1 Пачаби 9
9
Шаулилги Шамуилилги дандчӀвай
1Буняминил къавмалдаса Киш абун цӀар бугев цо къадру-къимат цӀикӀкӀарав чи вукӀана. Гьесул эмен Авиил, Авиилил эмен Церор, Церорил эмен Бехорат, Бехоратил эмен буняминияв Афиах вукӀана. 2Кишил вукӀана Шаул абун цӀар бугев берцинав гӀолохъанав вас. ГӀизраилазда гьоркьов вукӀинчӀо гьесдаса берцинав чи – киналго ракьцояздаса бетӀералъ ворхатавги вукӀана гьев.
3Шаулил эмен Кишил цӀухӀамул рилана цо къоялъ, ва гьес Шаулида абуна: «Вахъа, цо рагьтӀателги цадахъ вачун, цӀухӀамул ралагьизе а», – ян.
4Ефраимил мугӀрузул тӀалъи сверана, Шалишил ракь сверана, амма ратичӀо гьел. Цинги Шаалимил ракь сверана, амма гьенирги ратичӀо цӀухӀамул. Хадуб Буняминил ракьги сверана, амма гьенирги ратичӀо гьел. 5Цуфил ракьалде щведал, Шаулица абуна рагьтӀателасда: «РачӀа тӀадруссине, гурони нилъер ургъалица цӀухӀамул кӀочон тела дир инсуда».
6РагьтӀателас абуна: «ГӀенекке, доб шагьаралда вуго цо Аллагьасул авараг. РагӀи билълъарав чиги вуго гьев, ва гьес абухъе ккола кинабго. РачӀа гьесухъе рилълъине. Гьес бицине бегьула нилъеда нилъ ине кколеб нух».
7Шаулица абуна: «Щибги босун нилъ гьесухъе рилълъинел? Кодоб букӀараб чедги лъугӀанин. Гьесие кьезе кодоб сайгъат-саламго гьечӀогури. ЩибгӀаги нилъеда кодоб хутӀараб жо бугищ?»
8РагьтӀателас абуна: «Гьале гӀарцул шекелалъул ункъил бутӀа#9:8 Шекелалъул ункъил бутӀа – гӀага-шагарго 3 гр. буго дихъ. Гьеб кьела дица Аллагьасул аварагасе сайгъаталъе, ва гьес бицина нилъ ине кколеб нух».
9(Аллагьасул амру лъазе унеб мехалъ цебе ГӀизраилалда абулаан: «Рилълъа Аллагьасул амру лъалев чиясухъе», – ян. Гьанже Аллагьасул аварагилан абулеб жо, цебе Аллагьасул амру лъалев чиян букӀана.)
10Цинги Шаулица абуна: «ЛъикӀ буго, дуца абухъе гьабила. Рилълъа».
Гьедин Аллагьасул авараг вугеб шагьаралде рилълъана гьел. 11ГохӀдаса тӀаде рахун гьеб шагьаралде унел рукӀаго, гьезда данде ккана лъадал цӀезе унел ясал. Гьезда цӀехана гьез: «Дова Аллагьасул амру лъалев чи вугищ?» – ин.
12«Вуго, – ян абуна гьез. – БитӀун цере ралагьун а, амма гӀедегӀил гьабе. Гьев жакъа вачӀана шагьаралде, как-диналъул гохӀда БетӀергьанасе къурбан хъолеб бугелъул. 13Шагьаралде щварабго ватила нужеда дов. Хехлъи гьабе, дов борхалъиялде къаде кваназе иналде доре щвезе рукӀине; халкъ дов вачӀинчӀого кваназе гӀодоб чӀоларо, щайгурелъул цин гьес дугӀа гьабизе ккола гьеб къурбаналъул рахъалдасан, цинги гьалбал кваназе гӀодор чӀола. Гьединлъидал нуж а, гьев жеги гьенивго ватула нужеда».
14Гьел шагьаралде жанире рилълъана, ва шагьар бакьулъе щведал, борхалъуде унев Шамуил авараг данде ккана.
15Шаул вачӀиналде цебесеб къоялъ БЕТӀЕРГЬАНАС Шамуилида абун букӀана: 16«Буняминил ракьалдаса цо чи витӀун вачӀине вуго Дица духъе метер. Дуца гьесда зайтуналъул нах бахе; гьес ГӀизраилалда Дир халкъалда тӀад пачалъи гьабизе буго. Гьес пилистимазул зулмуялдаса хвасар гьабизе буго Дир халкъ. Дида рагӀана Дир халкъалъул ахӀи ва гьезул гьари къабул гьабуна Дица».
17Шаулида бер чӀварабго, БЕТӀЕРГЬАНАС Шамуилида абуна: «Гьале дов Дица духъе витӀун вукӀарав чи. Гьес Дир халкъалда тӀад нухмалъи гьабизе буго».
18Шагьаралъул кавабахъ вугев Шамуилида аскӀове вилълъана Шаул ва гьесда цӀехана: «Бице, киб бугеб дов Аллагьасул балъголъи лъалев чиясул рукъ?» – ин.
19Шамуилица жаваб кьуна: «Гьале дун вуго гьев чи, дида цадахъ борхалъуде вилълъине къачӀай. Жакъа нуж дида цадахъ кваназе руго; метер радал нухда тӀовитӀила дица мун, дур ракӀалда бугебщинабги бицун. 20Лъабго къоялъ церехун риларал дур цӀухӀамузулги ургъел гьабуге; гьел ратун руго. Дудасаги дур инсул хъизан-къаялдасаги хириял цоги щал ругел ГӀизраилалда?»
21Шаулица абуна: «ГӀизраилазда гьоркьоб бищун гьитӀинаб къавмалъул – Буняминил къавмалъул – чи гуревищ дун? Дир инсул хъизан-агьлуги бищун гьитӀинаб гьечӀищ Буняминил къавмалда жаниб? Щай дуца дида гьеб хабар бицунеб?»
22Шаулги гьесул рагьтӀателги рокъоре жаниреги рачун, гьалбадерида гьоркьор бищунго хӀурматияб бакӀалда гӀодор чӀезаруна Шамуилица. ЛъебергогӀанасев чи гӀодов чӀун вукӀана гьенив. 23Шамуилица квен гьабулев чиясда абуна: «Доб дица нахъе лъеян абун букӀараб бутӀа кье».
24Гьес тӀубараб ратӀал босун лъуна Шаулида цебе. Шамуилица абуна:
«Гьале дуе нахъе лъун букӀараб. Гьалбадерида цадахъ гӀодов чӀун дуца гьаниб кваназе нахъе цӀунун букӀанин гьеб, кванай».
Гьеб къоялъ Шамуилгун цадахъ квен гӀахьал гьабуна Шаулица.
25Цинги гьел борхалъудаса гӀодоре шагьаралде рилълъана, ва Шамуилица жиндирго рукъалъул тӀохде#9:25 ГӀагардасеб Бакъбаккул рахъалда некӀо рукъзазул чӀепарал тӀохал рукӀунаан ва рагъи хӀисабалда хӀалтӀизарулаан гьел. ахӀана Шаул кӀалъазе, хадуб гьенибго бусенги тӀамуна гьесие.
26Гьел радалго тӀаде рахъана, ва Шамуилица тӀохда вугев Шаулиде ахӀана: «КъачӀай, дица нухда регӀила мун гьанже», – ян.
Шаул тӀаде вахъун нухда ине къачӀана ва Шамуилида цадахъ къватӀиве вилълъана. 27Шагьаралъул рагӀалде щолеб мехалъ Шамуилица Шаулида абуна: «Дурго рагьтӀател цеве витӀе», – ян. Гьев цеве ана. «Мун лъалхъе гьанже, дица дуда бицина БетӀергьанасул амру», – ян абуна гьес.
Currently Selected:
1 Пачаби 9: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
