӀоларин дихъе вачӀине, дир Инсуца гьелъие рес рекъезабичӀони.
66Гьелдаса хадур гӀемерисел муридал нахъе ана ва тӀокӀал гьесда хадур инчӀо. 67Гьебмехалъ анцӀила кӀиявго муридасда гьикъана ГӀисаца нужееги нахъе ине бокьун гьечӀебищилан. 68Симон Пётрица абуна:
– Я, БетӀерчӀахъад, лъихъе ниж инел? Дуцалъидал рицунел ругел абадияб гӀумру насиблъулел рагӀаби. 69Ниж божана ва нижеда бичӀчӀана мун Аллагьасул мукъадасав илчи вукӀин.
70ГӀисаца абуна:
– Дицалъидал нужер анцӀила кӀиявго чи тӀаса вищарав. Амма нужеда гьоркьов цо илбисги вугевха!
71Гьес гьедин абулеб букӀана Симонил вас Ягьуда Искариотил хӀакъалъулъ. АнцӀила кӀигоясда гьоркьов вукӀаниги, гьев хилиплъизе хъван букӀана.
Currently Selected:
Иоанн 6: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
