Лука 22

Иуда срхкай мимс Иисусонь

(Матф. 26:1-5; Марк 14:1,2,10,11; Иоанн 11:45-53)

1Малаткшнесь аф шапама кшинь илась, конань лемоц – Очижи. 2Озксвятиень оцюнятне и койти тонафтыхне пельсть ломаттнень эзда, сяс синь ламос синнезь пряснон, кода машфтомс Иисусонь.

3И вов Сатанась сувась Иудань потмос, конань лемнезь Искариотокс. Сон ульсь кемгафтува тонафнихнень эзда фкясь. 4Сон мольсь и корхнесь озксвятиень оцюнятнень и Шкаень кудть ванфты оцюнятнень мархта, кода максомс тейст Иисусонь. 5Сят кенярдсть и надияфтсть Иуданди тянкса ярмак. 6Иуда макссь тейст вал мимс Иисусонь и учсесь ётка, кода тянь тиемс ломаньда салава.

Очижинди анокламась

(Матф. 26:17-25; Марк 14:12-21; Иоанн 13:21-30)

7Сась аф шапама кшинь шись, мзярда эрявсь печкомс очижинь вероз. 8Иисус кучезень Пёторонь и Иоаннонь, мярьгсь: «Арда, аноклада тейнек очижинь ярхцама». 9Синь кизефтезь: «Коса мярьгат анокламда?» 10Иисус мярьгсь тейст: «Ошу сувамстонт васьфттяда ведь кукшенень канды аля; моледа мельганза ся куду, конанди сувай. 11Мярьгода кудазорти: "Тонафтысь кизефнетянза тонь: коса кудбялькссь, конаса Тейне тонафнинень мархта ярхцама очижинь ярхцамбяльда?" 12Сон няфти тейнть оцю урядаф вярдень кудбялькс; тоса аноклатада». 13Синь тусть, и семботь музь стане, кода тейст мярькфоль, и анокласть очижинь ярхцама.

Очижинь илядень ярхцамась

(Матф. 26:26-30; Марк 14:22-26; 1 Кор. 11:23-25)

14Мзярда сась пингсь, Иисус и кемгафтува апостолхне озасть шрать ваксс. 15Сон мярьгсь тейст: «Конашкава оцюволь мялезе ярхцамс мархтонт Очижинь тя ярхцамбяльда маятамдон инголе. 16Азса тейнть, тяда меле Мон аф ярхцан Очижинь ярхцамбяльда ся пингть самс, мзярс аф пяшкодеви сон Шкаень Оцязорксшиса». 17Сон сявозе кядьготь и сюконямань азозь мярьгсь: «Сявость и явость сонь эсь ётковант. 18Азса тейнть, тяда меле Мон аф симан виноградонь винада, мзярс аф сай Шкаень Оцязорксшись».

19Меле Иисус сявозе кшить, азсь сюконяма Шкайти, синдезе и максозе тейст, корхтась: «Тя Монь ронгозе, кона максови тинь инксонт. Тянь тиендесть Монь лятфнемган». 20Илядень ярхцамада меле Сон тяконь лаца сявозе кядьготьке и мярьгсь: «Тя кядьгось – од соткс, кона кемокстаф Монь версон; сон валови тинь инксонт. 21Вов ванода, Монь миизень кядец фкя шра лангса Моннеть мархта. 22Ломанень Цёрась моли стане, кода Тейнза инголькиге ладяфоль, но вай, кодань кальдяв ули ся ломанти, кона мисы Сонь». 23Тонафнихне ушедсть кизефнема фкя-фкянь, кие ёткстост ся, кона тисы тянь.

Кие сембода оцю?

24Тонафнихне эсь ётковаст кармасть пялькстома: кие ёкстост лувома сембода оцюкс. 25Иисус мярьгсь тейст: «Оцязорхне азорондайхть ломаньтналхнень лангса, и ломаттне эсь лангсост азорондайхнень лемнесазь паронь тиикс. 26Тинь ётксонт улеза аф тяфта. Кие тинь эздонт инь оцю, ся вятеза прянц стане, бта сон ёмла, и оцюнясь – бта сон покоди. 27Кие сяда оцю: шра ваксса озадось али мельганза якай покодись? Афоли шра ваксстось? Но Мон тинь ётксонт покоди лацан.

28Тинь уледе Монь мархтон сембе Монь сталмонень пингста. 29Сяс Мон максан тейнть Оцязорксши, кода Монь Алязе максозе сонь Тейне. 30Тинь карматада ярхцама и симома шразень ваксса Монь Оцязорксшисон, и озатада оцязоронь озама вастс Израилень кемгафтува юропнень судендамост».

Иисус инголькиге азонды Пёторонь потаманц колга

(Матф. 26:31-35; Марк 14:27-31; Иоанн 13:36-38)

31Азорсь мярьгсь: «Симон, Симон, ватт! Сатанати максовсь варжамс тинь и понжафтомс, кода тозерть. 32Но Мон озондонь тонь инксот, афоль юма тонь кемамаце. И меле, мзярда тон мрдат Тейне, кемокстайть эсь кемай ялгатнень». 33Пётр каршезонза мярьгсь: «Азор, мон анокан молемс мархтот нльне пякстамгудс и куломас». 34Но Иисус мярьгсь: «Корхтан тейть, Пётр, тячи атякшсь аф кенери моразевомс, кода тон колмоксть мярьгат – аф содасамак Монь».

35Иисус кизефтезень синь: «Мзярда кучседязь тинь ярмакфтома и канксфтома, и карьсембяльфтома, ульсь али аш тинь кодамовок афсатыксонте?» Сят каршезонза: «Ашель». 36Эста Сон мярьгсь тейст: «Но тяни, кинь ули ярмакоц, ся сявоза, стане канксонцка; кинь аш тороц, ся миза лангонь щамонц и рамаза тор. 37Мон азса тейнть, Монь лангсон пяшкодеви ся, мезе тяштьф Сёрматфксса: "Зиянонь тиикс лувозь". Вдь ся, мезе Монь колган сёрматф, курок пяшкоди». 38Тонафнихне мярьгсть: «Азор, вов тяса кафта торхт». Сон мярьгсь тейст: «Саты».

Иисус озонды Вайшуфта панда пряса

(Матф. 26:36-46; Марк 14:32-42)

39Иисус лиссь ошста и, кода фалу, тусь Вайшуфта пандть лангс, мельганза тусть тонафниензовок. 40Тов пачкодемста мярьгсь тейст: «Озондода, варчсемстонт афоледе пра пежес». 41Сонць аердсь эздост кев ёрдамшка вастс и, плманжа лангс аразь, озондсь. 42«Аляй! Кда ули мяльце, ётафтк тя кядьготь Монь вакскан! Но улеза Тонь мяльце, аф Моннесь». 43Эвондась Тейнза менельста ангел и кемокснезе Сонь. 44Оцю сярятьфонь марязь, Сон нинге сяда вииста озондсь; и Сонь ливозец ульсь вер путерькснень лаца, конат путнясть модати.

45Озондомда меле Иисус стясь и мольсь тонафниензонды. Сон сатозень синь удозь, сяс мес синь матодовсть пичедемать эзда. 46Сон мярьгсь тейст: «Мес удотада? Стяда и озондода, варчсемстонт афоледе пра пежес».

Иисусонь кундамац

(Матф. 26:47-56; Марк 14:43-50; Иоанн 18:3-11)

47Мзярда Сон нинге корхтась, сась лама ломаньда, и инголест мольсь Иуда, кемгафтувотнень ёткста фкясь. Сон нежедсь Иисусонди паламонза, сяс мес сон мярьгсь тейст: «Кинь паласа, ся Сон». 48Иисус мярьгсь тейнза: «Иуда! Афоли паламаса мисак Ломанень Цёрать?» 49Иисусонь мархтотне шарьхкодезь, коза моли тевсь, мярьгсть Тейнза: «Азор, пади тейнек эрьхтемс торса?» 50Ёткстост фкясь эрьхтезе торса озксвятиень оцюнять покодиенц и керозе види пиленц. 51Эста Иисус мярьгсь: «Лоткада, саты». Токафтозе кяденц сянь пиленцты, пчкафтозе сонь.

52Эста Иисус мярьгсь озксвятиень оцюнятненди, Шкаень кудть ванфты оцюнятненди и ломаньтналонь оцюнятненди, конат састь Сонь кундамс: «Тинь саде Монь сявомс торса и пяльса, кода нельги-шави ломанень мельге! 53Мон эрь шиня улендень мархтонт Шкаень кудса, и тинь ашеде кепсе лангозон кятть. Но тяни тинне пингсь и азорондай шобдась».

Пётр потай Иисусонь эзда

(Матф. 26:57,58,69-75; Марк 14:53,54,66-72; Иоанн 18:12-18,25-27)

54Синь сявозь Иисусонь и вятезь озксвятиень оцюнять кудс. Пётр ичкозьге мольсь мельгаст. 55Пирьф кучкаса крьвястсть толмар и озсесть перьфканза. Пёторга озась ёткозост. 56Фкя покоди авась, няемок сонь толмарть ваксса озафста, пезфтазень лангозонза сельмонзон, и мярьгсь: «Тявок ульсь Сонь мархтонза». 57Пётр сёпсь, мярьгсь авати: «Мон аф содаса Сонь». 58Аф лама пингонь ётазь лия ломань няезе Пёторонь и мярьгсь: «Тонга синь эздост». Но Пётр мярьгсь тя ломанти: «Аф, ялгай». 59Частшкада меле нинге фкясь кемоста азозе: «Виде, тявок мархтонзоль, няк, Галилеянь эряй». 60Но Пётр мярьгсь ся ломанти: «Мон аф содаса, мезе тон корхтат». Ся ёткть, мзярда сон нинге корхтась, моразевсь атякшсь. 61Эста Азорсь шарфтсь и варжакстсь Пёторонь лангс; Пётр лятфтазень Азорть валонзон, кода Сон мярьгсь тейнза: «Аф кенери атякшсь моразевомс, кода тон колмоксть азсак – аф содасамак Монь». 62Пётр лиссь тоста и ризфта пяшксе седиса аварьгодсь.

Иисусонь сялдсазь и пеетьсазь

(Матф. 26:67,68; Марк 14:65)

63Ломаттне, конат кирдезь Иисусонь, пеетькшнесть лангсонза и пикссезь Сонь. 64Синь сотнезь Иисусонь сельмонзон, эрьхнезь шамати и кизефнезь: «Пророчендак, кие эрьхтензе?» 65Лама лия сялдомань валхт азондсть Тейнза.

Иисус Оцю пуромксть инголе

(Матф. 26:59-66; Марк 14:55-64; Иоанн 18:19-24)

66Мзярда сась шобдавась, пуромсть ломаньтналонь оцюнятне, озксвятиень оцюнятне и койти тонафтыхне. Синь вятезь Иисусонь Оцю пуромксть инголи. 67Мярьгсть: «Кда Тон Христоссят, азк тянь тейнек». Иисус мярьгсь тейст: «Азондяряса, тинь аф кематада, 68кизефтендярятядязь, тинь каршезон мезевок аф астада и аф нолдасамасть Монь. 69Но тя пингста сявомок Ломанень Цёрась озай сембода Вии Шкайть види кядь ширесонза». 70Сембе мярьгсть: «Лисенди, Тон Шкайть Цёрацат?» Сон каршезост мярьгсь: «Тя тинь корхтатада: тя Монан». 71Синь мярьгсть: «Кодама нинге няфтема тейнек эряви? Минь минць кулеськ тянь Сонь кургстонза!»

Currently Selected:

Лука 22: ОС16

Highlight

Copy