San Mateo 4

Ähuettä ucuocuinödo Jesús suronä jȩa̧ pä'ö

1Ja̧u̧nu̧ o'ca'a Espíritu Santomä o'ipinödo Jesúsru de'ara̧'a̧, ähuettä ka̧cuä̧mö̧ toarö pä'ö.

2Ttö̧ja̧ ta̧ju̧ mo̧ro̧'i̧nä̧, ttö̧ja̧ ta̧ju̧ yodo'inä u̧cuȩ ucuoca'a ki̧nö̧do. Ja̧u̧nu̧ o'ca'a ucua ppä̧i̧ rö̧jä̧chi̧'i̧nä̧cu̧do. 3Ja̧'hua̧nö̧ päi'omenä, ähuettä ichinödo Jesúsru suronä jȩa̧ pä'ö. Pä'inödo:

—Iso päi'önä, Dios I̧tti̧ cu'uttumä, pidu inäduttu ire päi'önä jȩpi̧.

4Ja̧'hua̧nö̧ päiyäcu Jesús ädätinödo:

—Huȩyu̧cuä̧ Huȩnȩ päa'a: “Ji̧yȩä̧cuȩtä̧, i̧ri̧si̧tä̧ cuä̧nö̧ ko̧co̧tö̧do ttö̧ja̧mä̧. O'ca juiyönä Dios päömä jȩpö̧ ttö̧ja̧cuä̧cuo̧tö̧.”

5Ja̧u̧nu̧ o'ca'a ähuettä adihuä ötahuiyä Jerusalén ötahuiyära̧'a̧ o'ipinödo Jesúsru. Juhua'attö Diosrö ucuocuäcuähuode huäme 'cha'ächinätödo. 6Juhua'attö ähuettä pä'inödo Jesúsru:

—Iso päi'önä Dios I̧tti̧ cu'uttumä, ja̧'a̧tä̧ tö'i. Huȩyu̧cuä̧ Huȩnȩ päa'a:

Dios huȩä̧cua̧ ángelesrö tta̧ttä̧ra̧ pä'ö ucuru.

Ttu̧mö̧nä̧ cättepäcuotö ucuru,

cu̧jä̧pö̧nä̧ ido'quittö tocuhue'ö juiyönä,

—pä'inödo.

7Ja̧'hua̧nö̧ päomenä Jesús ädätinäcudo:

—Ja̧'hua̧ta̧nö̧ päa'a Huȩyu̧cuä̧ Huȩnȩ: “Ka̧cuä̧mö̧mä̧ tocu'ä' Cu̧ru̧hua̧ Diosrömä.”

8Pä'äji ta'anö ähuettä o'ipinödo Jesúsru möä'cara̧'a̧, ju'toju isä'cara̧'a̧. Juhua'attö o'ca juiyönä rȩjȩ'i̧nä̧, rȩjȩ öadihuä'inä i̧jȩpi̧nä̧cu̧do. 9Ja̧u̧nu̧ o'ca'a pä'inödo Jesúsru:

—Ttö chä'ca jo̧mȩ cuihue'quiyunä kä̧mä̧dö̧, ttörö cua̧'cua̧ cu̧huȩnä̧rö̧ttö̧mä̧ o'ca juiyönä tocu'äjimä chi̧yä̧cua̧jä̧, —pä'inödo ähuettämä.

10Ja̧'hua̧nö̧ ja̧'a̧ttö̧ Jesús ädätinäcudo:

—Satanás, täi. Huȩyu̧cuä̧ Huȩnȩ päa'a: “Chu̧ru̧hua̧ Diosrötä cua̧'cua̧ huȩnä̧ri̧. Ja̧'hua̧ta̧nö̧ ja̧u̧tä̧ päömä jȩpi̧,” —ädätinäcudo.

11Ja̧'hua̧ ja̧'a̧ ähuettämä rä'opächinödo Jesús ö̧jo̧mȩttö̧. Ja̧u̧nu̧ o'ca'a ángeles ichö ppä'ädinätödo Jesúsru.

Jesús aditähuä kä̧mä̧dö̧ aditinödo Galileanä

12Jesús Juan cärenä ö̧'a̧'a̧ ä̧ju̧cuo̧mȩnä̧, Galilea rȩjȩra̧'a̧ 'chi̧nö̧do. 13Juhua'attö Nazaret ötahuiyänä ko̧cö̧ pi̧nö̧do. Capernaum ötahuiyänä, Galilea dubora jäyora jo̧mȩ ki̧nö̧do. Capernaum ötahuiyä Zabulón pättome'inä, Neftalí pättome'inä tö'cönänö ji̧na̧'a̧do.

14Jesús juhua'a ki̧nö̧do Dios i̧huȩnȩ jiäcuähuä i̧sa̧ Isaías i̧huȩyu̧ti̧nö̧mä̧ 'cuäopa'a pä'ö. 15Ja̧u̧ huȩyu̧ti̧nö̧do:

Zabulón rȩjȩ'i̧nä̧, Neftalí rȩjȩ'i̧nä̧

dubora rö̧ora mä̧nä̧ jäyä, Jordán ajettö kä̧hua̧ räopa'acu jo̧mȩ,

Galilea rȩjȩnä̧ judíos huocotö ttö̧ja̧cuo̧mȩ,

16juhua'a ttö̧ja̧ yo̧ö̧nä̧ ka̧cui̧nä̧tö̧mä̧, adihuä tȩa̧u̧mä̧ topinätödo.

Ja̧'hua̧ta̧nö̧ ttö̧ja̧ 'corupäi'äcuähuä juruhuome ka̧cui̧nä̧tö̧mä̧, adihuä tȩa̧u̧mä̧ tȩa̧hui̧nä̧u̧do,

pä'ö huȩyu̧ti̧nö̧do Isaíasmä.

17Juhuorö kä̧nö̧ Jesús kä̧mä̧dö̧ ji'ähuinödo:

—Pärocuäcutä amöcuädätucui. Dios Cu̧ru̧hua̧ päi'önä ö̧jä̧cua̧'a̧ tö'cöhuächa'a, —pä'ö ji'ähuinödo.

Jesús pa̧ja̧cuä̧nö̧ po̧i̧ 'cho'ätörö o'ipinödo

18Jesús Galilea dubora jäyora cueächomenä, u̧mä̧tö̧ ta̧ju̧ru̧ po̧cui̧pi̧nö̧do. Ya̧tȩ Simón pä'ö mi̧cui̧nö̧do. Ja̧'hua̧ta̧nö̧ koro i̧mi̧mä̧ Pedro mi̧cui̧nö̧do. Ja̧u̧ ö̧jä̧hua̧mä̧ Andrés pä'ö mi̧cui̧nö̧do. Jahuätö po̧i̧ 'cho'ätö pi̧nä̧tö̧do. Ttöäre ma'ayä tticua'a topinödo Jesúsmä. 19Ja̧'hua̧nö̧ ja̧'a̧ttö̧ Jesús päinä̧u̧do:

—Ttöcu ichätucui chu̧huo̧juȩtä̧tu̧cua̧cu̧ ttö̧ja̧rö̧ 'chocuhui'ätucua, —päinä̧u̧do.

20Yotäcu ttöäre ma'ayä jaropi'ö, chutäcu 'chi̧nä̧tö̧do.

21Ju̧huȩnȩ yabonänö 'chä̧nö̧, korotö ta̧ju̧ru̧ po̧cui̧pi̧nö̧do Jesús. Jahuätömä Jacobocu, ö̧jä̧hua̧ Juancu, Zebedeo i̧tti̧mö̧ pi̧nä̧tö̧do. Jahuätömä ttä'ocu huoi'canä ttöäre ma'ayä ti̧'chö̧ pȩji̧nä̧tö̧do. Jesús jahuätörö o'ipinödo. 22Ja̧'hua̧ta̧nö̧ yotäcu huoi'cattö huä̧mi̧'ö̧, ttä'orö jaropi'inätödo Jesúscu tti̧'cha̧ pä'ö.

Jesús recuätörö huo̧juȩti̧nö̧do

23Jesús Galilea rȩjȩnä̧ pa̧ja̧cu̧nä̧ huo̧juȩtö̧ cue'ächinödo, o'ca juiyönä judíos ttu̧huo̧jui̧'i̧nodehuiyänä koromecu, koromecu'inä. Adihuä huȩnȩ, Dios Ru̧hua̧ päi'önä ö̧jä̧cuȩ huȩnȩ, ji'ähuinödo. Ja̧'hua̧ta̧nö̧ o'ca toi'önä na̧'ä̧chä̧tö̧rö̧mä̧ aditö icuinödo. 24Ja̧'hua̧nö̧ cueächomenä, o'ca juiyönä Siria rȩjȩnä̧'i̧nä̧ ä̧ju̧cui̧nä̧tö̧do Jesúsru. Ja̧'hua̧nö̧ ja̧'a̧ttö̧ o'ca toi'önärö na̧'ä̧chä̧tö̧rö̧'i̧nä̧, koro juäi surojö ubara ttu'ätörö'inä, espíritus suropätörö ku̧nä̧rä̧tö̧rö̧'i̧nä̧, koro juäi na̧'ä̧chi̧pä̧rä̧tö̧rö̧'i̧nä̧, 'cuä'ätörö'inä i'cächinätödo Jesúsru. Jesús aditö icuinödo jahuätörö. 25Ja̧'hua̧ta̧nö̧ Jesús o'ca'anä recuätö 'chi̧nä̧tö̧do. Galilea rȩjȩttö̧'i̧nä̧, Decápolis rȩjȩttö̧'i̧nä̧, Jerusalén ötahuiyättö'inä, Judea rȩjȩttö̧'i̧nä̧, Jordán aje ji̧jȩcu̧ttu̧'i̧nä̧ Jesús o'ca'anä 'chi̧nä̧tö̧do.

Currently Selected:

San Mateo 4: PIDNT86

Highlight

Copy