Лука 8

8-тӥ ЛЮКЕТ

1Собере Иисус, Инмар Эксэйлыкез тодытыса, Ӟеч Ивор вераса, городъёстӥ, гуртъёстӥ ветлӥз. Соин ӵош дас кык дышетскисьёсыз ветлӥзы, 2нош озьы ик куд-ог кышномуртъёс но Со сьӧрын ветлӥзы, соосты Со периослэсь мозмытӥз, висёнъёслэсь бурмытӥз: пушкысьтыз сизьым периос потэм Магдалина шуон Мария; 3Иродлэсь юртъерзэ утьыса улӥсь Хузалэн кышноез Иоанна, озьы ик Сусанна но трос мукетъёсыз. Соос Иисуслы асьсэлэн ваньбуренызы юрттӥськыса улӥзы.

4Трос калык люкаськиз, вань городъёсысь калык Иисус котыре лыктӥз. Со мадён пыр вераны кутскиз: 5«Кизись кидыссэ кизьыны потэм. Кизьыкуз куд-огез сюрес дуре усем но лёгаськем, ин тылобурдоос сое кокчаса быдтӥллям. 6Куд-огез из вылэ усем, потэм но шуям, малы ке шуоно мускытэз вылымтэ. 7Куд-огез бышкись будосъёс куспы усем, бышкись будос ӝужам но ӝокатэм сое. 8Куд-огез ӟеч музъеме усем – будэм но сю полэс емыш ваем». Тае верам бераз бадӟым куараен ялӥз: «Кылыны пельыз вань мурт – мед кылоз!» 9Дышетскисьёсыз Солэсь юазы: «Та мадён мае возьматэ?» 10Со шуиз: «Тӥледлы Инмар Эксэйлыклэсь ватӥськыса улӥсь зэмлыксэ тодон сётэмын, нош мукетъёслы – мадёнъёс пыр, соин ик соос учко, но уг адӟо, кыло, но уг валало. 11Тани мае та мадён возьматэ: кидыс – со Инмарлэн кылыз. 12Сюрес кузя усемез – со сыӵе кылзӥсьёс, кинъёс доры бӧрысь диавол лыктэ но, медаз оске, медаз утиське шуыса, соослэн сюлмысьтызы Инмар кылэз нуэ. 13Из вылэ усемез – со сыӵеос, кинъёс кылэз кыло но шумпотыса кабыл басьто, но выжызы ӧвӧл: огдырын оско, нош визь сынаськон вуэ ке, усё. 14Бышкись будосъёс пӧлы усемез – со сыӵеос, кинъёс кылэз кылзо, но сюлмаськонъёсын, узырлыкен, майбыръяськыса улонэн нюртӥсько, соин ик емыш уг ваё. 15Нош ӟеч музъеме усемез – со сыӵеос, кинъёс Инмар кылэз кыло но лякыт, чылкыт сюлмазы возё, чиданэнызы емыш ваё». Тае вераз но бадӟым куараен шуиз: «Кылыны пельыз вань мурт – мед кылоз! 16Нокин но сюсьтылэз ӝуатыса посудаен уг шобырты яке кровать улэ уг пукты, пырисьёс югытэз мед адӟозы шуыса, сюсьтыл пуктонэ пукто. 17Уго ӧвӧл нокыӵе но лушкем маке, кудӥз шарае потытэк уг кыльы, нокыӵе ватӥськемлэн но тодмо луытэк, шарае потытэк кылемез уг луы. 18Чаклалэ, мае тӥ кылзӥськоды, уго кинлэн вань, солы сётэмын луоз; кинлэн ӧвӧл, солэсь, мае вань карыны малпа, соиз но басьтэмын луоз».

19Иисус доры Анаез, братъёсыз лыктӥзы но калык тросысь Со доры пырыны ӧз быгатэ. 20Солы ивортӥзы: «Анаед но братъёсыд, Тонэ адӟемзы потыса, педлон сыло». 21Соослы ответ сётыса, Иисус шуиз: «Мынам анае, Мынам братъёсы соос, кинъёс Инмар кылэз кылзо но сое быдэсъяло».

22Одӥг нуналэ Иисус дышетскисьёсыныз ӵош пыже пыриз но соослы шуиз: «Зарезьлэн тупалаз выжоме». Собере соос кошкизы. 23Уякузы Со умме усиз. Зарезь вылын кужмо тӧл ӝутскиз но соосты тулкымен пылатъяны кутскиз, соос секыт учыре сюризы. 24Дораз лыктыса, Сое сайкатӥзы но шуизы: «Дышетӥсь! Дышетӥсь! Быриськомы». Нош Со султыса, тӧллы но вулэн тулкымъяськонэзлы алыса вераз. Соку тӧл дугдӥз, ву вылын чус луиз. 25Собере дышетскисьёсызлы Иисус шуиз: «Кытын тӥляд осконды?» Нош соос кышкаса но паймыса огзылы огзы веразы: «Кин Та, тӧллы но, вулы но косыса вера но, соос Солэсь кылзӥсько?»

26Галилеялы ваче пумитэ интыяськем Гадара шаере вуизы. 27Ярдуре потэм бераз городысь кемалась дырысен периосын ёртэм, дӥськут дӥсятэк, коркан улытэк, шайгу пещераосын улӥсь одӥг адями Сое пумитаз. 28Иисусэз адӟыса черектӥськиз но, Со азе пыдесъяськыса, бадӟым куараен вераз: «Иисус, Вылысь Инмарлэн Пиез, Тынад мон бордын мар ужед? Тэльмырыса Тонэ курисько, эн курадӟыты монэ». 29Уго Иисус перилы та адями пушкысь потыны косӥз, уго со кема дыр ӵоже сое курадӟытыса возиз. Сое утён понна думылыса, жильыяса возизы. Нош со думетъёсты тӥялляз, пери сое кыр дуннеосы улляса нуллӥз. 30Иисус солэсь юаз: «Кызьы тынад нимыд?» Со шуиз: «Легион», малы ке шуоно со пушкы трос периос пыремын вал. 31Пыдэстэм гуэ соосты медаз улля вал шуыса, соос Иисусэз куризы. 32Татын ик гурезьын бадӟым парсь уллё возьмаське вал. Периос Сое куризы, соос пушкы пырыны мед лэзёз вал шуыса. Соосты Со парсьёс пушкы пырыны лэзиз. 33Адями пушкысь потыса, периос парсьёслэн пушказы пыризы; соку парсь уллё меӵ ярысен зарезе тэтчаз но вуэ выйиз. 34Мар луэмез адӟыса, парсь возьмасьёс бызьыса кошкизы, городын но, гуртъёсын но та сярысь ивортӥзы. 35Луэм учырез адӟыны потӥзы. Иисус доры лыктыса адӟизы Иисуслэн пыд выжыяз дӥсяськыса, визьмын пукись адямиез, кудӥз пушкысь периос потӥзы. Соос туж куалектӥзы. 36Адӟисьёс соослы веразы перияськем муртлэсь кызьы бурмемзэ. 37Гадара ёросысь вань калык Иисусэз дорысьтызы кошкыны куриз, уго соосты туж бадӟым куалектон ёртӥз. Со пыже пыриз но потэм интыяз берытскиз. 38Периосыз потэм мурт Иисусэз куриз Соин огазьын луыны. Нош Иисус сое бертыны косыса шуиз: 39«Аслад дорад берт но вера, мар тыныд Инмар лэсьтӥз». Со мыныса быдэс городэтӥ Иисуслэсь соин мар каремзэ тодытыса ветлӥз.

40Иисус берытскем бере калык Сое ӟеч пумитаз, уго ваньзы Сое возьмало вал. 41Соку сӥнагогалэн Иаир нимо кивалтӥсез лыктӥз. Иисуслэн азяз пыдесъяськыса, Сое аслаз корказ пырыны куриз, – 42солэн ог дас кык аресъем одӥг гинэ нылыз вал, со но кулоно кадь черлам. Со мыныку, калык Сое ӝиптӥз. 43Соку вирыз кошкыса дас кык ар ӵоже курадӟыса улӥсь кышномурт, кудӥз вань юртъерзэ врачъёслы тырыны быдтӥз, нош йӧнатыны огез но сое ӧз быгаты, 44бертӥз лыктыса, Иисуслэн дӥсянэзлэн сӧзы бордаз йӧтӥськиз. Со куспын ик вирыз виямысь дугдӥз. 45Иисус шуиз: «Кин Мон борды йӧтӥськиз?» Куке ваньзы «ӧм» шуизы, Петр но Соин ӵош луэмъёс веразы: «Дышетӥсь! Калык Тонэ котыртэ, ӝиптэ, нош Тон шуиськод: ”Кин Мон борды йӧтӥськиз?”» 46Соку Иисус шуиз: «Кин ке но Мон борды йӧтӥськиз. Мон шӧдӥ пушкысьтым кужымлэсь потэмзэ». 47Ватыны луымтэзэ адӟыса, кышномурт куалектыса лыктӥз но, Со азе пыдесъяськыса, вань калык азьын Солы ялӥз, кыӵе муген Со борды йӧтӥськиз но кызьы со куспын ик бурмиз. 48Иисус шуиз: «Сэзь лу, нылмурт! Осконэд тонэ утиз. Каньылэн берт». 49Тае веран куспетӥз кин ке но, сӥнагогалэн кузёез дорысь лыктыса, солы шуиз: «Нылыд кулӥз. Эн ни раньӟыты Дышетӥсез». 50Та кылъёсыз кылыса, Иисус солы шуиз: «Эн кышка, оскы гинэ, утемын луоз». 51Корказы вуыса, Петрез, Иоаннэз, Иаковез но ныллэсь атаеныз анайзэ сяна, нокинэ но бӧрсязы пырыны ӧз лэзьы. 52Со ныл понна ваньзы бӧрдӥзы, викышъязы, нош Иисус шуиз: «Эн бӧрдэ, со кулэмын ӧвӧл, со изе гинэ». 53Ныллэсь кулэмзэ тодыса, Сое серем каризы. 54Нош Со ваньзэс педло поттӥз, нылмуртэз китӥз кутӥз но солы бадӟым куараен вераз: «Нылаш! Султы». 55Ныллэн лулыз берытскиз; соку ик со султӥз. Иисус солы сиён сётыны косӥз. 56Анай-атайёсыз паймизы. Нош Иисус та луэм учыр сярысь нокинлы но вераны ӧз косы.

Currently Selected:

Лука 8: УДМБИБ

Highlight

Copy