Camba 17

Nguɗuk weɗ ini teeɓoh ambtiɗohiŋ Kooh na Ibrahiima

1Wa Ibram raak kiis ndaŋkiyaah-yasna-nikiis na yasna-nikiis (99), wa raakka mbeh, Nikiɗi teeɓukka ɗe, a woosa ɗe ne : « E mi Koohi Min, pesa findi ŋ waaɗoh, fu nik yurhiɗ. 2Ŋ hey ambtiɗohe na ɗa te ŋ hey ɗa tume ɓasil. » 3Wa a kerah woo keem, Ibram ƴekka po pukiŋ ɗe reesa kehƴi, Kooh taalndiɗta woyeeɗa na ɗe, 4a woosa ɗe ne : « Ambtiɗohiŋ ngo na ɗa, wa na hee tufkohe an : Fu hey nike baabiŋ ɓi cuuɓi cuuɓ, 5te fu teekissuuɗi Ibram (baab yakɗuuɗ) waaye Ibrahiima (baabiŋ ɓi laayiɗ), laam ŋ hey ɗa tume caaciŋ ɓi cuuɓ laayiɗ. 6Ŋ hey ɗa tume ɓasil, ɓi cuuɓi cuuɓ hey pulohe nga ɗa, ɓi buur sah hey rimkohe nga ɗa. 7Ŋ hey ambtiɗohe na ɗa, fu na ɓi na hee rimkohe nga ɗa, gomal nu nik, wa hey nike po faw. Ŋ ineem ŋ hey nike Koohiŋ ɗa na ɓi na hee rimkohe nga ɗa. 8Te kur ki fu nikoh jaambur wii, wa nikka Kanaan, ŋ hey ɗa wa one jen, fu na ɓi na hee rimkohe nga ɗa, ɗu raakoota po faw ; te ñam na hee nike Koohiŋ ɓa. »

9Ŋ finho ineem, Kooh woyissa Ibrahiima ne : « E fu na hee taambkohe ɓakiŋ ɗa ŋ ambtiɗohiŋ ngo na ɗa, fu na ɓi na hee rimkohe nga ɗa, gomal nu nik. 10Taambkohohaat ambtiɗohiŋ ngo na ɗu, fu na ɓi na hee rimkohe nga ɗa, an : Ƴaar nu nik nga ɗu ɗah, joyiɗ nguɗuk, 11nguɗkeem weɗi na hee teeɓohe ambtiɗohiŋ ngo na ɗu. 12Komaaki ƴaar nu raak neeh yasna-kaahay ɗah, a joyiɗ nguɗuk ; na, gomal nu a min ɓaahoh ɗah, yi rimohu ŋ kahan fu po yi romohu ŋ jaambra ɓaahɗi ŋ cuuɓiŋ ɗa. 13Ɓa jen ɓa joyiɗ nguɗuk, a nik ñaami rimkoh ŋ kahan fu mbaa yi fu rom na koporiŋ ɗa. Te nguɗki na hee nike ŋ faan ciŋ ɗu, weɗ ini na hee teeɓohe ambtiɗohiŋ ngo na ɗu po faw. 14Ƴaar nu nguɗukɗi, te nik ne a sang sang ɗah, a hey pulɗasse ŋ cuuɓiŋ ɗe laam raakan ɗe nguɗiɗ ambtiɗohi ŋ tufkiɗ. »

15Ŋ ineem Kooh woosa Ibrahiima ne : « Ŋ ini kaɗ ŋ ɓitiifu, a teekissuuɗi Saraay ; waaye tiikiŋ ɗe wa Saarata#17:15 Tiik cii, "Saraay" na "Saarata" caɗ ɓaah tokis. Ca tokis "kuɓki ɓitɓiŋ buuri". kotii. 16Ŋ hey ɗe barke'ɗe, ŋ on ɗa kuɓu ƴaar na ɗe, ŋ hey ɗe barke'ɗe, po a nikan caaciŋ ɓi cuuɓi cuuɓ ; ɓi buur sah hey pulohe nga ɗe. » 17Ibrahiima ƴekissa po pukaŋ ɗe reesa kehƴi ; a ƴennda, a woosa ŋ ɗooƴ ce ne : « Moo ƴaar na kiis teemet (100) minisiɗ raak kuɓu e ? Te Saarata yii, na kiis ciŋ ɗe ndaŋkiyaah-yasna-nikiis (90) cii, hey raake kuɓu e ? » 18A woosa ne : « A' ! Te fu amb ŋ Ismaayla rek ! »

19Kooh woosa ɗe ne : « Ŋ woo ne hee, Saarata hey raake kuɓu ƴaar yi fu na hee teeke Isaahha#17:19 Tiikiŋ "Isaahha" weɗ tokis "aa ƴene"., ŋ hey ambtiɗohe na ɗe po faw, a yi na ɓi na hee rimkohe nga ɗe. 20Ini kaɗ ŋ Ismaayla, ŋ kerhiɗ woo kiŋ ɗa, ŋ hey ɗe barke'ɗe, ŋ tum ɗe ɓasil, e kilifa ndaŋkiyaah na kanak (12) puloh nga ɗe te a fer cuuɓ angiɗ. 21Waaye ambtiɗohiŋ ngo na ɗa nak, ŋ hey wa tufkiɗe na Isaahha, kuɓki Saarata na hee raake maas. » 22Wa Kooh ƴut woo na Ibrahiima, a faɗta ɗe ndaam, a cootta ŋ ɗafka.

23Weɗi Ibrahiima ɓayoh kuɓkiŋ ɗe Ismaayla na ƴaaɓa rimohu kahna na ɓa a romoot na koporaŋ ɗe, ƴaar ca nikee ŋ kahan ce jen, a nguɗta ɓa ŋ noha mbaɗi ; findi Kooh woyoh ɗe wa. 24Wa Ibrahiima na nguɗke raak ɗe raakiɗ kiis ndaŋkiyaah-yasna-nikiis na yasna-nikiis (99). 25Kuɓkiŋ ɗe Ismaayla nameen raak kiis ndaŋkiyaah na kaahay (13) wa a na nguɗke. 26Ŋ noha mbaɗi, Ibrahiima na kuɓkiŋ ɗe Ismaayla nguɗukka. 27Ƴaar caŋ kahan ce jen nammba nguɗuk na ɗe mbaɗi, ɓa rimohu nga, na ɓa a rome.

Currently Selected:

Camba 17: YM

Highlight

Copy