1 Пачаби 13

Пилистималгун цӀидасан рагъ байбихьи

1Лъеберго сон барав чи вукӀана Шаул пачалъун вахъараб мехалда ва кӀикъоялда кӀиго соналъ пачалъи гьабуна гьес ГӀизраилалда. 2Шаулица гӀизраилазда гьоркьоса лъабазарго рагъухъан тӀаса вищана. Гьезда гьоркьоса кӀиазарго чи Михмашалда ва Бет-Элалъул тӀалъиялда Шаулида цадахъ, азарго Буняминил ракьалда бугеб Гивеаялда Ионатанида цадахъ тана. ХутӀарал чагӀи рокъо-рокъоре ритӀана.

3Ионатаница Геваялда рукӀарал пилистимазул гӀорхъи цӀунулел рагъухъабазул къокъа гъурана; гьеб хабар пилистимазухъе щвана.

«ГӀенекке, жугьутӀал!» – инги ахӀулаго, киса-кибего рагӀуледухъ суралъубе пуян лъазабуна гьебмехалда Шаулица.

4Гьедин кинабго ГӀизраилалда рагӀана Шаулица пилистимазул гӀорхъи цӀунулеб къокъа гъурун букӀин ва гьеб сабаблъун пилистимазда ГӀизраил хутӀарабги суризабун букӀин. Гьединлъидал, халкъ Гилгалалде Шаулида аскӀобе бакӀареян лъазабуна.

5Пилистимал данде ракӀарана ГӀизраилалгун рагъизе. Гьезул букӀана лъабазарго чолгьоко, анлъазарго чотӀахъан ва ралъдал рагӀалда салигӀан гӀемер, рикӀкӀун хӀал кӀолареб халкъ. Михмашалде рачӀун Бет-Авеналъул бакъбаккул рахъалда къайи чӀван чӀана гьел. 6ГӀизраилазда бихьана жал хӀинкъи-балагьалъукье ккун рукӀин, ва нохъал-хъитӀазда, хъархъазда гьоркьор, кьурабалъ, гвендал-гъуязулъ рахчана гьел. 7ЖугьутӀазул цо-цоял Иордан бахун дорехун Гадил ракьалде ва ГилгӀадалде щвезегӀанцин лъутана.

Шаул Гилгалалда вукӀана, ва гьесда сверухъ ракӀарарал рагъухъабиги хӀинкъиялъ сородулел рукӀана.

Шамуилил амру Шаулица тӀубазабичӀолъи

8Шаул анкьго къоялъ валагьун чӀана Шамуил вачӀиналъухъ – гьедин абун букӀиндал Шамуилица. Амма гьев вачӀунев вукӀинчӀо, Шаулил чагӀиги дагь-дагьккун рикьа-риххизе лъугьана. 9Цинги Шаулица абуна:

«Раче дихъе тӀуран рухӀулел ва ракълил къурбаназе къачӀарал хӀайванал», – ин. Цинги гьес жинцаго тӀобитӀана тӀубан бухӀулеб къурбан.

10Гьеб рагӀалде бахъиндал, ваккун вачӀана Шамуил ва салам кьезе гьесда данде вилълъана Шаул.

11Амма Шамуилица абуна: «Дуца гьабураб жо щиб?» – ин. Шаулица жаваб кьуна:

«Халкъ бикьа-биххун унеб букӀана, бихьизабураб заманалъ мунги вачӀинчӀо, Михмашалде ракӀарун пилистималги руго. 12Гьединлъидал дица пикру гьабуна: „Гьанже Гилгалалдеги рачӀун, пилистимал дида тӀаде кӀанцӀила, дунин абуни, БЕТӀЕРГЬАНАСУЛ рахӀмат-цӀоб гьарун Гьесда цеве вахъинчӀо жеги“, – ян, ва дицаго таваккал тӀамуна тӀубан бухӀулеб къурбан тӀобитӀизе».

13«ГӀадалаб жо гьабун буго дуца, – ян абуна Шамуилица. Дур БЕТӀЕРГЬАН Аллагьасул буюрухъазда мал бана дуца. БЕТӀЕРГЬАНАС абадиялъего щула гьабизе букӀана дур#13:13 Дур абураб рагӀул магӀна гӀатӀидаб буго гьаб бакӀалда. Цо Шаул гурев, гьесул тӀолабго наслу-зуриятги жанибе бачуна гьаб рагӀиялъ. пачалъи ГӀизраилалда тӀад. 14Амма гьанже дур пачалъи тарана. БЕТӀЕРГЬАНАС жиндирго ракӀ рекъарав чи валагьила ва гьев тела Жиндирго халкъалда тӀад пачалъун, щайгурелъул дуца БЕТӀЕРГЬАНАСУЛ амраби тӀуразаричӀелъул».

15Цинги Гилгалалдаса вахъун ана Шамуил Буняминил ракьалда бугеб Гивеаялде. Шаулица жиндаго цадахъ хутӀарал чагӀи рикӀкӀиндал, анлънусгогӀанасев чи ватана.

Михмашалда рагъ байбихьи

16Шаулги, гьесул вас Ионатанги, гьезда цадахъ хутӀарал рагъухъабиги Буняминил Гева абураб шагьаралда чӀун рукӀана; пилистимал Михмашалда рукӀана. 17Пилистимазул рахъалдасан лъабго къокъа рагъухъабазул бачӀана къватӀибе: цо къокъа Шуалалъул ракьалда бугеб Офраялде унеб нухде балагьун, 18кӀиабилеб – Бет-Хороналде унеб нухде, ва лъабабилеб – Цевоим расалъиялда тӀаде балагьун бугеб ГӀизраилалъул гӀорхъоде унеб нухде, бакъвараб авлахъалъул рахъалдехун балагьун.

19ГӀизраилалдаго цониги маххукъебед вукӀинчӀо гьебмехалда, щайгурелъул жидеего хучдулги хвалчабиги гьаризе жугьутӀал риччазе къасд букӀинчӀо пилистимазул. 20Гьединлъидал, жиндирго пуруц, газа-раххан, гӀащтӀи ва харицел рекӀинабизе пилистимазухъе хьвадизе кколаан гӀизраилал. 21Пуруц ва газа-раххан рекӀинабуралъухъ шекелалъул лъабго бутӀа гьабун кӀиго бутӀа босулаан; лъундул, гӀащтӀи, ва боцӀи ахӀулел тӀилал#13:21 БоцӀи ахӀулеб тӀил – халатаб, рагӀалда маххул кесекги бараб тӀил. къачӀаралъухъ шекелалъул лъабил бутӀа босулаан.

22Гьединлъидал, Шаулихъ ва гьесул вас Ионатанихъ хутӀизегӀан, гьезда цадахъ рукӀаразул цонигиясда кодоб гьеб рагъ ккараб къоялъ, я хвалчен, я хеч букӀинчӀо. 23Гьебго заманаялъ пилистимазул цо бо Михмашалъул кӀкӀалахъан унеб нухдаги чӀана.

Currently Selected:

1 Пачаби 13: АварАК

Highlight

Copy