Къанун 32

1«Зобал, нуж гӀенекке дир хитӀабалъухъ;

Ракьалъги гӀинтӀаме дир кӀалзул рагӀухъ.

2Дир вагӀза-насихӀат цӀадлъун чвахизе биччай,

щублъун чвахизе те дир рагӀабиги:

гӀурдаде тӀолеб тӀупан кинигин,

хур лъалъалеб рахӀмат кинигин!

3Дица БЕТӀЕРГЬАНАСУЛ цӀар ахӀила!

Нилъер Аллагьасул тӀадегӀанлъи! Гьесие рецц гьабе!

4Гьев вуго щулияб кьуру! Гьесул ишал камилал,

Гьесул нухал киналго ритӀарал!

Аллагь даим ритӀухъав, Жив мекъи кколарев!

Гьев кидаго вацӀцӀадав ва витӀарав!

5Амма яхӀ-намус рехарал Гьесул лъимал

Гьесда цере пасатго хьвадана!

Жидедаго тӀаде рогьоги цӀан,

бокьа-бокьараб гурони гьабулареб гӀадада хвараб агьлу!

6Гьебищ БЕТӀЕРГЬАНАСЕ нужер баркала?

ГӀантаб, гӀакълу гьечӀеб халкъ!

Гьев гуревищ нужер Эмен, нужее гӀумру кьурав Халикъ –

нужги дунялалда рижарав, нужер гӀумруялъе кьучӀги лъурав?

7Цебе араб ракӀалде щвезабе;

рукӀарал гӀелазул хӀисаб гьабе.

Дурго инсуда цӀехе, гьес бицина дуда,

кӀудиял чагӀазда гьикъе, гьез абила дуда.

8ТӀадегӀанас халкъазе ирсалъе ракьал кьолеб мехалъ,

Гьес тӀолабго инсаният бикь-бикьараб мехалъ,

Гьес халкъазул ракьазе гӀорхъи чӀвана,

ГӀизраилил васазул#32:8 Ялъуни «Аллагьасул васазул». рикӀкӀенги хӀисабалде босун.

9БЕТӀЕРГЬАНАСУЛ бутӀалъун ккола Гьесул халкъ,

Якъуб – Гьесул ирс.

10Авлахъалда батана Гьесда гьеб халкъ,

жанаварал рурудулеб гӀалхулаб авлахъалда.

Гьес гьезул тӀалаб гьабуна, гьел хьихьана ва

Жиндирго ясбер гӀадин цӀунана.

11ЦӀумалъ жиндирго бусен гьабулеб гӀадин

ва жиндирго тӀанчӀазда тӀад гьеб боржанхъулеб гӀадин,

куркьбалги гӀебеде ритӀун, жиндирго тӀанчӀи

куркьбаздаги лъун раччулел гӀадин,

12БЕТӀЕРГЬАНАС Жинцаго цебе бачана гьеб халкъ;

батӀияв аллагь гьелгун вукӀинчӀо.

13Гьедин Гьес дунялалъул борхалъиялде рахинаруна гьел,

ва, гӀалах-авлахъалъул нигӀматги кьун, кваназаруна.

Гьес кьурабазулъа гьоцӀо кьуна гьезие кваназе,

парсазухъа зайтуналъул нах кьуна,

14гӀи-боцӀул рехъалъа нахги рахьги кьуна,

кьариял кьагӀиги буртӀалги,

Башаналъул бищун лъикӀал куйдулги,

тӀаса бищараб ролъги кьуна.

Ва дуе гьекъезе цӀолбол жа букӀана – гъабуялъул би.

15Амма кьаралъана Ешурун#32:15 Ешурун – КъанагӀат гурони жиб хӀалтӀизабулареб ГӀизраилалъул батӀияб цӀар. Бал. гьединго 33:5, 26. ва малъараб гьабуларо;

гьесда тӀатӀи чӀвана, гьев гьарт-гьартана ва гьесул ракӀ хъачӀлъана.

Аллагь нахъ чӀвана – жиндирго Халикъ,

хвасарлъиялъул Кьуру рехун тана!

16БатӀиял аллагьзаби сабаблъун гьез Аллагьасул квешго ццин бахъинабуна,

жидерго хъубал ишаздалъун Гьев тӀуван гьалаглъизавуна!

17Гьез къурбанал шайтӀабазе гьаруна, Аллагьасе гуро –

цере лъалел рукӀинчӀел аллагьзабазе,

цӀиял раккарал аллагьзабазе;

гьел нужер умумузда рагӀунцин рукӀинчӀо.

18Нуж гьарураб Кьуру нужеца рехун тана,

Нужго рижарав Аллагь кӀочон тана!

19Гьеб бихьидал БЕТӀЕРГЬАНАСГИ гьел нахъчӀвана.

Жидерго васаздеги ясаздеги бахъараб гьалагаб цциналъ,

20Гьес абуна: „Дица гьездаса Дирго гьумер бахчила,

цинги гьезие ккезе бугелъухъ валагьила.

Гьел руго пасикълъиялъул агьлу,

ритӀухълъи лъаларел лъимал!

21Гьересиаллагьзабаздалъун Дир ццин гьалаглъизабуна гьез,

квераз гьарурал ясикӀо-аллагьзабаздалъун дир ракӀ кьогӀлъизабуна!

Дицаги гьезулъ жахӀда бижизабила жидеда

халкъин абизецин бегьуларел гӀадамаздалъун;

Гьагаб халкъалдалъун ццидахинарила гьел.

22Щайгурелъул Дир ццидал цӀа бакун бугелъул –

барзахалъул тӀиналде гӀунтӀунги кинабго бухӀула гьелъ;

гьелъ бухӀула ракьги, ракьалда бижарабщинабги,

кьурабазул кьучӀалги!

23Дица гьезда тӀаде балагьал ракӀарила,

гьезда Дирго чӀорал речӀчӀила:

24Гьел ракъуца хӀалакълъила,

квешал хвалил унтабаз чӀвала!

Дица гьезда тӀаде гӀалхул жанаваразул гажалги,

ракьалдасан шурулел жалазул загьруги биччала.

25КъотӀнор ругел хвалчаца чӀвала,

рокъор чӀарал хӀинкъуца холел рукӀина!

Хвезе руго гӀолохъабиги, бахӀаруччабиги,

каранда хахулел лъималги, бетӀер хъахӀлъарал харабиги.

26Дица гьел рикь-рикьун тӀагӀинарилаан,

халкъазда гьоркьоб гьезул лъалкӀцин нахъа течӀого,

27амма гьебмехалъ тушбабазул гӀамал кӀодолъила,

гьезда гьеб мекъи бичӀчӀила,

ва гьез абила: ‘Нилъер къуват бергьана!

БЕТӀЕРГЬАНАСУЛ иш гуро гьеб’, – ин.

28ГӀизраилил халкъ – гӀакълу билараб халкъ,

гьезда щибго бичӀчӀулеб гьечӀо!

29Гьез гӀакълу хӀалтӀизабулебани,

гьезда кинабго бичӀчӀилаан,

жидерго букӀунеб ахирги лъалаан“.

30Кин кӀолеб цо чиясда азаргояв лъутизавизе?!

КӀигоясда кин кӀолеб анцӀазарго чи лъутизавизе?!

Гьедин лъугьуна гьезул аллагьас гьел рехун тараб мехалъ,

Живго БЕТӀЕРГЬАНАС гьел тушбабазул кверде кьураб мехалъ!

31Дозул аллагь нилъер Аллагь гӀадав гьечӀелъул!

Нилъер тушбабазда жидедагоги лъала гьеб.

32Гьезул гъабу – Содомалъул гъабуялдаса лъугьараб,

гьезул цӀибил – Гоморраялъул ахазукьа лъугьараб.

Гьезул пихъ загьруяб,

цӀолбол хьоп кьогӀаб.

33Гьезул чагъир – борхьил загьру,

кобраялъул хвалил загьру.

34„Дица бахчун гуребищ гьеб бугеб?

Дир нахъарокъоб, мугьруги чӀван, тун гуребищ гьеб бугеб?

35РецӀел босулев – Дун вуго. Къисас Дица босила,

гьезул хӀетӀе хъущтӀараб къо бачӀиндал.

Гьезде чӀегӀераб къо бачӀунеб буго,

гьезие къачӀараб къадар гӀедегӀун щолеб буго“.

36БЕТӀЕРГЬАНАС диван гьабила Жиндирго халкъалъе,

ва Жиндирго лагъзадерида гурхӀила,

гьезул пакъирлъиги бихьун,

я асирал, я эркенал нахъе чагӀиго хутӀун гьечӀолъиги бихьун.

37Ва Гьес абила: „Киреха арал гьезул аллагьзаби?

Киб бугеб гьез мугъчӀвалеб букӀараб кьуру?

38Нужерго къурбаназул тӀатӀи гьезие кьуна нужеца,

гьезие чагъирги тӀуна.

Биччанте гьанже гьез кумек гьабизе нужее!

Биччанте гьез цӀунизе нуж!

39ГьанжегӀаги бичӀчӀа нужеда, цохӀо Дун вукӀин Аллагь,

Дун гурев батӀияв Аллагь гьечӀевлъи!

ГӀажалги хъвала Дица, гӀумруги кьола Дица.

Дица ругъун лъола – Дицаго сахги гьарула.

Дидаса хвасар гьаризе лъидаго кӀоларо!

40Эхеде кверги борхун гьедулев вуго Дун:

Дирго абадияб цӀаралхӀа,

41Дирго хвалченалъул пири бегӀер гьабурабго ва

жаза гьабизе гьеб кодобе босарабго,

Дица рецӀел босила тушбабаздаса,

Дун рихаразе жаза гьабила!

42Дица бидуца мехтизарила Дирго чӀорал,

Дир хвалчацаги гӀорцӀизегӀан гьан кванала.

ЧӀваразулги асиразулги би!

Тушбабазул церехъабазул бутӀрул!“

43Дунялалъул халкъал, нуж Гьесул халкъалдаса роха!

Жиндирго лагъзадерил бидухъ БЕТӀЕРГЬАНАС къисас босизе буго!

Гьес тушбабазе жаза гьабила,

Жиндирго халкъалъул ракьги бацӀцӀад гьабила».

44Гьедин, халкъалда цевеги вахъун, Мусаца киназдаго рагӀун гьеб туркиялъул рагӀаби цӀалана; гьесда цадахъ Нунил вас Гьошеаги#32:44 Гьошеа – Егьошуал цебе букӀараб цӀар. Мусаца гьесда цӀар хисун Егьошуа лъуна. вукӀана. 45ТӀолалго гӀизраилазе кинабго вагӀза-насихӀатги хитӀабги гьабун лъугӀарабго, 46Мусаца абуна:

«Жакъа дица нужеда малъарабщинаб жо рекӀелъ цӀуне. Нужерго лъималаздаги малъе гьаб Къануналда хъварал амраби мухӀканго тӀуразаризе. 47Гьел чӀорогоял рагӀаби гуро – гьел рагӀабазулъ буго нужер гӀумруялъул магӀна. Иордан гӀоралъул доб цояб рахъалда нужеца кверде босизехъин бугеб ракьалда гьездалъун букӀине буго нужее халатаб гӀумруги».

48Гьебго къоялъ БЕТӀЕРГЬАНАС Мусада абуна:

49«Аварим мугӀрузде а, Ерихоналда дандбитӀун МогӀавалъул ракьалда бугеб Нево магӀарде ваха ва Дица гӀизраилазе кьолеб бугеб Ханааналъул ракьалъухъ валагье. 50Гьеб магӀарде тӀаде вахине вуго мун ва гьенив хвезе вуго, цинги дурго умумулгун цолъизе вуго; Гьор магӀарда дур вац Гьарунги гьединго хвана ва жиндирго умумузухъе ана. 51Гьедин ккана, Цин абураб салул авлахъалда рукӀаго, Кадешалда бугеб Мерива абураб иццухъ гӀизраилазда цебе Дир адаб гьечӀеб жоги гьабун, нужеца ГӀизраилил халкъалда Дир тӀадегӀанаб хиралъи бихьизабичӀолъи сабаблъун. 52Гьединлъидал, Дица гӀизраилазе кьолеб бугеб ракь бихьила дуда рикӀкӀадасан, амма гьениве мун лъугьинаро».

Currently Selected:

Къанун 32: АварАК

Highlight

Copy