التكوين 1
1
بداية العالم
1فالبداية خلڮ مولانا العالم. وهاذي هي الطريقة اللي خلڮو بيها: 2فالبداية كانت لارض ماهي منتظمة ولا فيها شي، وكانت الظلمة امغطية الما، وروح مولانا يحوم فوڮو. 3وڮال مولانا: يخلڮ النور. واخلڮ النور. 4وخرص مولانا النور وشاف النور زين. وافصل مولانا النور عن الظلمة. 5وسما مولانا النور انهار، وسما الظلمة ليل. وعاد ليل وعاد امع الصباح . وكان ذاك هو اليوم لأول.
6وڮال مولانا: تخلڮ قبة امبين المياه اياك اتڮسم المياه شور قسمين. 7وخلڮ مولانا قبة وافصل المياه اللي تحت القبة عن المياه اللي فوڮها. واخلڮ هاذا. 8وسما مولانا القبة السما. وعاد ليل وعاد امع الصباح. وكان ذا اليوم الثاني.
9وڮال مولانا: يجتمعو المياه اللي تحت السما كاملين فابليدة وحدة اياك تظهر التراب. واخلڮ ذا. 10وسما مولانا هاذي التراب لارض، وسما بل امنين اجتمعو المياه لبحور. وخرص مولانا وشاف ذاك كامل زين.
11وڮال مولانا: تعطي لارض النباتات اللي فيهم لبذور، ويخلڮ اصدر رافد الثمار اللي فيهم لبذور بكل أنواعهم اعلى لارض. واخلڮ ذا. 12ووخظت لارض النباتات اللي فيهم لبذور بكل أنواعهم، واعطات املي اصدر رافد اثمار فيهم لبذور من نوعهم. وخرص مولانا وشاف ذا كامل زين. 13وعاد ليل وعاد امع الصباح. وكان ذا اليوم الثالث.
14وڮال مولانا: يخلڮو لأنوار فقبة السما اياك يميزو النهار عن اليل ويعودو علامات يحددو لأيام والسنين ولعياد. 15ويخلڮو أنوار فقبة السما اياك يظو اعلى لارض. واخلڮ ذا .
16وخلڮ مولانا لأنوار لكبار لأثنين : خلڮ النور لأول لكبير اياك يعود فانهار، وخلڮ النور الثاني الصغير اياك يعود فاليل، وخلڮ مولانا النجوم املي. 17ودار مولانا هاذو لأنوار فقبة السما اياك ايظو اعلى لارض، 18واجعلهم مولانا هوما المسؤولين عن انهار وليل وهوما اللي يميزو النور من الظلمة. وخرص مولانا وشاف ذا كامل زين. 19وعاد ليل وعاد امع الصباح. وكان ذا اليوم الرابع.
20وعاڮب ذا ڮال مولانا: تمتلا المياه بياسر من المخلوقات الحيين، واتعود فم اطيور اتطير امبين لارض والسما. 21وخلڮ مولانا وحوش لبحور لكبار ، وكيف ما خلڮ المخلوقات الحيين كاملين اللي املان منهم الماء، خلڮهم من كل نوع. وخلڮ املي كل اطير بريشاتو من كل نوع. وخرص مولانا هاذا وشافو زين. 22ودار مولانا فيهم البركة وڮال: اثمرو واكثارو ويمتلاو مياه لبحور بالمخلوقات، ويكثارو الطيور اعلى لارض. 23وعاد ليل وعاد امع الصباح. وكان ذا اليوم الخامس.
24وڮال مولانا: تعطي لارض مخلوقات حيين من كل نوع : من حيوان يُربّا وزواحف وحيوانات لخلا من كل نوع. واخلڮ ذا. 25وخلڮ مولانا الحيوانات لخلا من كل نوع، والحيوان اللي يُربّا من كل نوع، وكل حيوان يزحف اعلى التراب من كل نوع. وخرص مولانا وشاف ذا زين. 26وعاڮب ذاك ڮال مولانا: انخلڮو لإنسان اعلى شي من صيفاتنا، وسلّط مولانا لإنسان اعلى حوت لبحر واطيور السما والحيوان اللي يُربّا وحيوان لخلا اعلى التراب واعلى كل حيوان يزحف اعلى التراب .
27وخلڮ مولانا لإنسان اعلى شي من صيفاتو، اعلى شي من صيفاتو خلڮهم راجل وامرة. 28ودار مولانا فيهم البركة وڮال: اثمرو واكثارو وعودو ياسرين وسيطرو اعلى لارض، واتسلطو اعلى حوت لبحر واطيور السما وكل شي يتحرك اعلى لارض. 29وڮال مولانا: اراني اعطيتكم كل اصدر اعلى وجه لارض رافد ابذور. اعطيتكم كل صدراية رافدة لكم ثمار اياك توكلوهم. 30يغير لحيوانات لارض واطيور السما كاملين وكل الحيوانات الصغيرة اللي تزحف وكل مخلوق فيه روح، اتعود النباتات اطعامها. واخلڮ ذا . 31وخرص مولانا هاذا وشافو زين حته. وعاد ليل وعاد امع الصباح. وكان ذا اليوم السات.
Currently Selected:
التكوين 1: الحسانية
Highlight
Share
Copy
Want to have your highlights saved across all your devices? Sign up or sign in
© 2024 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
