प्रेरित 17
17
पावल आउँ सिलास थेस्लोनिकि सहरै
1पावल आउँ सिलास अम्फिपोलिस आउँ अपोल्लोनियाक् सहरक् पैंदा भेइबानाइ थेस्लोनिकि सहरै पुग्लुहुन्। ओछि यहुदिलकक् एक्टा सभाघर रैल्हकुन्। 2पावल सटौघरिहिंक् परौ ओछि रैल्ह सभाघरै जाइलक्। आउँ ओहिं तिन सातासम्म बिसारिक दिनै धर्मसास्ट्रक् कहिन् लेइबानाइ उखर्ह्वाक्सङ्हिं तर्क-बितर्क करिहिन् बस्लक्। 3ओहिं धर्मसास्ट्रक्भटे पर्मान देहिन् उखर्ह्वानि यन्हिं बुझालाहा, “मुक्ति देलाहार खिरिस्टइ दुक्ख भोगिबानाइ मोर्बा पोर्लाहार रैल्हकुन् आउँ मोर्लोक्भटे फेरि जिउँटबा पोर्लाहार रैल्हकुन्। तसौ मुँइ तोहोराखर्ह्वालाइ पर्चार कर्ल उहे येसुय मुक्ति देलाहार खिरिस्ट हो।” 4यरङ् करिहिन् कुन्हुँ-कुन्हुँ यहुदिलके बिस्वास कर्लुहुन्, आउँ परमेस्वरक् भक्ति कर्लाहार थुप्रोय गिरिकलक् आउँ नाउँ चल्ल अइमाइलकुहु पर्भुक्लाइ बिस्वास करिहिन् पावल आउँ सिलासक्सङ्हिं लाग्लुहुन्।
5तर ओछि रैल्ह ओर्को यहुदिलकेसेहे उखर्ह्वाक् उप्रै दाहा लाग्लाहा आउँ बाजार भिट्रक् बदमास मानुसलकलाइ जउर पारिबानाइ सहरेभोरि हुल-डङ्का कर्बा लागालाहा। उखर्ह्वाइ पावल आउँ सिलासलाइ पक्रिबानाइ मानुसलकक् आगारि आन्बाक्नि यासोनक् घरक्पटि दग्रटे जाइलुहुन्। 6तर उखर्ह्वाइ पावल आउँ सिलासलाइ भेंटाबा नहिंपार्लुहुन्। उहेसैर्हे उखर्ह्वाइ यासोन आउँ कुन्हुँ-कुन्हुँ पर्भुक्लाइ बिस्वास कर्लाहार दाजु-भाइलकलाइ घिस्याते सहरक् सासकलकक्ठालाइ आन्लुहुन् आउँ बर्केचोटे चिच्यातिहि यन्हिं बाज्लुहुन्, “पुराय सन्सारलाइ उठलपुठल पार्लाहार यि मानुसलक् यच्छुहु आइपुग्ल रहट्थ्ला। 7आउँ यासोने उखर्ह्वालाइ आफ्निक् घरै आनिबानाइ पालिहिन् धर्ल धरेट्थ्ला। उखर्ह्वाइ रोमि राजाक् हुकुमलाइ नहिंटेरिहिन् येसु बाज्ल ओर्कोय राजा रहैस् बाजिहिन् बाजट्थ्ला।” 8उ कहिन् सुनिबानाइ ओछि रैल्ह मानुसलक् आउँ सहरक् सासकलक् अलमल पोर्लुहुन्। 9तसौ सहरक् सासकलके यासोन आउँ ओक्राक्सङ्हिं रैल्ह मानुसलकक्भटे धरौटि लेइबानाइ उखर्ह्वालाइ छार्लाहा।
पावल आउँ सिलास बेरिया सहरै जाइल
10रात पोरेहे बिट्के पर्भुक्लाइ बिस्वास कर्लाहार दाजु-भाइलके पावल आउँ सिलासलाइ बेरिया बाज्ल सहरै पाठालाहा। तसौ जब उखर्ह्वा ओछि पुग्लुहुन् ओछि रैल्ह यहुदिलकक् सभाघरै जाइलुहुन्। 11बेरियाक् मानुसलक् ता थेस्लोनिकिक् मानुसलकेसौ एकदमे खुल्ला बिचारक् रैल्हुहुन्, किसाबुने उखर्ह्वाइ परमेस्वरक् बचन एकदमे मन लागाहिन् सुन्लुहुन्। आउँ पावले बाज्ल कहिनलक् सहि रहेला ना बोइने बाजिबानाइ उखर्ह्वाइ दिन्हुँपट धर्मसास्ट्र पर्हिबानाइ जाँच करथ्। 12यरङ् करिहिन् थुप्रोय यहुदिलके पर्भुक्लाइ बिस्वास कर्लुहुन्। आउँ नाउँ चल्ल थुप्रोय गिरिक अइमाइलके आउँ पुर्खरलके आको पर्भुक्लाइ बिस्वास कर्लुहुन्। 13तर थेस्लोनिकिमा रैल्ह यहुदिलके बेरियाहुमा पावले परमेस्वरक् बचन पर्चार कर्बा ठाल्ल धरैस् बाज्ल कहिन् सुन्लुहुन्। तसौ उखर्ह्वाइ बेरियाहुमा जाइबानाइ मानुसलकलाइ उच्काइबानाइ पावलक् बिरोधै सुर्याबा ठाल्लाहा। 14यरङ् कहिन् थाहा पाहेबिट्के पर्भुक्लाइ बिस्वास कर्लाहार दाजु-भाइलके छिट्छिटो करिहिन् पावललाइ समुन्रक् छेंओक्पटि पाठालिहिंक्। तर सिलास आउँ तिमोथिसेहे बेरियाहिमा बस्लुहुन्। 15पावललाइ पुर्याबा जाइलाहार दाजु-भाइलके ओक्रानि एथेन्स बाज्ल सहरसम्म पुर्यालिहिंक्। ओछि पुग्नेसौ पावले ओक्रानि पुर्याबा जाइलाहारलकलाइ सिलास आउँ तिमोथिलाइ सकेसम्म चारो आउस् बाजिहिन् खभर पाठालक्।
पावल एथेन्स सहरै
16पावले एथेन्स सहरै सिलास आउँ तिमोथिलाइ अस्यालटाकै उ सहरलाइ मुर्तिलकिहि भोर्लो देखिबानाइ ओक्राक् मन एकदमे दुक्खकुन्। 17उहेसिहिरे ओहिं यहुदिलकक् सभाघरै जाइबानाइ यहुदि आउँ परमेस्वरक् भक्ति कर्लाहार गिरिक जातक् मानुसक्सङ्हिं येसुक् बिसइमा तर्क-बितर्क करै। उहेरङ् करिहिन् दिनदिने सहरक् मुल बाजारै आओत-जाओत कर्लाहार मानुसलकक्सङ्हिंऔ तर्क-बितर्क करै। 18कुन्हुँ-कुन्हुँ इपिक्युरि आउँ स्तोइकि बाज्ल बिचारधारा भेल बिद्वानलकुहु ओक्राक्सङ्हिं बाद-बिबाद कर्बा ठाल्लुहुन्। उखर्ह्वामध्ये कट्काइसेहे यन्हिं बाज्लुहुन्, “यि फत्फत्या किस् बाजैस् हाँ?” ओर्कोलकुहु बाज्लुहुन्, “यहिं ता कुन्हुँ ओर्कोय लौओ देबि-देउतालकक् पर्चार कर्तिहि रहैस् खम।” किसाबुने पावले येसु आउँ मोर्लोक्भटे जिउँटो भेबाक् कहिनक् पर्चार करै।
19तसौ उखर्ह्वाइ पावललाइ अरियोपागस बाज्ल सभाइ लेगिबानाइ सोर्ल्हिहिंक्, “तुँइ पर्चार कर्ल यि लौओ सिच्छा किवा हो, किस् हामुहुँ जान्बा मिलेला? 20किसाबुने तुँइ हाम्रानि एकदमे लौओ कहिन् सुनाल धरस्ला। उहेसिहिरे तुँइ बाज्बाक् खोज्लो खास कहिन् किवा हो, हामि आको जान्बा चाहाहुँक्ला।” 21(एथेन्स सहरक् जम्मा मानुसलक् आउँ ओछि बस्लाहार बिदेसिलके लौओ-लौओ कहिनलक् करिहिन् आउँ सुनिहिने दिनलक् बिटाथ्।)
22तसौ पावले अरियोपागस बाज्ल सभाक् आगारि ठड्ध्याइबानाइ यन्हिं बोल्लाहा, “अ एथेन्सक् मानुसेहेलक्, तोहोराखर्ह्वा ता धार्मिक मानुसलक् रहला बाजिहिन् मुँइ थाहा पाइल धरम्ना। 23किसाबुने यि सहरै घुम्बा जाइटे मुँइ तोहोलेके पुजा कर्बाक् थोकलकौ देख्ल धरम्ना। मुँइ उ मध्ये एक्टा भोग चार्हाबाक् बेदिमा ‘नहिंचिन्ल्ह देउताक् लागि’ बाजिहिन् लेख्ल भेंटाल धरम्ना। उहेसिहिरे जक्रालाइ तोहोलेके नहिंचिन्हिहिने पुजा करहला, उहे परमेस्वरक् बिसइमा अख्नि मुँइ तोहोरानि सुनातिहि रहमेहेर्ला। 24जुन् परमेस्वरे यि सन्सार आउँ यछि भेल सेब्भ्रोउ थोक् सिरिस्टि कर्ल धरैस्, उहे परमेस्वर स्वर्गो आउँ पिर्थिबिक् पर्भु भेलसैर्हे उ मानुसलकक् हाथे बानाल मन्दिरलकै बास नाँकरै।#१ राजा ८:२७; यसैया ४२:५; प्रेरित ७:४८ 25ओक्रानि किच्छु थोकक् खाँचो पोर्लोक् परौ करिहिन् मानुसक् हाथक्भटे ओक्राक् सेवा भेबा पोर्लाहार बाजहिन् बुन् सोंचोहो। किसाबुने ओहिंय जम्मा मानुसलकलाइ जिबन, पारान आउँ सेब्भ्रोउ थोक् देइस्। 26ओहिं एकजेना मानुसक्भटे जम्मा मानुसक् जातलकलाइ सिरिस्टि कर्लक् आउँ उखर्ह्वालाइ पिर्थिबिभोरि बस्बा देलक्। तसौ उखर्ह्वाइ जिउँबा पोर्लाहार समइ आउँ बस्बाक् ठाउँ ओहिं पैल्हाहि तोक्लो धर्देलाहा। 27मानुसलके परमेस्वरलाइ खोजुस् आउँ उखर्ह्वाइ छामछाम-छुमछुम करिबानाइ भेंटाबा पारुस् बाजिहिन् ओहिं यरङ् कर्लक्। भेटौसुधा परमेस्वर हाम्राइसौ टार्हो नाभेओइ। 28किसाबुने
“‘हामि परमेस्वरक्भटे बाँच्ल रहुँक्ला, आउँ ओक्रिहिक्भटे हिंठ्डुल करुहुँक्ला आउँ हामि ओक्रिहिमा रहुँक्ला।’
तोहोराखर्ह्वाक् कुन्हुँ कबिलकुहु यन्हिं बाज्ल रहट्थ्ला,
‘साँच्चिय हामि ओक्रिहिंक् सन्तान हो।’
29तसौ हामि परमेस्वरक् सन्तान भेलसैर्हे परमेस्वरलाइ मानुसक् कल्पना आउँ हाथक् सिपक्भटे बानाल सोनो, चाँरि आउँ दोंखोक् मुर्तिक् परौ रहैस् बाजिहिन् हामि सोंच्बा नाभेक्। 30यिहेसैर्हे बित्ल समइमा अन्जानै कर्ल कामलाइ परमेस्वरे वास्ता नहिंकर्लक्। भेटौसुधा परमेस्वरे जम्मा ठाँओक् सेब्भ्रोउ मानुसलकलाइ आफ्नि-आफ्निक् पापलाइ मानिलेहिन् छार्बा बाजिहिन् आग्या देल धरैस्। 31किसाबुने यि सन्सारक् मानुसलकक् नियाँ कर्बाक् दिन ओहिं तोक्लो धरैस्, आउँ उ दिनै ओहिं आफ्निहि चुन्ल एकजेना मानुसक्भटे सहि तरिकाइ सन्सारक् नियाँ करैस्। उ मानुसलाइ नियाँ कर्बाक् अधिकार रहेक्ला बाजिहिन् जम्मा मानुसलाइ पर्मान देबाक् लागि परमेस्वरे ओक्रालाइ मोर्लोक्भटे फेरि जिउँटो पार्ल धरेला।”
32जख्नि उखर्ह्वाइ मानुस मोर्लोक्भटे जिउँटो भेबाक् बिसइमा सुन्लुहुन्, तसौ कुन्हुँ-कुन्हुँइ पावललाइ खिसि कर्लिहिंक्। तर ओर्कोलके सेहे यन्हिं बाज्लुहुन्, “हामि यक्राक् बिसइमा फेरि ओर्कोबाजि तोरा कहिन् सुन्बा चाहुँक्ला।” 33ओक्राक्पाछु पावल उखर्ह्वाक् माझक्भटे निस्किहिन् जाइलक् 34तर कुन्हुँ मानुसलके पावललाइ पछ्याबा ठाल्लिहिंक्, आउँ पर्भुक्लाइ बिस्वास कर्लुहुन्। उखर्ह्वामध्ये अरियोपागसक् सभाक् डियनुसियस बाज्ल सदस्य आउँ दामारिस नाउँ भेल एकजेना अइमाइ, आउँ ओर्को मानुसलकौ रैल्हुहुन्।
Currently Selected:
प्रेरित 17: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
