Лука 21

Ашу удавать казнец

(Марк 12:41-44)

1Иисус ванць ярмаконь кочкама арзять шири и няезе, кода козятне путнесть эзонза казнет. 2Сон няезе фкя ашу удаватьке, кона путсь тоза кафта серень ярмакт. 3Иисус мярьгсь: «Видеста корхтан тейнть: тя ашу удавась путсь сембода лама. 4Нят сембе путсть Шкайти козяшиснон эзда, а сон ашушинц эзда путозе сембонц, мезе лангс трясь пря».

Иисус аноконди азонды Шкаень кудть срафтоманц колга

(Матф. 24:1,2; Марк 13:1,2)

5Мзярда пуромфне ушедсть корхтама Шкаень кудть колга: конашкава мазы кевста сон тиф, и конашкава козя казнет сонь мазопнесазь, Иисус мярьгсь: 6«Сайхть шит, мзярда сембось, мезе тяса няйхтяда, срафтови-калафтови, кев лангса кевга аф ляды».

Мекольдень пинкнень тяштьксна

(Матф. 24:3-14; Марк 13:3-13)

7Иисусонь кизефтезь: «Тонафты, мзярда тя ули? Кодама тяштьксонь коряс содасаськ тянь пяшкодевоманц?» 8Сон мярьгсь: «Ванфтода пря, афоледязь васькафта: сяс мес ламотне сайхть Монь лемозень ала и мярьгихть: "Тя Монан" и "Пингсь сась". Тяда яка мельгаст! 9Мзярда марятада кулят тюремань колга и ломанень комболдоматнень колга, тяда эводе, сяс мес инголи тянди улема, но тя нинге аф песь».

10Эста мярьгсь тейст: «Ломаньтналсь кеподи ломаньтнал лангс, масторсь – мастор лангс; 11васток-васток улихть вии модашерьхкомат, сайхть вача пинкт и куломань урмат, и менельста эвондайхть эвфти и оцюдонга оцю тяштькст.

12Семботь тянь улемда инголе кармайхть кунцемонт тинь, Монь инксон панцемонт, макссемонт синагогас и пякстамгудга, и вяттядязь оцязорхнень и оцюнятнень инголи; 13вов тейнть ётка корхтамс Монь колган. 14Сяс путость седиезонт тянь – аноконди тясть арьсекшне, мезе тейнть корхтама прянь араламанкса. 15Мон максан тейнть валхт и смузьши, конатнень каршес кивок, тейнть каршек ащихнень эзда, мезевок аф азови и каршек аф молеви.

16Митядязь тинь тинцень алянте-тядянте, брадонте, эсь юромонь ломаненте, ялганте, и конатнень-конатнень ёткстонт шавсазь. 17И Монь лемозень инкса кивок аф кармай кельгомонт тинь. 18Аньцек шяярьнявок аф прай тинь прястонт. 19Кирдеда и тейнть идеви ваймонте».

Иисус азонды Иерусалимть калафтоманц колга

(Матф. 24:15-21; Марк 13:14-19)

20«Мзярда няйхтяда Иерусалимть перьфке ушмовийхть, эста содасть, маладсь сонь срафтомань-калафтомань пингоц. 21Эста сят, конат Иудеясот, ласькост панттненди; конат Иерусалимсот, лисест тоста; конат перьфпяльдень велеват, тязаст сувсе ошу. 22Вдь тя – кяжень пандома шитне, и пяшкодеви сембось, мезе инголькиге азфоль Сёрматфксса. 23Вай, конашкава стака ули ся шитнень пекихненди и идень потяфтыхненди. Оцюдонга оцю маятама ули тя масторса и Шкаень кяжсь прай ня ломаттнень лангс. 24Финцне прайхть тор эзда, омбонцнень сявсазь полонц#21:24 полон – плен лия масторга; Иерусалимсь ули лия ломаньтналхнень пильгала снярс, мзярс аф аделави синь пингсна».

Ломанень Цёрать самац

(Матф. 24:29-35; Марк 13:24-31)

25«Кармайхть улема пелькс тяштькст шить, ковть, тяшттнень лангса. А модать лангса ломаньтналхне кармайхть трнаткшнема седи акшенязост самс оцюведень зярьфта и комболдомада. 26Ломаттне пелемать эзда кармайхть прашендома ёжефтома, марямок ся зияттнень колга, конат сайхть тя масторть лангс. Вдь менелень вийхне шерьхкозевихть. 27Эста няйсазь Ломанень Цёрать инь оцю вийсонза и иневалдсонза коволхнень лангса саманц. 28Мзярда сембось тя ушеды пяшкодевома, эста тинь видептесть копорентень и кеподесть прянтень, малады тинь воляс нолдаманте».

29Иисус азондсь валвеляфкс: «Варжакстода смоква шуфтть и лия шуфттнень лангс; 30кодак кармайхть синь лопаяма, тянь няемста тинць содасасть – кизось ни маласа. 31Стане тясонга: мзярда няйсасть азфозень пяшкодевоманц, содасть, маласа Шкаень Оцязорксшись. 32Видеста корхтан тейнть: тяниень пингонь эряйхне аф кенерихть юмамс, кода сембось тя ули. 33Менельсь и модась юмайхть, но Монь валне аф юмайхть».

Уледа анокт!

34«Ванода эсь мельгант, тясть стакалгофта седиентень топафксонь аф содамаса, симондемаса и эрь шинь тевонкса лажнамаса, афоледязь сата ся шись аф анокста. 35Сон кода тувор#21:35 тувор – капкан, кундасыне сембонь, кие эряй масторлангса. 36Сяс уледа фалу анокт и озондода: максоволь тейнть вий мяндемс сембе ся сай зияттнень эзда и арамс Ломанень Цёрать инголи».

37Иисус шить тонафтсь Шкаень кудса, а илять тушендсь тоста и ётафнезе веть Вайшуфта панда пряса. 38Сембе ломаттне варьхмодема ланга сашендсть Шкаень куду кулхцондомонза.

Currently Selected:

Лука 21: ОС16

Highlight

Copy