San Mateo 20
20
Uwa pätta aditätünä̧ wȩnȩtü̧ ji'äwinü̧
1Mo̧ro̧jä̧ ru̧wa̧ weomȩmä̧ uwa pätta u̧ru̧wa̧, ji̧nä̧ yo̧ä̧i̧ ja̧'a̧ku̧ i'ätta ttaditäkua'a i̧mi̧tä̧kuä̧u̧ru̧ ukuoku i̧'chi̧nü̧'a̧nü̧ ja̧'a̧. 2Ya'ute mo̧ro̧mä̧, ji̧yȩtȩ denario-tä chi̧mi̧tä̧kuä̧u̧jä̧ pä'ü juätürü ukuokuäji̧'ka̧, uwa pätta ü'ättanä̧ ttadita pä'ü we'ü u̧ju̧ni̧nä̧u̧. 3Ja̧'wa̧nü̧ jä̧ji̧ o'ka'a, kkä̧wa̧mä̧ yo̧ä̧i̧ku̧ las nueve jä̧'i̧jü̧juei isomȩ ja̧'a̧ rä'opü toomȩnä̧ kkorotü plaza-nä̧ ttaditäwä jui'ätü ttü̧ja̧kua̧'a̧ topinü̧. 4Juätürü pä'inü̧; chi'ätta uwa pättara̧'a̧ aditäjätukui, jua'akumä̧ mikuäwächünä̧ jo̧mȩ chi̧mi̧tä̧kuä̧u̧jä̧; pä̧u̧mä̧ aditü 'chi̧nä̧tü̧. 5Pä'äji ä'kanä̧ jȩä̧ji̧ta'anü̧ jȩpü̧ ukuokuinü̧, kkorotürü kkä̧wa̧ jueü kkü̧rü̧ jä̧'i̧nü̧ juei'isome. Juȩnȩ o'komȩnä̧, ni̧pä̧ro̧mȩ las tres jä̧'i̧juei isomȩ'i̧nä̧, ä'koji jä̧ji̧ta̧'a̧nü̧ kkorotürü ukuokuinü̧. 6Ja̧'wa̧ta̧nü̧ ni̧pä̧ro̧mȩku̧, las cinco-nä̧ jä̧'i̧juei isomȩ plaza-ra̧'a̧ rä'opü toomȩnä̧, ttaditoka'a kka̧kuä̧tü̧rü̧ topü pä'inü̧: ¿Tta̧'a̧nü̧ pä'ü ukutumä̧ mo̧ro̧ 'kuäopünä̧ kuaditätukuoka'a ku̧ja̧kuä̧tu̧kua̧'a̧jä̧ttü̧, pȩnȩmä̧? 7Jä̧ȩpä̧u̧ ttädätinä̧ku̧: Ya̧tȩ'i̧nä̧ tadita pä'ümä̧ wȩo̧ko̧u̧ päjä'kotü kka̧kuä̧tü̧jä̧. Ttädätäku päinä̧u̧: Jua̧u̧nu̧mä̧ ukutu'i̧nä̧ chi'ätta uwa pättara̧'a̧ aditäjätukui, adiwomȩnä̧ chi̧mi̧tä̧kuä̧u̧jä̧.
8Täkü, yodó juomȩnä̧ uwa pätta u̧ru̧wa̧mä̧ adikuä isotü ttu̧ru̧wa̧rü̧ pä'inü̧: Adikuä ttü̧ja̧rü̧ wopo'ü mi̧tä̧ri̧, ä̧kuo̧mȩnä̧mä̧ rüjinä̧ kka̧kuä̧mä̧jä̧tü̧ttü̧ kkä̧mä̧dü̧, jua̧u̧nü̧ o'ka'a rüjí ja̧'a̧ku̧mä̧ ä'kanä̧ kka̧kuä̧mä̧jä̧tü̧bü kä'ädü. 9Ja̧'wa̧nü̧ ja̧'a̧, ni̧pä̧ro̧mȩ ja̧'a̧ku̧ las cinco-nä̧ kka̧kuä̧mü̧ aditäjätürümä̧, ya'ute denario pünä̧ i̧mi̧tä̧'chi̧nä̧u̧, yotükupünä̧rü̧mä̧. 10Ja̧'wa̧nü̧ i̧mi̧tä̧rä̧ji̧ o'ka'a, ä̧kuo̧mȩnä̧ do'ächü aditäjätümä̧ ichi'ü, ujutumä̧ jua'a yabonä̧nü̧ i̧mi̧tä̧kuä̧u̧jä̧ 'kua̧ra̧'a̧ pättäja'amä̧, juätürü'i̧nä̧ ji̧yȩtȩ denario pünä̧tä̧ i̧mi̧ti̧nä̧u̧. 11Ja̧'wa̧nü̧ ttaditäji mikuä i̧mi̧tä̧rä̧u̧ ȩmü̧mä̧, pätta u̧ru̧wa̧ ütü'kü suronä̧ ukuokuinä̧tü̧, 12pä'inä̧tü̧: «Jitüja rüjinä̧ ichü, suro ji̧yȩtȩ hora-tä aditäjärü'i̧nä̧ ujutu ya'ute mo̧ro̧ 'kuäo'ünä̧ aditü, du'a'a kkä̧nü̧ usurä ȩmä̧wä̧jä̧tü̧ jü̧ta̧'a̧nü̧ i̧mi̧tä̧jä̧u̧,» jü̧nä̧. 13Ja̧'wa̧nü̧ ji̧yä̧ku̧ pätta u̧ru̧wa̧mä̧ juätüttü ya̧tȩrü̧ pä'inü̧: Cha̧wa̧ru̧wa̧ ukurumä̧ suronä̧mä̧ mitokü päjisä. Ukukumä̧ ya'ute mo̧ro̧mä̧, ji̧yȩtȩ denario jo̧mȩtä̧ chimi̧taku pä'ü tukuokuäkuäwäja'attü. 14Ja̧'wa̧nü̧ ja̧'a̧ttü̧ kuaditäji mikuämä̧, pi̧yȩtä̧ ja̧'a̧: Ja̧já̧. Ja̧'wa̧nü̧ ja̧'a̧nä̧, rüjinä̧ do'ächäjirü'i̧nä̧ ukuru jü̧ta̧'a̧nü̧ yoräteunä̧ chiya pä'üsä. 15Ttütä chiäre pärätämä̧, ttürütä pä̧wä̧rü̧jo̧mȩnä̧ jȩpü̧sä̧. ¿Adiu jȩcha̧'a̧mä̧, uku kuju'kü juiyünä̧ ja̧'a̧ tä̧jí̧?
16«Ja̧'wa̧nü̧ jü̧ta̧'a̧nü̧, ä̧kuo̧mȩnä̧ wotümä̧, rüjinä̧ pätti'äkuotü; ja̧'wa̧ta̧nü̧ rüjinä̧ wotütä, ä̧kuo̧mȩnä̧ pätti'äkuotü.»
Wäbodäkuä päi'ünä̧, Jesú-mä̧ toe'ä̧kuȩ ji'äwinü̧
(Mc 10.32-34; Lc 18.31-34)
17Jerusarȩ́-ra̧'a̧ku̧ mä̧nä̧nä̧ i̧'cho̧mȩ kkä'kottü, Jesú-mä̧ u̧wo̧juȩtä̧u̧ doce-nü̧ wotürü i̧mi̧ku̧nä̧ pojopo'ü päinä̧u̧:
18—Jitämä̧, Jerusarȩ́-ra̧'a̧ku̧ 'chä̧tü̧jä̧, jua'attümä̧, Ttü ubo I̧tti̧rü̧mä̧ sacerdote wotü tturuwotü ttu̧mü̧nä̧'i̧nä̧, weäwä wȩnȩ wo̧juȩtä̧tü̧ ttu̧mü̧nä̧'i̧nä̧ iyü ttikuomȩnä̧, kuä'ü ttikuattü pä'ü we'ü ttu̧ju̧nä̧kua̧sä̧. 19Ja̧'wa̧nü̧ ja̧'a̧ judío pokotürü iyü ttikuomȩnä̧, ya̧'a̧wä̧'chü̧, kuäkuäpü jȩpi̧'ü̧'kotü, ü̧jo̧kä̧nü̧ jäi daunä̧ ttu̧ju̧na̧'a̧ 'korupä'i̧'ü̧'ka̧, wäbodäkuä mo̧ro̧ päi'omȩnä̧ tto̧dä̧chä̧kua̧sä̧.
Sa̧ti̧a̧ku̧ku̧, Ju̧a̧-ku̧ tta̧ju̧ru̧ Jesú ädätinü̧
(Mc 10.35-45)
20Ja̧'wa̧nü̧ ja̧'a̧ Zebedeo i̧tti̧mü̧ tta̧ju̧, Jesú ä'ka jo̧mȩ Kki̧tti̧mü̧ku̧ 'chä̧wi̧'ü̧, kkiwe'kiyunä̧ pä̧mä̧di̧nä̧ju̧ kkorojuei jäjepa pä'ü. 21Jesú-mä̧, päinä̧kua̧:
—¿Däjejä̧ttü̧ ukuru rekuä rü̧jü̧mä̧? ädätinä̧ju̧:
—Ukú Ru̧wa̧ ku̧'o̧mȩnä̧mä̧ pitü chi̧tti̧mü̧ ta̧ju̧ru̧, ya̧tȩrü̧mä̧ ku̧wo̧jua̧'a̧ku̧nä̧, kka̧ra̧rü̧mä̧ ku'oweja̧'a̧ku̧nä̧ ttü̧'ȩmü̧nä̧ wekua pä'äjusä.
22Päjäku, Jesú-mä̧ ädätinä̧kua̧:
—Jäkuepätukua'anä̧, jerupätüjä̧. ¿Ttü usurä chȩmä̧wä̧kua̧'a̧ jü̧ta̧'a̧nü̧, usurä kuȩmä̧wä̧tu̧kua̧ pä'ätüjä̧?
Päomȩnä̧, ttädätinä̧ku̧:
—A̧, usurä tȩmä̧wa̧ pä'ätüjä̧,
23Jesú-mä̧ ädätinä̧u̧:
—Isopäi'ünä̧ pädäu̧jä̧, ttütä jü̧ta̧'a̧nü̧ rü̧ȩnä̧ usurä kuȩmä̧wä̧tu̧kua̧'a̧nä̧; ttü wedomȩttü̧ chu̧wo̧jua̧'a̧ku̧nä̧, chü'oweja̧'a̧ku̧nä̧, rütüwämä̧ ttü jäwämä̧kü̧, Chä'o ü'ätetinä̧u̧ru̧ iyü jäwä ja̧'a̧.
24Kkorotü u̧wo̧juȩtä̧u̧ diez-nü̧ wotümä̧, pi̧yȩ ä̧ju̧ku̧, juätü i̧jä̧wa̧ku̧, ubüoku wotü ta̧ju̧ru̧ ttüjü'kü juiyünä̧ amükuädinä̧tü̧. 25Ja̧'wa̧nü̧ ji̧yä̧ku̧ Jesú-mä̧ wopo'ü päinä̧u̧:
—Ukutumä̧ wo̧juä̧tü̧jä̧, pi̧jä̧nä̧ ruwotü we'ätümä̧, ttü̧ja̧rü̧ pä̧i̧ku̧nä̧ we'ü jȩpä̧tü̧ ja̧'wa̧nü̧ jȩpü̧ juiyo ruwotümä̧, juätü ttu̧wä̧mȩnä̧ we'ätümä̧. 26Ja̧'wa̧nü̧ ja̧'a̧nä̧, ukuturumä̧ ja̧'wa̧nü̧ jo̧ka̧'a̧ jä̧kua̧'a̧. Isopäi'ünä̧, ya̧tȩ ukuo i̧sa̧ ü̧ja̧ päüttümä̧, ku̧mü̧wä̧ya̧tu̧ku̧ jä̧kua̧. 27Ja̧'wa̧ta̧nü̧ ukututtü ya̧tȩ ä̧kuo̧mȩnä̧ i̧sa̧ ja̧ päüttümä̧, esclavo pättäku jä̧'i̧jü̧'a̧nü̧ wekuätukuäku jä̧kua̧; 28Ttü, Ubo I̧tti̧ chüta'anü̧, ttümä̧ weda pä'ümä̧ ichokü pinü̧sä̧, pärokua'aku ttu̧mü̧wä̧ya̧ jü̧nä̧tä̧, rekuätürü ppä'ädü iku cha̧'kua̧rü̧ iyäu ichinü̧sä̧.
Jesú ä̧to̧kä̧tü̧rü̧ aditü ikuinü̧
(Mc 10.46-52; Lc 18.35-43)
29Jericó ütawiyättü rä'opächü i̧'cho̧mȩnä̧, o'ka'anä̧ ttü̧ja̧ rekuätü 'chi̧nä̧tü̧. 30Ja̧'wa̧nü̧ i̧'cho̧mȩnä̧, Jesú 'kuä'opüdo pätta'a ä̧ju̧ku̧, ä̧to̧kä̧tü̧ ta̧ju̧ mä̧nä̧ jäyä pȩjü̧ wopinä̧tü̧:
—¡Chu̧ru̧wa̧, Dawi i̧tti̧ ujuturu rȩrü̧jü̧ topitü!
31Ja̧'wa̧nü̧ wo̧tti̧yä̧u̧ ttü̧ja̧mä̧ ttü'koruchi'a pätta'anä̧, yabonü̧ jarodi'ü wopinä̧tü̧:
—¡Chu̧ru̧wa̧, Dawi i̧tti̧ ujuturu rȩrü̧jü̧ topitü!
32Ja̧'wa̧nü̧ wottäku Jesú-mä̧ kkä̧mä̧do̧'ü̧ ä̧to̧kä̧tü̧rü̧ wopo'ü pä'inü̧:
—¿Däje jȩchä̧tu̧kua̧ku̧ päkuätukuättü̧?
33Päomȩnä̧, ttädätinä̧ku̧:
—Chu̧ru̧wa̧, pä'äji ji̧nü̧ta'anü̧, ti'äre adiwächa pä'ätüjä̧.
34Rȩrü̧jü̧nü̧ topü, Jesú-mä̧ tti'ärenä̧ mȩo̧mȩnä̧ yotäku tottünä̧ päi'inä̧u̧. Täkü, jua̧u̧nu̧tä̧ chutäku 'chi̧nä̧tü̧.
Currently Selected:
San Mateo 20: PNT13
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela
