Иоанн 15

Иисус афкуксонь виноградонь кусторкссь

1«Мон афкуксонь виноградонь кусторксан, а Монь Алязе – виноградонь перень касфты. 2Сон керсы эрь тараткязень, кона аф канды имошт; а эрь иможень канды тарадста керсы аф эрявиксть, тяфта ароптозь лезды тейнза сяда пяк иможиямс. 3Тинь ни ароптфтада ся валть вельде, конань Мон азонкшнине тейнть. 4Уледа Монь эсон, Монга улян тинь эсонт. Кода тараткясь почкфтома сонць аф канды имошт, стане тиньге аф канттада имошт, кда аф ульхтяда Монь эсон.

5Мон – виноградонь почксь, а тинь – тараткятне. Кие Монь эсон и Монга эсонзан, ся максы лама иможда. Моньфтомон тейнть мезевок аф тиеви. 6Кие аф ули эсон, сянь ёрдасазь тарад лаца, и коськи. Тяфтама тараттнень кочкасазь и ёрдасазь толти, и синь палыхть.

7Кда тинь ульхтяда эсон и Монь валневок улихть тинь эсонт, эста Алязень кядьста анада, мезе мяленте, и максови тейнть. 8Алязень иневалдоц няфтеви сянь эса: кда тинь канттада лама иможда и ульхтяда Тейне тонафникс. 9Кода Алязе кельгсамань Монь, стане Монга кельктядязь тинь; уледа Монь кельгомасон. 10Ванфтондярясасть кошардомвалнень, карматада эряма Монь кельгомасон, кода Монга ванфтыне Алязень кошардомвалонзон и эрян Сонь кельгомасонза. 11Тянь Мон азыне тейнть, улеза эсонт Монь кенярдемазе, и пяшкодеза марнек седиенте кенярдемада.

12Вага Монь кошардомвалозе: кельгода фкя-фкянь, кода Мон кельктядязь тинь. 13Мзярда кивок путсы эсь эряфонц ялганзон инкса – тяда оцю кельгома аф эряй. 14Кда тисасть сянь, мезе мярьган тейнть, эста тинь Тейне ялгатада. 15Мон ни аф лемнетядязь тинь покодикс; покодись аф содасы, мезе тиенди азороц. Мон лемдедязь тинь ялгакс, сяс мес азыне тейнть сембонь, мезе марянь Алязень эзда. 16Аф тинь Монь кочкамасть, а Мон тинь кочкадязь и путодязь тяфтама тевонь тиема: молемс и кандомс имошт, конат мзярдонга аф юмайхть. И эста Алязе макссы тейнть семботь, мезе анатада Монь лемсон. 17Вов кодама кошардомвал азан тейнть: кельгода фкя-фкянь».

Масторлангсь аф кельгсыне Иисусонь мельге молихнень

18«Кда масторлангсь тинь аф кельктядязь, содасть: тиндедонт инголи Монь лангозон валгсь кяжсна. 19Кда тинь улеледе тя масторлангонь ломаттнень лаца, тя масторлангсь кельголедязь тинь, кода эсензон. Но тинь ни аф синь лацостада – Мон тинь кочкадязь тя масторлангста, сяс масторлангсь прокс аф кельктядязь. 20Мяляфтость, мезе Мон азонь тейнть: покодись аф сяда оцю азоронц коряс. Кда Монь панцемазь, тиньге кармайхть панцемонт; кда Монь валозень кулхцондозь, кулхцондсазь тиннетьке.

21Сембонь тянь тисазь тейнть Монь лемозень инкса, сяс мес аф содасазь Монь Кучиезень. 22Кда Мон афолень са и афолень корхта тейст, эста афоль уле пежесна; а тяни тейст аш кода мярьгомс – аш пежесна. 23Кие Монь прокс афолемань няе, ся афолезе няе Алязеньге. 24Кда ингольдест афолень тие тефт, кодапт кивок лия ашезь тиенде, эста афоль уле пежесна; а тяни няезь тевнень, и сяка прокс афолемазь няе Монь и Монь Алязень. 25Тяфта лиссь, сяс мес эрявсь пяшкодевомс валти, кона сёрматф синь койснон эса: "Туфталфтома Монь прокс афолемазь няе".

26Тейнть сай Лезды, Мон кучса Сонь Алязень эзда. Тя Лездысь – видешити вяти Ваймопожф, кона лиси Алязень эзда. Сон кармай азондома колган. 27Тиньге карматада азондома, сяс мес тинь ушетксстокиге уледе Монь мархтон».

Currently Selected:

Иоанн 15: ОС16

Highlight

Copy