Байбихьи 3
3
Инсан мунагьалъукье ккей
1БЕТӀЕРГЬАН Аллагьас рижарал киналго гӀалхул рухӀчӀаголъабазда гьоркьоб бищунго сихӀираб букӀана борохь. Гьелъ чӀужугӀаданалда гьикъана:
«Гьаб ахикьа цониги гъотӀодаса пихъ кваназе биччалеб гьечӀин нужее Аллагьасилан абураб жо битӀараб бугищ?» – абун.
2«Ахикь ругел гъутӀбуздаса пихъ кваназе нижее изну буго, – ян жаваб кьуна чӀужугӀаданалъ. – 3Амма ах бакьулъ бугеб гъотӀол рахъалъ Аллагьас абуна, гьелда тӀаса пихъ кванагейилан, гьелда кверцин хъвагейилан, гурони, ниж холилан».
4«Холарелха! – ян абуна борхьица. – 5Аллагьасда лъала гьеб гъотӀол пихъ квараб мехалда нужер берал рагьулеблъи ва, Аллагьасда гӀадин, лъикӀлъиги квешлъиги лъалел гӀадамаллъун нуж лъугьунеблъи».
6Гьебмехалъ чӀужугӀаданалда бихьана гьеб гъотӀол пихъ кваназе лъикӀабги, бихьизе берцинабги, гӀакъиллъи-цӀодорлъи кьолеб букӀиналъ жинде гъира ккезабулебги букӀин. Гьебмехалъ гьелъ гьеб гъотӀодаса пихъ тӀуна, кванана ва аскӀов вукӀарав росасеги кьуна – гьесги кванана. 7ГьебсагӀаталдаго гьезул берал рагьун рачӀана ва жалго гӀицӀго рукӀин бихьана. Гьебмехалъ инжиралъул гъотӀол тӀанхазул хьухьун, жидерго гӀаврат бахчизе жо гьабуна гьез.
8БакъанигӀужалъул гьогьомараб гьури бахъиндал, гьезда рагӀана БЕТӀЕРГЬАН Аллагь ахикьан вачӀунев, ва гъутӀбузда нахъа рахчана гьел кӀиялго.
9«Мун кив вугев?» – ин ахӀана БЕТӀЕРГЬАН Аллагьас инсанасде.
10«Дида рагӀана Мун ахикьан вачӀунев, – абун жаваб кьуна гьес. – Дудаса хӀинкъун, вахчун вуго дун, щайгурелъул дун гӀицӀго вугелъул».
11«Лъица дуда абураб мун гӀицӀго вугилан? Дица дуда кванагеян абун букӀараб гъотӀодаса пихъищ кванараб?» – ин цӀехана Гьес.
12Инсанас Гьесие жаваб гьабуна:
«Дуца дие кьурай чӀужугӀадан йиго дунгун – гьелъ кьуна дие доб гъотӀодаса пихъ, дицаги кванана», – ян.
13«Дуца гьабураб щиб?» – ан гьикъана БЕТӀЕРГЬАН Аллагьас чӀужугӀаданалда.
Гьелъ жаваб кьуна:
«Борхьица гуккана дун, гьедин квана дица гьеб».
14Цинги БЕТӀЕРГЬАН Аллагьас борхьида абуна:
«Дуца гьедин гьабуралъухъ, нагӀана буго дуе. Киналго жанавараздаги хӀайваназдаги гъорлъ нагӀанабатадлъун букӀина мун: тӀолабго гӀумруялъ мун чехьалда хъурщила, дур квенлъунги хӀур букӀина. 15Мунги чӀужугӀаданги цоцазе тушбабилъун гьарила Дица, тушманлъи букӀина дур тӀанчӀаздаги гьелъул наслуялдаги гьоркьоб. Гьелъул васас дур бетӀер чӀинтӀила, дуца гьесул хӀатӀиагъада хӀанчӀила».
16ЧӀужугӀаданалда Гьес абуна:
«Лъимадул хӀара чӀвараб мехалъ, гӀазаб цӀикӀкӀинабила Дица дуе – гӀазаб-гӀакъубаялда гьарила дуца лъимал. Бугониги, рос вокьила дуе, амма росас дуда тӀад кверщел гьабила».
17Адамида БЕТӀЕРГЬАН Аллагьас гьадин абуна:
«Дурго лъадухъги гӀенеккун, кванагеян Дица дуда лъазабун букӀараб гьеб пихъ кванана дуца! Гьанже мун сабаблъун гьаб ракьалъеги нагӀана буго: гӀазаб-гӀакъуба бихьун хӀалтӀила мун тӀолабго гӀумруялъ, ракьалдаса нигӀмат щвеялъе гӀоло. 18Зазги чӀахӀги бижила ракьалъ дуе ва хуриса бачӀараб жо букӀина дуе квание. 19ГӀетӀ бецӀцӀун гурони щвеларо дуе квине жо, ракьалдасан вижарав мун ракьулъе тӀад вуссинегӀан, – мун ракь вугелъул, нахъеги ракьуде сверизе вуго».
20Адамица#3:20 Адам – ЖугьутӀ мацӀалда «адам» абураб рагӀи бачӀана «адама» (ракь, яги хӀатӀ) абураб рагӀудасан, «гӀадан» ялъуни «инсан» абураб магӀнаялда. «Инсан» абураб магӀнаялда хӀалтӀизабула гьеб рагӀи гьаб тӀехьалъул тӀоцебесеб кӀиго бетӀералда. Дунялалда цогидал гӀадамал рижун хадуб «Адам» абураб рагӀи тӀоцевесев бихьинчиясул цӀар хӀисабалда хӀалтӀизабизе лъугьана. жиндирго лъадуда цӀар ХӀава#3:20 ХӀава – жугьутӀ мацӀалда гьаб цӀар релълъуна «гӀумру» абураб рагӀуда. лъуна, щайгурелъул инсанияталъулго эбеллъун лъугьиндал гьей.
21БЕТӀЕРГЬАН Аллагьас къохьол партал гьабуна Адамиеги гьесул лъадуеги ва гьеб гьезда ретӀана. 22Цинги БЕТӀЕРГЬАН Аллагьас абуна:
«Гьале гьанже инсан лъугьун вуго Нилъер цояв гӀадинав: лъикӀлъиги квешлъиги лъана гьесда! Гьанже доб ГӀумруялъул гъотӀодеги квер бегьизе гурин гьес, гьелъул пихъги кванан, хвел гьечӀевлъун лъугьине!»
23Цинги БЕТӀЕРГЬАН Аллагьас инсан Эдемалъул ахикьа къватӀиве гъуна ва жиндасан гьев вижараб ракь хӀалтӀизабизе витӀана. 24Аллагьас, инсанги къватӀиве гъун, Эдемалъул ахил бакъбаккул рахъалда, кинабго рахъалде хьвагӀулеб цӀадул хвалченгун, херувимал#3:24 Херувим – куркьбал ругел къуватал малаикзаби ва малаикзабазда гьоркьорги бищун тӀадегӀаназул цо тайпа, Зобалазул ва Мукъадасабщиналъул хъаравулзаби (3 Пач. 6:23-28). тана хъаравулзабилъун – ГӀумруялъул гъотӀохъе унеб нух цӀунизе.
Currently Selected:
Байбихьи 3: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
