Къанун 31
31
Егьошуа – Мусал варис
1Ахиралдаги Мусаца тӀолалго гӀизраилазде гьадинаб хитӀаб гьабуна.
2Мусаца абуна: «Дица нусиялда къого сон бана ва тӀокӀалъ бажаруларо дихъа нужеда цадахъ хьвадун. БЕТӀЕРГЬАНАСГИ абуна дун Иордан бахун довехун ине гьечӀилан. 3Живго БЕТӀЕРГЬАН Аллагь вукӀине вуго нужеда цадахъ, дора ругел халкъалги Гьес нужеда цереса тӀагӀинаризе руго ва нужеца доб ракьги кверде босизе буго. Егьошуаца цере рачине руго нуж, БЕТӀЕРГЬАНАСУЛ рагӀуда рекъон. 4БЕТӀЕРГЬАНАС гьел халкъазеги гьабила амориязул пачазаби Сихониеги, Огиеги, гьезул ракьазеги гьабураб – гьел халкъалги гьединго гъурила. 5БЕТӀЕРГЬАНАС нужер кверде кьезе руго гьел ва нужеца гьезие дица нужеда тӀадкъарабщинаб гьабизе ккола. 6Нуж щулаго чӀа, къвакӀун рукӀа. Гьезукьа хӀинкъуге, я нахъе къаге, БЕТӀЕРГЬАН Аллагь вугелъул нужгун. Гьес нуж киданиги рехун тезе гьечӀо!»
7Хадуб Мусаца Егьошуа ахӀана ва тӀолалго гӀизраилазда цебе гьесда абуна:
«Мун къвакӀун ва кьварун чӀа, щайгурелъул мун ине ккола БЕТӀЕРГЬАНАС нилъер умумузе рагӀи кьун букӀараб ракьалде гьаб халкъги бачун, ва, гьезул ирс хӀисабалда, дуца гьезда гьоркьоб бикьизе ккола гьеб ракьги. 8Живго БЕТӀЕРГЬАН ине вуго дуда цеве-цеве ва Гьев мунгун вукӀине вуго; Гьес мун кидаго рехун тезе гьечӀо. Мун сункьаниги хӀинкъуге ва ракӀ тӀуркӀизе биччаге».
Къанун цӀали
9Мусаца гьаб Къанун хъвана ва БЕТӀЕРГЬАНАСУЛ КъотӀиялъул гъамас баччулел Левийил къавмалъул кашишзабазухъе ва ГӀизраилалъул кӀудиял чагӀазухъе кьуна. 10Хадуб Мусаца абуна:
«Анкьго соналда жаниб цо нухалъ, тӀасалъугьиналъул соналъ, Хъошазул байрамкъояз, 11ГӀизраилил халкъ БЕТӀЕРГЬАН Аллагьасда цебе чӀезе, Гьес тӀаса бищараб Мукъадасаб бакӀалде бакӀарараб мехалъ, киналго гӀизраилазда рагӀун гьаб Къанун цӀале. 12ТӀолабго халкъ бакӀаре – бихьиналги, руччабиги, лъималги, нужер шагьаразда чӀарал цогидал халкъазул гӀадамалги. Биччанте гьезда рагӀизе ва лъан букӀине: гьел ругьунлъизе ккола БЕТӀЕРГЬАН Аллагьасукьа хӀинкъизе, Гьесие сужда гьабизе ва Гьесул Къанунги мухӀканго тӀубазабизе. 13Биччанте жеги гьаб Къанун лъаларел лъималги гӀенеккизе ва гьездаги лъан букӀине: гьел ругьунлъизе ккола БЕТӀЕРГЬАН Аллагьасукьа хӀинкъизе ва Гьесие сужда гьабизе. Гьедин букӀине ккола кидаго, Иорданалъул доб цояб рахъалда нужеца кверде босизехъин бугеб ракьалда нужеца гӀумру гьабулебщинаб мехалъ».
БЕТӀЕРГЬАНАСУЛ тӀадкъай
14БЕТӀЕРГЬАНАС Мусада абуна:
«Дуе хвезе заман щолеб буго. Егьошуа ахӀе ва ДандчӀваялъул Чадиралда цере чӀа, Дица гьесие амру гьабизе букӀине».
Мусаги Егьошуаги ДандчӀваялъул Чадиралда цере чӀана. 15Гьебмехалъ БЕТӀЕРГЬАН загьирлъана накӀкӀул парчадул хӀубиялъулъ ва Чадиралъул кӀалтӀа чӀана. 16БЕТӀЕРГЬАНАС Мусада абуна:
«Мун кватӀичӀого дурго умумулгун парахалъизе вуго, гьаб халкъин абуни, жиб унеб бугеб ракьалъул гьересиаллагьзабазда хадубги ун, пасалъизе буго. Гьез Дун рехун тезе вуго ва жидергун гьабураб Дир КъотӀиги хвезабизе буго. 17Гьеб къоялъ Дир гьезда гьалагаб ццин бахъила ва Дица гьелги рехун тела. Гьебмехалъ Дица гьездаса Дирго гьумер бахчила, гьелги чияр давлалъун ккела. ГӀемерал вахӀшиял балагьал рачӀина гьезда тӀаде. Гьебмехалъ гьез абила: „Гьалгощинал балагьал нилъеда тӀаде рачӀун руго нилъгун нилъер Аллагь гьечӀолъиялъ!“ – ин. 18Дицайин абуни, гьеб къоялъ ракӀчӀун Дирго гьумер бахчизе буго, батӀиял аллагьзабаздеги руссун, гьез гьабурабщинаб квешлъи сабаблъун.
19Гьанже гьаб турки хъвай ва гӀизраилазда малъе; биччанте гьез гьеб ахӀизе – гьеб букӀине буго гьезда данде чӀараб Дир нугӀлъун. 20Дица гьел рачина рахьги гьоцӀоги чвахулеб ракьалде, гьезие кьелин гьезул умумузе Дун гьедараб ракьалде. Гьениб гӀорцӀизегӀан кваназе квенги щун, кьаралъараб мехалъ, Дунги рехун тун ва Дир КъотӀиги хвезабун, гьел батӀиял аллагьзабазде руссина ва гьезие хъулухъ гьабизе лъугьина. 21Хадуб, гӀемерал балагьалги гӀазаб-гӀакъубаги хӀехьезе ккараб мехалъ, гьаб турки гьезда данде нугӀлъун чӀела (рачӀунел гӀелаздаги кӀочене гьечӀелъул гьаб турки). Дида гьанжего лъала гьезул ракӀазул къасдал, гьезие кьелин Дун гьедараб ракьалде гьел щвелалдего».
22Доб къоялъ Мусаца турки хъвана ва гӀизраилазда малъана. 23Нунил вас Егьошуаде БЕТӀЕРГЬАНАС гьадинаб амру гьабуна:
«Мун къвакӀун ва кьварун чӀа, щайгурелъул дуца рачине кколелъул гӀизраилал гьезие кьелин Дун гьедараб ракьалде. Дунги вукӀине вуго мунгун».
24Байбихьудаса ахиралде щвезегӀан тӀолабго Къанун хъван лъугӀарабго, 25Мусаца БЕТӀЕРГЬАНАСУЛ КъотӀиялъул гъамас баччулел левитазде гьадинаб амру гьабуна:
26«Гьаб Къануналъул тӀехь босе ва КъотӀиялъул гъамасалда аскӀоб лъе. Гьеб гьениб букӀина нужеда данде чӀараб нугӀ хӀисабалда. 27Дида лъалелъул нужеего бокьарабги гьабун чӀолел чагӀи нуж рукӀин. Жакъа, дун жеги нужгун вугеб мехалъцин, гьедигӀан БЕТӀЕРГЬАНАСЕ мутӀигӀлъуларел нужер, дун хун хадуб щибдай букӀина?! 28Нужер къавмазул кӀудиялги церехъабиги дихъе ахӀе, гьезие дица гьал рагӀаби цӀализе ва гьезда данде нугӀзаллъун зобги ракьги ахӀизе. 29Дида лъалелъул дун хун хадуб нуж ракӀчӀун пасалъизе рукӀин ва, дица малъараб нухги тун, къосун ккезе рукӀин. Заманалдасан нужеда тӀаде балагьал рещтӀине руго, БЕТӀЕРГЬАНАСДА цере нужеца гьарурал квешлъаби ва Гьесул ццин бахъинабулел нужер ишал сабаблъун».
Мусал турки
30Мусаца тӀолалго гӀизраилазда рагӀун, байбихьудаса ахиралде щвезегӀан гьаб турки цӀалана.
Currently Selected:
Къанун 31: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
