2 Juan 1
1
Igresia-rü teäwinü̧ wȩnȩ
1Igresia-ttü ukuo i̧sa̧mä̧, Dio pojopü ȩmi̧nä̧u̧rü̧ jua'atäku ja̧u̧nä̧tä̧ kka̧kuä̧tü̧rü̧ te'äusä. Isopäi'ünä̧ eseu repedä̧u̧jä̧; ja̧'wa̧ta̧nü̧ ttütämä̧kü̧, ja̧u̧ ja̧jü̧jueimä̧ o'katoi'ünä̧ isopäi'ünä̧ wȩnȩ wo̧jui̧'i̧nä̧tü̧'i̧nä̧. 2Ukuturumä̧ isopäi'ünä̧ jäwä tamiso'kinä̧ tu̧ju̧nä̧rü̧nä̧ ja̧'wa̧ta̧nü̧ 'kuäopünä̧tä̧ kkä̧kuȩnä̧ eseu repedä̧u̧jä̧. 3Jä'o Dio-nä̧, ja̧'wa̧ta̧nü̧ I̧tti̧ Jesucrito-nä̧, mippoünä̧ iyäwä'i̧nä̧ re kkä̧kuä̧wä̧'i̧nä̧, wȩnȩ juiyünä̧ kkä̧kuä̧wä̧'i̧nä̧ ja̧'wa̧ta̧nü̧ Jä'o I̧tti̧mä̧ ujutuku ü̧jä̧kua̧ isopäi'ünä̧ wȩnȩ päü'anü̧.
Isopäi'ünä̧ eseu repeäkuäwä wȩnȩ
4Rü̧ä̧nä̧ esewächi'äjisä ukututtü yotukunä̧ isopäi'ünä̧ wȩnȩ pä'aku Tä'o Dio weü'anü̧ ttü̧ja̧kua̧'a̧ po̧kui̧pü̧mä̧. 5Ja̧'wa̧ta̧nü̧ jitämä̧, chawaruwä chü̧jä̧wa̧tü̧, kkorotüku repe'äkuäu kka̧kuä̧tu̧kui̧ pä'ü ajuäwäkuäunü̧ jädepä̧u̧jä̧. Pi̧yȩ chi̧wȩyu̧tu̧mä̧ jareü wȩnȩmä̧kü̧ ja̧u̧ ja̧jü̧jueimä̧ ä̧kuo̧mȩnä̧tä̧ päi'ünä̧ tȩmi̧nü̧ ja̧'a̧. 6Ja̧'wa̧ta̧nü̧ eseu repeäkuäwämä̧ Dio weü wȩnȩ päü'anü̧ ttü̧ja̧kua̧ pä'ü kkada'kawa'a, ja̧'wa̧nü̧ ja̧'a̧ttü̧ ä̧kuo̧mȩnä̧tä̧ päi'ünä̧ kuä̧ju̧kui̧nä̧tu̧ku̧ta̧'a̧nü̧ eseu repe'ünü̧ kka̧kuä̧tu̧kui̧.
Jesucrito-nä̧ isopäi'ünä̧ tta̧'kua̧ ttu̧wȩnä̧rü̧ wȩnȩ
7Ja̧'wa̧ta̧nü̧ pi̧jä̧nä̧mä̧ rekuätü ttü̧ja̧rü̧ yaparetü Jesucrito-mä̧ isopäi'ünä̧ Ubo jü̧nä̧mä̧ ichokü pinü̧ pä'ü kue'ächü ji'äwätü. Ja̧'wa̧nü̧ wa̧mä̧ jerutu ikuäwä i̧sa̧tä̧ ja̧'a̧ ja̧'wa̧ta̧nü̧ Crito aboi̧ya̧tä̧ wa̧. 8Ttu̧'ȩpä̧rü̧nü̧ kka̧kuä̧tu̧kui̧, taditäwä u̧wä̧ju̧ tote'ächü juiyäkua'anü̧, totte'ächajueimä̧ iya päinü̧mä̧ jo̧mȩnü̧tä̧ kuȩmä̧tu̧kuä̧kua̧'a̧nü̧.
9Ya̧tȩ Crito u̧wo̧juȩti̧no̧mȩttü̧'i̧nä̧ abonä̧nü̧ amükuädümä̧ Dio-rümä̧ kkü̧nä̧ro̧kü̧; ja̧'wa̧nü̧ ja̧'a̧nä̧ u̧wo̧juȩti̧nü̧nä̧ kkü̧mä̧ Jä'orü'i̧nä̧, I̧tti̧rü̧'i̧nä̧ kku̧nä̧rü̧. 10Ya̧tȩ, ukuturu do'ächü ichü pi̧yȩ wo̧juȩkuä̧ wȩnȩ i'chächoka'a ichüttümä̧ kuojusodetukunä̧mä̧ do'ädü'i̧nä̧ te'äu'i̧nä̧ jü̧nä̧mä̧ jȩ'kuä̧tu̧kuä̧rü̧. 11Ja̧'wa̧nü̧ wa̧rü̧ te'äumä̧ suronä̧ jȩü̧nä̧ ppächi̧'ä̧kua̧.
Rüjinä̧ teäwi'inü̧ wȩnȩ
12Ukuturumä̧ rü̧ä̧nä̧ chukuokua pä'üsä, ja̧'wa̧nü̧ ja̧'a̧nä̧ kuyäru isojänä̧mä̧ wȩyu̧tu̧mä̧ we'oküsä. Ttütätä ukuturu do'ächü ichü topü chukuokua pä'ütä tta̧'a̧ru̧sä̧, ja̧'wa̧nü̧ jü̧ttü̧tä̧ tesewäkuäwä'ijümä̧ jo̧mȩnü̧ jä̧kua̧'a̧.
13Ukutu kuawaruwä kui̧jä̧wa̧tü̧ ji̧nä̧ ji̧yȩtȩ wotümä̧ ja̧'wa̧ta̧nü̧ Dio pojopü ȩmi̧nä̧u̧mä̧ tti̧wȩnȩnä̧ te'äu wȩttä̧u̧jä̧.
Currently Selected:
2 Juan 1: PNT13
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela