San Mateo 14

Bautizo jȩä̧kuä̧wä̧ i̧sa̧, Ju̧a̧ wa'ü ikuinü̧ wȩnȩ

(Mc 6.14-29; Lc 9.7-9)

1Jua̧u̧nu̧tä̧ pä̧nä̧ Herode Antipas-mä̧, Galirea rȩjȩnä̧ ru̧wa̧ pä̧nü̧, Jesú rü̧ȩnä̧ ukuota'a ä̧ju̧kui̧nü̧. 2Ja̧'wa̧nü̧ ä̧ju̧ku̧ u̧mü̧wä̧yotürü pä'inü̧: «Jua̧u̧mä̧, bautizo jȩpi̧'ȩnü̧ Ju̧a̧ ja̧'a̧ wa'arettü tto'ächäji̧'ka̧ jȩa̧'a̧. Ja̧'wa̧nü̧ jo̧mȩttü̧ ujuru kkä̧ku̧ jȩpü̧, jȩtto̧kü̧ ja̧jü̧juei jȩa̧'a̧mä̧.» 3Pa̧'a̧nü̧ pä'amä̧, Herode-mä̧ Ju̧a̧-rü̧ kä̧rȩnä̧sa̧nä̧ nü̧'kü kärenä̧ ttütünä̧ weina̧'a̧ ji̧na̧'a̧, i̧jä̧wa̧ Filipo irekua Herodía jäwänä̧. 4Ja̧'wa̧nü̧ jä̧kua̧'a̧mä̧, Ju̧a̧-mä̧ Herode-rü päina̧'a̧ ji̧na̧'a̧: «Kui̧jä̧wa̧ irekuarümä̧ kuirekua jü̧nä̧mä̧ ku̧ju̧ juiyü'anü̧ ja̧'a̧.» 5Herode-mä̧, Ju̧a̧-rü̧ kuä'ü ikua pä'ü amükuäda'anä̧ jȩpo̧kü̧ pinü̧, ttü̧ja̧rü̧ yekua'attü̧, jua̧u̧mä̧ profeta pä'ü ttesetiyäku. 6Ja̧'wa̧nü̧ ja̧'a̧nä̧ Herode uwäpächinü̧ mo̧ro̧ pätekuächü pä'kärinä̧, Herodía kkittiju baira tü'inä̧ju̧ ttü̧ja̧ o'katoi'ünä̧ ttä'ka jo̧mȩttü̧, Herodes'i̧nä̧ esewächi'ünä̧. 7Ja̧'wa̧nü̧ jä̧ku̧, o'kajuiyünä̧ kküjü'kümä̧ jäjeparü pä'ü juramento pättünä̧ jȩpi̧nü̧. 8Ja̧'wa̧nü̧ ja̧'a̧ Juajumä̧, ä'kanä̧ kka̧ju̧ ro̧ȩkuä̧nä̧ Herode-rü pä'inä̧ju̧:

—Sä̧rä̧bä̧nä̧ ȩnä̧wa̧'a̧ bautizo jȩä̧kuä̧wä̧ i̧sa̧ pä'ijü, Ju̧a̧ u iyittü.

9Päjomȩnä̧ Ru̧wa̧ Rey Herode-mä̧ rü̧ȩnä̧ a̧'kua̧ tta̧'ȩkui̧pinü̧; ja̧'wa̧nü̧ ja̧'a̧nä̧ a̧tȩpä̧jä̧u̧ ttä'ka jo̧mȩttü̧ juramento pättü jȩä̧ja̧'a̧ jä̧ku̧, jäjepäjimä̧ iyätukuiju pä'ü we'inü̧. 10Ja̧'wa̧nü̧ ja̧'a̧ttü̧ Ju̧a̧-rü̧mä̧ kärenära̧'a̧ttü̧ «u» 'kui'opü ttikuarü pä'ü we'inü̧; 11weäjita'anü̧ jȩpä̧jä̧'kotü sä̧rä̧bä̧nä̧ ȩpü̧ müäyajuru iyinä̧tü̧, ttiyäjäkuamä̧ kka̧ju̧ru̧ iyinä̧ju̧.

12Ja̧'wa̧nü̧ jä̧ja̧'a̧ o'ka'amä̧, Ju̧a̧ u̧wo̧juȩtä̧u̧ pä'ijätümä̧, 'korujuo'ächäjirütä ȩmo̧po̧'ä̧chü̧ 'turu ikuäjä'kotü; Jesú-ru ji'äu 'chi̧nä̧tü̧.

Jesú rekuätürü ttu̧kuȩ iyinü̧

(Mc 6.30-44; Lc 9.10-17; Jn 6.1-14)

13Jesú-mä̧ Ju̧a̧ toeächäji jittäwa'a ä̧ju̧kui̧'i̧pü̧tä̧, juorümä̧ woi'kanä̧ rä'opächü 'chi̧nü̧ dȩ'a̧ra̧'a̧ ttü̧ja̧ tomȩku̧. Ja̧'wa̧nü̧ i̧'chä̧ja̧'a̧ ä̧ju̧ku̧ ttü̧ja̧mä̧ ütawiyä pünä̧ttü̧ rä'opü rȩjȩnä̧ rutti'inä̧ku̧. 14Jesú-mä̧ woi'kattü i̧mȩyȩwi̧'o̧mȩnä̧ ttü̧ja̧ rekuätü ttü̧ja̧kua̧'a̧ topinü̧; to'omȩnä̧ rȩrü̧jä̧chi̧'ä̧ku̧ na̧nȩpä̧tü̧ tti̧'chä̧chä̧jä̧u̧ru̧ aditü ikuinü̧. 15Täkü ni̧pä̧chi̧yä̧u̧, u̧wo̧juȩtä̧u̧mä̧ 'chä̧wi̧'ü̧ Jesú-ru pä'inä̧tü̧:

—Täkü ni̧pa̧ro̧mȩ ja̧'a̧, ttü̧ja̧'i̧nä̧ tü'künä̧mä̧ tomȩ ja̧'a̧. Ttü̧ja̧rü̧mä̧, ütawiyära̧'a̧ku̧ we'ü ikuitü ttu̧kuȩ ttȩmä̧ja̧.

16Ja̧'wa̧nü̧ pättäku Jesú-mä̧ ädätinä̧u̧:

—Ȩmü̧ tti̧'cha̧ pä'ümä̧ rekuä rü̧jo̧ko̧u̧; ukututä iyätukuitü ttu̧kuȩmä̧.

17Pä̧u̧ ädätinä̧tü̧:

—Pȩnȩmä̧, suro pa̧ja̧kuä̧cho̧ko̧mȩtä̧ kku̧nä̧rä̧tü̧jä̧, trigo o̧si̧mä̧ ji̧mü̧tȩ jäwätä ja̧'wa̧ta̧nü̧ po̧i̧mä̧ ta̧ju̧ru̧tä̧, jü̧nä̧.

18Jesú-mä̧ päinä̧u̧:

—Pa'aku i'kächätukui.

19Pä'äji̧'ka̧, ttü̧ja̧rü̧mä̧ isä'kua wä̧mȩ ttü̧'ä̧mä̧da̧ pä'ü wȩä̧jä̧u̧ ttü̧'ȩjä̧ma̧'a̧nä̧, ji̧mü̧tȩ jäwä trigo ire o̧si̧'i̧nä̧, po̧i̧ ta̧ju̧ru̧'i̧nä̧ ȩmo̧po̧'ü̧ mo̧ro̧jä̧ra̧'a̧ku̧ topünü̧ Dio-rü eseunu̧ ukuokuinü̧. Ukuokuäji̧'ka̧ 'To'opü i̧yä̧u̧ u̧wo̧juȩtä̧u̧mä̧ jua'a yabo ttü̧ja̧rü̧ iyä'chinä̧tü̧. 20O'katoi'ünä̧ suttädi'omȩbü päi'ünä̧ kuinä̧tü̧; ttukuäji o'ka'a kka̧kui̧pä̧ji̧ttü̧mä̧ püttäwä o'tamä̧ doce-nü̧ jo̧mȩnä̧ su̧'pȩ päi'ünä̧ ka̧ka̧ti̧nä̧tü̧. 21Jua̧u̧ kuinä̧tü̧mä̧ cinco mil jo̧mȩnä̧ ji̧na̧'a̧, suro u̧mä̧tü̧tä̧mä̧, nä̧tü̧rü̧'i̧nä̧, ppo̧'ä̧tü̧rü̧'i̧nä̧ pa̧ja̧kuä̧juiyünä̧.

Jesú aje wä̧mo̧tonä̧ i̧'chi̧nü̧ wȩnȩ

(Mc 6.45-52; Jn 6.16-21)

22Jua̧u̧ o'komȩnä̧, Jesú-mä̧ u̧wo̧juȩtä̧u̧rü we'inü̧ woi'kanä̧ pȩjä̧mü̧ ä'kanä̧ rü̧ä̧ dubora ttijäwiyarü pä'ü, chutämä̧ ttü̧ja̧rü̧ we'ü iku ü̧ji̧pa̧'a̧nä̧. 23Ttü̧ja̧ rekuäjätürü we'ü ikuäji̧'ka̧, Jesú-mä̧ mü̧'ä̧'kara̧'a̧ kkatätä 'cha'ächinü̧ Dio-rü ukuoku 'chä̧nü̧. Jua'atä ni̧'ȩkuä̧chä̧ji̧'ka̧ kkatätä kki̧nü̧, 24Woi'kamä̧ jäyotottü otó juoächäja'a ra̧'a̧, aje rü̧ȩnä̧ ppawina̧'a̧ kkä̧rü̧'koppamä̧ pä̧tȩkuä̧nü̧ düomȩnä̧. 25Ja̧'wa̧nü̧ ja̧'a̧ mo̧ro̧ juoä'kaku päi'omȩnä̧, Jesú-mä̧ rü̧ä̧ dubora wä̧mo̧tonä̧ u̧wo̧juȩtä̧u̧ ttü̧rȩja̧'a̧ku̧ ü̧jä̧pü̧nä̧ ichinü̧. 26Ja̧'wa̧nü̧ aje wä̧mo̧tonä̧ icha'a topü u̧wo̧juȩtä̧u̧mä̧ jerupü ye'ü wopinä̧tü̧:

—¡Wa'inä̧tü̧ ttüäwettä! pä'ü,

27Ja̧'wa̧nü̧ ji̧yä̧ku̧ Jesú-mä̧ päinä̧u̧:

—¡Wo'kuätukuä! ¡Ttütäsä!: ¡Ye'ü'i̧nä̧ yekuätukuä!

28Ja̧'wa̧nü̧ päiyäku Peduru-mä̧ päinä̧ku̧:

—Chu̧ru̧wa̧, ukutä jü̧ttü̧mä̧, ttü'i̧nä̧ aje wä̧mo̧tonä̧ ku̧ja̧'a̧ku̧ chi̧'cha̧ we'i.

29—Päku, Jesú-mä̧: —Ichi, päinä̧ku̧,

Ja̧'wa̧nü̧ ja̧'a̧ Peduru-mä̧ woi'kattü mȩyȩwä̧chü̧ aje wä̧mo̧tonä̧ Jesú ü̧ja̧'a̧ku̧ 'chi̧nü̧. 30Ja̧'wa̧nü̧ ja̧'a̧nä̧ rü̧ȩnä̧ kkä̧rü̧'ko̧wa̧'a̧ topü yeomȩnä̧, jakuotoku ma̧'o̧po̧'ä̧chü̧, wopinü̧:

—¡Chu̧ru̧wa̧, ppä'ädittü! jü̧nä̧. 31Woäku, Jesú-mä̧ yotäku u̧mü̧ttü̧ 'chu'ädü päinä̧ku̧:

—¡Tta̧'u̧ wȩnä̧rä̧kuä̧wä̧ a̧'u̧kua̧jä̧! ¿Tta̧'a̧nü̧ pä'ü esetoküjä̧ttü̧?

32Woi'kanä̧ ttü̧'ä̧jä̧mo̧mȩnä̧, kkä̧rü̧'koppamä̧ wirochi'ina̧'a̧. 33Woi'kanä̧ pȩjä̧tü̧mä̧ Jesú ä'ka jo̧mȩ ttiwe'kiyunä̧ kka̧kuä̧mü̧ pä'inä̧tü̧:

—¡Isopäi'ünä̧tä̧ ukumä̧ Dio I̧tti̧jä̧!

Genesaret-ttü na̧nȩpä̧tü̧rü̧ Jesú-mä̧ aditü ikuinü̧

(Mc 6.53-56)

34Rü̧ä̧ dubora kkäwächäjä'kotü Genesaret rȩjȩra̧'a̧ rȩbȩwi̧pi̧nä̧tü̧. 35Juä̧jä̧nä̧ kka̧kuä̧tü̧mä̧ Jesú-ru wo̧jui̧'ä̧'kotü, juä̧jä̧ ppeyänä̧ kka̧kuä̧tü̧rü̧'i̧nä̧ ji̧ttä̧wä̧u̧ na̧nȩpä̧tü̧rü̧ tti'chächiniyä̧ku̧, 36tti̧'chä̧chä̧u̧mä̧, ajuäkuäunü̧ jä̧ttȩpä̧ri̧nä̧ku̧, suro ku̧'ka̧tä̧wä̧ta̧ wä̧mȩ i̧sä̧ta̧ beipomȩ mȩta̧ we'itü pä'ü; ja̧'wa̧nü̧ ja̧'a̧ jua̧u̧ru̧ mȩ'ä̧tü̧mä̧ o'katoi'ünä̧ ttumä̧richeittümä̧ pȩji̧pi̧nä̧tü̧.

Currently Selected:

San Mateo 14: PNT13

Highlight

Copy