Байбихьи 13

Ибрамги ЛутӀги цоцаздаса ратӀалъи

1Мисриялдаса тӀадги вуссун, нахъеги Негевалде гочана Ибрам, жиндирго лъадигун ва кинабго боцӀи-бечелъигун цадахъ. Гьесда цадахъ вукӀана ЛутӀги. 2Ибрам цӀакъ бечелъана: гӀемераб боцӀиги гӀарац-меседги букӀана гьесул. 3Негевалдасаги ун, гьев гочана Бет-Элалде, Бет-Элалдаги Гайалдаги гьоркьоб жинцаго цебе чӀел гьабун букӀараб ва 4тӀоцеве гьениве щвараб мехалъго къурбан-бакӀ бан букӀараб бакӀалде. Гьениб БЕТӀЕРГЬАНАСЕ гӀибадат гьабуна Ибрамица.

5Ибрамида цадахъ гочарулев вугев ЛутӀилги букӀана гӀи-боцӀиги жиндирго чадралги. 6Гьанже кӀиязего гьеб ракь гӀолеб букӀинчӀо: боцӀи-бечелъи гӀемерлъун, цадахъ чӀезе бакӀ къварилъана гьезие. 7Ва Ибрамилги ЛутӀилги гӀухьбузул дагӀба-рагӀи кколеб букӀана. (Доб заманалда гьеб ракьалда гӀумру гьабулеб букӀана ханааниязги перизиязги.) 8Гьебмехалъ Ибрамица ЛутӀида абуна:

«Нилъ гӀагарал чагӀи ругелъул, я нилъеда гьоркьоб, яги дурги дирги гӀухьбузда гьоркьоб кьал букӀине бегьуларо! 9Гьале кинабго ракь дуда цебе буго – рачӀа нилъ ратӀалъизе. Мун квегӀиса ани, дун квараниса ина. Мун квараниса ани, дун квегӀиса ина».

10ЛутӀ сверухъе валагьана ва гьесда бихьана Иорданалъул Расалъи. БетӀергьанасул ах гӀадаб бакӀ букӀана гьеб, ЦогӀар шагьаралде гӀунтӀун лъалъазе лъимги гьарзаяб, Мисриялъул гӀадаб беэнаб ракьги бугеб. (БетӀергьанас Содомги Гоморраги тӀагӀинабилалде цебе заман букӀана гьеб.) 11Цинги ЛутӀица Иорданалъул Расалъи тӀаса бищана ва бакъбаккудехун валагьун ана. Гьедин рикьана гьезул нухал: 12Ибрам Ханааналда чӀана, ЛутӀ Расалъиялъул шагьаразда чӀана. ЛутӀица жиндирго чадрал чӀвана Содомалде щвезегӀан. 13Содомалъул алкъин абуни, цӀакъ квешлъун букӀана, БЕТӀЕРГЬАНАСЕ рихарабщинаб гьабулеб букӀана гьез.

14ЛутӀ нахъе араб мехалъ, БЕТӀЕРГЬАНАС Ибрамида абуна:

«Дуца киса-кибего сверухълъиялде бер щвезабе! Мун валагье шималалъулги къилбаялъулги рахъалде, валагье бакъбаккулги бакътӀерхьулги рахъалде. 15Гьеб тӀолабго дуда бихьулебщинаб ракь Дица абадиялъего дуеги дур наслабазеги кьолеб буго. 16Ракьул хӀургӀанги гӀемерлъизарила дица дур наслаби: хӀурул къатӀраби рикӀкӀине бажарулеб батани, дур наслуялъул гӀадамалги рикӀкӀине бажарила.

17Гьанже гьеб ракьалъухъ валагьизе а, гьелъул гӀеблъухъеги халалъухъеги щва, дуе кьолеб бугелъул Дица гьеб».

18Ибрам гьенисан ана Хевроналда гӀагарлъухъе, Мамрел миккил гъутӀби ругеб бакӀалде щвезегӀан, ва гьенив чӀана. Ибрамица гьенибги БЕТӀЕРГЬАНАСЕ къурбан-бакӀ бана.

Currently Selected:

Байбихьи 13: АварАК

Highlight

Copy