1 Juan 5
5
A̧'kua̧ wȩnä̧rü̧mä̧, surojü abo 'kuä'o'ü
1O'katoi'ünä̧ Jesú-ru, Crito ja̧'a̧ pä'ü esetätümä̧, Dio-ttü uwäpächinä̧tü̧ ja̧'a̧; ja̧'wa̧ta̧nü̧ o'katoi'ünä̧ Jä'orü eseu repe'ätümä̧, i̧tti̧rü̧'i̧nä̧ eseu repe'ätü. 2Ja̧'wa̧nü̧ ja̧'a̧ttü̧ Dio-rü eseu repe'ü kkä̧nü̧ Chutä weinü̧ tukuotomȩnä̧mä̧, Dio i̧tti̧mü̧rü̧ eseu repe'ätüjä̧ pä'ü wo̧juä̧tü̧jä̧. 3Ujutu Dio-rü eseu repetümä̧ i̧jȩkuä̧cha̧'a̧, Chutä weinü̧ wȩnȩ tukuotomȩnä̧. Jua̧u̧ ukuotäkuäwämä̧ juiyomä̧ jeruwokü ja̧'a̧. 4O'katoi'ünä̧ Dio-ttü uwäpächinä̧tü̧mä̧ pi̧jä̧ jäwä surojü kkȩdü̧ ikuätü. Ja̧'wa̧ta̧nü̧ o'katoi'ünä̧ Jesucrito-rü tta̧'kua̧ wȩnä̧rä̧tü̧mä̧ pi̧jä̧ jäwä surojü abo 'kuä'o'ätü. 5Jesucrito-mä̧ Dio I̧tti̧ ja̧'a̧ pä'ü esetümä̧ pi̧jä̧ jäwä surojü kkȩdü̧ iku.
6Pidetä, Jesucrito-tä ja̧'a̧ ajiyanä̧'i̧nä̧, ukuojanä̧'i̧nä̧ ichinümä̧, bautizo jȩtti̧nä̧ku̧ ajiyanä̧'i̧nä̧, 'korujuoächomȩnä̧ ukuoja werächinä̧ku̧. Dio-ttü ichü Epíritu-tä ja̧'a̧ pi̧yȩ toinü̧ ji'äumä̧, jua̧u̧ jiäumä̧ o'kajuiyünä̧ jueü wȩnȩtä̧ ja̧'a̧. 7[Mo̧ro̧jä̧nä̧ttü̧ ji'äwätümä, wä̧mȩtukuä ja̧'a̧: Jä'o Dio'i̧nä̧, I̧wȩnȩ'i̧nä̧, Epíritu Sa̧tu̧'i̧nä̧, jü̧nä̧.] #5.7 Pi̧yȩ [] corchete pättü jakuä wȩyu̧kuä̧mä̧ täbokü tti̧wȩyu̧ti̧nü̧ griego wȩnȩnä̧mä̧ (mss griego antiguo) pättünä̧mä̧ räopoka'a; latín wȩnȩnä̧ tti̧wȩyu̧ti̧nü̧nä̧tä̧ (mss latín-nä̧) räopa'a. Juätü wämetukuämä̧ ji̧nä̧ ya̧tȩ wotü ja̧'a̧. 8Epíritu Dio weinä̧ku̧'i̧nä̧, ajiya bautizo jȩä̧kuä̧wi̧nü̧'i̧nä̧ ja̧'wa̧ta̧nü̧ ukuoja, ü̧jo̧kä̧ jäittü werächinoya'i̧nä̧, jü̧nä̧. Ja̧'wa̧nü̧ ja̧'a̧ttü̧, pi̧yȩ [wäbodäkuänä̧ jo̧mȩnä̧ jü̧mä̧, ji̧nä̧ ji̧yȩtȩtä̧ jiäwa'a.] 9Ujutumä̧ ttü̧ja̧ pättütä mikuäunä̧ esetätüjä̧ ja̧'wa̧nü̧ ja̧'a̧nä̧ jua'a yabonä̧ mikuäunä̧ esetätüjä̧ Dio päümä̧, Chutä I̧tti̧ ütü'kü jiäwa'attü. 10Dio I̧tti̧rü̧ ta̧'kua̧ tu̧wȩnä̧ro̧mȩnä̧mä̧, Dio pä'inü̧ esetätüjä̧. Ja̧'wa̧nü̧ ja̧'a̧nä̧ Dio-rü esetokümä̧, Jua̧u̧ru̧ ya̧pa̧rȩwa̧ jü̧nä̧ kku̧ni̧pü̧, jua'amä̧ Chutä Dio I̧tti̧ Jesucrito ütü'kü ukuokuinü̧ esetoka'attü̧. 11Ja̧'wa̧nü̧ ja̧'a̧ttü̧, Dio-mä̧ kkä̧kuä̧wä̧ i'ko ujuturu Chutä iyinü̧ ukuokuinü̧, jua̧u̧ kkä̧kuä̧wä̧ i'komä̧ I̧tti̧rü̧ tesetomȩnä̧tä̧ tu̧ju̧nä̧ri̧ya̧rü̧ pä'ü. 12Dio I̧tti̧rü̧ kku̧nä̧rü̧mä̧, kkä̧kuä̧wä̧ i'ko kku̧nä̧rü̧; ja̧'wa̧nü̧ ja̧'a̧nä̧ Dio I̧tti̧rü̧ kkü̧nä̧ro̧kü̧mä̧ kkä̧kuä̧wä̧ i'ko jui̧'a̧.
Rüjí jäwä
13Ukutu Dio I̧tti̧ i̧mi̧nä̧ esetätürü wȩyu̧tu̧ we'üsä, kkä̧kuä̧wä̧ i'ko kku̧nä̧rä̧tü̧jä̧ pä'ü ku̧wo̧juä̧tu̧kua̧ pä'ü.
14Pa̧'a̧nü̧ jo̧mȩttü̧ Dio-rümä̧ ta̧'kua̧ wȩnä̧rä̧tü̧jä̧, Churutä pä̧wä̧rü̧jo̧mȩnä̧ jätepomenä̧mä̧, Jua̧u̧mä̧ ä̧ju̧kuä̧tü̧jä̧ pä'ü tu̧wo̧jua̧'a̧ttü̧. 15Ja̧'wa̧nü̧ Dio-rü jä'epü tukuokumä̧ ä̧ju̧kuä̧tü̧jä̧ pä'ü tu̧wo̧jua̧'a̧ttü̧, ja̧'wa̧ta̧nü̧ jätepinü̧mä̧ iyinä̧u̧jä̧ pä'ü'i̧nä̧ wo̧juä̧tü̧jä̧.
16Ya̧tȩ ta̧wa̧ru̧wa̧ ti̧jä̧wa̧ Dio-ttü jo̧mȩnü̧ 'kȩ'ȩpü̧ ikuokü surojü jȩo̧mȩnä̧mä̧, jua̧u̧ru̧ Dio-rü ukuokui, jua̧u̧ru̧ Dio kkä̧kuä̧wä̧ iyarü, jua'a'i̧nä̧ Dio-ttü jo̧mȩnü̧ 'kȩ'ȩpü̧ ikuokü surojü jȩo̧mȩnä̧tä̧. Ja̧'wa̧nü̧ ja̧'a̧nä̧ kkoro surojü kka̧'a̧ Dio-ttü jo̧mȩnü̧ 'kȩ'ȩpü̧ iku, jua̧u̧ jȩü̧ttü̧mä̧, Dio-rümä̧ jättepa pä'oküsä. 17O'kajuiyütä surojümä̧, Dio abo jäwä ja̧'a̧ ja̧'wa̧nü̧ ja̧'a̧nä̧ surojü o'kajuiyünä̧mä̧ Dio-ttümä̧ 'kȩ'ȩpü̧ ikuokü.
18O'katoi'ünä̧ Dio-ttü uwäpächinä̧tü̧mä̧ surojümä̧ jȩpȩ'ü̧ kko̧ko̧tü̧. Jua'amä̧ Dio I̧tti̧tä̧ tta̧wä̧ra̧'a̧ttü̧, äwettä mȩü̧ juiyünä̧. 19Ujutumä̧ Dio-ku ji̧nä̧ ji̧yȩtȩ wotüjä̧ ja̧'wa̧ta̧nü̧ pi̧jä̧ ttü̧ja̧mä̧ o'katoi'ünä̧ äwettä weünä̧tä̧ kka̧kuä̧tü̧. 20Ja̧'wa̧ta̧nü̧ wo̧juä̧tü̧jä̧ Dio I̧tti̧ ichinü̧'ka̧, ji̧nä̧so Chutä Dio-rü jo̧mȩnü̧ tu̧wo̧jua̧ pä'ü u̧wo̧juȩti̧na̧'a̧mä̧. Ujutumä̧ I̧tti̧ Jesucrito-nä̧ ji̧nä̧ ji̧yȩtȩ wotüjä̧; jua̧u̧tä̧ ja̧'a̧ ji̧nä̧so Chutä Dio-mä̧, jua̧u̧nä̧ kka̧'a̧ kkä̧kuä̧wä̧ i'komä̧. 21Chi̧tti̧mü̧ wotü, yaparewätü ttü̧ä̧nä̧wo̧tü̧rü̧ kuesetätukuä.
Currently Selected:
1 Juan 5: PNT13
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela
