San Marcos 7

Ttü̧ja̧rü̧ surojuoepü wȩnȩ

(Mt 15.1-20)

1Fariseo wotümä̧, weäwä wȩnȩ wo̧juȩkuä̧ isotü Jerusarȩ́-ra̧'a̧ttü̧ ichäjätüku, Jesú ü̧jo̧mȩku̧ ichi'inä̧tü̧. 2Ichi'opo'ü, pitümä̧, Jesú u̧wo̧juȩtä̧u̧ yotukunä̧ ttu̧mü̧ idikua'anä̧ ttu̧kui̧yä̧u̧, jua'amä̧ ttütükäwoka'a jä̧ji̧yä̧u̧ topü suronä̧ pättinä̧u̧. 3Jua'amä̧ fariseo wotümä̧ ja̧'wa̧ta̧nü̧ judío o'katoi'ünä̧tä̧ ttü̧tä̧mü̧mi̧nä̧ jȩtti̧nü̧'a̧kuä̧, ttu̧mü̧ ttütükäwoka'amä̧ kuokotü ja̧'a̧ttü̧ ji̧na̧'a̧. 4Ja̧'wa̧ta̧nü̧, ttu̧kuȩ ȩmä̧wo̧mȩttü̧ ȩmü̧ 'chi̧'ü̧'kotü ppa̧ttä̧cho̧mȩnä̧mä̧, ttu̧mü̧ ttütükäwoka'amä̧ kuokotü pinä̧tü̧. Suro jua̧u̧tä̧mä̧kü̧ kkoro'i̧nä̧ jȩpi̧nä̧tü̧; vaso o̧'ta̧wi̧yä̧'i̧nä̧, 'kä̧nä̧ri o̧yu̧'i̧nä̧, kuoräu o̧'ta̧wi̧yä̧'i̧nä̧, camiyü̧'i̧nä̧ tükü iku kku̧ni̧pü̧tä̧ ttukuä'ija'a jä̧u̧. 5Fariseo wotümä̧ ja̧'wa̧ta̧nü̧ weäwä wȩnȩ wo̧juȩkuä̧ isotümä̧ jä'epü ttä̧ju̧kuä̧ku̧:

—¿Tta̧'a̧nü̧ pä'ü uku ku̧wo̧juȩtä̧u̧mä̧ ujutu tü̧tä̧mü̧mi̧nä̧ jȩtti̧nü̧'a̧kuä̧mä̧ jȩtto̧ka̧'a̧ ttu̧mü̧ idikua'anä̧ kuätüjä̧ttü̧? 6Jesú-mä̧ ädätinä̧u̧:

—Ä'koyättütä esetätüjä̧, ja̧'wa̧nü̧ ji̧yä̧ku̧ profeta Isaía-mä̧, wȩyu̧ti̧nü̧:

Pitü ttü̧ja̧mä̧ ttättütä tteseta'anä̧,

tta̧mi̧ iso'kinä̧mä̧ ttüttümä̧ otó wotü.

7Yaparetätä ttürü ukuotätü 'kua̧rü̧nä̧ kuesewätukuäkusä,

ttü̧ja̧ weäwätä kkä̧kuä̧wä̧ wȩnȩ 'kua̧rü̧nä̧ ku̧wo̧juȩtä̧tu̧kua̧'a̧mä̧.

8Ukutumä̧, Dio weäwä wȩnȩmä̧ kä'ädi'ü, pärokuä pi̧jä̧ ttü̧ja̧ weäwätä ukuotätüjä̧.

9Ja̧'wa̧ta̧nü̧ päinä̧u̧.

—Ku̧tä̧mü̧mi̧nä̧ jȩpü̧ ttü̧ji̧nü̧nä̧tä̧ juiyo adiu ukuotü jȩpä̧tü̧jä̧, Dio weinü̧mä̧ ukuotü jȩ'kuä̧tu̧kuo̧ka̧'a̧nä̧. 10Isopäi'ünä̧, Moisé-mä̧ pä'inü̧: «Kuä'orü'i̧nä̧, kua̧ju̧ru̧'i̧nä̧ ukuotü esewi» ja̧'wa̧ta̧nü̧ «jä'orü'i̧nä̧, ja̧ju̧ru̧'i̧nä̧ ukuotü esewokürümä̧ wa'ü ikua pä'ütä pä̧wi̧'ä̧kua̧.» 11Ja̧'wa̧nü̧ ja̧'a̧nä̧ ukutumä̧ pä'ätüjä̧: Ya̧tȩ jä'orü jü̧ttü̧'i̧nä̧, ja̧ju̧ru̧ jü̧ttü̧'i̧nä̧ päü'anü̧ ja̧'a̧: Ppädädü juiyü'anü̧ wa̧jä̧, suro o'kajuiyünä̧ chu̧ju̧nä̧rü̧mä̧ Corbán-tä ja̧'a̧ttü̧, (jua̧u̧mä̧ Dio-rü iyäwä pä'ü päwä). 12Ja̧'wa̧nü̧ pä'ü ukutumä̧ wo̧juȩtä̧tü̧jä̧, ttä'orü ja̧ pä'üdä̧jä̧, tta̧ju̧ru̧ ja̧ pä'üdä̧jä̧ täkü ppäkuädätukua pä'ümä̧ juiya'a: «Täkü tiya pätäjimä̧ o'kajuiyünä̧tä̧ Dio-rü chiyä̧kuȩtä̧ ja̧'a̧» pättünä̧. 13Ja̧'wa̧nü̧ jȩpü̧ Dio i̧wȩnȩmä̧ si'epü ikuätüjä̧ ku̧tä̧mü̧mi̧nä̧tu̧ku̧ jäwätä wo̧juȩtü̧. Kkoro'i̧nä̧ pi̧yȩ jü̧ta̧'a̧nü̧tä̧ wo̧juȩtä̧tü̧jä̧.

14Jua̧u̧nü̧ o'ka'a, Jesú-mä̧, ttü̧ja̧rü̧ wopo'ü pä'inü̧:

—O'katoi'ünä̧ ku̧wo̧jui̧pä̧tu̧ku̧nä̧ adiu ä̧ju̧kuä̧tu̧kui̧. 15Ji̧yȩtȩ'i̧nä̧ juiya'a u̧mi̧nä̧ttü̧ doächüttü ttü̧ja̧sa̧rü̧ surojuoepümä̧ ja̧'wa̧nü̧ ja̧'a̧nä̧ a̧mi̧ iso'kittü räopütä ja̧'a̧ surojuoepümä̧. 16[Ukutu ä̧ju̧kuä̧tü̧mä̧, adiu ä̧ju̧kuä̧tu̧kui̧.]

17Ttü̧ja̧ttü̧ rekuätüttü 'kȩ'i̧pä̧chä̧ji̧'ka̧ isodenä̧ doächi'omȩnä̧, u̧wo̧juȩtä̧u̧mä̧ u̧wo̧juȩtä̧ji̧ tü'kü jä'epü ttä̧ju̧kui̧nä̧ku̧. 18Juätürü pä'inü̧:

—¿Ja̧'wa̧ta̧nü̧ ukutu'i̧nä̧ yoriso wo̧jui̧'o̧ko̧tü̧jä̧ tä̧jí̧? O'kajuiyünä̧ wä̧mȩttü̧ ttü̧ja̧sa̧rü̧ doächümä̧, jua̧u̧ru̧ surojuepokü pä'ümä̧ 19Jua'amä̧, tta̧mi̧ iso'kira̧'a̧mä̧ doächokü pärokua'aku ttü'käbiyura̧'a̧tä̧ 'kuä'o'i'ü rejura̧'a̧tä̧ räopächü pä'inü̧. Pi̧yȩ pä'ümä̧, o'kajuiyünä̧ ttukumä̧ surojuoepokü jä̧kuȩ pä'ü, pä'inü̧. 20Ja̧'wa̧ta̧nü̧ pä'inü̧:

—Ttü̧ja̧sa̧ttü̧ räopütä ja̧'a̧ churutä surojuoepümä̧, 21Jua'amä̧, ttü̧ja̧ tta̧mi̧ iso'kittütä räopa'a suronä̧ amükuädäkuäwämä̧, nä̧tü̧ku̧'i̧nä̧, u̧mä̧tu̧ku̧'i̧nä̧ jȩä̧'chä̧kuä̧wä̧mä̧, nä̧u̧kuä̧rä̧kuä̧wä̧mä̧, ttü̧ja̧rü̧ kuä'ü ikuäwämä̧, 22o'kajuiyünä̧ ttu̧ju̧nä̧ra̧ pä'ü kkü'käwämä̧, yapareäkuäwämä̧, tta̧mü̧nä̧ ukuo teäkuäwämä̧ ja̧'wa̧ta̧nü̧ wo̧juȩku̧nä̧ amükuädäkuäwokümä̧. 23O'kajuiyünä̧ pi̧yȩ surojümä̧, jakuänä̧ttü̧tä̧ räopü, jua̧u̧tä̧ ja̧'a̧ ttü̧ja̧sa̧rü̧ surojuoepümä̧.

Judío isaju pokoju kka̧'kua̧ wȩnä̧ri̧nä̧ju̧

(Mt 15.21-28)

24Jesú-mä̧, juorü rä'opächü Tiro rȩjȩra̧'a̧ku̧, 'chi̧nü̧. I̧'chi̧'o̧mȩnä̧ isodenä̧ do'ächi'omȩnä̧, ttü̧ja̧ ttu̧wo̧jua̧rü̧ pä'okü pinü̧ ja̧'wa̧nü̧ ja̧'a̧nä̧ udajui'ü juiyünä̧ ji̧nä̧ku̧. 25Jua̧u̧ ütü'kü yotäku ä̧ju̧kuo̧po̧'ü̧, epíritu su̧ro̧pa̧rü̧ kku̧nä̧rä̧ju̧ mü̧ä̧yaju Kka̧ju̧mä̧, Jesú ü̧jo̧mȩku̧ ichi'ü kkiwe'kiyunä̧ kkä̧mä̧di̧nä̧jü̧. 26Juajumä̧, Judío isaju pinä̧ju̧, ji̧nä̧somä̧ Sirofenicia isotü isaju ja̧'wa̧nü̧ ja̧'a̧ttü̧ epíritu su̧ro̧pa̧, kkittijuttü rä'epü ikuiyajü pä'ü Jesú-ru 'chä̧wi̧'ü̧ ajawäkuäwinä̧jü̧. 27Ja̧'wa̧nü̧ kkajakuäwäku Jesú-mä̧ päinä̧kua̧:

—Ä̧kuo̧mȩnä̧ i̧tti̧mü̧rü̧ suttädi'ünä̧ ttukua'anä̧ ja̧'a̧tä̧ topi. Isopäi'ünä̧ adiwoka'a i̧tti̧mü̧ ttu̧kuȩ 'cho'ipü, ä̧wi̧ri̧tü̧rü̧ iyäwänä̧mä̧.

28Päkuamä̧, kkädätinä̧ku̧:

—Iweye ja̧'wa̧nü̧tä̧ ja̧'a̧nä̧ Chu̧ru̧wa̧ ja̧'wa̧nü̧ ja̧'a̧nä̧ ä̧wi̧ri̧tü̧'i̧nä̧ i̧tti̧mü̧ ttukuomȩnä̧ mesa isodä dȩa̧'a̧nä̧ ma̧ä̧chü̧ttü̧ kuätü.

29Päjiyäku Jesú-mä̧ pä'inü̧:

—Ja̧'wa̧nü̧ päkua'attü̧ täkü täi, epíritu su̧ro̧pa̧mä̧ täkü kuittijüttümä̧ rä'opächäji.

30Kkojusodera̧'a̧ kki̧'chi̧'o̧mȩnä̧ ji'kichawajurumä̧ epíritu suropäjimä̧ räopächäkuatä cama-nä̧mä̧ kkü̧'a̧'a̧ topinä̧ju̧.

I̧wȩnȩ tta̧tta̧pü̧kkä̧nü̧ jä̧ri̧yä̧wa̧rü̧, Jesú-mä̧ aditü ikuinü̧

31Jesú-mä̧, pä'äji jä̧ji̧ta̧'a̧nü̧ Tiro rȩjȩttü̧ rä'opächü Sidón ütawiyänä̧ 'kuä'o'ü Galirea rü̧ä̧ duboranä̧ rȩbȩwi̧pi̧nü̧, Decápoli rȩjȩnä̧ 'kuä'opünü̧. 32Juorümä̧ i̧wȩnȩ tta̧tta̧pü̧ ukuokuokü, jä̧ri̧yä̧wa̧rü̧ i'chächipü, jua̧u̧ru̧ u̧mü̧ mȩi̧ya̧tü̧ pä'ü jättepinä̧ku̧. 33Ja̧'wa̧nü̧ ja̧'a̧, Jesú-mä̧, ttü̧ja̧ttü̧ 'kȩ'i̧pä̧chü̧ kkara'aku jua̧u̧ru̧ ȩmi̧pü̧ ä̧ja̧ isäjunä̧ üdo'chenä̧ rä'ädükkä̧nü̧, ä soya su'opo'ü i̧nȩnä̧'i̧nä̧ jȩpi̧nü̧. 34Jua̧u̧ o'komȩnä̧ mo̧ro̧jä̧ku̧ topünü̧, rü̧ȩnä̧ juäpü pä'inü̧: «¡Efatá!» jua̧u̧mä̧, («¡ba'ekuächi!» pä'ü pä'inü̧).

35Ja̧'wa̧nü̧ päomȩnä̧ yotäku ä̧ja̧ isäjumä̧ bawekuächinä̧ku̧, i̧nȩ'i̧nä̧ ejächi'inä̧ku̧ adiu ukuokunä̧tä̧. 36Aditü kä'ädü, Jesú-mä̧, ya̧tȩrü̧'i̧nä̧ jittäu juiyü̧nä̧tä̧ weinä̧u̧; ro̧'ȩpü̧ wea'anä̧ yabonü̧tä̧ jittäwini̧yä̧ku̧. 37Isoo pä'ü kkä̧nü̧ pä'inä̧tü̧; o'kajuiyünä̧tä̧ adiu jȩpü̧, ä̧ju̧kuo̧ko̧tü̧rü̧'i̧nä̧ ttä̧ju̧ku̧nä̧tä̧ ja̧'wa̧ta̧nü̧ tti̧wȩnȩ jui'ätürü'i̧nä̧ ttukuokunä̧tä̧ jȩa̧'a̧ttü̧, pä'inä̧tü̧.

Currently Selected:

San Marcos 7: PNT13

Highlight

Copy