1 Пачаби 16

Шамуилица Давудида зайтуналъул нах бахин

1БЕТӀЕРГЬАН кӀалъана Шамуилида:

«Мун кидаллъизегӀан Шаулида хадув гӀодизе вугев? Дица нахъчӀвана гьев; ГӀизраилалда тӀад пачалъун толаро Дица гьев. Зайтуналъул нахул лълъарги цӀезабун нухде вахъа. Дица Бет-Лехемалдаса Йишайихъе витӀулев вуго мун; гьесул васазда гьоркьоса пача тӀаса вищун вуго Дица Диего».

2Шамуилица абуна: «Кин дун гьениве инев? Шаулида рагӀани, гьес дун чӀвалагури?»

БЕТӀЕРГЬАНАС гьесда гьадин малъана: «Дуца дурго рехъалъа гӀачӀарги цадахъ баче, ва дун БЕТӀЕРГЬАНАСЕ къурбан хъвезе вачӀун вугилан абе. 3Йишайги ахӀе къурбан хъолеб мехалъ, цинги Дица малъила дуда гьабизе кколеб жо, ва дуца зайтуналъул нах тӀаде тӀезе кколев чи вихьизавила».

4БЕТӀЕРГЬАНАСУЛ буюрухъалда рекъон гьабуна Шамуилица кинабго. Бет-Лехемалде гьев щваравго, шагьаралъул церехъаби рачӀана гьесда данде ургъаликье ккун.

«Мун лъикӀалъе вачӀарав чийищ?» – ин цӀехана гьез.

5«У, лъикӀалъе вачӀарав вуго. Дун БЕТӀЕРГЬАНАСЕ къурбан хъвезе вачӀун вуго. Нужго рацӀцӀад гьаре ва, ниятги гьабун, дида хадур къурбан хъолеб бакӀалде рилълъа», – ян жаваб кьуна гьес.

Цинги гьес Йишайги гьесул васалги ратӀа гьаруна, ва, гьел рацӀцӀад гьариялъе дугӀаги гьабун, къурбаналъулъ гӀахьаллъизе ахӀана. 6Гьел гьенире щведал, Элиавида бер чӀвана Шамуилил ва гьесда ккана:

«Гьале ракӀчӀун БЕТӀЕРГЬАНАС тӀаса вищарав пача вуго цеве эхетун!» – ин. 7Амма БЕТӀЕРГЬАНАС Шамуилида абуна:

«Мун гьесул гьурмахъ яги лага-саналъухъ валагьуге, Дица гьев гуро тӀаса вищарав. Инсанасул гӀадаб балагьи гуро Дир букӀунеб. Инсан гьурмахъ валагьула, БЕТӀЕРГЬАНИН абуни рекӀехъ валагьула».

8Цинги Йишайица Авинадав ахӀана ва Шамуилида цеве вачана. Амма Шамуилица абуна: «Гьевги тӀаса вищичӀо БЕТӀЕРГЬАНАС», – ин.

9Цинги Йишайица Шамма вачун вачӀана Шамуилида цеве. Амма Шамуилица абуна: «Гьевги тӀаса вищичӀо БЕТӀЕРГЬАНАС», – ин.

10Цо-цоккун анкьавго вас Шамуилида цеве вачана Йишайица, амма Шамуилица абуна: «БЕТӀЕРГЬАНАС гьезул цонигияв тӀаса вищичӀо», – ян.

11Шамуилица Йишайида цӀехана: «Дур киналго васал ругищ гьанир?» – ин.

«Цо бищун гьитӀинавги вуго дир, амма гьев гӀияда вуго», – ян абуна Йишайица.

Шамуилица абуна: «Гьесда хадув чи витӀе. Гьев вачӀинчӀого нилъ кваназе гӀодор чӀезе гьечӀо», – ян.

12Хадув чиги витӀун, гьев вачун вачӀана. ТӀадвитӀарав, берцинал бералги ругев, гьайбатаб куц-мухъалъул вас вукӀана гьев.

«Вахъа, гьесда зайтуналъул нах бахе – гьев вуго дов», – ин вихьизавуна БЕТӀЕРГЬАНАС.

13Шамуилица гьесул вацазда цебе нахул цӀураб лълъар босун Давудил ботӀроде чӀехьана. Гьебмехалъ БЕТӀЕРГЬАНАСУЛ РухӀ рещтӀана Давудида тӀаде ва гьеб къоялдаса нахъе гьесдаса батӀалъичӀо. Цинги Шамуил Рамаялде тӀадвуссун ана.

Шаулие хъулухъалъе пачаясул кӀалгӀаялде Давуд вачин

14Шаулин абуни, БЕТӀЕРГЬАНАСУЛ РухӀалъ тана, гьелъул бакӀалда гьесие гӀазабалъе квешаб рухӀ лъуна БЕТӀЕРГЬАНАС. 15Цинги Шаулил чукъбуз гьесда абуна:

«БетӀергьанас лъураб квешаб рухӀалъ гӀазаб кьолеб буго дуе. 16Нижер бетӀерчӀахъадица жиндирго чукъбузе буюрухъ кье абе арфаялда бакънал рачине гьунар бугев чи валагьеян. БетӀергьанас дуде квешаб рухӀ рещтӀинабулеб мехалъ, гьес бакънал рачина ва дуе мадар лъугьина», – ян.

17«Валагье щив вукӀаниги бакънал рачине гьунар бугев чи ва дихъе щвезаве гьев», – ин абуна Шаулица.

18Гьесул цо чукъаяс абуна: «Дида лъала Бет-Лехемалдаса Йишайил вуго бакънал рачине гьунар бугев вас. Лебалав, рагъуе махщелги бугев, цӀодораб каламги бугев, сипатги берцинав, БЕТӀЕРГЬАНАСУЛ баракатги щварав чи вуго гьев».

19Цинги Шаулица жиндирго чагӀигун хабар битӀун ана Йишайихъе: «ГӀияда вугев дур вас Давуд витӀе дихъе», – ян.

20Йишайица хӀамаги кьолон, сайгъаталъе чедгун, чӀагӀдал рахълъенгун цадахъ цо бурутӀгун жиндирго вас витӀана Шаулихъе. 21Давуд Шаулихъе вачӀана ва гьесда цеве эхетана. Шаулие гьев кутакалда рекӀее гӀуна ва жиндирго ярагъ баччулев чилъун тана. 22Цинги Шаулица Йишайихъе хабар битӀана:

«Давудида дир ракӀ рекъана, гьединлъидал гьев дие хъулухъалъе вукӀине те», – ян.

23Щибаб нухалъ Шаулида тӀаде БетӀергьанас гьеб рухӀ рещтӀинабурабго, Давудица жиндирго арфаялда бакънал рачунаан. Гьелъ Шаулие бигьалъи лъугьунаан ва квешаб рухӀ нахъе къалаан.

Currently Selected:

1 Пачаби 16: АварАК

Highlight

Copy