San Mateo 15

Ji̧yȩtȩtä̧ ubottö räopö idicuächö huȩnȩ

1Jerusalén ötahuiyära̧'a̧ttö̧ ichö korotömä fariseos huotö'inä, hueähuä huȩnȩ huo̧juȩtä̧tö̧'i̧nä̧ Jesúsru jä'epinätödo:

2—Ucu cu̧huo̧juȩtä̧u̧mä̧ ¿dä̧bö̧ jȩpo̧co̧tö̧ ujutu tä̧do̧tö̧ mi̧nä̧ jȩtti̧nö̧ jȩtä̧'i̧jö̧'a̧nö̧? Jahuätömä jȩtä̧'i̧jö̧ ta'anö ttu̧cuȩ ttucuäcua'a ä'canämä ttu̧mö̧ töcähuocotö, —pä'inätödo.

3Ja̧'hua̧ ja̧'a̧ Jesús jahuätörö jä'epinödo:

—Pi̧jä̧ ttö̧ja̧ jȩttä̧'i̧jö̧ ta'anö jȩpö̧ kä̧nö̧, ¿dä̧bö̧ jȩcu̧'ä̧tu̧cuo̧ca̧'a̧jä̧ttö̧ Dios hueinömä? 4Dios i̧huȩnȩ päa'a: “Cuä'orö'inä, cua̧ju̧ru̧'i̧nä̧ ucuotätucui.” Ja̧'hua̧ta̧nö̧ päa'a: “Jä'orö'inä, ja̧ju̧ru̧'i̧nä̧ suronä pä'ömä, hua'ö i̧cuä̧cua̧.” 5Ucutu pä'ätöjä ya̧tȩ jä'orö'inä, ja̧ju̧ru̧'i̧nä̧ päö'a̧nö̧ ja̧'a̧: “Ucuturu ppä'ädocösä. O'ca juiyönä chu̧ju̧nä̧rö̧ Diosrö iyäjisä.” 6Ja̧'hua̧nö̧ pä'ömä iso päi'önä jä'orö'inä, ja̧ju̧ru̧'i̧nä̧, ppädö juiyö'a̧nö̧ ja̧'a̧, pä'ätöjä ucutumä. Ucutu pi̧jä̧ ttö̧ja̧ jȩttä̧'i̧jö̧ ta'anö jȩcu̧'ä̧tu̧cua̧ pä'ö, Dios hueinömä jaropi'ätöjä, koro juäi micuähuocö do'opö tticu'a̧nö̧. 7¡Yapareu ttö̧ja̧jä̧! Dios i̧huȩnȩ jiäcuähuä i̧sa̧ Isaías adiu pä'inödo ucuturu. Ja̧u̧ pa̧'a̧nö̧ huȩyu̧ti̧nö̧do:

8Pitö ttö̧ja̧ ttä ä'cattötä esetätö ttörö.

Ttami iso'quimä otohuotö ttörö.

9Ttörö adiunämä ucuocuocotö.

Jahuätö pi̧jä̧ ttö̧ja̧ huo̧juȩcuä̧tä̧ huo̧juȩtä̧tö̧.

10Ja̧'hua̧nö̧ ja̧'a̧ttö̧ Jesús ttö̧ja̧rö̧ ca̧ca̧tö̧ ji'ähuinödo:

—Adiu ä̧ju̧cuä̧tu̧cui̧. 11O'ca juiyönä rattädi'omenä, idicuächoca'a ja̧u̧mä̧. Ji̧yȩä̧cuȩtä̧ ubo ättö räopötä, ja̧u̧tä̧ idicuächömä.

12Ja̧'hua̧ ja̧'a̧ u̧huo̧juȩtä̧u̧mä̧ Jesúsru tö'cönänö ichi'ö pä'inätödo:

—Ucu päcuhuäjimä kö'cocotödo pä'äjätö fariseos huotömä.

13Jahuätörö pä'inödo:

—O'ca juiyönä daumä Chä'o mo̧ro̧jä̧nä̧ kö̧ u̧ju̧no̧cö̧mä̧, ujupo'tiyä'inä sa'ö i̧cuä̧cua̧. 14Huäinä 'chä̧tö̧. Jahuätömä, ttä̧to̧cä̧cha̧'a̧nä̧ korotö ä̧to̧cä̧tö̧ ttä̧'canä 'chä̧tö̧. Ja̧'hua̧ta̧nö̧ ya̧tȩ ä̧to̧ca̧mä̧ ka̧ra̧ ä̧to̧ca̧ ä'canä i̧'chö̧ttö̧mä̧, ta̧ju̧cuä̧yo̧tö̧ rȩju̧ jacuä ma̧ttä̧chö̧'a̧nö̧ ja̧'a̧.

15Ja̧'hua̧ ja̧'a̧ Pedro pä'inödo Jesúsru:

—Ttö̧ja̧rö̧ idicuächö huȩnȩ, adiu ji'ähuitö.

16Jesús pä'inödo:

—¿Ucutu'inä ä̧ju̧cuo̧co̧tö̧jä̧ tä̧ji̧? 17¿Ucutu ä̧ju̧cuo̧co̧tö̧jä̧ tä̧ji̧? O'ca juiyönä ttänä doächömä, ttö'cäbiyönätä ȩji̧pö̧do. Ja̧u̧nu̧ o'ca'a kara'anätä rä'epö icuähuädo. 18Ja̧'hua̧nö̧ ja̧'a̧nä̧, ttö̧ja̧ ttättö räopömä, ttami iso'quittö räopö. Ja̧u̧tä̧ ttö̧ja̧rö̧ idicuächömä. 19Suronä amöcuädäcuähuä'inä, ttö̧ja̧rö̧ cuä'ö icuähuä'inä, nä̧tö̧rö̧ suronä usähuä'inä, ka̧ra̧ irecuarö suronä jȩä̧cuä̧huä̧'i̧nä̧, nä̧u̧cuä̧cuä̧huä̧'i̧nä̧, yapareu ucuocuäcuähuä'inä, korotörö suronä ucuocuäcuähuä'inä räopa'a ttö̧ja̧ ttami iso'qui jacuättö. 20Ja̧u̧ juäi o'ca juiyönä ttö̧ja̧rö̧ idicuächömä. Ttö̧ja̧ jȩttä̧'i̧jö̧ ta'anö ttu̧cuȩ ttucuäcua'a ä'canä ttu̧mö̧ ttötöcähuoca'a, ja̧u̧ juäi yoröiso idicuächocö ttö̧ja̧rö̧, —pä'ö huo̧juȩti̧nö̧do Jesús.

Yajute kara'attö ichinäju Jesúsru esetinäjudo

21Jesús juhua'attö rä'opö Tiro ötahuiyä tö'cönä'inä, Sidón ötahuiyä tö'cönä'inä 'chi̧nö̧do. 22Yajute isaju, cananea ttö̧ja̧ isaju, juhua'a ki̧nä̧ju̧do. Jahuäju Jesúsru ichi'ö huopinäjudo:

—¡Chu̧ru̧hua̧, David I̧tti̧, ttörö re rö̧jö̧nä̧ topittö! Chittijumä espíritu su̧ro̧pa̧rö̧ ku̧nä̧rä̧ju̧. Rö̧ȩnä̧ ubara ttu'äju.

23Jesús jahuäjuru ädätocö pi̧nö̧do. Ja̧'hua̧ ja̧'a̧nä̧ u̧huo̧juȩtä̧u̧ ichi'ö pä'inätödo:

—Ki̧'cha̧ pä'ö hue'iju. To'ca'anä huopö cue'ächäju.

24Ja̧'hua̧nö̧ pättomenä, Jesús pä'inödo:

—Dios ttörö hue'inö Israel ttö̧ja̧rö̧tä̧, o̧vȩja̧stö̧ re'tehuächätö jä̧'i̧nö̧'a̧nö̧ cue'ächätörö jidähua pä'ö.

25Yajutä isaju Jesúsru tö'cönänö ichi'ö, kihue'quiyunä kä̧mä̧dö̧, pä'inäjudo:

—Chu̧ru̧hua̧, ppä'ädittö.

26Jesús päinäcuado:

—Iso päi'önä ppo̧'ä̧tö̧ ttu̧cuȩ i̧ri̧si̧ ȩmi̧pö̧, ä̧hui̧ri̧tö̧rö̧ iyähuocö.

27Ja̧'hua̧nö̧ päcua, pä'inäjudo:

—Huo̧jua̧ju̧sä̧, Chu̧ru̧hua̧. Ja̧'hua̧nö̧ ja̧'a̧nä̧ ä̧hui̧ri̧tö̧ ttu̧ru̧hua̧ ucuomettö, ji̧'qui̧cha̧nö̧tä̧ ma̧ä̧cho̧mȩnä̧ cuätö.

28Ja̧'hua̧ ja̧'a̧ttö̧ Jesús päinäcuado:

—Isaju, rö̧ȩnä̧ esetäjujä. Ucu cuesetö ta'anö, cuittiju adiu kö̧'i̧pä̧cua̧ju̧, —pä'inödo.

Ja̧'hua̧nö̧ päomenä, kittiju pi̧'i̧nä̧ju̧do.

Recuätö na̧'ä̧chä̧tö̧rö̧ aditö icuinödo

29Jesús juhua'attö rä'opö, Galilea dubora jäyoranä 'cuä'opinödo. Ja̧u̧nu̧ o'ca'a möä'ca huäme'ca huämipö pä̧mä̧di̧nö̧do. 30Ttö̧ja̧ recuätö ö̧jo̧mȩ ichinätödo. Recuätö cue'ächocotörö'inä, ä̧to̧cä̧tö̧rö̧'i̧nä̧, tti̧huȩnȩ jui'ätörö'inä, ttöjo'inä, ttöja'inä jui'ätörö'inä, koro juäi na̧'ä̧chä̧tö̧rö̧'i̧nä̧ i'cächinätödo. Jesús ä'ca jo̧mȩ rötinätödo. Jesús jahuätörö o'ca toi'önärö aditö icuinä̧u̧do. 31Ja̧'hua̧ ja̧'a̧ ttö̧ja̧ to̧pä̧rö̧ ka̧cui̧nä̧tö̧do tti̧huȩnȩ jui'ätö ttucuocua'a topö. Ttöjo jui'ätö'inä adiu päi'inä̧u̧do. Cue'ächocotö cuettächa'a'inä, ä̧to̧cä̧tö̧ totta'a'inä to̧pä̧rö̧ ka̧cui̧nä̧tö̧do. Jahuätömä Israel ttö̧jä̧ Diosrö eseunu ucuocuinätödo.

Cuatro mil jo̧mȩnä̧ ttö̧ja̧rö̧ ttu̧cuȩ iyinödo

32Ja̧u̧nu̧ o'ca'a Jesús u̧huo̧juȩtä̧u̧ru̧ huopö pä'inödo:

—Pitörö cha̧'cua̧ tta̧ jö̧nä̧ topösä. Täcö huäbodäcuä mo̧ro̧ ja̧'a̧ ttöcu cuettächäja'amä ttu̧cuȩ beipächäja'a. Ttojusodera̧'a̧ ttu̧cuȩ ttucuoca'amä hueda pä'ocösä. Ja̧'a̧tä̧ tti̧'chö̧ttö̧mä̧ mä̧nä̧nä̧ 'chä̧nö̧ ttijuiyuhuächi'ö'a̧nö̧ ja̧'a̧.

33Ja̧'hua̧nö̧ päomenä, u̧huo̧juȩtä̧u̧ pä'inätödo:

—Pottö, ttö̧ja̧ yoröiso tomettö, ¿tottö tȩmä̧cua̧'a̧jä̧ttö̧ cuäcuähuämä ja̧'hua̧nö̧ recuätömä ttucua pä'ö?

34Jesús jä'epinödo:

—I̧ri̧si̧mä̧, ¿tta̧'a̧nö̧ rö̧ȩnä̧ ö̧si̧ ka̧'a̧jä̧ttö̧?

Jahuätö pä'inätödo:

—Ko̧ro̧mö̧ttö̧nö̧ to̧si̧rȩtä̧, po̧i̧'i̧nä̧ ji̧'qui̧cha̧nö̧tä̧ ka̧'a̧.

35Ja̧'hua̧ ja̧'a̧ ttö̧ja̧rö̧ hue'inödo rȩjȩ ttö̧'ä̧mä̧da̧ pä'ö. 36Po̧i̧'i̧nä̧, i̧ri̧si̧, ko̧ro̧mö̧ttö̧nö̧ to̧si̧rȩ'i̧nä̧ u̧mö̧nä̧ ȩmo̧po̧'ö̧ Jä'o Diosrö ucuocuinödo. Ja̧'hua̧ ja̧'a̧ 'tȩ'chä̧rö̧ iyinödo u̧huo̧juȩtä̧u̧ru̧, juhua'a yabo ttiya pä'ö ttö̧ja̧rö̧. 37O'ca toi'önä suttädi'önä cuinätödo. Ttucuäji o'ca'a ka̧cui̧pä̧ji̧mä̧ uru'tiyu ko̧ro̧mö̧ttö̧nö̧ to'tare suhuädi'önä ȩni̧nä̧tö̧do. 38Ja̧u̧nu̧ cuinätömä, nä̧tö̧'i̧nä̧, ppo̧'ä̧tö̧'i̧nä̧ pa̧ja̧cuä̧ juiyönä, cuatro mil jo̧mȩnä̧ u̧mä̧tö̧ ji̧na̧'a̧do. 39Ja̧u̧nu̧ o'ca'a, Jesús ttö̧ja̧rö̧ röji ji'ähuäji'ca̧, huoi'canä pä̧mä̧di̧nö̧do. Magdala rȩjȩra̧'a̧ 'chi̧nö̧do.

Currently Selected:

San Mateo 15: PIDNT86

Highlight

Copy