Wenía 34

Jacopa aĩvake Siquém yorarasĩni ati akãtivo ivo yoã

1Askái shavá wetsã, Jacopa vake Liamẽsho ã merachna Diná ivo, ano atõ shokoanamã kanívenarasĩ pokéshonõ iinã kaí. 2Ano heveu yora Hamor niá, kakáya. Askái ato pokéshonõ iinã ãwẽ kamaĩnõ, ãatõ vake Siquemni, Jacopa vake atxi atxiki. 3Aská ashõ aĩvomẽ petxikima nishõ noíki. Askái txipo roakai avé vanai. 4Askávaíki ãwẽ papa Hamor “ea yokak ishõ”, iinã tanamakĩ.

5Askámaĩnõ Jacopa, ãwẽ vake ãwẽ atxĩ atxĩai ikí nĩkãinã ã takevo ato yoãshoáma, iná shokoanamã atõ itãi veá manáki.

6Askái Siquemni papa Jacó chinãvaĩi kaí avé vananõ iinã. 7Askámaĩnõ, ãwẽ vakerasĩni wai matxi itãi tachivarãsho nĩkãtachívo, onísi, ichnákéi akávo. Awesáma, Siquém anõ itimatõ ikí, Jacopa ãwẽ vakerasĩnĩsho nĩkãnése.

8Askávaitxinĩ Hamor atonĩ vanai. “Ẽ vakẽ matõ vake roa aka askámaĩnõnã, ea mã oĩmashõtirá? 9Nõ wetsama ikinanãnõ, nokẽ shavo viãnanãsho nõ shokonõ. 10Nenose shokokésho nokenĩ shaváyarína. Marí mã roakanamãrvi mai kopímavai shokosho, matõ marí chinãtõ ikírvi shokotsoma”, ato akĩ.

11Anosho ãatõ vakẽ Dinapa papa, ãwẽ takevorasĩ aká ato tanamakĩ. “Mato ẽ chinãshoa ea mã anõ aka ivoro, mã chinã ivorasĩ mato ẽ ashõókatsa. 12‘Naatii noke onis arí’, mã imaĩnõ mato ẽ inãskatsa. ‘Aatishõ’, mã imaĩnõ ẽ kopímaókatsa aká, Dinámẽsho. Askámaĩnõ aĩvoro ea yonoshotsoma, ẽ oĩnõ”, akĩ.

13Aská akĩ atõ take aĩvake atxĩ atxĩvaitõsho, ãwẽ vakerasĩniro, aa, ãwẽ papa aká anõpakĩka revíma ikívo, parãsvo. 14Atovo neskái vanavo. “Yora askátõ nokẽ aweshavo noke oĩkãtĩpá. Ina repã retás ikitámasho noke ravĩmamísi. 15Nokẽ tanátinĩpari itsoma. Mato venerasĩ ‘ashkã nõ inõ’, mã imaĩnõro, noke mã yokáa mato nõ ashõkatsa. 16Aská ivõ mã ikíro nõ shavo ikinanãkatsa. Mato nakosho nõ vesovaĩkatsa. Õsíkesho yora westíse keskásho nõ shokokatsa. 17Askámẽkĩ nokẽ vana mã anõ akáma, retás ikitáma ivoro, nokẽ aweshavo vivainii nõ vokatsai”, akávo.

18Atõ askái vanamaĩnõ Hamornĩ Siquém ato vana anõ akĩ. 19Siquémro ãwẽ papã wetsamavorasĩni oĩtanapa ivo yora, askásho ãatõro Jacopa vake petxĩkima chinãinã aaparika vevo retás ikí. 20Ano askái mashtévaí, aa, ãwẽ papa aká voshõ, cidade kepoti sawéanamãsho avé shaváyaivo atonĩ kãtxísho yoãvo. 21“Naa yorarasĩro chinã raweyavo yora. Neno shaváyashõ, atõ chinãtõ ikírvi ave shokonõvo. Mairo itãtimarvi atõ anõ shokokatsa. Aská ashõ atonĩ nõ shavo ikinanãnõ. 22Noke venerasĩ atõ ikítõ ishõ ashkã nõ retás imaĩnõro, nokenĩ õsíkesho shokokatsavo. 23Atõ inárasĩ atõ awe wetsarasĩ aká nokená keskáse ikatsai. Askásho nõ ishõnõ, avé shaváyashõ nõ shokonoshõ”, ikívo.

24Askái ano cidade kepoti sawéanamãsho venerasĩ, atõ vana anõ avaí ashkã retás ipái voávo. 25Askái, 3 shavá tavákeanamãsho atõ tsewe tee iki kavimamaĩnõ, Jacopa vakerasĩ Simeão, Levi aatii atõ kewãa vivainii atõ cidadenamã voshõ venerasĩ kopimakĩmáse ato yamamávo. 26Aská akĩ Hamornĩ Siquém yamamavaikĩ, atõ aweshavo Siquém shavánamãsho ewevarãóvo. 27Askávai txiposho Jacopa vake wetsarasĩni yora yamayarasĩ atõ awe kochãkãi, atõ shavapa awerasĩ tĩi ikí ivo vii akávo, atõ take aĩvakemẽ kopitáki. 28Aská avaikĩ atõ inárasĩ askásevi aoi akávo, atõ txivorasĩ, txashorasĩ, jumentorasĩ, atõ shavapa katxía awerasĩ, waĩ awerasĩ akárasĩ kawĩvaĩóvo. 29Aská avaikĩ, aĩvorasĩnĩ vakerasĩ askásevi aovo, maví akĩ, avaikĩ atõ shovo naki awerasĩ kawĩvaĩóvo.

30Atõ askámaĩnõ atõ papã Simeão Levi aká ato aská akĩ. “Ea mã ichná aka. Ramaro cananeu yorarasĩ, perizeu yorarasĩ aatii ea ato mã ichnamakatsai. Nokero ãtsapamarívi, atovõro õsí õsítãsho ẽ vakerasĩnĩkĩ ea keyokatsavo”, akĩ.

31Ãwẽ askái vanamaĩnõ revívo. “Mã ase roase askámẽkĩ, ãatõ nokẽ take, vesãkara shavo akátõse noke akãvaikatá”, akávo.

Currently Selected:

Wenía 34: YKV

Highlight

Copy