1 Пачаби 8
8
Халкъалъ жиндиего пача тӀалаб гьави
1Шамуил херлъун вукӀун гьес жиндирго васал тана ГӀизраилалда тӀад къадизабилъун. 2Гьесул тӀоцеве гьавурав васасда цӀар Иоил, кӀиабилесда цӀар Авия букӀана. Гьел Беэр-Шеваялда рукӀана къадизабилъун. 3Гьесул васаз инсул нух кквечӀо. Гьел хӀарамаб бетӀербахъиялда хадур лъугьана, ришваталъухъ хӀукмуги къотӀун, зулму-пасалъи гьабуна.
4Гьединлъидал, ГӀизраилалъул киналго кӀудиял чагӀи данде ракӀарана, ва гьел Рамаялде Шамуилихъе рачӀана. 5Цинги гьез абуна: «Гьале мунги херлъун вуго, дур васалги дур нухда хьвадулел гьечӀо. Цогидал халкъазулго гӀадин, нижее нухмалъи гьабизе вукӀине пача те нижеда тӀад», – ин.
6Жидеда тӀад пача теян гьез абураб рагӀи цӀакъ рекӀее гӀечӀо Шамуилие. Цинги БЕТӀЕРГЬАНАСДЕ дугӀа гьабуна Шамуилица 7ва БЕТӀЕРГЬАНАС гьесда абуна:
«Гьез бицарабщиналъухъ гӀенекке мун, щайгурелъул гьезул рокьукълъи дудехун бугеб гуро бугеб, Дун жидерго пачалъун вукӀиналдаса инкар гьаби ккола гьезул гьеб. 8Дица гьел Мисриялдаса къватӀире рачаралдаса жакъа къоялде щвезегӀан, чияр аллагьзабазе бетӀерги чӀван, Дие бокьуларебщинаб гьабуна гьез. Гьебго гьабулеб буго гьез дуеги. 9Гьединлъидал, гьезухъ гӀенекке, амма пачаяс гьезие гьабизе бугебщиналъул хӀакъалъулъ лъазабе гьезда».
10Цинги, жиндие пача кьеян абун чӀараб халкъалда Шамуилица бицана кинабго БЕТӀЕРГЬАНАСУЛ калима. 11Гьес гьезда абуна:
«Гьале нужер вукӀине вугев пачаясул ихтиярал: гьес рачун нужер васал жиндирго чолгьакал рачунел чагӀилъун цере хӀалтӀизе тӀамила, чотӀахъабилъун ва чолгьаказда цере-хадур рекерулел рагъухъабилъунги тела. 12Гьезул цо-цоял азарилбутӀруллъун тела, цо-цоял кӀикъоялда анцӀго рагъухъанасул бутӀруллъун тела, цогидал жиндирго ракь бекьизе ва тӀорщел бакӀаризе тӀамила, цогидал ярагъ ва чолгьаказул тӀагӀелал гьаризе тӀамила. 13Нужер ясалги рачун ина гьес, гьуинал махӀал гьарулел чагӀилъун, богогьабилъун ва чед бежулел гӀадамаллъун жиндаго цере хӀалтӀизаризе. 14Нужер лъикӀал рищун ракьалги, цӀолбол ахалги, зайтуналъул гъутӀбузул ахалги нахъе росун, жиндирго чукъбузе кьела. 15Нужер хуриса бачӀарабщинаб хӀалухъеналъул ва цӀолбол анцӀабилеб бутӀаги босун, жиндирго церехъабазе ва чукъбузе кьела. 16Нужер лагъзал-гъаравашалги, гӀолохъабиги, хӀамулги гьес жиндиего рачина ва жиндаго цере хӀалтӀизарила. 17Нужер гӀиязул анцӀго бутӀаги ина гьес ва нужгоги гьесул лагъзаллъун ккела. 18Гьебмехалъ гьардела нуж нужецаго тӀаса вищарав пачаясул зулмуялдаса хвасар гьареян, амма БЕТӀЕРГЬАНАС къабул гьабиларо нужер гьари».
19Амма Шамуилица бицарабщиналъухъ гьез гӀин тӀамичӀо. «Нижее нижеда тӀад пача вукӀине бокьун буго! 20Цинги нилъги цоги халкъазда релълъина. Пачаяс нухмалъи гьабила нилъее ва рагъда аскаразе бетӀерлъиги гьабила», – ян чӀана гьел.
21Шамуил халкъалъ абуралъухъ гӀенеккана, ва гьелъул хӀакъалъулъ БЕТӀЕРГЬАНАСДЕ дугӀа гьабуна. 22БЕТӀЕРГЬАНАС Шамуилида абуна: «Гьезул гьариялда рекъон пача те гьезда тӀад», – ин.
Цинги Шамуилица гӀизраилазда абуна: «Гьанже нуже-нужер рокъоре тӀадрусса».
Currently Selected:
1 Пачаби 8: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
