Апостолъёслэн ужъёссы 8

8-тӥ ЛЮКЕТ

1Стефанэз виемзэс Савл умой уж луэ шуыса лыдъяз. Со нуналысен Иерусалимын черкез туж зол ёртыны кутскизы. Ваньмыз, апостолъёс сяна, Иудеялэн но Самариялэн пӧртэм палъёсаз пазьгиськоно луизы. 2Стефанэз вӧсяськись муртъёс ватӥзы, со понна туж бӧрдӥзы. 3Нош Савл черкез улляны, ӝикатыса возьыны кутскиз. Коркаосы пыраса, пиосмуртъёсты но, кышномуртъёсты но гыж кыскаса поттылӥз, пытсэтэ сётылӥз.

4Соку пазьгиськемъёс пӧртэм палъёстӥ ветлӥзы но Ӟеч Иворез тодытӥзы. 5Озьы Филипп, Самарияысь городэ вуыса, соослы Христос сярысь тодытыны кутскиз. 6Филипплэсь тодытэмзэ кылыса, солэсь паймымон ужъёс лэсьтэмзэ адӟыса, трос калык солэсь верамзэ кабыл басьтӥз. 7Уго трос адямиос пушкысь периос шуш куараен кеськыса потылӥзы, трос пери шуккемъёс, чутӥсьёс бурмылӥзы. 8Соку со городын бадӟым шумпотон вал.

9Со городын ик Симон нимо кыӵе ке но пиосмурт вал, со тунаськыса-пелляськыса улӥз, Самарияысь калыкез паймытылӥз, ассэ кыӵе ке но вылӥ мурт карыса возьматыны тыршиз. 10Пичиысен бадӟымозь – ваньмыз солэсь кылзӥськизы, шуо вал: «Та – Инмарлэн быдӟым кужымез». 11Кема дыр ӵоже со соосты тунатсконъёсын паймытылӥз, соин ик солэсь сак кылзӥськизы. 12Нош куке Филипплэн Инмар Эксэйлык сярысь, Иисус Христослэн нимыз сярысь Ӟеч Ивор верамезлы оскизы, соку пиосмуртъёс но, кышномуртъёс но пылатӥськизы. 13Ачиз Симон но оскыны кутскиз. Пылатӥськем бераз со Филипп вӧзысь ӧз кошкылы ини; бадӟымесь, кужмо ужъёслэсь, паймымон тодметъёслэсь ортчылэмзэс адӟыса паймылӥз.

14Самарияысь адямиослэсь Инмар кылэз кабыл басьтэмзэс кылыса, Иерусалимын улӥсь апостолъёс соос доры Петрез но Иоаннэз ыстӥзы. 15Оскыны кутскемъёс Святой Духез басьтыны мед быгатозы шуыса, апостолъёс вӧсяськизы. 16Соос пӧлысь огзы вылэ но Святой Дух та дырозь васькымтэ на вал уго, соос Кузё-Инмарлэн Иисуслэн нимыз понна гинэ пылатэмын вал. 17Соку апостолъёс соос вылэ кизэс понӥзы но, соос Святой Духез кабыл басьтӥзы. 18Апостолъёслэн кизэс понэм пыр Святой Дух сётэмын луэ шуыса, Симон адӟиз но Петрен Иоаннлы коньдон вайиз, 19соослы со шуиз: «Мыным но сыӵе кужым сётэ – кин вылэ киме понӥ ке, со Святой Духез мед басьтоз». 20Нош Петр солы шуиз: «Тынад азвесед асэныд ӵош быроно мед луоз, – Инмарлэсь кузьымзэ тон уксёен басьтыны малпад уго! 21Татын тынад люкетэд, люкет басьтонэд ӧвӧл, малы ке шуоно Инмар азьын тынад сюлмыд чылкыт ӧвӧл. 22Та сьӧлыкед понна ӧпкельы, Инмарлы вӧсяськы: оло, сюлмыдлэсь та урод малпанзэ Со уз кушты-а; 23адӟисько уго: сэпед пӧсьтымон луэмын ни, урод ужъёслэн сьӧлтэтазы улӥськод». 24Соку Симон шуиз: «Мон понна Кузё-Инмарлы вӧсяськелэ, тӥляд верамъёсты пӧлысь огез но мон вылэ медаз вуы шуыса». 25Апостолъёс вань адӟемзэс верамзы но Кузё-Инмарлэсь кылзэ тодытэмзы бере берен Иерусалиме кошкизы. Бертыкузы Самарияысь тросаз гуртъёсын Евангелиез тодытӥзы.

26Филипплы Кузё-Инмарлэн Кылчинэз шуиз: «Султы но лымшор пала, Иерусалимысь Газае васькись сюрес вылэ, мын. Со калыктэм инты». 27Со султӥз, отчы мынӥз. Тани, Эфиопияысь адями, евнух#8:27 евнух – Востокысь эксэйёслэсь юртъерзэс утись-чаклась мурт; кандакия – Эфиопия кунысь кышномурт эксэйёслэн сӥё-дано нимзы (титулзы), Эфиопияысь эксэй кышномуртлэн, кандакиялэн*, юртаз кузёйыр, солэсь вань узырлыксэ возьмаса улӥсь мурт, Иерусалиме йыбырттыны вуылӥз. 28Бертон сяменыз, уробояз пукыса, Исаия пророклэсь гожъямзэ лыдӟыса мынӥз. 29Дух Филипплы шуиз: «Мын та уробо вӧзтӥ». 30Филипп матаз мынӥз. Уробоын пукись Исаия пророклэсь гожъямзэ лыдӟе шуыса кылэм бераз солы шуиз: «Мар лыдӟиськод, валаськод-а?»

31Со мурт шуиз: «Нокин но ӧз дышеты бере, кызьы валалом?» Собере со Филиппез уробояз тубыны но асэныз артэ пуксьыны косӥз. 32Нош Священной Гожтэмысь лыдӟоно люкетаз тазьы гожтэмын вал: «Ыж кадь вандыны Со нуэмын вал, ыж ӵышкись азьысь ыжпи кадь Со куаратэм вал, Аслэсьтыз ымзэ ӧз усьтылы. 33Сое ултӥязы, шонер судить ӧз каре, нош Солэн выжыез сярысь кин вераны быгатоз? Уго Солэн улонэз музъем вылысь басьтӥське ни». 34Евнух Филипплы шуиз: «Курисько тонэ: кин сярысь озьы пророк вера? Оло, ас сярысьтыз яке кин ке но мукетыз сярысь-а?» 35Соку Филипп вераны кутскиз. Та Гожтэмысен кутскыса, Иисус сярысь солы Ӟеч Ивор тодытӥз. 36Сюрес кузя мынон сямен соос ву дуре вуизы. Соку евнух шуиз: «Тани, ву. Мар мыным люкетэ пылатӥськыны?» 37Нош Филипп солы шуиз: «Вань сюлмысьтыд оскиськод ке, луоно». Соку эфиоп пи ответ сётыса шуиз: «Оскисько, Иисус Христос Инмар Пи луэ шуыса». 38Валзэ дугдытыны косӥз, нош собере кыкназы ик вуэ пыризы: Филипп но, евнух но. Филипп сое пылатӥз. 39Соос вуысь потэм бере Святой Дух евнух вылэ васькиз. Нош Филиппез Кузё-Инмарлэн Кылчинэз нуиз, евнух сое ӧз адӟы ни, со шумпотыса сюрес кузя азьпала мынӥз. 40Нош Филипп Азотэ вуттэмын вал. Татысен Кесарияе вуытозяз, вань городъёстӥ Ӟеч Ивор тодытыса ветлӥз.

Currently Selected:

Апостолъёслэн ужъёссы 8: УДМБИБ

Highlight

Copy