मर्कुस 13
13
अन्त्यकर दिनकर चिन्न
(मति २४:१-१४; लुका २१:५-१९)
1जब येसु मन्दिरबान निस्कितिन रइल, तब चेलालत मद्दे एउटोन बाज्ले, “गुरु हेर ते, कति बुङ्डो-बुङ्डो पाथर! किन्खा अचम्म लाग्दो भबनलत!”
2येसुन होलाइ बलल्ते,“तुइनिन अखन देखिधर्ल ह्य भबनकर एउटो पाथर उप्रान अर्को पाथर हक्नार बइने, सेब्बे भत्काइनारआछ।”
3येसु मन्दिरकर पारपटि जइतुन डाँरानाइ बसिधर्ल बेलानाइ पत्रुस, याकुब, युहन्ना र अन्दिरियासिन सुटुक्क आइके येसुलाइ सोद्ला, 4“हाइलाइ बल, ह्य घटना कखन हक्नारआछि? र ह्य कुरो पुरा हकइ लाग्तिन केति चिन्न हक्नारआछि?”
5येसुन होल्काइ बल्-ल्याक,“होसियार हको, तोराल्काइ कुन्नुल्किन पुनि जुनछक्याइदिखन! 6धेराइ मान्छेलत मोर नाउँनाइ ‘मुइ ने खिरिस्ट हो’ बाज्तिन आइनार आछत अनि धेराइ मान्छेल्काइ छक्याइनार आछत। 7जब तोराल्किन लडाइ र झगडा हक्ल कुरो सुन्छो, तब जुनडाराओ, इन्खा कुरो ता हकइ ने पर्छि तर उत्तिने खेर सन्सारकर अन्त्य चाइ बइहकि।” 8किनारइभने जातिकर बिरुद्दनाइ जाति र राज्यकर बिरुद्दनाइ राज्य लडाइ हक्नारआछि। ठउँ-ठउँनाइ भुइचालो जाइनारआछि र अनिकाल पर्नारआछि। ह्य चाइ नानि पाइनाराइ बेटिकाइ बेथा लागइ सुरु हक्ल ठि दुखकर सुरु हो।
9 “तोराचाइ होसियार हकिके बसो, किनारइभने मान्छेल्किन तोराल्काइ आठाइके अदालतनाइ सुम्पिनार आछत अनि सभाघरनाइ लाकाइके ठाटाइनार आछत। तोरा मोर कारनिन बडा-हाकिम र राजाल्को अगाडि ठडाइनार आछो, र मोर बारेनाइ तोराल्किन होल्काइ साछि दिनारआछो। 10तर अन्त्य आइभन्दा अगाडि सेब्बाइ जातिल्काइ सुसमचार पर्चार गरइ ने पर्छइ। 11मान्छेल्किन तोराल्काइ आठाइके लाकाइतिन केति बाजु बाजिके पइला ने चिन्ता जुनगरो। होल्को अगाडि ठडाइल बेलानाइ तोराल्काइ जे दिलाछ होइ बाजो, किनारइभने बाज्नाराइ तोरा बया तर पबित्र आत्मा हक्नारआछ।#मति १०:१७-२०; लुक १२:११-१२ 12ह्व बेला मान्छेल्किन आफ्ने दाजेक-भाएककाइ मारइ लाइनारआछत। उन्खाए गरिके ब्वाकिन बेटाक-बेटेककाइ र बेटाक-बेटेककिन आमेक-ब्वाकलाइ बिरोद गरिके मारइ लाइनारआछत। 13अनि तोराल्किन मुइलाइ बिस्वास गर्ल हुदान सेब्बाल्किन तोराल्काइ घिर्ना गर्नारआछत, तर जुन जिबनकर अन्तिमसम्म इस्थिर हक्छइ होइनिन उद्दार पाइनारआछ।#मति १०:२२
डरलाग्दो समयकर बारेनाइ
(मति २४:१५-२८; लुका २१:२०-२४)
14 “जब तोरा असुद्द पार्नार घिनलाग्दो कुरोलाइ मन्दिरकर पबित्र ठउँनाइ देख्छो” हेक्र अर्थ पढ्नारिन बुज्दिक,“तब ह्व बेला यहुदियानाइ हक्नाराइ डाँरादिस भागिके जाइदिखन।#दा ९:२७;११:३१;१२:११ 15घरकर छतनाइ हक्नाराइ हेठ्ठ झरिके सर-सामान लेइ घरभित्र जुन्पस्दिखन।#लुक १७:३१ 16खेतबारिनाइ हक्नाराइ आफ्ने बर्को लेइ पछाडि जुन्जाइदिखन। 17ह्व बेला नानि पाइनाराइ र दुत ख्वाइनाराइ बेटिल्को हालत झन बिजोक हक्नारआछि। 18ह्य कुरो जाडो महिनानाइ जुन्हक्दिक बाजिके पार्थना गरो। 19किनारइभने उन्खा महासङ्कटकर दिन ता सिरिस्टिकर सुरुसिन अखनसम्म हक्ल बइने र पछि पुनि हक्नार बइने।#दा १२:१; पर ७:१४ 20यदि परमेसोरिन ह्व दिन बइघटाइल हक्लासिन कुनु पुनि बइबाच्नाला, तर आफिन छान्लाइ मान्छेल्को लागि परमेसोरिन ह्व दिन घटाइलाछ।
21 “ह्व बेला कुन्नुल्किन तोराल्काइ ‘हेरो, खिरिस्ट इछि आछ’ वा ‘उछि आछ’ बल्-ल्या भने तोराल्किन बिस्वास जुनगरो। 22किनारइभने उन्खा झुटो खिरिस्ट र झुटो अगमबक्तालत देखा पर्नारआछत। सक्लसम्म परमेसोरिन छान्लाइ मान्छेल्काइ छक्याइकर लागि होल्किन बुङ्डो-बुङ्डो चिन्न र अचम्मकर काम गर्नाराइआछत। 23तर तोरा चाइ होसियार हको। मुइनिन तोराल्काइ सेब्बे कुरो अगाडि ने बल्दिलाछु।
मानुसकर बेटाककर आगमन
(मति २४:२९-३१; लुका २१:२५-२८)
24 “ह्व दिननाइ महासङ्कटपछि घाम आँधारि हक्नारआछि, र चानाजुनिन उज्यालो दिनार बइने। #
यस १३:१०; इज ३२:७; यो २:१०,३१;३:१५; पर ६:१२ 25आकासबान तारालत झर्नारआछि, र आकासकर सेब्बे सक्ति डगमगाइनार आछि।#यस ३४:४; यो २:१०; पर ६:१३ 26ह्व पछि मानुसकर बेटाकलाइ बड्खो सक्ति र महिमासाथ बादलनाइ आइधर्ल मान्छेल्किन देख्नारआछत।#दा ७:१३; पर १:७ 27अनि होइनिन स्वर्गदुतकाइ धर्ति र आकासकर चारेपटि पाठाइनारआछ र होल्किन परमेसोरिन छान्लाल्काइ जम्मा गराइनार आछत।”
नेभाराकर गाछबान सिछ्या
(मति २४:३२-३५; लुका २१:२९-३३)
28 येसुन अजइ बाज्तिन जाइले, “नेभाराकर गाछबान केइ कुरो सिको। हेक्र हङ्गा कउलो हकिके चिउला फेर्लपछि गर्मि आल्तिसइ बाजिके तोराल्किन था पाइछो। 29उनिखे ने मुइनिन बल्ल ह्य कुरो हकिधर्ल देखिके मानुसकर बेटाककर आगमन नजिके आछि बाजिके जानो। 30साँच्चि मुइ तोराल्काइ बल्छु, ह्य सेब्बे कुरो पुरा नहकुन्जेलसम्म ह्य पुस्ता नास हक्नार बइने। 31स्वर्ग र धर्ति बितिके जाइनारआछि, तर मोर बचन कइले बितिजाइनार बइने।
जागे बसो
(मति २४:३६-४४; लुका १२:३८,४०)
32 “ह्व दिन र ह्व बेला कखन आइछि बाजिके कुनुकाइ था बइने। न ता स्वर्गदुतकाइ न ता बेटाकलाइ था आछि, तर ह्व कुरो परमेसोर ब्वालाइ मात्र था आछि। 33होइहुदान होसियार हको, जागे बसो, र पार्थना गरो, किनारइभने ह्व दिन कखन आइछि बाजिके तोराल्काइ था बइन्या। 34ह्य ता मालिकिन आफ्ने नोकरकाइ घरकर सेब्बे कामकर जिम्मा दिके र पालेलाइ पुनि मजसिन रेखदेख गरइ बाजिके आग्या दिके परदेस लाग्ल जिन्खाए हो।#लुक १२:३६-३८ 35होइहुदान जागे बसो, किनारइभने घरकर मालिक बेल्का, आदा रातनाइ, भाले बास्तिन वा ब्यान कखन आइछइ तोराल्काइ था बइन्या। 36नत्र ता ह्व एक्कासि आइतिन तोराल्काइ निदाइधर्ल भेट्टाइतिक। 37मुइनिन तोराल्काइ बल्ल जिन्खाए सेब्बाल्काइ बल्छु, ‘जागे बसो।’”
Currently Selected:
मर्कुस 13: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
