San Marcos 4
4
Kku̧nä̧wä̧ i̧sa̧ u̧ju̧ni̧nü̧ wȩnȩtü̧ ji'äwinü̧
(Mt 13.1-23; Lc 8.4-15)
1Pä'äjita'anü̧, Jesú-mä̧, Galirea rü̧ä̧ dubora jäyorattü kkä̧mä̧dü̧ wo̧juȩti̧nü̧. U̧wo̧juȩto̧mȩnä̧, ttü̧ja̧ rekuätü ttü̧ka̧ka̧kuä̧ji̧yä̧ku̧, Jesú-mä̧ woi'ka ajenä̧ ra̧'a̧ 'cha'ächi'ü pä̧mä̧dü̧ ji'äwinü̧; ttü̧ja̧tä̧ rȩba̧nä̧ kkä̧ku̧ ttä̧ju̧kuä̧ra̧'a̧nä̧. 2Ja̧'wa̧nü̧ ja̧'a̧ Jesú-mä̧, kkä̧mä̧dü̧ wo̧juȩti̧nü̧, wȩnȩtü̧nü̧tä̧: 3Adiu ä̧ju̧kuä̧tu̧kui̧: Ya̧tȩ kuäwä kku̧nä̧wä̧ i̧sa̧ kku̧nu̧ 'chi̧nü̧. 4U̧ju̧no̧mȩnä̧, ji̧yȩtȩ u̧wä̧ju̧mä̧ mä̧nä̧nä̧ ma̧ä̧chi̧na̧'a̧ ja̧'wa̧nü̧ ma̧ä̧chä̧ji̧mä̧ ppi̧yu̧ ichi'ü kui'inä̧tü̧. 5Ja̧'wa̧ta̧nü̧ kkoro u̧wä̧ju̧mä̧, i̧nä̧sa 'kä̧tȩ rȩjȩ a̧'u̧ku̧nä̧tä̧ jo̧mȩ ma̧ä̧chi̧na̧'a̧; jua̧u̧ u̧wä̧ju̧mä̧ jurunä̧ tȩa̧ri̧kuä̧chi̧'ü̧ bawi'inü̧ rȩjȩ a̧'u̧ku̧nä̧ jo̧mȩ ja̧'a̧ttü̧. 6Ja̧'wa̧nü̧ ja̧'a̧nä̧ kkä̧wa̧, räo'omȩnä̧ kuo'ü iku, iwewi appiyä juiya'attü̧ joi'inü̧. 7Ja̧'wa̧ta̧nü̧ kkoro u̧wä̧ju̧mä̧ so̧ä̧'kua 'kä̧tȩ jo̧mȩ ma̧ä̧chi̧na̧'a̧. Jua̧u̧ so̧u̧ bawi'omȩnä̧, trigo kuäwä jä̧ji̧mä̧ so̧ü̧tä̧ a̧ttä̧di̧'i̧nü̧, u̧wä̧ju̧ wȩjü̧ juiyünä̧tä̧. 8Ja̧'wa̧nü̧ ja̧'a̧nä̧, kkoro ppächämä̧, rȩjȩ adiwomȩ ma̧ä̧chi̧na̧'a̧. Jua̧u̧mä̧ ba'ipü rü̧ä̧chi̧na̧'a̧ u̧wä̧ju̧ wȩjü̧nä̧ päi'ünä̧; ji̧yȩku̧ ochanä̧mä̧ treinta-nü̧ u̧wä̧ju̧ jo̧mȩnä̧, kkoro ochanä̧mä̧ sesenta-nü̧ u̧wä̧ju̧ jo̧mȩnä̧, kkoro pünä̧mä̧ ciȩnü̧dä̧jä̧ wȩji̧na̧'a̧ ji̧yȩtȩnä̧mä̧. 9Jua̧u̧ pä'ü kä'ädü, päinä̧u̧: Ä̧ju̧kuä̧kuä̧wä̧ kku̧nä̧rä̧tü̧mä̧, ä̧ju̧kuä̧tu̧kui̧.
¿Tta̧'a̧nü̧ pä'ü wȩnȩtä̧rü̧ jiäwina̧'a̧jä̧ttü̧?
(Mt 13.10-17; Lc 8.9-10)
10Jua̧u̧ o'ka'a, Jesú-mä̧ kkatätä ü̧ji̧pä̧ja̧'a̧, ippeyänä̧ kka̧kuä̧tü̧mä̧ ja̧'wa̧ta̧nü̧ u̧wo̧juȩtä̧u̧ doce-nü̧ wotü'i̧nä̧, däje tü'kü wȩnȩtü̧ jiäwäjá̧ pä'ü, jä'epü ttä̧ju̧kui̧nä̧ku̧. 11Juätürü pä'inü̧: «Ukuturumä̧ Ru̧wa̧ Dio weü ttieruwuönä̧ jü̧ ku̧wo̧juä̧tu̧ku̧nä̧ iyinä̧u̧jä̧; ja̧'wa̧nü̧ ja̧'a̧nä̧ u̧mi̧nä̧ kka̧kuä̧tü̧rü̧mä̧ wȩnȩtü̧tä̧ ji'äkuäwa'a. 12Jua'amä̧ rü̧ȩnä̧ totta'anä̧ tottü juiyäkua'anü̧ ja̧'wa̧ta̧nü̧ rü̧ȩnä̧ ttä̧ju̧kua̧'a̧nä̧ ttu̧wo̧jui̧pü̧ juiyäkua'anü̧, suronä̧ jȩttä̧'i̧jü̧, Dio-rü jȩpü̧ ikunä̧ jättepokomȩnä̧mä̧.»
Wȩnȩtü̧ jiäwäji, Jesú-mä̧ rä'epü iku ji'äwinü̧
(Mt 13.18-23; Lc 8.11-15)
13Ja̧'wa̧ta̧nü̧ päinä̧u̧: ¿Pi̧yȩ wȩnȩtü̧ jidäwäjimä̧ wo̧ji̧'o̧ko̧tü̧ päjätüjä̧ tä̧jí̧? ¿Ja̧'wa̧nü̧ ja̧'a̧mä̧, kkoro wȩnȩtü̧ jiäkuäwä o'kajuiyünä̧mä̧ toku ku̧wo̧juä̧tu̧kuä̧kua̧'a̧jä̧ttü̧? 14Kku̧nä̧wä̧ i̧sa̧ päjimä̧ jareü wȩnȩ ji'äuru wȩnȩkuä̧cha̧'a̧. 15Ja̧'wa̧ta̧nü̧, mä̧nä̧nä̧ ma̧ä̧chi̧nü̧ u̧wä̧ju̧ jä̧ji̧mä̧ wȩnȩkuä̧cha̧'a̧: Dio i̧wȩnȩ ttä̧ju̧kua̧'a̧nä̧, ttä̧ju̧kuä̧ji̧ o'ka'a, tta̧mi̧ iso'kittü Satanás ichi'ü 'choipo'ächä̧u̧ru̧. 16Ja̧'wa̧ta̧nü̧ i̧nä̧sanä̧ kku̧nä̧wi̧'i̧nü̧ jä̧ji̧mä̧ wȩnȩkuä̧cha̧'a̧, Dio i̧wȩnȩ, ttä̧ju̧kuo̧mȩnä̧ yotäku eseunu̧ esetätürü. 17Ja̧'wa̧nü̧ ja̧'a̧nä̧ jitünä̧tä̧ 'chu̧ä̧rü̧ juitta'attü 'kiyünä̧ kko̧ko̧tü̧rü̧; Dio i̧wȩnȩnä̧, surojü wȩnȩ ichomȩnä̧, si'epü ttikuatü pä'ü ttusomȩnä̧, tta̧'kua̧ ttu̧wȩnä̧rä̧'i̧jü̧mä̧ to̧ȩpo̧'ä̧u̧ru̧. 18Ja̧'wa̧ta̧nü̧ kkorotümä̧ so̧ä̧'kuanä̧ kku̧nä̧wi̧'i̧nü̧ jä̧ji̧nä̧ wȩnȩkuä̧cha̧'a̧; Dio i̧wȩnȩ ttä̧ju̧kua̧'a̧nä̧, 19pi̧jä̧ttü̧ tta̧'kua̧ roekuäkuäwänä̧, ruwotü juoäwänä̧, yaparetä̧u̧ o'kajuiyünä̧ ttu̧ju̧nä̧ra̧ pä'ü amükuädäkuäwänä̧. Ja̧'wa̧nü̧ jo̧mȩnä̧ Dio i̧wȩnȩ ttä̧ju̧kuä̧ji̧mä̧ a̧ttä̧di̧'a̧'a̧, u̧wä̧ju̧ wȩjü̧ juiyünä̧tä̧. 20Ja̧'wa̧ta̧nü̧ rȩjȩ adiwomȩ kku̧nä̧wi̧'i̧nü̧ jä̧ji̧mä̧ wȩnȩkuä̧cha̧'a̧; Dio i̧wȩnȩ ä̧ju̧ku̧ adiu esetätürü, treinta-nü̧ pünä̧'i̧nä̧, sesenta-nü̧ pünä̧'i̧nä̧, ciȩnü̧ pünä̧'i̧nä̧ ttu̧wä̧jü̧ iyünä̧ kka̧kuä̧tü̧rü̧.
Tȩya̧u̧nä̧ wȩnȩtü̧ jiäwinü̧ wȩnȩ
(Lc 8.16-18)
21Ja̧'wa̧ta̧nü̧ päinä̧u̧: ¿Tejäwore tti'chächomä̧nä̧mä̧ i̧so̧ka̧ jakuä ȩnü̧ ttu̧ju̧na̧ pä'ü i'kächäkuäwä tä̧jí̧, ka̧ma̧bä dȩa̧'a̧ dajü ttu̧ju̧na̧ pä'ü i'kächä̧kua̧ tä̧jí̧? ¡Isokü̧! ju'toju jo̧mȩ tȩya̧u̧ kkȩdȩpü̧nä̧ ttu̧ju̧na̧ pä'ü ja̧'a̧. 22Ja̧'wa̧nü̧ jü̧ta̧'a̧nü̧ yä̧wä̧i̧nä̧ da̧jä̧rä̧kuä̧wä̧mä̧ juiya'a, o'kajuiyünä̧tä̧ wäjunä̧ ttu̧wo̧juö̧nä̧ i̧jȩkuä̧chä̧kua̧'a̧. 23Ä̧ju̧kuä̧kuä̧wä̧ kku̧nä̧rü̧mä̧, ä̧ju̧kui̧. 24Ja̧'wa̧ta̧nü̧ päinä̧u̧: «Adiu ä̧ju̧kuä̧tu̧kui̧. Kkorotürü jȩ'kuä̧tu̧ku̧'ta̧'a̧nü̧, ukuturu'i̧nä̧ jȩä̧kuä̧wä̧kua̧'a̧, juȩnȩ yabonä̧ kuä̧ju̧kuä̧tu̧ku̧'i̧nä̧ jäekuäkua'a. 25Ja̧'wa̧nü̧ ja̧'a̧ttü̧ kku̧nä̧rü̧rü̧mä̧, yabonü̧ iyäwäkua'a ja̧'wa̧nü̧ ja̧'a̧nä̧ jui̧'a̧rü̧mä̧, suro a̧'u̧ku̧nä̧tä̧ u̧ju̧nä̧rü̧'i̧nä̧ 'choikuäkua'a.»
U̧wä̧ju̧ ba'ipü rü̧ä̧chü̧nä̧ wȩnȩtü̧ ji'äwinü̧
26Ja̧'wa̧ta̧nü̧ Jesú-mä̧ pä'inü̧: Ru̧wa̧ Dio weü wȩnȩmä̧, kuäwä u̧wä̧ju̧, ya̧tȩ rȩjȩ u̧ju̧na̧'a̧ jä̧'i̧nü̧'a̧nü̧ ja̧'a̧: 27Jua̧u̧ kku̧nä̧ji̧mä̧, ä'aja pä'üdä̧jä̧, to̧ä̧ra̧ja̧ pä'üdä̧jä̧, mo̧ro̧ ja̧ pä'üdä̧jä̧, yodó ja̧ pä'üdä̧jä̧ yoräteunä̧tä̧. Kku̧nä̧wä̧mä̧ ba'ipü rü̧ä̧cha̧'a̧ u̧wo̧jui̧pü̧ juiyünä̧tä̧. 28Jua'amä̧, rȩjȩtä̧tä̧ u̧wä̧ju̧ iyünä̧ ja̧'a̧ttü̧: ä̧kuo̧mȩnä̧mä̧ a̧mu̧ri̧yä̧kuä̧u̧ ba'ipü, juȩnȩ o'komȩnä̧mä̧ ocha juoa'a, jua'a yabo u̧wä̧ju̧mä̧ wȩjä̧ma̧'a̧. 29Täkü u̧wä̧ju̧ jo̧mȩnü̧ 'kiyächipomȩnä̧, ka̧ka̧tü̧ bo'epü kku̧nä̧wä̧ i̧sa̧mä̧.
Mostaza pättü u̧wä̧ju̧nä̧ wȩnȩtü̧ ji'äwinü̧
(Mt 13.31-32; Lc 13.18-19)
30Ja̧'wa̧ta̧nü̧, Jesú-mä̧ pä'inü̧: ¿Ru̧wa̧ Dio weü wȩnȩmä̧, däjé jä̧'i̧nü̧'a̧nü̧ jü̧ttü̧, däjenä̧ tu̧wȩnȩtü̧'a̧nü̧ ja̧'a̧ jä̧ttü̧? 31Jua̧u̧mä̧ mostaza u̧wä̧ju̧ isäte, rȩjȩ ttu̧ju̧na̧'a̧ jä̧'i̧nü̧'a̧nü̧ ja̧'a̧. Jua̧u̧mä̧, pi̧jä̧nä̧ kka̧ku̧ u̧wä̧ju̧ttu̧'i̧nä̧ abonä̧nü̧ ppo̧ü̧ ja̧'a̧. 32Ja̧'wa̧nü̧ ppo̧ü̧ ja̧'a̧nä̧, ttu̧ju̧no̧mȩnä̧mä̧ kkoro kuäwä oittü'i̧nä̧ abonä̧nü̧ u̧wä̧mȩnä̧ päi'ünä̧ rü̧ä̧i juoa'a, ä̧na̧jui̧yä̧ oi bäreunä̧, ppi̧yu̧'i̧nä̧ dȩa̧'a̧ o̧ju̧tä̧ro̧mȩ ttä̧'ti̧yu̧ ttu̧wȩnü̧nä̧ päi'ünä̧.
Ttü̧ja̧ ttu̧wo̧jui̧pü̧nä̧ wȩnȩtä̧rü̧ ji'äwinü̧, Jesú-mä̧
(Mt 13.34-35)
33Ru̧wa̧ Dio weümä̧, wȩnȩtä̧rü̧tä̧ rü̧ȩnä̧ wo̧juȩti̧nü̧ Jesú-mä̧, ttü̧ja̧ ttu̧wo̧jui̧pä̧rü̧nä̧. 34Ji̧yȩtȩ'i̧nä̧ u̧wȩnȩto̧ka̧'a̧mä̧ ji̧ä̧wo̧ko̧u̧ pinä̧tü̧ ja̧'wa̧nü̧ ja̧'a̧nä̧ u̧wo̧juȩtä̧u̧rümä̧ o'kajuiyünä̧tä̧ i̧mi̧ku̧nä̧ rä'epü iku ji'äwinü̧.
Jesú kkä̧rü̧'koppa wirodinü̧
(Mt 8.23-27; Lc 8.22-25)
35Jua̧u̧nu̧ mo̧ro̧ ni̧pä̧cho̧mȩnä̧, Jesú-mä̧ u̧wo̧juȩtä̧u̧rü pä'inü̧:
—Rü̧ä̧ dubora ji̧jä̧ku̧ ti̧'chä̧tu̧kua̧.
36Ja̧'wa̧nü̧ ja̧'a̧ttü̧, ttü̧ja̧mä̧ ttü̧ji̧pa̧'a̧nä̧, woi'ka juȩnȩ rä'kanä̧, Jesú-ru o'ipächü kkäwinä̧tü̧; kkorotü'i̧nä̧ kkoro o'kanä̧ kkäwinä̧tü̧. 37Ttijäwomȩnä̧, kkä'kotottü kkä̧rü̧'koppa tawipina̧'a̧, aje rü̧ȩnä̧ ppaunä̧, ttuwe'ka'i̧nä̧ wä'okuächära̧'a̧ttü̧ ma̧ttä̧chü̧'a̧nü̧tä̧ päi'ünä̧. 38Ja̧'wa̧nü̧ ja̧'a̧nä̧ Jesú-mä̧, woi'ka ubü'kakunä̧, unä̧ i̧sä̧ppä̧ ppä̧'ȩkuä̧ji'ka̧ ä̧'ä̧rü̧ pi̧nü̧, ä̧'ä̧ra̧'a̧ porädü iku pättinä̧ku̧:
—¡Chu̧ru̧wa̧! ¿Tote'a'anä̧, unichä̧rü̧ pü̧jä̧?
39Ja̧'wa̧nü̧ wottäku, ä̧rä̧mi̧'ü̧ kkä̧rü̧'ko̧pparü'i̧nä̧, rü̧ä̧ duborarü'i̧nä̧ we'ünü̧ wopi'inü̧:
—¡Täkü 'koruchi'i!, ¡Täkü wirochi'i! Päomȩnä̧, kkä̧rü̧'koppamä̧ kkä̧mä̧di̧na̧'a̧, aje'i̧nä̧ wirochi'ina̧'a̧. 40Jua̧u̧ jä̧ji̧ o'ka'a, Jesú-mä̧ u̧wo̧juȩtä̧u̧rü pä'inü̧:
—¿Tta̧'a̧nü̧ pä'ü yekuekuätukua'ajä̧ttü̧? ¿Kua̧'kua̧ wȩnä̧ro̧ko̧tü̧jä̧ tä̧jí̧?
41Ja̧'wa̧nü̧ ja̧'a̧ topü, ye'i'ü, yotukunä̧ jä̧'ȩpä̧rä̧kuä̧wi̧'i̧nä̧tü̧:
—¿Pidemä̧ díjä̧ttü̧ kkä̧rü̧'koppa'i̧nä̧, rü̧ä̧ dubora'i̧nä̧ ukuotäkumä̧?, jü̧nä̧.
Currently Selected:
San Marcos 4: PNT13
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela
