Saaŋ 13

Yeesu naawsiɗ kot ciŋ taalubeeciŋ ɗe

1Wa nikee bala feetiŋ Paak reyan, te Yeesu inheen ne jamanooni a joy puloh Adina a kaɗ ŋ Baabi reyiɗ. A waaɗeen ɓooɓiŋ ɗe nik ŋ Adina, te a waaɗta ɓa po ɗiska waaɗ top.

2Na niina, Yeesu na taalubeeciŋ ɗe nikee ñameeɗa. Raak Seytaani ɓekiɗ ŋ keeñiŋ Yudaa kuɓkiŋ Simong Iskaryot ne a eɗndoh ɗe. 3Yeesu inheen ne Baabi faɗiɗ in ci jen ŋ yaah ciŋ ɗe. A nameen inah ne, a puloh ŋ Kooh te a na dokke nga ɗe. 4A kurukka, a wolissa kulɓaakaŋ ɗe yakka, a ɓayya mooskoha, a tokɗukkaa. 5A neyya masuɓ ŋ inaa, a naawsiɗeeɗa taalubeeciŋ ɗe kot, a mooseeɗa ca na mooskohaana a tokɗuke#13:5 Ŋ jamanoonaam, hanhe hayeen ɗah, a ñaamiŋ kahni meeɗ ɓay masuɓ, naawsiɗ ɗe kot ciŋ ɗe, a moos ca..

6Wa a kaɗ po a reesa ŋ Simong Piyeer, yeem woosa ɗe ne : « Heɗi, a fu naawsiɗan ndo kot e ? » 7Yeesu loffa ɗe ne : « Ɗiski wa nik, fu inahɗi ini mi na haɓɗe waaye mbeh, fu hey wa inhe. » 8Piyeer woosa ɗe ne : « Fu moosanɗi so naawsiɗ kot muk ! » Yeesu woosa ɗe ne : « Ŋ naawsiɗɗi ɗa kot ɗah, fu rahsohissanɗi in na so. » 9Simong Piyeer woosa ɗe ne : « Mbaa Heɗi, fu topanɗi ŋ kot ci dong, waaye fu hey naawisndohe yaah ci na hafi. » 10Yeesu woosa ɗe ne : « Ɓoyi ɓookuk po ƴutta, a hooliɗ jen, a etohɗi ɓookkis, ɗal kot ci ɗah ; ɗu hooliɗ waaye e ɗu jen haa. » 11A inheen ya ɓa nga ɓa na hee ɗe eɗndohe, weɗ tah a woosa ne : « E ɗu jen hool haa. »

12Wa a naawsiɗ ɓa kot po ƴutta, a ɓekkissa kulɓaakaŋ ɗe, a ɓooffa. A woosa ɓa ne : « Ɗu inhiɗ ini ŋ haɓɗiɗ ɗu e ? 13Ɗu na ɓeeɗkohee so Jangɗohohi wala Heɗi ; te ɗu woo keeh, weɗ ŋ nik. 14Kon mi yi Heɗi, mi yi Jangɗohohi, ŋ naawsiɗiɗ ɗu kot ciŋ ɗu ɗah, yaa nu nga ɗu ɗah joyiɗ nam naawsiɗ morom ce kot. 15Ŋ teeɓiɗ ɗu findi wa tumohsan ne findi ŋ tumoh na ɗu, ɗu namee tumoh ɗaa. 16Ñam na woyee ɗu wa, te ambaat ne wa keeh, ñaam uupuu heɗ ce te yi woosu minɗi uup yi woos ɗe. 17Ɗiski wa nik, ɗu inhiɗ ineem, ɗu tuma ɗah, ɗu hey neɓɗe.

18E ɗu jen na tahee so woo haa, ŋ inhiɗ baahiɗ ɓi ŋ kooɗ. Waaye ini Fiis ci woo joyiɗ raak, an : “ Yi na ɓaahe na so bool yino, tapiɗ to mbalnguus.#Sabuur 41:10 ” 19Ŋ woyiɗ ɗu ineem woti, bala wa hayan ɗah, ne wa hay ɗah, ɗu kos ne ñam nik. 20Ñam na woyee ɗu wa, te ambaat ne wa keeh, yaa nu teyɗuk yi ŋ woos ɗah, a teyɗuk ko, te yaa nu teyɗuk ko ɗah, a teyɗuk Yi woos so. »

Yeesu teeɓohiɗ ne Yudaa hey ɗe eɗndohe

21Wa Yeesu ƴut woo ineem, a jahaskohha ŋ ɗooƴ ce, a woosa halang ne : « Ñam woo ɗu wa, te ambaat ne wa keeh, yino nga ɗu hey yo eɗndohe. » 22Taalubeeci markoheeɗa ŋ harmban ɓa, ɓa inheeɗi ɓoyi a joy nik.

23Yino ŋ taalubeeci, yi Yeesu keeñkohe, nikee ɓoofiɗ ŋ serooce ŋ kañam ka. 24Simong Piyeer tummba ɗe na yaah ne a meekis Yeesu ɓoyi a na woye. 25Taalubeena hiirra ŋ Yeesu meekissa ɗe ne : « Heɗi, fu na woye ya ɓa ? » 26Yeesu loffa ɗe ne : « Ŋ hey njeeɓe nguɗiŋ mbuurndii ŋ ɗooƴ kañam ki, ɓoyi maa hee wa eɗe, a yi. » Weɗ a njeeɓoh nguɗaŋ mbuurnda, a eɗta wa Yudaa kuɓkiŋ Simong Iskaryot.

27Yudaa ɓay ɓay mbuurnda rek Seytaani aassa ɗe. Yeesu woosa ɗe ne : « Ini fu na hee haɓɗe, araa haɓiɗ. » 28Ali ɓo' ŋ ɓooɓa ɓinooɓa ɓoofee ŋ ɗiska ñameeɗa inheeɗi ini tah Yeesu woosa ɗe ineem. 29A Yudaa meeɗ ɗaak koporaŋ ɓa, weɗ tah raakka ɓi liiɓee ne Yeesu na nakee ɗe ne a rom ini ɓa etoh ŋ feeta, wala a eɗ ñakiɗ ca in. 30Wa Yudaa ɓay nguɗaŋ mbuurnda, jaarra pul, wa nikee ŋ ndengelnde wek.

Nakohi asi

31Wa Yudaa pul, Yeesu woosa ne : « Ɗiski wa nik, jamanooni Kuɓkiŋ ɓoyi yakɗohsan reyiɗ, te yaki Kooh yak hey hotke nga ɗe. 32[Nik ne yaki Kooh yak hotkan taamboh nga ɗe ɗah,] Kooh hey ɗe name yakiɗ ngaŋ haf ce, te jamanooni a na hee wa tumohe hayiɗ kotii. 33Ƴaaɓiŋ ngo, mi yii na ɗu poyi, waaye wa maañisɗi. Ɗu hey yo waake waaye ina ŋ woyee kilifaaciŋ Yawuut ci weɗ maa hee ɗu woye : Ɗiski mi na kaɗe, ɗu minɗi kaɗ nga.

34Mi yii eɗ ɗu nakoh as : Waaɗtiɗohaat ŋ harmban ɗu. Findi ŋ waaɗoh ɗu, namaat waaɗtiɗoh ɗaa ŋ harmban ɗu. 35Ɗu waaɗtiɗoh ŋ harmban ɗu ɗah, ɓooɓi jen hey inhe ne ɗu taalubeeciŋ ngo. »

Yeesu woyiɗ ne Piyeer hey ɗe taaske

36Simong Piyeer woosa ɗe ne : « Heɗi, fu na kaɗe nde ? » Yeesu loffa ɗe ne : « Ɗiski wa nik, fu minɗi so ñaakiɗ ŋ ɗiski mi na kaɗe, waaye ƴut ɗah, fu hey yo ñaakɗe. » 37Piyeer woosa ɗe ne : « Heɗi, wa ye tah ɗiski wa nik ŋ minɗi ɗa ñaakiɗ ? Ŋ ƴutiɗ ne ŋ eɗoh kiñin kiŋ ngo wuu fu ! » 38Yeesu loffa ɗe ne : « Fu ƴutiɗ ne fu eɗoh kiñin kiŋ ɗa wuu so i ? Ñam na woyee ɗa wa, te amba ne wa keeh, bala siiki leehkan ɗah, fu hey yo taaske waas kaahay. »

Currently Selected:

Saaŋ 13: YM

Highlight

Copy