पेरित 14
14
आइकोनियन सहरनाइ पावल र बारनाबास
1आइकोनियननाइ पुनि पावल र बारनाबास यहुदिल्को सभाघरनाइ जाइके इन्खा कुरो बाज्ला, कि उछि हक्लाइ धेराइ यहुदि र आने जातकराइ मान्छेल्किन पर्भुनाइ बिस्वास गर्ला। 2तर पर्भुनाइ बिस्वास बइगर्नाराइ यहुदिल्किन चाइ आने जातकराइ मान्छेल्काइ उस्काइके पर्भुनाइ बिस्वास गर्नाराइ दाजि-भाइको बिरोद गरइ लाग्ला। 3ता पुनि पावल र बारनाबासिन आफ्ने भरोसा पर्भुनाइ गरिके साहससिन होक्र बारेनाइ बाज्तिन धेरइ दिनसम्म उछि बस्ला। पर्भुन होल्को हातबान अचम्मकर काम र चिन्नलत गराइकइ आफ्ने अनुगरहकर बचन साँच्चि हो बाजिके पर्मानित गर्ले। 4तर ह्व सहरकराइ मान्छेल्कोनाइ फाटो आल्ते, र कोइ यहुदिलत दिसउने र कोइचाइ पेरितलत दिसउने लाग्ला।
5तब केइ आने जातिलत र यहुदिलत आफ्ने सासककोसिन मिलिके पावल र बारनाबासलाइ सताइनार र पाथरिन हिर्काइनार सडेन्तर गर्ला। 6तर पावल र बारनाबासिन ह्य कुरो था पाइके लुकोनियाकर छेत्रनाइ पर्नार लुस्त्रा, डर्बि र वरिपोरिकर ठउँ हुदो भागिके जाइला। 7र उछि पुनि होल्किन सुसमचार पर्चार गर्ला।
लुस्त्रा र डर्बि सहरनाइ
8लुस्त्रा सहरनाइ एउटो जन्मइदेखिकर कुजो मानुस रइल। ह्व कइले पुनि हिन्ल बइरइल। 9होइनिन पावलिन बाज्ल कुरो ध्यान दिके सुन्तिन रइल। पावलिन होलाइ एकडिस लाइके हेरल्ते, र होक्र बिसेक हक्नार बिस्वास आछि बाजिके पावलिन था पाइले। 10अनि पावलिन होलाइ बड्खो सोरिन बलल्ते, “तोर गोडकर भरिन सिदा ठडाउ।” अनि ह्व जुरुक्क उठ्ले र हिनइ लाग्ले। 11जब भिडकिन पावलिन गर्ल इन्खा काम देख्ला, तब होल्किन लुकोनिया भासानाइ बड्खो सोरिन इन्खा बाजइ लाग्ला, “देउतालत ता मानुसकर रुपनाइ हाइ हक्लनाइ झरिके आइलासइ।” 12होल्किन बारनाबासलाइ जिउस देउता र पावललाइ हर्मेस देउता बाज्ला, किनारइभने पावलचाइ मुख्य पर्चारक रइल। 13जिउस देउताकर मन्दिर ह्व सहरकर छेउनाइ रल्ति। ह्व मन्दिरकर पुजारिन मुल ढोकानाइ फुलमाला र बहर-बाछाकाइ आन्ले र उछिराइ मान्छेल्कोसिन मिलिके बलि चाराइनार मन गर्ले।
14जब पेरितलत बारनाबास र पावलिन ह्य कुरो था पाइला, तब होल्किन आफ्ने लुगा च्यात्ला र कुत्तिन मान्छेल्को भिडनाइ जाइला र साराइतिन बाज्ला, 15“ए दाजि-भाइलत, तोरा किनारइ इन्खा काम गर्छो? हाइ पुनि ता तोराजिन्खाए दुख-सुख भोग्नाराइ मान्छे हो। हाइ तोराल्काइ ह्य बेर्थेकर काम छाडिके आकास, धर्ति, समुन्द्र र उछि हक्ल सेब्बे थोक बानाइनार जिउँते परमेसोरदिसउने फर्को बाजिके सुसमचार सुनाइ आइलाइ हो।#पर २०:११; भजन १४६:६ 16उइलेराइ मान्छेल्काइ परमेसोरिन आफ्ने मनखुसिनाइ देबि देउता मानइ छाड्दिल्याक। 17तर परमेसोरिन असल र भलाइकर काम गरइ कइले छाड्ल बइने। परमेसोरिन आकासबान पानि पार्दिछइ र ठिक समयनाइ पर्सस्त उब्जनि गर्दिलाछ, र मान्छेल्को हिर्दयलाइ खाइनार कुरो र आनन्दन सन्तुस्ट पार्छइ। इनिखे परमेसोरिन आफ्ने कामबान ने साछि दिलाछ।” 18ह्य कुरो बलिके पावल र बारनाबासिन मुस्किलिन होल्काइ बलि पुजा गरइबान रोक्ल्याक।
19ह्व पछि पिसिदिया छेत्रकर एन्टिओखिया र आइकोनियन सहरबान केइ यहुदिलत उछि आइके मान्छेल्को भिडकाइ उस्काइके पावललाइ पाथरिन हिर्काइला। अनि मर्ले बाजिके होल्किन पावललाइ सहर बाइर घिस्याइतिन लाकाइला। 20तर चेलालत आइके पावलकर वरिपोरि जम्मा हक्ला र ह्व उठिके सहरनाइ जाइले, र अर्को दिन बारनाबाससगिन डर्बि सहरनाइ जाइले।
सिरियाकर एन्टिओखियानाइ फर्कि आइलाइ
21पावल र बारनाबासिन डर्बि सहरनाइ सुसमचार पर्चार गरिके धेराल्काइ पर्भु येसुकर चेला बानाइला। ह्व पछि होलत लुस्त्रा र आइकोनियन हक्तिन पिसिदियाकर एन्टिओखियानाइ फर्किला। 22होल्किन ह्व ठउँ-ठउँनाइ हक्लाइ पर्भुकराइ चेलाल्काइ आत्मानाइ दरो बानाइला र बिस्वासनाइ लागिधरइ बाजिके उत्साह दितिन बल्-ल्याक, “हाइ परमेसोरकर राज्यनाइ जाइकर लागि धेरे दुख कस्ट सइपर्छइ।” 23जब पावल र बारनाबासिन सेब्बे मन्डलिनाइ एल्डरलत नियुक्त गर्ला, अनि उपबास बसिके पार्थना गर्तिन ह्व चेलाल्काइ आफिन बिस्वास गर्ल पर्भुकर जिम्मानाइ छाड्दिल्याक।
24ह्व पछि होलत पिसिदिया हक्तिन पामफिलियानाइ आइला। 25पर्गानाइ बचन पर्चार गरिके होलत अटालियानाइ झर्ला। 26अनि उछ्यान होलत जहाजनाइ चडिके सिरियाकर एन्टिओखियानाइ फर्किला। हेइ एन्टिओखियाकराइ बिस्वासिल्किन पावल र बारनाबासलाइ परमेसोरकर अनुगरहनाइ सुम्पिकइ पाठाइलाइ रइला।
27एन्टिओखियानाइ आइपुग्लपछि पावल र बारनाबासिन मन्डलिकराइ सेब्बाल्काइ बालाइला, अनि परमेसोरिन होलत मार्फत गर्ल सेब्बे कामकर बयान गर्ला, र किनिखे परमेसोरिन आने जातिल्को लागि बिस्वासकर ढोका खोल्दिले ह्व सुनाइला। 28होलत उछि चेलाल्कोसिन धेरइ दिनसम्म बस्ला।
Currently Selected:
पेरित 14: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
