Wenía 21

Isaque vaketi ivo yoã

1Askávaíki txipo Yavepa Sara roapa ivo ashõki, ãwẽ tanamachĩa keskáki. 2Abraão sheniwetsamẽkĩ ãwẽ aĩ Sara ãwẽ toomáa, venevake pakéi, Yové Koĩni tanáshochĩanamãse. 3Askámaĩnõ ãwẽ papã “Isaque” akĩ aneki. 4Isaque ãwẽ pakévai, 8 shavá nokómaĩnõ Abraãone ãwẽ ina repã retás akĩ, Yové Koĩni ãwẽ tanamachĩa keskáki. 5Askái 100 varinamãsho ãwẽ vake Isaque pakéti.

6Askámaĩnõ Sara vanairo, “Yové Koĩni mekíi osãtĩ ea imaai.#21.6 Hebraicõ vana “Isaque” ikíro “osãa” Yoãna nĩkãsho atonĩsho ẽ osãókatsa”, ikí. 7Askávai vanaói. “Vevõ ‘mĩ aĩni vake shoma amakatsa’, ikĩ Abraão aská akátĩpa ivaivaichnávo askámẽkĩ naaro ẽ vene sheniwetsamekĩ vake ẽ merashoa”, ikí.

8Askái Isaque kaniinásho shoma eneki. Aská akĩ shoma ãwẽ enemaĩnõ aaivo shavapa Abraão saí ikí. 9Askánamãsho Ismael, Abraão vake wetsa, Hagar, Egito shavomẽsho ãwẽ merachna ivõ, Isaque ãwẽ ati akãa Sarã oĩki. 10Ãwẽ aská oĩinã Abraão yoãshokĩ. “Naa ea mee ishõya shavo ãwẽ vakenĩ ashõ yono. Ãatõro mĩ mekẽya awe ẽ vake Isaquenĩsho viátĩpakatá”, akĩ.

11Ãwẽ aská akatõsho, Abraão naíi, Ismael ãwẽ vakesevi chinãsho. 12Ãwẽ aská oĩinã Yové Koĩni Abraão vana akĩ. “Mĩ vake, ã ewa akámẽ tsakároa, Sarã mia tanamatõ atso. Awesáma, Isaque ivomẽsho miapa ivo yora revokatsasho ẽ ikí. 13Shavo wetsamẽsho Ismael mĩ merasmẽkĩ mĩ vakeserívi. Anõsho yora shoko wetsa ato ẽ shovimaókatsa”, akĩ.

14Askávaíki Abraãone, shavá oá merasho, vesokaĩsho ãwẽ vake aya kati ivo pão kashma ashõi, yoini shakapa wakapasha matá ashõi, Hagar papimaí, akĩ. Aská avaikĩ vake eneshovai, “votãtsoma”, iinã ato ãwẽ yonoatõsho voshõ askata wenẽ Berseba ivonamãsho venó venóvawãvo. 15Askái anosho wakapasha ãwẽ vivaĩa ivo keyosho ãwẽ vake võko teró tsaõsho enevaĩki. 16Askái ãwẽ vake oĩtashõ, tawa õtxia nipái kaatishõ ora tsaókei kaí, “nenosho ẽ vake vopia ea oĩkatsikíma”, ikĩ chinãinã tsaópakesho isĩinasho wai ikí.

17Askái vake txakar ikí nĩkãinã Yové Koĩ ãwẽ yonoa yovepa Hagar naĩsho kenaníki, “Hagarpá mia awesái? Rakéroa, vake ano tsaosho ãwẽ txakar ikí Yové Koĩni nĩkãai. 18Kawã, weníiná, vake mepáta, anõsho yora westíma ẽ revomakatsai”, akĩ.

19Aská akĩ anoshose Yové Koĩni Hagar vaná wakapasha tsaóa meramakĩ. Aská oĩinã weanivai kashõ ãwẽ vake amai kakĩ.

20Aská akĩ Ismael Yové Koĩni vesoki kanimáa. Kanisho, askata wenẽ Parã ivõ nishõ, tawã tekon iki kanesma nii. 21Anosho ãwẽ ewã Egito shavo ninivarãsho oĩmakĩ.

Abraãonĩ Abimeleque vana tavámatima ivõ itivo ivo yoã

22Aatiã shavapa, Abimeleque Abraãonĩ vananõ iinã chinãvaĩi kaí ãwẽ teske akaya kakáya Ficolnĩ. Askáki ano nokósho aská akĩ. “Katsése mĩ meearasĩ Yové Koĩni mia peshót akatõsho mĩ ikírvi. 23Ramaro Yové Koĩni anemẽsho vana tavámatima ivo ea neská ashõtso. Txipokiri ea, ẽ revomarasĩ aká noke parãóroa. Mia ẽ maĩ shaváyai mĩ nimaĩnõ mia ẽ aká keskásevi akĩ nokepa ivo yora askásevi noípakĩ vesoótso”, akĩ.

24Ãwẽ askámaĩnõ, “ase, mia ẽ aská ashõnõ askáro”, ikĩ 25revísmẽinã vamo ikí vanai, vaná wakamẽsho. Awesáma, Abimeleque shokõkenavõ, atonámamẽkĩ atõ viãkévaisho.

26Askái ãwẽ vanamaĩnõ Abimeleque vanai. “Tsoã mia avaira? Askáinãro rayá ea yoãshokĩnã. Mia atõ aská avai ea tanama, rama mĩ yoã nĩkãaivísi ẽ ikí”, akĩ.

27Askái tanáti tavámakĩnanãma ivõ vanai mashtévaĩvaíki, Abraãone ãwẽ txivo, ãwẽ txasho anika aatii ravé Abimeleque inãki. 28Aská avaikĩ ãwẽ txivo vake aĩ 7 atxivaíki inãóki. 29Ãwẽ aská akatõsho, “awesainã naaivorasĩ ea mĩ atxishoará?” 30ãwẽ akátõsho, “mia anõ onis ati mia ẽ atxishoátsikĩ. Vaná waka ẽ pokĩvai ivo ‘anõse ãatõ avai’, ikĩ ea mĩ chinãshonõ iinã mia ẽ inãa”, akĩ.

31Anosho askánanãvaíki vaná wakapasha “Berseba”, akĩ ane netãvo. Aaro neská akĩ atõ anea, ravé tavámatima ivoi atõ vanakiri chinãsho.

32Askái Bersebanamãsho mekikinanãvaí, Abimeleque, Ficol aatii filisteu yorarasĩni maikiri iovaĩóvo. 33Askámaĩnõ Abraão Bersebanamã vaná tamargueira ivo vanasho, Yavé, Awetima Yové ravisho nii. 34Askái ano filisteu yorarasĩni maĩ inoi nii.

Currently Selected:

Wenía 21: YKV

Highlight

Copy