1 Пачаби 15

Шаулил аскаралъ амалекиял гъури

1Цо къоялъ Шамуилица Шаулида абуна: «Мун ГӀизраилалъул пачалъунги гьавун, БЕТӀЕРГЬАНАС витӀун, дуда зайтуналъул нах бахарав чи вуго дун. Гьанже БЕТӀЕРГЬАНАСУЛ рагӀухъ гӀенекке. 2Гьале Гучал Аскаразул БЕТӀЕРГЬАНАСУЛ калима:

„Дида ракӀалда буго Амалекалъ ГӀизраилалъе гьабураб квешлъи, – Мисриялдаса рачӀунаго гьел гьезда данде чӀараб куц. 3Вахъа, амалекиязда тӀаде кӀанцӀе; тӀуран тӀагӀинаре гьел ва гьезул буголъи. ГурхӀел-рахӀму тун чӀвай киналго: бихьиналгун руччаби, гьезул рижиго – хахулел лъималгицин нахъе течӀого – боцӀигун гӀиял, варанабигун хӀамул“».

4Шаулица Телаималде аскар данде бакӀарана ва гьезул къадар батана кӀинусазарго лъелав рагъухъан; анцӀазарго рагъухъан Ягьудиялдаса вукӀана. 5Амалекиязул шагьаралда гӀагарда бугеб гӀурумухъда вахчана Шаул жиндирго аскаргун. 6Цинги гьес кениязухъе хабар битӀана:

«Дица амалекиязда цадахъ гъуричӀого рукӀине, нуж гьениса нахъе а, Мисриялдаса гӀизраилал рачӀунелъул нужеца лъикӀлъи гьабун букӀиндал гьезие», – ян.

Цинги кениял гьениса нахъе ана. 7Гьебмехалъ Шаулил рагъухъабаз, Хавилаялдаса бахъараб Мисриялъул гӀорхъода бугеб Шуралде щвезегӀан, амалекиял гъурана. 8Амалекиязул пача Агагги чӀаго асир гьавуна гьес, гьесул кинабго халкъги цо течӀого хвалчаца гъурана. 9БукӀаниги, Шаулица ва гьесул рагъухъабаз Агаг чӀаго тана. Гьединго, тӀаса бищараб гӀи-боцӀи, кьариял кьагӀрал ва къиматабщинаб къайи-къоно хвезабизе бокьичӀо гьезие, – загӀипаб-къадарабщинаб гурони хвезабичӀо.

БетӀергьанас Шаул нахъчӀвай

10Цинги гьадинаб БЕТӀЕРГЬАНАСУЛ калима бачӀана Шамуилихъе: 11«Дун рекӀекълъун вуго Шаул пачалъун теялдаса, гьес Диде мугъ рехулеб буго ва Дир рагӀиги гӀадахъ босулеб гьечӀо».

ЦӀакъ ццин бахъана Шамуилил гьебмехалда, ва тӀубараб сордоялъ магӀу тӀун, БЕТӀЕРГЬАНАСДЕ дугӀа гьабуна гьес. 12Радал Шаулгун дандчӀвазеян цудунго тӀаде вахъана Шамуил.

«Шаул Кармил шагьаралде ун вукӀана. Гьениб жиндиего памятникги бан, гьанже Гилгалалде щун вуго», – ян бицана гьесда.

13Шамуил гьесда тӀаде щведал, Шаулица абуна: «БЕТӀЕРГЬАНАС баракат лъеги дуда! Гьале дица БЕТӀЕРГЬАНАСУЛ амру тӀубазабуна», – ян.

14Шамуилица абуна: «Гьаб кинха цинги дир гӀундузда рагӀулеб бугеб гӀиязул багӀади ва боцӀул гӀергӀеди?» – ян.

15Шаулица жаваб кьуна: «Амалекиязухъа бахъун бачӀана гьеб боцӀи рагъухъабаз; дур БЕТӀЕРГЬАН Аллагьасе къурбаналъе хъвезе букӀине, лъикӀаб гӀи-боцӀи тӀаса бищана, хутӀарабщинаб нижеца тӀагӀинабуна».

16Цинги Шамуилица абуна: «ГӀинтӀаме, дица бицинин дуда нолъ къаси БЕТӀЕРГЬАНАС дие рагьараб жо».

«Бице», – ян абуна Шаулица.

17«ГӀизраилазул къавмазда гьоркьов дуцаго мунго бищун гьитӀинавлъун рикӀкӀаниги, гьезул бетӀерлъун вахъинавичӀищ мун? БЕТӀЕРГЬАНАС ГӀизраилалда тӀад пачалъунги тарав мун! 18Цинги БЕТӀЕРГЬАНАС амру гьабун калима битӀана духъе: „Вахъа, гъурун тӀагӀинабе доб мунапикъзабазул агьлу – амалекиял. ТӀубан гьел гъурун лъугӀизегӀан гьезулгун рагъ гьабе“, – янги абун. 19Щайха дуца БЕТӀЕРГЬАНАСУЛ амру тӀубазабичӀеб ва хъантӀун давлаялда хадувги вортун, БЕТӀЕРГЬАНАСУЛ ццин бахъараб жо гьабураб?» – ин абун гьесда кӀал гьикъана Шамуилица.

20«БЕТӀЕРГЬАНАСУЛ буюрухъ тӀубазабунагури дица! БЕТӀЕРГЬАНАС абураб гьабун къватӀиве вахъана, тӀуран амалекиялги гъурана ва гьезул пачаги асир гьавуна. 21Халкъалъин абуни лъикӀа-лъикӀал тӀаса рищун гӀиялги, боцӀиги нахъе тана дур БЕТӀЕРГЬАН Аллагьасе Гилгалалда къурбаналъе кьезе», – ян жаваб кьуна Шаулица.

22Цинги Шамуилица абуна: «Къурбаналги сайгъаталги БЕТӀЕРГЬАНАСУЛ РагӀуе мутӀигӀлъиялдасаги хириял ругинцин гурищ дуда ккараб? МутӀигӀлъи къурбаналдасаги тӀадегӀанаб, рагӀухъ гӀенекки – куязул тӀатӀи бухӀун кьеккен гьабиялдасаги къиматаблъидал бугеб.

23МутӀигӀлъунгутӀи буго сихӀручилъиялда бащадаб мунагь, гӀамалкӀодолъиги гьересиаллагьзабазе тӀагӀат-гӀибадат гьабиялда релълъуна. Дуца БЕТӀЕРГЬАНАСУЛ буюрухъ нахъ чӀваралъухъ, Гьес мунги нахъе рехила пачалъиялдаса».

24Цинги Шаулица абуна Шамуилида:

«Дица дунго мунагьалъукье ккезавун вуго, – БЕТӀЕРГЬАНАСУЛ буюрухъги тӀубазабичӀого, дур рагӀиги гӀадахъ босичӀого. ГӀадамазукьа хӀинкъун, гьезухъ гӀенеккана дун. 25Бегьулеблъун батани, тӀаса лъугьа гьанже дидаса, ва дица БЕТӀЕРГЬАНАСЕ гӀибадат гьабизе букӀине, дида цадахъ халкъалъухъе тӀадвусса», – ян.

26«Вилълъинаро дун дуда цадахъ. Дуца БЕТӀЕРГЬАНАСУЛ рагӀи нахъчӀвана, гьединлъидал БЕТӀЕРГЬАНАС мун ГӀизраилалъул пачалъиялдасаги рехана», – ян абуна Шамуилица.

27Вахъун Шамуил нахъе ине лъугьаравго, Шаулица вортун гьесул гӀабаялъул квенчӀел къан ккуна ва гьеб бихъун ана. 28Гьебмехалъ Шамуилица абуна:

«ГӀизраилалъул пачалъи духъа нахъе бахъулеб буго жакъа БЕТӀЕРГЬАНАС ва цогидасухъе, дудаса лъикӀасухъе, кьезе буго. 29ГӀизраилалъул ТӀадегӀанас я гьереси бицунаро, я Жиндирго рагӀи хисуларо, Гьев инсан гурелъул бицаралда ракӀ бухӀизе», – ян.

30«Дица мунагь гьабуна, амма гьарула дуда, гьанже дида цадахъ вилълъун халкъалъул чӀахӀиял чагӀазда цеве тӀадегӀан гьаве дун, дица дур БЕТӀЕРГЬАНАСЕ гӀибадат гьабизе букӀине», – ян гьарана Шаулица.

31Цинги Шамуил гьевгун цадахъ тӀадвуссана, ва Шаулица БЕТӀЕРГЬАНАСЕ сужда гьабуна. 32Цинги Шамуилица абуна: «Амалекиязул пача Агаг ваче гьаниве», – ян.

Агаг парахатго гьесда аскӀове вачӀана, хвалил кьогӀлъи тӀаса анин ракӀги чӀун. 33Гьебмехалъ Шамуилица абуна: «Дур хвалчаца руччаби лъималаздаса махӀрум гьарурал гӀадин, дур эбелалъулги вукӀунге абе тӀокӀалъ вас», – ин.

Гьединги абун, чӀвана Агаг Шамуилица БЕТӀЕРГЬАНАСДА цеве Гилгалалда. 34Хадув Шамуил Рамаялде ана, Шаул Гивеаялде рокъове ана. 35Гьелдаса нахъе Шамуилги Шаулги тӀокӀалъ цоцада дандчӀвачӀо. Амма Шамуил цӀакъ ракӀбакъван вукӀана Шаул сабаблъун. БЕТӀЕРГЬАНГИ рекӀекълъана Шаул ГӀизраилалда тӀад пачалъун теялдаса.

Currently Selected:

1 Пачаби 15: АварАК

Highlight

Copy