San Marcos 2

Parárisi na̧'ä̧chü̧rü̧ Jesú aditü ikuinü̧

(Mt 9.1-8; Lc 5.17-26)

1A̧'u̧kua̧'a̧tä̧ mo̧ro̧ o'ka'a, pä'äjita'anü̧, Jesú-mä̧ Cafarnaúm ütawiyära̧'a̧, ppa̧'ä̧chi̧'ä̧ji̧'ka̧, isodenä̧ ü̧ja̧'a̧ ä̧ju̧kui̧päjä'kotü. 2Isode äpate'ka, ttü̧ja̧mä̧ rü̧ȩnä̧ 'ko̧ttä̧dä̧kuä̧u̧nä̧ päi'ünä̧ ttü̧ka̧ka̧kuä̧ja̧'a̧; jareü wȩnȩ ji̧ä̧wi̧nä̧u̧. 3Ja̧'wa̧nü̧ jiäwa'a 'kä̧tȩnä̧, ttü̧ja̧ pa̧ja̧kuä̧nü̧ wotü, parárisi mä̧richei na̧'ä̧chü̧rü̧ i'kächinä̧tü̧. 4Ja̧'wa̧nü̧ ja̧'a̧nä̧ ttü̧ja̧ ttirekua'a dottächü juiyünä̧ jä̧u̧, isode wä̧mȩnä̧ Jesú ü̧jo̧mȩ päte'ü, 'tä̧'ȩpäjä'kotü isäbänä̧ sä̧bü̧kä̧nü̧ ü̧'a̧'a̧nä̧ jui'ädinä̧tü̧. 5Ja̧'wa̧nü̧ tta̧'kua̧ wȩnä̧rü̧ tti'chächäja'a topü, Jesú-mä̧, jua̧u̧ru̧ pä'inü̧:

—Chi̧tti̧, suronä̧ jȩ'kuä̧'i̧jü̧mä̧ jȩä̧chä̧ku̧jä̧.

6Ja̧'wa̧nü̧ pä'a ä̧ju̧ku̧, weäwä wȩnȩ wo̧juȩkuä̧ isotüttü, juȩnȩ pȩjä̧tü̧mä̧ amükuädinä̧tü̧: 7«¿Toku pä'ü, ja̧'wa̧nü̧ pä'üjä̧ttü̧? jua̧u̧mä̧ Dio-rü suronä̧ pä'ütä päwä, Dio-tä ja̧'a̧ ttü̧ja̧ suronä̧ jȩttü̧ jȩpü̧ ikumä̧.» 8Ja̧'wa̧nü̧ amükuädü ttukuokua'a wo̧jui̧'ü̧, Jesú-mä̧ päinä̧u̧:

—¿Tta̧'a̧nü̧ pä'ü, jua̧u̧ amükuädätüjä̧ttü̧? 9¿Toku pättüttütä adiwomȩnä̧ ja̧'a̧ttü̧, parárisi mä̧richei na̧'ä̧chü̧rü̧mä̧? ¿Suronä̧ jȩ'kuä̧'i̧jü̧mä̧ jȩä̧chä̧ku̧jä̧, pä'ü jui'ü'i̧nä̧ ku̧'ä̧bä ȩmi̧pü̧ täi, pättüttütä, adiwomȩnä̧ ja̧'a̧, ukuturumä̧? 10Jua̧u̧nu̧mä̧, isopäi'ünä̧, pi̧jä̧ttü̧mä̧ ubo I̧tti̧mä̧ suronä̧ ü̧jä̧'i̧jü̧ jȩpü̧ ikua pä'ü'i̧nä̧ ujuru kku̧nä̧rü̧ pä'ü ku̧wo̧juä̧tu̧kuä̧kua̧'a̧nü̧,

Parárisi na̧'ä̧chü̧rü̧ pä'üsä:

11—Ä̧rä̧mi̧'ü̧, ku̧'ä̧bä ȩmi̧pü̧, kuojusodera̧'a̧ täi.

12Ja̧'wa̧nü̧ päku, na̧'ä̧chä̧ji̧mä̧, yotäku ä̧rä̧mi̧'ü̧ ttü̧ja̧ o'katoi'ünä̧ ttä'ka jo̧mȩttü̧ ü̧'ä̧bä ȩmi̧pü̧, juorümä̧ rä'opächü, 'chi̧nü̧. Ja̧'wa̧nü̧ ji̧yä̧u̧, o'katoi'ünä̧, Dio-rü eseäkuäu, pä'inä̧tü̧:

—Yoriso, pa̧'a̧nü̧ jü̧mä̧ topokotü pä'ijä̧tü̧jä̧, jü̧nä̧.

Jesú, Mateo-rü wopinü̧

(Mt 9.9-13; Lc 5.27-32)

13Jua̧u̧nu̧ o'ka'a, Jesú-mä̧ pä'äjita'anü̧ dubora jäyoraku ichäja'a; ttü̧ja̧ ttü̧ka̧ka̧kuä̧ku̧ juätürü wo̧juȩti̧nü̧. 14Ja̧'wa̧nü̧ ja̧'a̧ 'kuäopomȩnä̧, Mateo, Alfeo i̧tti̧rü̧, Roma-ra̧'a̧ iyäwä pärätä ka̧ka̧kuo̧mȩ ü̧'a̧'a̧ topü, päinä̧ku̧:

—Ttüku ichi.

Päku, ä̧rä̧mi̧'ü̧ chutäku 'chi̧nü̧.

15Jua̧u̧nü̧ o'ka'a, Jesú-mä̧ Mateo ojusodettü mesa-nä̧ u̧kuȩ ukua'a ppeyänä̧, Roma-ra̧'a̧ weäwä pärätä ka̧ka̧tä̧'i̧jä̧tü̧'i̧nä̧, suronä̧ jȩtta̧'a̧ ukuowä'ijätü'i̧nä̧, chutä u̧wo̧juȩtä̧u̧'i̧nä̧, rekuätü o'ka'anä̧ kue'ächätü'i̧nä̧, pȩji̧nä̧tü̧. 16Ja̧'wa̧nü̧, juätuku u̧kuȩ ukua'a topü, weäwä wȩnȩ wo̧juȩkuä̧ isotü'i̧nä̧, fariseo wotü'i̧nä̧, Jesú u̧wo̧juȩtä̧u̧rü jä'epü ä̧ju̧kui̧nä̧tü̧:

—¿Tta̧'a̧nü̧ pä'ü ku̧ru̧wa̧tu̧ku̧mä̧, pärätä ka̧ka̧kuä̧ isotüku'i̧nä̧, suronä̧ jȩpä̧'i̧jä̧tu̧ku̧'i̧nä̧, u̧kuȩmä̧ ukua'ajä̧ttü̧? 17Ja̧'wa̧nü̧ pätta'a ä̧ju̧ku̧, Jesú-mä̧ päinä̧u̧:

—Na̧'ä̧cho̧ko̧tü̧mä jawapü ru̧wa̧rü̧mä̧ rekuä rü̧jo̧ko̧u̧, na̧'ä̧chä̧tü̧tä̧ jua̧u̧ru̧ rekuärü̧jä̧u̧mä̧. Ttümä̧, adiu jȩpä̧tü̧rü̧mä̧ ȩmü̧ ichokü pinü̧sä̧, surojü jȩpä̧tü̧rü̧ ȩmü̧ ichinü̧sä̧, Dio-ku ppa̧ttä̧cha̧ pä'ü.

A̧do̧chä̧kuä̧wä̧, Jesú-ru jä'epinä̧tü̧

(Mt 9.14-17; Lc 5.33-39)

18Ya'utenä̧, Ju̧a̧ bautizo jȩä̧kuä̧wä̧ i̧sa̧ umüwäyotü'i̧nä̧, fariseo wotü'i̧nä̧, ttu̧kuȩ a̧do̧chü̧ jȩtto̧mȩnä̧, yotüte, Jesú-ru jä'epü ä̧ju̧ku̧ 'chi̧nä̧tü̧:

—¿Tta̧'a̧nü̧ pä'ü Ju̧a̧ umüwäyotü'i̧nä̧, fariseo wotü ttumüwäyotü'i̧nä̧ ttu̧kuȩ a̧do̧chü̧ jȩtta̧'a̧nä̧, uku ku̧wo̧juȩtä̧u̧mä̧ jȩpo̧ko̧tü̧jä̧ttü̧?

19Pättäku Jesú-mä̧ ädätinä̧u̧:

—¿Dí jä̧'i̧jä̧ttü̧, ya̧tȩ irekuarü ü'käu pä'käri jȩa̧'a̧ 'kä̧tȩnä̧, ä̧tȩpä̧jä̧u̧ttu̧ u̧kuȩ a̧do̧chü̧mä̧? ü'käwa'a 'kä̧tȩnä̧mä̧, chutä ü̧ja̧'a̧nä̧mä̧ a̧do̧chä̧kuä̧wo̧kü̧ jäwä ja̧'a̧. 20Ja̧'wa̧nü̧ ja̧'a̧nä̧, irekuarü jareünä̧ ȩmü̧rü̧ ttȩmi̧pü̧ mo̧ro̧ rȩbȩä̧kuä̧wä̧kua̧'a̧, jua̧u̧nü̧ mo̧ro̧tä̧ ttu̧kuȩ a̧do̧chü̧ jȩttä̧kuo̧tü̧.

21Ja̧'wa̧ta̧nü̧ pü̧jä̧ta̧ tä̧bo̧i̧sä̧ta̧nä̧mä̧, ja̧rȩä̧ta̧ be'epümä̧ ya̧tȩ'i̧nä̧ 'tü̧ä̧wo̧kü̧. Ja̧'wa̧nü̧ jü̧ttü̧mä̧, ja̧rȩä̧ta̧ 'tü̧ȩkuä̧cho̧mȩnä̧ tä̧bo̧i̧sä̧ta̧mä̧, yabokutä sȩrä̧wi̧'ä̧ta̧. 22Ja̧'wa̧ta̧nü̧ vino isoya jareoyamä̧ odres isäba täboisäbanämä̧ ya̧tȩ'i̧nä̧ 'karäwokü ja̧'a̧. Ja̧'wa̧nü̧ ttü'karüttümä̧ vino isoya a̧'ti̧'o̧mȩnä̧, isäba ri'ädi'ü sȩrä̧wi̧'o̧mȩnä̧, vino isoya'i̧nä̧ toe'ächa'anä̧, isäba'i̧nä̧ toe'ächäkua'a. Ja̧'wa̧nü̧ jü̧ juiya pä'ümä̧, vino isoya jareoyamä̧ odres isäba jareäbanä̧ 'karü kku̧nä̧wä̧ ja̧'a̧.

U̧wo̧juȩtä̧u̧ sawaru mo̧ro̧ trigo ocha ka̧ka̧ti̧nä̧tü̧

(Mt 12.1-8; Lc 6.1-5)

23Ji̧yȩtȩ sawaru mo̧ro̧, Jesú u̧wo̧juȩtä̧u̧ku pättiyu 'kä̧tȩnä̧ 'kuäopomȩnä̧; u̧wo̧juȩtä̧u̧mä̧, trigos ocha ka̧ka̧ti̧nä̧tü̧. 24Ja̧'wa̧nü̧ jȩtti̧yä̧u̧, fariseo wotümä̧ Jesú-ru pä'inä̧tü̧:

—¿Tta̧'a̧nü̧ pä'ü ku̧wo̧juȩtä̧u̧mä̧, sawaru mo̧ro̧ ttadita pä'ü weäwokü jäwä jȩpä̧tü̧jä̧ttü̧?

25Ja̧'wa̧nü̧ pättiyäku ädätinä̧u̧:

—¿Ukutumä̧, Dawi umüwäyotüku rü̧ȩnä̧ ukua ppäiri̧jä̧ku̧, ya'utenä̧, jȩi̧nü̧ wȩyu̧kuo̧mȩmä̧, topokotü pä'ijätüjä̧ tä̧jí̧? 26¿Dio-rü ukuokuäkuäwodenä̧ do'ächi'ü, sacerdote wotü ttu̧ru̧wa̧ Abiatar pä'ü mi̧kua̧ ü̧ja̧'a̧, sacerdote wotütä ttukú trigo o̧si̧ ro̧ü̧ kui'i'ü umüwäyotürü'i̧nä̧ iyinomȩ jä̧'i̧jo̧mȩmä̧?

27Jua'a yabonü̧ päinä̧u̧:

—Sawaru mo̧ro̧mä̧ ttü̧ja̧rü̧ rekuä rü̧ji̧yä̧ku̧ aditü kku̧ni̧nü̧. Pärokua'aku ttü̧ja̧rü̧mä̧ sawaru mo̧ro̧ rekuä rü̧ji̧yä̧ku̧mä̧ aditokü pinü̧. 28Ja̧'wa̧nü̧ ja̧'a̧ttü̧, ubo I̧tti̧mä̧ sawaru mo̧ro̧'i̧nä̧ u̧ru̧wa̧ ja̧'a̧.

Currently Selected:

San Marcos 2: PNT13

Highlight

Copy