लुका 16
16
चलाख बेबस्थापक
1येसुन आफ्ने चेलाल्काइ एउटो उखान बल्-ल्याक, “कुनइ धनि मानुसकर सेब्बे कारोबार गर्नार एउटो मानुस रइल। ह्व कारोबार गर्नार मानुसिन तोर सेब्बे धन-सम्पति मन लाग्दि खर्च गर्लाछ बाजिके मान्छेल्किन ह्व धनि मानुसलाइ सुनाइला। 2अनि मालिकिन ह्व कारोबार गर्नारलाइ बालाइके बलल्ते, ‘मुइनिन तोर बारेनाइ ह्य केति सुन्तिन आछु? तुइनिन गर्ल कामकर सेब्बे हिसाब मुइलाइ देउ। अबसिन तुइ कारोबार गरइ बइपास।’ 3अनि कारोबार गर्नारिन आफ्ने मनमने सोच्ले, ‘अब मुइ केति गरुँ? मोर मालिकिन मुइलाइ कारोबार गर्नार कामबान निकालइ आट्लाछ। खनजोत गरिके खाउँ भने खन्नार तागत बइने, मागिकइ खाउँ भने मुइलाइ लाजउनो लाग्छइ। 4अब मुइनिन केति गरइ पर्नार हो मुइनिन सोचिसक्लाछु। कारोबार गर्नार कामबान निकाल्तिन पुनि मान्छेल्किन मुइलाइ होल्को घरनाइ सत्कार गर्नारआछत बाजिके मुइनिन पक्का गर्लाछु।’ 5अनि होइनिन मालिककर रिन लाकाइनारकाइ एउटो-एउटो गरिके बालाइल्याक र पइलोलाइ बलल्ते, ‘तुइलाइ मोर मालिककर रिन कत्ता आछि?’ 6होइनिन बाज्ले, ‘तिन हजार लिटर जइतुनकर तेल।’ कारोबार गर्नारिन होलाइ बलल्ते, ‘तोर तमसुक आन र चाने बसिके पन्र सय लिटर लेख।’ 7ह्व पछि अर्कोलाइ सोदल्ते, ‘तोर रिन कत्ता आछि?’ होइनिन बाज्ले, ‘तिन सय पचास कुन्टल गहुँ।’ कारोबार गर्नारिन बलल्ते, ‘तोर तमसुक आन र तिन सय कुन्टल लेख।’ 8होक्र मालिकिन ह्व बेमानि कारोबार गर्नारकर चलाखि देखिके पर्सन्सा गर्ले किनारइभने ह्य सन्सारकराइ मान्छेलत आफ्ने मान्छेल्कोसिन गर्नार बेबहारनाइ जोतिराइ सन्तान भन्दा अजइ बढ्ता चलाख हक्छत।
9“मुइ तोराल्काइ बल्छु, आफ्ने लागि सन्सारकर धनिन साथि बानाओ जब ह्व धन सक्किछि, तब होल्किन तोराल्काइ अनन्तकर घरनाइ स्वागत गर्नारआछत। 10जुन थोरे कुरोनाइ इमान्दार हक्छइ, ह्व धेरइनाइ पुनि इमान्दार हक्छइ र जुन स्यान्खि कुरोनाइ बेइमान हक्छइ, ह्व बड्खो कुरोनाइ पुनि बेइमान हक्छइ। 11जुन सन्सारकर धननाइ इमान्दार बइहक होलाइ कुनिन सत्य धनकर जिम्मा दिछि र? 12यदि तोरा आनेको धननाइ इमान्दार बइहको भने तोराल्किन पाइनार धन कुनिन दिस्या र?
13“कुनइ नोकरिन दुइटाइ मालिककर सेवा गरइ बइसक, किनारइभने होइनिन एउटोलाइ हेला गर्छइ र अर्कोलाइ मया गर्छइ, अथवा एउटोन बल्ल मान्छइ र अर्कोन बल्ल चाइ वास्ता बइगर। तोरा पुनि परमेसोर र धन धेउटेकर सेवा गरइ बइसको।” #मति ६:२४
येसुकर आने सिछ्या
(मति ११:१२-१३;५:१८-३२)
14ह्य सुनिके फरिसिल्किन येसुकर कुरोलाइ ठट्टानाइ उडाइला किनारइभने होल्किन पइसालाइ धेरइ मया गर्तेला। 15अनि येसुन होल्काइ बल्-ल्याक, “तोरा मान्छेल्को अगाडि आफिलाइ धर्माति देखाइ हेर्छो, तर परमेसोरिन तोराल्को हिर्दय जान्छइ। मान्छेल्को नजरनाइ जे कुरो मजार आछि, परमेसोरकर नजरनाइ ह्व घिरित हक्छइ।
16“बप्तिस्मा दिनार युहन्नाकर बेलासम्म मोसान लेख्ल परमेसोरकर नियम र अगमबक्ताल्को सिछ्या चलि धर्ल रल्ति। ह्व बेलासिन अखनसम्म परमेसोरकर राज्यकर सुसमचार पर्चार हकिधर्लाछि र सेब्बाइ मान्छेलत ह्व राज्यनाइ पसइलाइ जोड गर्छत।#मति ११:१२-१३ 17स्वर्ग र धर्ति नाठिके जाइ सक्छि तर धर्मसास्तरनाइ लेख्ल परमेसोरकर बचन एउटो पुनि बइनाठि।#मति ५:१८
18“जुनिन आफ्ने बोहेकलाइ छाडिके अर्किलाइ ब्याहा गर्छइ होइनिन बेभिचार गर्छइ अनि साहेकिन छाड्लि बेटिलाइ ब्याहा गर्नार मानुसिन पुनि बेभिचार गर्छइ।”#मति ५:३२; १को ७:१०-११
धनि मानुस र लाजरस
19येसुन बाज्ले, “एउटो धनि मानुस रइल। होइनिन दिन-दिने मङ्गो र मजार लुगा लाइतेल र दिन्ने स्वाद-स्वाद खाइके मोज-मस्ति गर्तेल। 20मान्छेल्किन होक्र घरकर दइलोनाइ लाजरस नाउँ हक्ल एउटो गरिब मानुसलाइ आनिकइ धर्दितेला। होक्र जिउभोरि घावइघाउ रल्ति। 21धनि मानुसिन खाइतिन टेबुलबान झर्ल टुक्राटाक्रि खाइके लाजरसिन आफ्ने पेट भर्नार मन गर्तेल। कुकल्किन पुनि आइके होक्र घाउ चाट्तेला। 22एक दिन ह्व गरिब लाजरस मर्ले र स्वर्गदुतकिन होलाइ लाकाइके अब्राहामकर छेउनाइ धर्ला। अनि धनि मानुस पुनि मर्ले र होक्र लास गड्काइला। 23अनि धनि मानुसिन नरकनाइ एकदम कस्ट भोगिधर्ल बेलानाइ होइनिन उप्रउने फर्किके बद्दुर हेर्तिन अब्राहामकर छेउनाइ लाजरसलाइ देख्ले। 24अनि होइनिन साराइतिन बाज्ले, ‘हे ब्वा अब्राहाम, मुइलाइ दया गरिके लाजरसलाइ इछि पाठाइदिक। होइनिन आफ्ने अउलाकर टुप्पा पानिनाइ चोपिकइ मोर जिब्रोलाइ सितल पार्दिक, किनारइभने मुइ ह्य आगिनाइ धेरइ कस्ट पाइधर्लाछु।’ 25तर अब्राहामिन होलाइ बलल्ते, ‘बेटाक, याद गर, तुइ सन्सारनाइ हक्तिन आफ्ने जिबन सुखनाइ बिताइलइ तर लाजरसिन चाइ दुखइ-दुख पाइल रइल। अखन इछि लाजरस सुखनाइ आछ र तुइ चाइ कस्टनाइ आछस। 26अब ह्य सेब्बे कुरो बाएक इछ्यान तुइ हक्ल ठउँनाइ जाइ हेर्नाराइ जाइ बइसकत र उछ्यान इछि हाइ हक्ल ठउँनाइ आइ पुनि जुनसक्दिखन बाजिके हाम्रो र तोराल्को माजनाइ एउटो गइरो खाल्टो आछि।’ 27ह्व धनि मानुसिन बाज्ले, ‘ब्वा, उन्खा हक्लान मुइ तुइसिन बिन्ति गर्छु, लाजरसलाइ मोर ब्वाकर घरनाइ पाठाइदिक। 28किनारइभने मोर पाँचुटाइ दाजि-भाइलत आछत, होइनिन जाइके होल्काइ चेतावनि दिदिक, नत्रता होलत पुनि ह्य कस्टकर ठउँनाइ आइछत।’ 29अब्राहामिन बाज्ले, ‘होल्कोसिन मोसा र अगमबक्ताल्किन लेख्ल किताब आछि, होल्किन ह्व सुन्दिखन।’ 30धनि मानुसिन बाज्ले, ‘बया, ब्वा अब्राहाम, तर कोइ मर्लबान जिउँते हकिके होल्कोनाइ जाइले भने ता होल्किन आफ्ने पाप मानिलिके छाड्नाला।’ 31अब्राहामिन होलाइ बलल्ते, ‘मोसा र अगमबक्ताल्किन लेख्ल किताब पढिके र सुनिके बिस्वास बइगरत भने, मर्ल मानुस जिउँते हकिके होल्कोनाइ जाइतिन पुनि बिस्वास गर्नार बइनेत।’”
Currently Selected:
लुका 16: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
