Wenía 24

Isaque mai wetsã atõ shavo vishõti ivo yoã

1Abraão ãwẽ sheniwetsa mashtéanamãsho Yavepa roaparasĩ katsése ashõkõvarãki. 2Shavá wetsã ramama ãwẽ awe katseki vesomaináti ivo yora kenasho tanamakĩ. “Ẽ kichi teró ea atxitso.#24.2 Aatiã tanáti kichi teró atxivaĩsho tavámatima ivo vana aká 3Yavé, naínĩ mai shavá vesoya ivo Yovepa anemẽsho tavámatima ivo vana ea neská ashõtso. Neno ẽ anõ niá ivo maĩ ẽ vake Isaque Canaã shavo ea oĩmakãroa. 4Ẽ wetsamavorasĩ shokoanamã ivo shavo miã ẽ vake kavẽsho vishõta”, akĩ.

5Ãwẽ aská akatõsho, ãwẽ yonoa yorã nĩkãki. “Aĩvo ãwẽ evé okatsikímaro ẽ awesakatsai? Mĩ anõ oyãta maikiri mĩ vake arimẽse ewevaĩóki?” ãwẽ akátõsho, 6“ẽ vakero aská akáma, arimẽse ea imavaĩokatsikíma. 7Yavé naĩ niá ivo Yovepa, ẽ papa, ẽ wetsamavorasĩni mai aatii ea enemavarãki, tavámatima ivõ ea vana ati, ‘mĩ revomaa yorarasĩ naaivo mai ato ẽ inãkatsa’, iinã ea tanamati. Ãatõ yonoa yovepa mia yoivaĩatõsho, kakĩ mĩ merakatsa ẽ vakẽ aĩ. 8Askámaĩnõ aĩvo mivé okatsikímaro, roase, vana tavámatima ivõ ea mĩ aká ivo enéstso. Askámaĩnõ ẽ vakero ea ewẽvaĩroa, ari ea yonokatsikíma”, akĩ.

9Askái ãwẽ vanamaĩnõ, ãwẽ mee ima ivo yorã, ãwẽ kichi teró atxisho, tavámatima ivo vanã akĩ. 10Askái avé vanavaíki, ãwẽ ivõ 10 camelo atxishoí, awe roapa ivo vii, avaí, Naor anõ nipawa shavá Mesopotámiakiri kaí. 11Askákaĩi nokókaĩi, yãtã kanívenarasĩni wakapasha atõ vii vẽvẽa varinamã. Askái ano cidade kesotõ vaná wakapashanamã ãwẽ camelorasĩ maĩ ato metĩ ipamavaí 12Yavénĩ vanai. “Yavepá miaro ẽ ivo Abraãone Yové, askásho ẽ chinã ivorasĩ ea ashõtso, ẽ ivo askásevi, anõ noípakĩ ea vesoshotso. 13Neno vaná wakapasha tsaóa kesó ẽ niá. Askáki naaivo cidadenamã shokoyavõ vake kanívenarasĩ, wakapasha vinõ iinã atõ vemaĩnõ 14wetsase neská akĩ ẽ vana akatsai, ‘chomo tsaopaké. Wakapasha ẽ anõ’, ẽ akátõsho, ‘mã ase arí, mĩ camelorasĩ mia amaoshonõ’, ikí vanaya kanívena ivo itikĩ, Isaque mĩ kavẽshoáro. Aská ẽ oĩa ivoro, ẽ ivo anõ noípakĩ mĩ vesoa ikĩ ẽ tanakatsa”, akĩ.

15Askánamãsho Yavénĩ vana iski ãwẽ oĩa Rebeca chomo iánisho ipákarãi. Aaro Betuel meráshavo. Ãwẽ ochtxóro Naor, ãwẽ aĩ Milcaro ã paĩtxó, askámaĩnõ Naorro Abraãone take. 16Rebecaro kanívena ichnámachta, venẽ merama. Askái oshõ vaná wakapasha tsaóanamã chomõ wakapasha weawani ãwẽ iinakaĩmaĩnõ, 17Abraãone mee ima yorã atxõ erékaĩki meramavaikĩ aská akĩ, “mĩ chomõ wakapasha ama ea”, ãwẽ akátõsho, 18“mã ase arí”, avaikĩ, ãwẽ iáa ivo tsaõpakesho amaki. 19Anosho amavai vanai. “Mĩ camelorasĩ ato wakapasha weaoshonõ, ave anõ yaninínõvo”, akĩ. 20Aská avaikĩ erékawãki chomõ anõ inárasĩni wakapasha ati tsaóatõ manekevaíki, erésho vaná wakapasha ato weashonõ iinã iokaĩi.

21Ãwẽ aská ashõa oĩinã, venẽ vanainámamẽkĩ matsíkashóse kanívenákase oĩki, “Yavepa anõkĩse ea imavarãrívi ẽ oĩa”, ikĩ chinãki. 22Aská akĩ camelorasĩni wakapasha akĩ atõ mashtevaĩmaĩnõ, venẽ, ouro rechpi ãwẽ ewe tanati 6 grama, ouro meneshti ravévakĩ 120 grama aatii vivaikĩ aĩvo sawemakĩ. 23Aská avaikĩ, “mianã tsoã vakerkĩ? Mĩ papã shovonamã shanẽ wetsa yamará? Anosho evé shokoyarasĩnĩsho yamé ẽ tenenõ”, akĩ.

24Ãwẽ aská akatõsho, revíníki. “Earo Betuel vaketsikĩ. Ẽ ochtxóro Naor, ãwẽ aĩ Milcaro ẽ paĩtxó”, akĩ. 25Aská avaikĩ, “noke wasi aya, vaná wetsa aya, inapa pitirasĩ, anõ mã oshati ayasevi aká”, akĩ.

26Ãwẽ aská nĩkãinã, aaivo venẽ vetĩ ipásho Yavé ravii 27askái vanai. “Yavepá, miaro ẽ ivo Abraãone Yové, askásho mia roapa. Ẽ ivomẽ noípai nishõ, petxitima chinãsho vesoshoaya. Askámaĩnõ earo, Yavepa ea vesokõvarãki, Abrãone wetsamavorasĩni shavapa ea nokómaai”, ikí.

28Ã askámaĩnõ, kanívena oĩwani kayasho ãwẽ ewã wetsamavorasĩ katseki ato yoãshoi kakĩ. 29Aská, ãwẽ take Labão aská nĩkãvaí aa yora ẽ meranõ iinã vaná waka tsaóakiri kayai. 30Awesáma, ãwẽ takẽ rechpi, meneshti aká ãwẽ sawea oĩi, ãwẽ vana katseki ãwẽ yoã nĩkãi avainii, kaí vaná wakapasha kesó camelorasĩ tavá ãwẽ niá meratachísho 31vanai. “Yavepa roapa ashõya ivó, neno niroa, kawã. Shanẽ wetsa mia kashma ashõai, mĩ anõ camelorasĩ shokõti askásevi aká”, akĩ.

32Aská avaikĩ shovõ ewevaĩkĩ, ãwẽ camelorasĩ papíro keyoki potapakevaíki wasi inãi, vaná wetsa inapa piti ivo inãi avaikĩ, avé veayavorasĩro avé tatxó inõ iinã wakapasha weasho inãvo. 33Aská avaikĩ, piti ato ãwẽ setẽvarãshoatõsho Abraãone yonoa yora vanainái. “Matonĩpari ẽ vananõ, askávaíki txipo ẽ pinõ”, ãwẽ imaĩnõ, “ase irí, vana”, akĩ Labãone.

34Ãwẽ aská akatõsho, vanainái. “Earo Abraãone yonoa yora ea. 35Yavepa ẽ ivo Abraão roapa ashõkõvarãki, yora kakataiya shovimashõ nitxĩsho, prata, ouro, ãwẽ mee ima vene aĩvorasĩ, ãwẽ yoini inárasĩ txivorasĩ, txasho anikarasĩ, camelorasĩ, jumentorasĩ aatii inãmtá. 36Ãwẽ aĩ Sara aatiã yõshayamẽkĩ anõsho vake meramtá. Aaro ãwẽ papã mekẽya awerasĩ viakekatsaiya ivo vake. 37Ẽ ivõ ‘vana tavámatima ivo ea ashõtso’, iinã ea yonoki, ‘ẽ vake neno ẽ anõ vesokaĩa shavánamã cananeu shavorasĩ ea oĩmakãroa’, iinã. 38‘Ẽ papã shavapa ẽ wetsamavorasĩ shokoanamãkase shavo merasho vishõta’, 39ea ãwẽ amaĩnõ, ẽ ivonĩ neskái ẽ vanavai. ‘Askámaĩnõ aĩvo evé okatsikíma ivororá, ẽ awesakatsai?’ iinã ẽ nĩkãtõsho, 40‘roase, Yavepa ãwẽ vana anõ akí ẽ niá ivõ ãwẽ Yonoa Yové mia yonoshoatõsho ãatõ mia peshót avaĩsho mia ashõkatsa, ẽ papã wetsamavorasĩ shokoanamã shavo ẽ vake mĩ ewevarãshokatsai. 41Askámaĩnõ kashõ ẽ wetsamavorasĩ mĩ yokáa atõ aví iyamamaĩnõrívi tavámatima ivo vana enéstso, aĩvo yamase mĩ oa roase ikatsai’, ivai.

42Askákarãi oí rama vaná waka tsaóa kesó nii oshõ ẽ neskái. ‘Yavepá, ẽ ivo Abraãone Yovepá, ẽ chinãvarãa ivorasĩ roakakĩ ea ashõtso. 43Ea neno vaná waka tsaóa tavá ẽ niá, kanívenapa wakapasha vii omaĩnõ neskái ẽ vanakatsa. “Mĩ chomõ wakapasha ama ea”, akĩ ẽ yokáatõsho, 44“mã ase arí”, ivaikĩ, “mĩ camelorasĩ mia amaoshonõ”, ikí vanaya ivo ikatsai, ẽ ivõ vakẽ aĩ akatsai ivo mĩ merashoáro’, ẽ aka. 45Askái Yavénĩ vanai mashtékaĩkatsiinã ẽ oĩase Rebeca chomo iásho ipákarãi, vaná wakapasha weanõ iinã. Ãwẽ askámaĩnõ, ‘wakapasha ama ea’, iinã ẽ yokáatõsho, 46ãwẽ chomo iáa ivo tsaõpakevai vanai. ‘Naĩ, arí, mĩ camelorasĩ mia amaoshonõ’, ivaikĩ ẽ amaĩnõ, ẽ camelorasĩ ea amaoshoa.

47Ãwẽ aská amaĩnõ, ‘mĩ papanã tsoarkĩ’, iinã ẽ nĩkãatõsho ea revínii vanai. ‘Earo Betuel vaketsikĩ. Ẽ ochtxóro Naor, ãwẽ aĩ Milcaro ẽ paĩtxó’, ea ãwẽ amaĩnõ, rechpi meneshti ravévakĩ aká sawemavaikĩ 48maĩ vetĩ ipásho Yavé ẽ raviai. Yavé, ẽ ivõ ravia ivo Yové roapa. Ãatõ roaka akĩ yoivarãki ẽ ivõ takẽ aweshavo ea merashoa, ãwẽ vakẽ ave aĩ anõ iinã. 49Ramaro ea tanamana, ẽ ivo anõ noípakĩ vesoki, petxitima ivo chinã mã ashõkatsa? ‘Akáma’ mã imaĩnõro awesátiraki ẽ chinãnõ erí”, ato akĩ.

50Ato ãwẽ askámaĩnõ, Labãonĩsho Betuelpa revívo. “Neská ivorasĩro Yavepa yonorívi. Awesa ikíkata nõ vanaikĩ? 51Rebeca neno rakáa ewevaĩta. Mĩ ivõ#24.51 Aatiã tanáti yora ivoyaro awe keskámẽkĩ roai vesótáa vakẽ ave oĩnõ, Yavepa chinã keská akĩ”, akávo.

52Atõ askái vana nĩkãinã Abraãone nitxĩa ivo yora maĩ vetsek ipásho Yavé raviki. 53Anosho pratanĩ ouro awerasĩ, õporasĩ aká vivaikĩ Rebeca inãki, aská avaikĩ ãwẽ takenĩ ãwẽ ewa awe oraka ivorasĩ ato inãpakeóki. 54Ato aská avaí ãwẽ avé vovaiya venerasĩnĩsho, pivai, oshavai, shavá nakoi vesokaĩvai vanai. “Ẽ ivõ shavapa arimẽse ẽ iokaĩotanõ, ramaro”, ato ãwẽ akátõsho, 55ãwẽ take ãwẽ ewa aatii askái vanavo, “aaro ave 10 shavákase nokenĩ neno ave nioi inõ, askávai txipo votanoshõ”, akávo.#24.55 Hebraicõ vana wichá wetsaro “katãnoshõ” ikí

56Atõ aská akatõsho, “ea atxiketsomároa. Yavepa ẽ ivõ chinã ivo ea ashõai. Arimẽse ẽ ivõ shavapa ẽ iokaĩtanõ”, ãwẽ imaĩno, 57“Rebeca kenana, awesá ikatsíki nõ nĩkãnõ”, akávo. 58Anosho kanívena kenavaíki nĩkãóvo, “waa venenĩnã mĩ kakatsai”, atõ akátõsho, “ẽe, ẽ katãnõ”, ikĩ ato revíki.

59Anosho Rebeca, ãwẽ vesoya aĩvo, Abraão nitxĩa yora, ãwẽ avé vevaiyavorasĩ aatiinĩ ashõ yonovo. 60Askáki Rebeca vana roapa ivo netãi vanavo. “Ase také, minõsho itãtima revotikĩra, atonĩ ranokasmananãyavõ shavárasĩ ato ave viakenõvo”, akávo. 61Aská nĩkãvaíki Rebeca ãwẽ shokõkena aĩvorasĩnĩsho atõ awerasĩ roa avaikĩ camelõ kãtxínivai, Abraão nitxĩa yora shotovaĩi voávo. Askáki aĩvo viwãti.

62Askái aatiã Isaque Beer-Laai-Roinamã#24.62 Hebraicõ vana “Beer-Laai-Roi” ikíro “nishõ ea oĩyatõ vaná waka” oĩtani oí Neguebenamã nii oí. 63Askáki yãtã, “iná shokoanamãsho oĩki nishõ ẽ chinã chinãvãnõ”, iinã kakĩ camelorasĩ veá meraki. 64Arishõ askásevi, okĩ Rebecã patáináki Isaque meraovaíki camelõsho nipávaíki, 65Abraão nitxĩa yora nĩkãki. “Waanã tsoa venerkĩ, noke chinãvarãyanã”, ãwẽ akátõsho, “ẽ ivotsikĩ”, ãwẽ akátõsho anoshose ãwẽ õpo vevãkatõ vepãtmeinái.#24.65 Aatiã tanátiro esérvi, aĩvo õpo vevãkatõ vepãtméa 66Askái nokókaĩsho Abraão nitxĩatõ Isaque keyoki yoãshokĩ. “Ẽ askátavai”, iinã. 67Anosho Isaquẽ Rebeca ewevaĩki, ãwẽ ewa Sara anõ rakákaĩkaĩchna peshepa. Aská akĩ ninivarãsho anõ noíki, anõsho ãwẽ ewamẽ ã rona tãti akĩ.

Currently Selected:

Wenía 24: YKV

Highlight

Copy