1 Juan 3

1Topätukui, Tä'o Dio ujuturu rü̧ȩnä̧ repe'ü jȩi̧nü̧, Dio i̧tti̧mü̧ pä'ü ottatü pä'ü. Ja̧'wa̧nü̧ jo̧mȩttü̧ pi̧jä̧ ttü̧ja̧mä̧ ttu̧wo̧juo̧ko̧u̧jä̧, Churutä'i̧nä̧ ttu̧wo̧juo̧ka̧'a̧ ji̧na̧'a̧ttü̧. 2Chawaruwä chi̧jä̧wa̧tü̧, täkü jitämä̧ Dio i̧tti̧mü̧jä̧ ja̧'wa̧nü̧ ja̧'a̧nä̧, ji̧nä̧ yodoji tä̧kuȩmä̧ wokotüjä̧, Jesucrito ichomȩnä̧mä̧ chutä jü̧ta̧'a̧nü̧ täkuotüjä̧, jua'amä̧ churutä tota'attü̧. 3O'katoi'ünä̧ jua̧u̧ru̧ a̧mü̧kuä̧rü̧ tta̧'a̧rä̧tü̧mä̧, surojü adikuäkuäu ikuätü, jua'amä̧ Chutä Jesú'i̧nä̧ surojü jui̧'a̧ ja̧'a̧ttü̧.

4O'katoi'ünä̧ surojü jȩpä̧tü̧mä̧ weäwä wȩnȩ'i̧nä̧ jarodätü; ja̧'wa̧nü̧ ja̧'a̧ttü̧ surojümä̧ weäwä wȩnȩ jarodäkuäwä ja̧'a̧. 5Ja̧'wa̧ta̧nü̧ wo̧juä̧tü̧jä̧, Jesucrito-mä̧ ttü̧ja̧ suronä̧ jȩttü̧ si'epü ikua pä'ü ichinü̧, pä'ü. Jua'amä̧ Chutä'i̧nä̧ surojü jui̧'a̧ ja̧'a̧ttü̧. 6O'katoi'ünä̧ Jua̧u̧nä̧ kka̧kuä̧tü̧mä̧, surojümä̧ jȩpo̧ko̧tü̧; ja̧'wa̧nü̧ ja̧'a̧nä̧ o'katoi'ünä̧ surojü jȩpä̧tü̧mä̧, Chutä Jesú-ru topokotü wotü ja̧'wa̧ta̧nü̧ Jesú-ru jerupätü wotü. 7Chi̧tti̧mü̧ wotü, ya̧tȩrü̧'i̧nä̧ kuesetätukuä ya̧pa̧rȩwa̧rü̧mä̧. Adiwäjuei jȩpü̧ kkü̧mä̧, adiwä i̧sa̧ ja̧'a̧; Chutä Jesú adiwä i̧sa̧ jü̧ta̧'a̧nü̧; 8Surojü jȩpü̧ kkü̧mä̧ äwettä i̧sa̧ ja̧'a̧; isopäi'ünä̧ äwettämä̧ ä̧kuo̧mȩnä̧ttü̧tä̧ päi'ünä̧ surojü jȩi̧na̧'a̧ttü̧. Isopäi'ünä̧ Dio I̧tti̧mä̧ ichinü̧, äwettä aditäwä si'epü ikua pä'ü.

9O'katoi'ünä̧ Dio-ttü uwäpächinä̧tü̧mä̧ surojümä̧ jȩpü̧ kko̧ko̧tü̧, Dio i̧tti̧mä̧ juätünä̧ ü̧ja̧'a̧ttü̧. Surojümä̧ jȩpü̧ ttü̧jü̧ juiyünä̧ jä̧u̧, Dio-ttü ttuwäpächina̧'a̧ttü̧. 10Pa̧'a̧nü̧ jo̧mȩttü̧ Dio i̧tti̧mü̧rü̧'i̧nä̧, äwettä i̧tti̧mü̧rü̧'i̧nä̧ wo̧juä̧wa̧'a̧: o'katoi'ünä̧ adiwä juei Dio jäwä jȩpo̧ko̧tü̧mä̧, Dio i̧tti̧mü̧mä̧kü̧. Ja̧'wa̧ta̧nü̧ ttü̧jä̧wa̧tü̧rü̧ repe'okotü'i̧nä̧, Dio i̧tti̧mü̧mä̧kü̧.

Eseu repetta pä'ü weäwä wȩnȩ

11Isopäi'ünä̧, pi̧yȩ wȩnȩ ja̧'a̧ ä̧kuo̧mȩnä̧ttü̧tä̧ päi'ünä̧ kuä̧ju̧kui̧nä̧tu̧ku̧mä̧: «Yotükupünä̧ eseu repe'äkuäu tü̧ja̧kua̧ pä'ü.» 12Caín, äwettä i̧tti̧ ja̧'a̧ ü̧jä̧wa̧rü̧ kuä'ü ikuinü̧'a̧nü̧mä̧kü̧. ¿Jua̧u̧mä̧ tta̧'a̧nü̧ pä'ü kuä'ü ikuina̧'a̧ jä̧ttü̧? Jua'amä̧ Chutä jȩü̧mä̧ surojü jä̧ku̧, i̧jä̧wa̧tä̧ jȩü̧tä̧ adiwä juei ji̧yä̧ku̧, kuä'ü ikuinü̧.

13Chawaruwä chü̧jä̧wa̧tü̧ pi̧jä̧ ttü̧ja̧ ttüjü'küjuiyüttümä̧, ¿tta̧'a̧nü̧ pä'ü ttü̧jü̧'ko̧ko̧u̧jä̧ttü̧? pä'ümä̧ kuamükuädätukuä. 14Ujutumä̧ wo̧juä̧tü̧jä̧, wa'arettümä̧ a̧'kua̧rä̧kuä̧wä̧ra̧'a̧ku̧ 'kuä'o'inä̧tü̧jä̧ pä'ümä̧; tawaruwä tü̧jä̧wa̧tü̧rü̧ eseu repeta'attü̧. A̧wa̧ru̧wa̧ ü̧jä̧wa̧rü̧ repe'okümä̧ ji̧nä̧ wa'arenä̧tä̧ kkü̧ ja̧'a̧. 15O'katoi'ünä̧ ttawaruwä tti̧jä̧wa̧tü̧rü̧ kkü'kokotümä̧, ttü̧ja̧rü̧ kuäwä isotü ja̧'a̧; ukutumä̧ wo̧juä̧tü̧jä̧ ttü̧ja̧rü̧ kuäwä i̧sa̧mä̧, 'kuäopünä̧mä̧ kkä̧kuä̧wä̧ i'komä̧ jui̧ä̧kua̧ pä'ü. 16Ja̧'wa̧nü̧ ja̧'a̧nä̧, eseu repeäkuäwämä̧ wo̧jui̧'i̧nä̧tü̧jä̧; Chutä a̧'kua̧rü̧ ujutu jäwänä̧ iyäwino̧mȩttü̧; ja̧'wa̧ta̧nü̧ ujutu'i̧nä̧ ta̧'kua̧rü̧ tiyäwa pä'ü ja̧'a̧, tawaruwä ti̧jä̧wa̧tü̧ jäwänä̧. 17Isopäi'ünä̧, yotüte ttiäre pärätä kku̧nä̧rä̧tü̧, tta̧wa̧ru̧wa̧ tti̧jä̧wa̧rü̧ rekuä rü̧ja̧'a̧ totta'anä̧; jua̧u̧ru̧ re ttü̧jü̧ juiyüttümä̧, ¿Toku kkä̧kua̧'a̧jä̧ttü̧, tta̧mi̧so'kinä̧mä̧, Dio eseu repeü jäwämä̧? 18Chi̧tti̧mü̧ wotü, suro ti̧wȩnȩnä̧tä̧mä̧, suro tänä̧tä̧mä̧ eseu repetü juiyü'anü̧ ja̧'a̧. Ja̧'wa̧nü̧ jo̧ka̧'a̧ isopäi'ünä̧ jȩpü̧nü̧, jueü wȩnȩ ukuokua'aku repe'ü tesewa pä'ätukui.

19Pi̧yȩttü̧ topü wo̧juä̧wä̧tü̧jä̧, jueü wȩnȩ isotüjä̧ pä'ümä̧. Jua̧u̧ Dio ä'kattü ta̧mi̧ iso'ki totäkuäwomȩnä̧ adiu tü̧jü̧nä̧ jä̧u̧; 20Ja̧'wa̧nü̧ ja̧'a̧nä̧ tta̧mi̧ iso'ki, ukumä̧ su̧ro̧pa̧jä̧ päüttümä̧, Dio-mä̧ ta̧mi̧ iso'kittü'i̧nä̧ abonä̧nü̧ büó ja̧'a̧ttü̧, o'kajuiyünä̧tä̧ wo̧jua̧. 21Ja̧'wa̧nü̧ ja̧'a̧nä̧, chawaruwä chü̧jä̧wa̧tü̧, ta̧mi̧ iso'ki, su̧ro̧pa̧jä̧ päü juiyüttümä̧, Dio ä'ka jo̧mȩttü̧ ta̧'kua̧ tu̧wȩnä̧rü̧nä̧ ja̧'a̧. 22Ja̧'wa̧nü̧ jo̧mȩnä̧, o'kajuiyünä̧ jätepümä̧ Dio-mä̧ i̧yä̧kuä̧u̧jä̧. Chutä i̧wȩnȩ weütä ukuotü ja̧'wa̧ta̧nü̧ üjü'kütä jȩpü̧ tü̧ja̧kua̧'a̧ttü̧. 23Jua̧u̧ weümä̧, pi̧yȩ ja̧'a̧: I̧tti̧ Jesucrito-rü tesetiyarü pä'ü ja̧'wa̧ta̧nü̧ yotükupünä̧ repe'äkuäu eseu tü̧ja̧ pä'ü, Chutä weinü̧'a̧kuä̧. 24Ja̧'wa̧nü̧ ja̧'a̧ttü̧, Chutä weinü̧ ukuotü jȩpü̧ kkü̧mä̧, Dio-ku kkü̧ ja̧'wa̧ta̧nü̧ Dio-mä̧ jua̧u̧nä̧tä̧ kkü̧. Jua'amä̧ wo̧juä̧tü̧jä̧, Epíritu Sa̧tu̧, Chutä iyinä̧ku̧ jiäwa'attü.

Currently Selected:

1 Juan 3: PNT13

Highlight

Copy