Wenía 18

3 venerasĩni Abraão pokéshotivo ivo yoã

1Askávai txipo Yavepa Abraão meramatachíki, iwi carvalho Manrena ivonamã orakama ãwẽ nimaĩnõ. Askái vari isĩinámaĩnõ shanaka tanainã ãwẽ peshé ikoti veyó tsaókaĩi. 2Askái ano tsaósho patáináki ã oĩa, 3 yora oramachta shokoa meraki. Askái atõ shokoa merainã erékaĩi kaí ato veyó pakéi kashõ maĩ vetsek ipái kaí. 3Askái westímẽse eséyakĩ vana ainakĩ. “Ase, ‘shavá ichnátõsho mĩ vesokaĩmatsẽrã’, iinã mia ẽ ravĩshoasmẽkĩ, ea manátso. 4Nenosho tenetsoma, iwi tavá kãtxíshóse. Mato wakapasha ẽ yonoshóinã, mã anõ tatxó inõ. 5Ea mã pokéshoi vemaĩnõ matomẽ mekíai ea. Mato pitichta pimanõ, anõ vestẽinavaí iovaĩtánosho”, iinã ato ãwẽ akátõsho revívo, “mã ase, noke ashõ askáro”, ikívo.

6Askávaíki Abraãone erékaĩi kashõ ãwẽ peshepa ikosho ãwẽ aĩ Sara yonoki. “Trigo poto roapa ivo 10 kilos vivaikĩ, teyóvaíki, pão arí, rayá”, akĩ. 7Askávai anoshose Abraão erékawãkíse txasho shokoanamã ãwẽ peshkó roapa ivo kavẽsho atxivaíki aa mee ishõya inãki, “rayá naí arí, ave pinõvo”, iinã. 8Askái piti naíkaĩmaĩnõ, Abraãone “coalhada” atõ aká ivo, leite, nami naí ikitáya aatii veayavorasĩ setẽshokĩ ato pimaki.#18.8 Coalhadaro leite katxaka ivo Aská akĩ atõ pimaĩnõ, ato vesoi nii, iwi tavá.

9Anosho, “Abraãó, mĩ aĩ Saranã atorá?” akĩ nĩkãvotõsho, “peshepa rakáa”, ato akĩ.

10Askámaĩnõ westíkase vanainái. “Waa vari wetsa oáyatõ mia ẽ pokéki oĩói omaĩnõ, naaivo oshenamãsevi mĩ aĩ Sara vakeyakatsai”, ãwẽ akátõsho Sarã ato petxirisho nishõ peshé ikoti veyósho nĩkãki.

11Aatiãro Abraão ma sheniya, Sara ma yõshaya, vakeyati taváyavo. 12Askáinã Sarã osã ikí chinãki. “Ea shavo yomemakaĩmaĩnõ, ẽ vene sheniwetsayashonã ea mekímatirá? Nokẽ metsá ma keyóya”, ikĩ chinãki.

13Ãwẽ aská akĩ chinãmaĩnõ Yavepa Abraão nĩkãki. “Awesainã ãwẽ osãrakĩ, mĩ aĩninã? Awesainã ‘ea vakeyaotĩpá, ea ma yõsha mashtéya’, iinã ãwẽ ikírá? 14Eanã ẽ akátĩpa ivorasĩ ayará? Mia ẽ tanáshoanamã ea neno iokarãmaĩnõ, Sara vakeyakatsaivere”, akĩ.

15Ãwẽ aská nĩkãinã Sarã rakéinã parãki. “Awesa ea osã ikimakatá”, ãwẽ imaĩnõ, “Yoa iroa, mĩ osãaivere”, akĩ Yavepa.

16Anosho, aa pokéi veayavorasĩ wenínivaĩi voshõ, Sodomakiri nõ oĩnõ iinã shokovaĩsho oĩvo. Askái Abraão kochikaĩsho ato enei kakĩ. 17Askái ã kamaĩnõ, Yavepa arí chinãi vanai. “Ẽ akatsiki ivorasĩnã Abraãonã ẽ pãtemaspá? 18Ãwẽ yora shoko wetsa mestẽkatõ papa ikatsai. Anõsho, maitioi shokoa yora wetsarasĩ vana roapa netãnákatsa. 19Aaro kavẽnáya ivo yora. Ãwẽ vakerasĩ, ãwẽ revomarasĩ aká aská akĩ ato ave yononõ, ‘Yavé anõ atsoma chinã mekiyai shokotsoma’, iinã. Askái Abraão ẽ tanamayãtá ivo vana katsése ẽ ashõkatsa”, ikĩ chinãki. 20Aská avaikĩ Yavepa Abraão yoãshokĩ. “Sodomanĩ Gomorra yorarasĩ vana tavámai ichnápatõ ikí kakámtsãwa. 21Ano ẽ oĩpakéi kakatsai, atõ yoã ẽ nĩkãvaĩvaĩa, ‘yoa vanará, anõserá’, iinã”, ikí.

22Askávai anoshose pokéi veayavo ravévakĩ pashkávaĩi voávo Sodoma shavákirí, askámaĩnõ Yavéro anose Abraãonĩ niakéi. 23Askái Abraãone aa kesópáchta nii kashõ nĩkãki. “Awesára, yora chinã mekiyavo, ãwẽ ichnárasĩ aká õsikíse ato mĩ keyokatsa? 24Ano aaivo cidadenamã 50 chinã mekipa yora ayamaĩnõnã, atomẽ noísmẽinã ano shavapa shokoyavorasĩ katsése ato mĩ keyoskatsa, ato mĩ shokõskatsa? 25Õsikéki ato mia keyoma ikatsai taíse, katsékase mĩ vana tavámaipatsĩkĩ. Mia aská akátĩpa taíse. Miaro maitioi shokoyavo ato chinã meki ashõyarvi, Askáshovísi mekika akĩ ato mĩ chinãshoti”, akĩ.

26Ãwẽ askámaĩnõ Yavepa revínióki. “Sodomanamã 50 chinã mekipa yora ẽ meraa ivoro atomẽsho aaivo shavá ea keyoma ikatsai”, akĩ.

27Anosho Abraão nĩkãnióki. “Neskátõ mivé ea vana vanatĩpamẽkĩ ẽ vana isai, miaro Yové ivo, askámaĩnõ earo ichnárvi, michpo, mai poto aká keskárvi. 28Askámaĩnõ ano 45 yora aská ayamaĩnõ, naa 5 yorachtase pashkámẽkĩ shavátióse mĩ aoskatsa keyokinã?” ãwẽ imaĩnõ, Yavepa revíóki. “45 ato ẽ meraa ivoro ea ato keyoma ikatsai”, akĩ.

29Askámaĩnõ Abraão ioinaósi. “Askámaĩnõ 40 ayamaĩnõrora?”

“40 ato ẽ meraa ivoro ea ato keyoma ikatsai”, akĩ.

30Askámaĩnõ Abraão ioinaósi. “Eki ichnákeroa Yavepá, mia ẽ nĩkãómaĩnõ. 30chtase ayamaĩnõrora?” ãwẽ akátõsho, “30 ato ẽ meraa ivoro ea ato keyoma ikatsai”, aoi.

31Askámaĩnõ Abraão aonióski. “Nĩkãsmẽinã mia nĩkãoirívi. 20kase ayamaĩnõrora?”

“20 ato ẽ meraa ivoro ea ato keyoma ikatsai”, akĩ.

32Askámaĩnõ Abraãone anõkasho enevaĩkatsiinã vanaoníki. “Ichnákeroa Yavepá, naaro anõkasho enékaĩa ivo mia ẽ nĩkãrívi. Askámaĩnõ 10namãchtarorá?” ãwẽ aská akatõsho, “naatii 10 ato ẽ meraa ivoro, ea ato keyoma ikatsai”, akĩ.

33Askái Yavé Abraãonĩ vanai mashtékaĩvaí ãwẽ kamaĩnõ, Abraãoro arimẽse ã shavapa iokarãói.

Currently Selected:

Wenía 18: YKV

Highlight

Copy