San Mateo 18

Korotöttö'inä abonänö adihuä isotö huȩnȩ

1Ja̧u̧nu̧ pä̧nä̧ u̧huo̧juȩtä̧u̧ Jesús ö̧jo̧mȩ ichi'ö jä'epinätödo:

—Dios Tu̧ru̧hua̧ päi'önä kö̧ pä'ätöttö, ¿dijä̧ttö̧ korotöttö'inä abonänö adihuä i̧sa̧ päi'önä ö̧jä̧cua̧mä̧ ujututtu?

2Jesús ya̧tȩ ji̧'qui̧cha̧hua̧rö̧ cä'epö rötinödo ttä'ca jo̧mȩ. 3Ja̧u̧nu̧ o'ca'a jahuätörö pä'inödo:

—Iso päi'önä pä'ösä ucuturu, ppo̧'ä̧tö̧ ttamöcuädö'a̧nö̧ pärocuäcutä cuamöcuädätucu juiyöttömä, yoröiso Dios ö̧jo̧mȩ do'ächocotö cuäcuotöjä. 4Ja̧'hua̧nö̧ ja̧'a̧ttö̧, Dios Tu̧ru̧hua̧ päi'önä kö̧ pä'ätöttö, korotöttö'inä abonänö adihuä i̧sa̧mä̧ pide ji̧'qui̧cha̧hua̧ ta'anö a̧mö̧cuä̧dä̧cua̧. Ja̧'hua̧nö̧ ja̧'a̧nä̧ adihuä i̧sa̧sä̧ päoca'anä, ppä̧dä̧cua̧ korotörö. 5Ja̧'hua̧ta̧nö̧ ya̧tȩ pide ji̧'qui̧cha̧hua̧ ta'anö huotörö ttö chi̧mi̧nä̧ adiu eseunu ppä'ädö, ttörö'inä ppä'ädö.

Korotörö suronä jȩä̧cuä̧huä̧ huȩnȩ huo̧juȩti̧nö̧do

6“Ya̧tȩ ubo pa̧'a̧nö̧ ji̧'qui̧cha̧hua̧ ta'anö huotörö ttörö esetätö suronä jȩtta̧ pä'ö huȩ'ä̧rö̧, ja̧u̧ru̧ u̧ru̧pä̧'quȩnä̧ ido'qui ti̧'ä̧dö̧ aje täcuome päte'ö kä'ö tticu'a̧nö̧ hua̧. 7Iso päi'önä pi̧jä̧ ttö̧ja̧ pi̧jä̧nä̧ ka̧cu̧mä̧ topö, suronä jȩtto̧mȩnä̧ suroja'ado. 'Cuäopönä kä̧cua̧'a̧ pi̧jä̧ jähuämä. Ja̧'hua̧nö̧ ja̧'a̧nä̧ korotörö suronä jȩtta̧ pä'ö huȩ'ä̧rä̧tö̧rö̧ suronä 'cuäopäcua'a.

8“Ja̧'hua̧nö̧ ja̧'a̧ttö̧ cu̧mö̧'i̧nä̧, cu̧jä̧pö̧'i̧nä̧ suronä jȩcu̧'a̧ pä'ö hueöttömä, 'cui'ocu icu, oto do'opö icui. Iso päi'önä, cu̧mö̧ to̧mö̧rȩ ka̧'a̧nä̧, cu̧jä̧pö̧ to̧'u̧rȩ ka̧'a̧nä̧, ocurära̧'a̧ cui̧'cha̧'a̧ttö̧'i̧nä̧ abonänö adihua'ado cu̧huä̧nä̧hua̧'a̧ doächäcuähuänä cu̧mö̧ ji̧mö̧tȩtä̧, cu̧jä̧pö̧ ji̧'u̧tȩtä̧ ka̧'a̧ 'chä̧cuä̧huä̧nä̧. 9Ja̧'hua̧ta̧nö̧ cu'äre suronä jȩcu̧'a̧ pä'ö hueöttömä, baropö icu, oto do'opö icui. Iso päi'önä cu'äre torere ka̧'a̧nä̧, ocurära̧'a̧ cui̧'cha̧'a̧ttö̧'i̧nä̧ abonänö adihua'ado cu̧huä̧nä̧hua̧'a̧ doächäcuähuänä cu'äre jiretetä ka̧'a̧ 'chä̧cuä̧huä̧nä̧.

Oveja ire'tehuächinö huȩnȩ huo̧juȩti̧nö̧do

10“Suronä cuamöcuädätucuä' pitö ppo̧'ä̧tö̧rö̧. Ucuturu pä'ösä, pitörö tta̧'ä̧rä̧tö̧ ángelesmä, Chä'o mo̧ro̧jä̧nä̧ kö̧ ä'ca jo̧mȩ ka̧cuä̧tö̧ 'cuäopönä. 11Ubo I̧tti̧mä̧ suronä jȩpö̧ re'tehuächätörö ȩmö̧ ichinödo.

12“Pi̧yȩmä̧ ¿tta̧'a̧nö̧ päcuhuätucuättö? Ya̧tȩ ubomä ä̧ji̧mö̧ o̧vȩja̧stö̧ ya'ute cien jo̧mȩnä̧ ku̧nä̧rö̧mä̧, ä̧ji̧mö̧ttö̧ ya̧tȩ toei'omenä, ¿korotörö möä'canä jaropi'ö äji re'tehuächörö usocö tä̧ji̧ ö̧'o̧cui̧'a̧rö̧ pä'ö? 13Ja̧'hua̧nö̧ usu, ö̧'o̧cui̧'ö̧ttö̧mä̧, iso päi'önä ja̧u̧ru̧ re'tehuächäjirö korotö ä̧ji̧mö̧ re'tehuächocotöttö'inä abonänö ȩsȩhuä̧cua̧. 14Ja̧'hua̧ta̧nö̧ Cuä'o mo̧ro̧jä̧nä̧ kö̧ pitö ppo̧'ä̧tö̧ttö̧ ya̧tȩ'i̧nä̧ ire'tehuächa pä'ö yoröiso pä'ocö.

Ttö̧jä̧hua̧ suronä jȩpö̧rö̧ unichi'äcuähuä huo̧juȩti̧nö̧do

15“Cu̧jä̧hua̧ suronä jȩö̧ttö̧mä̧ ucuru, katä ucuocuirö suronä jȩä̧ji̧ u̧huo̧juä̧cua̧'a̧nö̧. Ucuru ä̧ju̧cu̧ttu̧mä̧, pä'äji ta'anö ȩsȩhuä̧cua̧ ucuru. 16Ja̧'hua̧nö̧ ja̧'a̧nä̧ ucuru ä̧ju̧cu̧ juiyöttömä, ka̧ra̧rö̧'i̧nä̧, ta̧ju̧ru̧'i̧nä̧ o'ipö, pä'äji ta'anö ucuocuirö ocuhuipä̧u̧ ttä'ca jo̧mȩttö̧. Ja̧'hua̧nö̧ jȩcu̧'o̧mȩnä̧, o'ca juiyönä cucuocumä ttä̧ju̧cuä̧cuo̧tö̧ korotö'inä. 17Ucuturu ji̧nä̧ ä̧ju̧cu̧ juiyöttömä, o'ca toi'önä iglesia ruhuä ttä'ca jo̧mȩttö̧ ucuocuirö. Ja̧'hua̧nö̧ ja̧'a̧nä̧ jahuätörö o'ca toi'önärö ä̧ju̧cu̧ juiyöttömä, 'quȩ'i̧pä̧chä̧tu̧cui̧rö̧ ka̧ra̧ Diosrö esetocö ö̧jö̧'a̧nö̧ ö̧ja̧ pä'ö. Ja̧'hua̧ta̧nö̧ ru̧hua̧ öäre pärätä ȩmä̧'i̧jö̧ ö̧jö̧'a̧nö̧ ö̧jä̧cua̧.

18“Iso päi'önä pä'ösä ucuturu, o'ca juiyönä pi̧jä̧nä̧ cuä̧ppö̧tä̧rä̧tu̧cu̧mä̧, mo̧ro̧jä̧nä̧'i̧nä̧ Dios ä̧ppö̧tä̧rä̧cua̧. Ja̧'hua̧ta̧nö̧ pi̧jä̧nä̧ huecuhuätucumä, mo̧ro̧jä̧nä̧'i̧nä̧ Dios huȩä̧cua̧.

19“Ja̧'hua̧ta̧nö̧ pä'ösä ucuturu, ucututtu pi̧jä̧nä̧ ka̧cuä̧tö̧mä̧ ta̧ju̧ ji̧nä̧ yo̧mȩtȩ eseunu Diosrö jäcuhue'ätucuttumä, jäcuhue'ätucumä o'ca juiyönä i̧yä̧cua̧ Chä'o mo̧ro̧jä̧nä̧ kö̧mä̧. 20Iso päi'önä ta̧ju̧nu̧'i̧nä̧, huämetucuänö'inä, ca̧ca̧cui̧pö̧ ttö chi̧mi̧nä̧ eseunu ttucuocuttumä, ttömä jahuätöcu chö̧jä̧cua̧sä̧, —pä'inödo Jesús.

21Ja̧'hua̧ ja̧'a̧ttö̧ Pedro 'chä̧nö̧ jä'epinödo Jesúsru:

—Chu̧ru̧hua̧, chö̧jä̧hua̧ ttörö suronä jȩo̧mȩnä̧, ¿tta̧'a̧nö̧ rö̧ȩnä̧ chunichi'äcua'ajä̧ttö̧? ¿Ko̧ro̧mö̧ttö̧nö̧ todärenö tä̧ji?

22Ja̧'hua̧nö̧ päomenä, Jesús ädätinäcudo:

—Ko̧ro̧mö̧ttö̧nö̧ todäretämäcö̧. Ttö pä'ösä, suronä jȩtto̧mȩnä̧, 'cuäopönätä cunichi'ätucuaja cu̧jä̧hua̧tö̧rö̧.

Ya̧tȩ suronä jȩpö̧rö̧ unichi'a päocö huȩnȩ huo̧juȩti̧nö̧do

23“Ja̧'hua̧nö̧ ja̧'a̧ttö̧, Dios hueömä, ya̧tȩ ru̧hua̧ umöhuäyotörö imita pä'ö jä̧'i̧nö̧'a̧nö̧ ja̧'a̧. 24Umöhuäyotörö pä'ötä imitomenä, churutä juiyo rö̧ȩnä̧ mippotörö i'cächinätödo. 25Ja̧u̧ usurä i̧sa̧ pi̧nö̧do. Yoröiso ru̧hua̧rö̧ imita pä'ö jui'inödo. Ja̧'hua̧nö̧ ja̧'a̧ttö̧ ja̧u̧ ru̧hua̧ hue'inödo ja̧u̧ru̧ mippotörö'inä, irecuarö'inä, i̧tti̧mö̧rö̧'i̧nä̧, o'ca juiyönä ttu̧ju̧nä̧rö̧'i̧nä̧ korotö ttumöhuäyotö päi'önä iyö tticua pä'ö. Ja̧'hua̧nö̧ iyö tticuomenä, pärätä ȩmö̧, chutä öäre pärätä päi'önä ȩma̧ pä'inödo. 26Ja̧'hua̧nö̧ hueomenä, chutä ru̧hua̧rö̧ mippotömä ihue'quiyunä kä̧mä̧dö̧ pä'inödo ru̧hua̧rö̧: “Chu̧ru̧hua̧, cua̧'cua̧ tta̧nö̧ topittö. Ucuru o'ca juiyönä chi̧mi̧tä̧cua̧sä̧.” 27Ja̧'hua̧nö̧ päomenä, ja̧u̧ ru̧hua̧ a̧'cua̧ tta̧nö̧ toinäcudo. Ja̧u̧ru̧ yoröiso yabonä imitö juiya pä'inödo u̧mö̧huä̧ya̧rö̧. Ja̧u̧nu̧ o'ca'a räopächa pä'ö hueinäcudo adiunä ö̧ja̧ pä'ö. 28Ja̧'hua̧nö̧ ja̧'a̧nä̧ ja̧u̧ räopächomenä, ka̧ra̧rö̧ a̧hua̧ru̧hua̧rö̧, ja̧u̧ru̧tä̧ ji̧'qui̧cha̧nö̧tä̧ mippotörö po̧cui̧pi̧nö̧do. Ja̧u̧ a̧hua̧ru̧hua̧rö̧ u̧ru̧pä̧'quȩnä̧ chu'ädö pä'inödo: “Ttörö cuimippotömä mitittö.” 29Ja̧'hua̧nö̧ päomenä, a̧hua̧ru̧hua̧ ihue'quiyunä kä̧mä̧dö̧ pä'inödo: “Cua̧'cua̧ tta̧nö̧ topittö. Ucuru o'ca juiyönä chi̧mi̧tä̧cua̧sä̧,” pä'inödo. 30Ja̧'hua̧nö̧ päomenä, ka̧ra̧mä̧ yoröiso ä̧ju̧cuo̧cö̧ pi̧nö̧do. Cärenä ttötarö pä'ö hue'inödo, churutä imitome jubö päi'önä. 31Korotö ahuaruhuä ja̧'hua̧nö̧ jȩa̧'a̧ tottomenä, tta̧'cua̧ tta̧'ȩcui̧nä̧tö̧do. O'ca juiyönä 'cuäopäjimä ttu̧ru̧hua̧rö̧ ji'äu 'chi̧nä̧tö̧do. 32Ja̧'hua̧nö̧ ä̧ju̧cu̧ ru̧hua̧mä̧ huopinödo ja̧u̧ u̧mö̧huä̧ya̧rö̧, suronä jȩpä̧ji̧rö̧. Ja̧u̧ru̧ pä'inödo: “Chu̧mö̧huä̧ya̧, ucumä su̧ro̧pa̧jä̧. Ttörö rö̧ȩnä̧ cuimippota'anä, juhua'a yabonä cuimitö juiya pä'äjisä ttörö adiunä jäcuhue'omenä. O'ca juiyönä unichi'äjisä. 33Ttörö cuimippotömä ucuru cha̧'cua̧ tta̧nö̧ tochäji ta'anö, ucu'inä cua̧hua̧ru̧hua̧rö̧ cua̧'cua̧ tta̧nö̧ tocu'a̧nö̧ ja̧'a̧,” pä'inödo. 34Ja̧u̧nu̧ o'ca'a ja̧u̧ru̧ juiyo ra̧huä̧ri̧nö̧do ru̧hua̧mä̧. Hue'inödo ja̧u̧ru̧ cärenä ttötarö pä'ö ru̧hua̧rö̧ imitome jubö päi'önä.

35Ja̧'hua̧ ja̧'a̧ Jesús cä'ädö pä'inödo:

—Chä'o mo̧ro̧jä̧nä̧ kö̧ ja̧'hua̧ta̧nö̧ jȩä̧cua̧ ucuturu'inä cu̧jä̧hua̧rö̧ suronä jȩo̧mȩnä̧ cuami iso'quinä eseunu cunichi'ätucu juiyöttömä, —pä'inödo Jesús.

Currently Selected:

San Mateo 18: PIDNT86

Highlight

Copy