Апостолъёслэн ужъёссы 4

4-тӥ ЛЮКЕТ

1Петрен Иоанн калыклы Инмар кылэз тодытыса улыку, соос доры священникъёс, храмын возьмаськисьёслэн кузёйырзы но саддукейёс лыктӥзы. 2Соос апостолъёслэн калыкез дышетэмзы но Иисус пыр кулонысь улӟыса султонэз тодытэмзы понна йыркуръяськизы. 3Соосты кырмизы но ӵукнаозьлы возьмаськисьёс киулэ сётӥзы; уго ӝыт вуэмын вал ини. 4Та тодытонэз кылзӥськисьёс пӧлысь тросэз оскыны кутскизы; оскись муртъёс ог вить сюрс мында вал.

5Мукет нуналэ Иерусалиме кузёйыръёс, тӧроос, книга тодӥсьёс, 6Анна архиерей но Каиафа, Иоанн, Александр, нош озьы ик архиерей выжыысь мукет муртъёс люкаськизы. 7Апостолъёсты шораз султытыса юазы: «Кыӵе кужымен, кинлэн нимыныз тае тӥ лэсьтӥды?» 8Соку Петр, Святой Духен тыр луыса, соослы шуиз: «Калыклэн кузёйыръёсыз, Израильлэн тӧроосыз! 9Туннэ милесьтым висись муртлы ӟеч лэсьтэммы понна, кызьы со бурмытэмын вал шуыса ответ куро ке, 10ваньдылы тӥледлы, быдэс израиль калыклы тодмо мед луоз шуыса верасько: Назаретысь Иисус Христослэн, Кинэ тӥ кортӵогады но Кинэ Инмар кулэмысь улӟытыса султытӥз, Солэн нимыныз та висись тӥ азе висисьтэм карыса султытэмын; 11Иисус – Со из, тӥледын, лэсьтӥськисьёсын, кулэтэм карем, корка сэреглы инъет луэм из. Со бордын сяна, нокин бордын но утиськон ӧвӧл. 12Инбам улын адямиослы сётэмын ӧвӧл мукет ним, кудӥз пыр асьмеос мед быгатысалмы утиськыны».

13Петрен Иоаннлэсь кышкасьтэм луэмзэс адӟыса, соослэсь дышетскымтэ, огшоры адямиос луэмзэс валаса, кенеше лыктэмъёс паймизы. Но соос тодмазы, та адямиос Иисусэн огазьын ветлӥсьёс вал шуыса. 14Апостолъёсын огазьын сылӥсь бурмытэм адямиез адӟыса, соослы пумит номыр но вераны ӧз быгатэ ни. 15Апостолъёсты сӥнедрионысь потыны косӥзы. Асьсэос куспазы кенешизы. 16Шуизы: «Та адямиосын асьмелы мар кароно? Уго Иерусалимын вань улӥсьёслы тодмо луиз, шарае потӥз соосын лэсьтэм паймымон уж, нош асьмеос со ӧй вал шуыны ум быгатӥське. 17Калык пӧлы та эшшо но медаз вӧлмы шуыса, соосты кышкатоме, Иисуслэн нимыз сярысь ноку но нокинлы но адямиослы вераны ум лэзе». 18Соосты ӧтизы но Иисуслэн нимыз сярысь вераны но, дышетыны но чик ӧз лэзе ни. 19Нош Петрен Иоанн соослы ответ сётыса шуизы: «Асьтэос судить каре: Инмар азьын шонер-а луоз, Инмарез сярысь, тӥледыз золгес кылзӥськыны? 20Ми ум быгатӥське адӟеммес но, кылэммес но вератэк улыны». 21Нош соос апостолъёсты эшшо огпол кышкатӥзы на. Калыкен сэрен вӧсь карыны луонлык шедьтытэк, соосты лэзизы, малы ке шуоно та учыр бере вань калык Инмарез данъяса улӥз. 22Нош со адямилы, кудӥз вылын ортчиз паймымон бурмон, ньыльдон ареслэсь ятыр вал ини.

23Мозмытскем беразы Петрен Иоанн асьсэлэнъёс доры лыктыса веразы, мар соослы архиерейёс но тӧроос шуизы. 24Оскисьёс соосты ӧз кылзӥське, соос ваньзы, огкылысь кариськыса, куаразэс будэтыса, Инмарлы вазиськизы: «Кузё-Атаймы, Инмармы, Тон инэз но, музъемез но, зарезез но – ваньзэ, маиз соос пушкын вань, Кылдытӥсь! 25Тон Аслад ляльчиедлэн, милям атаймылэн Давидлэн, ымыныз Святой Дух пыр верад: ”Малы калыкъёс бугыръясько, калык выжыос ярантэм уж лэсьтыны ӧдъяло? 26Музъем выл эксэйёс ӝутӥсько, кивалтӥсьёс Кузё-Инмарлы, Солэн Христосэзлы пумит огазе люкасько”. 27Зэмзэ ик, та городын Иисуслы, Тынад Дун-Сьӧлыктэм Пиедлы, Вӧйын Зырӟыса Пуктэмедлы, пумит Ирод но Понтий Пилат язычникъёсын, израиль калыкен валче люкаськизы 28лэсьтыны сое, мае Тынад киыд, Тынад визь-кенешед азьвыл ик лэсьтыны малпазы вал. 29Кузё-Инмармы, соослэн кышкатонъёссы шоры али учкы но Аслад ляльчиосыдлы чик кышкатэк Тынэсьтыд кылдэ вераны луонлык сёт; 30висисьёсты бурмытыны кидэ сёт, Аслад Дун-Сьӧлыктэм Пиедлэн Иисуслэн нимыныз паймымон тодметъёс, паймымон ужъёс лэсьты». 31Вӧсяськем беразы соослэн люкаськем интызы зурказ, ваньзы, Святой Духен тыр луыса, Инмар кылэз кышкатэк вераны кутскизы.

32Ваньмыз оскыны кутскем муртъёс огкадь лулын-сюлмын, огкадь мылкыдын улӥзы. Нокин но аслаз ваньбур пӧлысьтыз номыре но таиз мынам аслам шуыса ӧз нима, – ваньмыз соослэн огазьын, огъя вал. 33Кузё-Инмарлэн Иисус Христослэн улӟыса султэмез сярысь апостолъёс вань кужымзэс сётыса ивортылӥзы. Соослэн ваньзылэн вылазы Инмарлэн быдӟым дэлетэз улӥз. 34Соослэн пӧлазы нокин но ӟудыса улӥсь ӧй вал: уго кинлэн музъемез яке коркаосыз вал, соосты вузазы но вузам дунзэс вайыса 35апостолъёслэн пыд выжыязы тырылӥзы, нош соос ӟудыса улӥсьёслы сое сётылӥзы-люкылӥзы. 36Тани, апостолъёсын Варнава шуыса нимам Иосия, солэн нимыз «буйгатӥсь» шуэм луэ, левит, Кипрын вордскем мурт, – 37солэн аслаз музъемез вал, – музъемзэ вузаз но коньдонзэ вайыса апостолъёслэн пыд выжыязы понӥз.

Currently Selected:

Апостолъёслэн ужъёссы 4: УДМБИБ

Highlight

Copy