प्रेरित 15
15
यरुसलेमक् माहासभा
1ओक्राक्पाछु कुन्हुँ मानुसलक् यहुदिया इलाकाक्भटे एन्टिओखियाइ आइबानाइ पर्भुक्लाइ बिस्वास कर्लाहार दाजु-भाइलकलाइ यरङ् करिहिन् सिखाबा ठाल्लाहा, “तोहोलेक मोसाक् नियमक् बमजिम खतना नहिं भेइगलेहेबुने ता तोहोराखर्ह्वाइ मुक्ति पाबा नाप्पारह।”#लेबि १२:३ 2तसौ पावल आउँ बारनाबास उ कहिनै सहमत नहिंभेलुहुन् आउँ उखर्ह्वाक्सङ्हिं बर्के बाद-बिबाद पोर्लाहा, उहेसिहिरे ओस्कोक् दाजु-भाइलके पावल, बारनाबास आउँ ओर्को थुप्रोय जेनालाइ उ कहिनक् फैसला कर्बाक् लागि यरुसलेम सहरै रैल्ह प्रेरितलक् आउँ एल्डरलकक्ठालाइ पाठाबाक्नि निर्नय कर्लुहुन्।
3उहेसिहिरे मन्डलिक् दाजु-भाइलके उखर्ह्वालाइ पैंदाइ चाइल्हाहार चिंजलक् देइबानाइ ओछिसौ बिदा कर्लुहुन्। उखर्ह्वा फोनिके आउँ सामरिया इलाकाक्भटे जाइतिहि कर्लटाकै अर्जाति मानुसलकुहु पर्भुक्लाइ बिस्वास कर्ल धरट्थ्ला बाज्बाक् जम्मा कहिन् उखर्ह्वालाइ राम्रोइसम् सुनालाहा। उ कहिने ओछि रैल्ह बिस्वासि दाजु-भाइलक् एकदमे खुसि भेलुहुन्। 4जख्नि उखर्ह्वा यरुसलेम आइपुग्लुहुन्, तसौ उखर्ह्वानि पर्भुक्लाइ बिस्वास कर्लाहार दाजु-भाइलक्, प्रेरित आउँ एल्डरलके स्वागत कर्लाहा। ओक्राक्पाछु पावल आउँ बारनाबासे ओछि रैल्हाहार जम्माहिंलाइ परमेस्वरे उखर्ह्वाक्भटे कर्ल कामलकक् बिसइमा उखर्ह्वानि जानालाहा। 5तसौ ओछि रैल्ह फरिसि समुहक् बिस्वासिलकेसेहे उठिबानाइ यन्हिं बाज्लुहुन्, “अर्जाति मानुसलकक् खतना कर्बाक् आउँ उखर्ह्वालाइ मोसाक् नियम पालन कर्बाक् लागि आग्या देबा पोर्लाहार रहेला।”
6उहेसैर्हे यि बिसइमा छलफल कर्बाक् लागि प्रेरितलक् आउँ एल्डरलक् एके ठाँओइ जउर भेलुहुन्। 7थुप्रोय बाद-बिबाद भेहिन् सिधानेसौ पत्रुसे उठिबानाइ यन्हिं बोल्लाहा, “ताचु-बाबुहेलक्, तोहोराखर्ह्वालाइ थाहाय रहेर्ला, धेरे समइ आगारि परमेस्वरे कहने मोरा मुखक्भटे अर्जाति मानुसलके खुसिक् खभर सुनुस् आउँ बिस्वास करुस् बाजिहिन् तोहोराखर्ह्वाक् माझक्भटे मोरानि चुन्लक्।#प्रेरित १०:१-४३ 8आउँ जम्मा मानुसलकक् हिर्दायाक् कहिन् जान्लाहार परमेस्वरे हाम्रानि देलक् परौ कहिरिन् उहौखर्ह्वालाइ आको पबित्र आत्मा देल धरेट्थ्ला, आउँ उखर्ह्वालाइ सुइकार कर्ल धरैस् बाज्बाक् कहिन् देखालक्।#प्रेरित २:४; १०:४४ 9ओहिं यहुदि आउँ अर्जातिक् मानुसलकक् माझै किच्छुय पछेपात नहिंकर्लक्, बरुस् उखर्ह्वाइ पर्भुक्लाइ बिस्वास कर्ल सिहिरे उखर्ह्वाक् हिर्दाया सुद्ध पारिदेलाहा। 10उहेसिहिरे चेलालकक् काँर्है यि जुवा हालिदेहिन् किसा परमेस्वरक् इच्छाक् बिरोध करहला? यि जुवा ना ता हाम्रा बाज्या-बाराजुलके ना ता हामि बोक्बा पार्ल धरुहुँक्ला। 11ओरोङ् बुन् करुहुँक्, उखर्ह्वाक् परौय हामि आको पर्भु येसुक् अनुग्रहक्भटे मुक्ति पाइल धरुहुँक्ला, बाज्बाक् कहिनै हामि बिस्वास करुहुँक्ला।”
12तसौ सभाइ भेलाहार जम्मायँ चुप्लाहिन् बस्लुहुन्। पावल आउँ बारनाबासे अर्जाति मानुसलकक् माझै परमेस्वरे उखर्ह्वाक्भटे कनङ्-कनङ् चिन्हँ देखालक् आउँ अचम्मक् कामलक् कर्लक् बाजिहिन् ओक्राक् बयान देलटाकै ओछि रैल्ह जम्माहिं मन लागाहिन् सुन्लुहुन्। 13उखर्ह्वाइ बाजिहिन् सिधानेसौ याकुबुहु यन्हिं बाज्लक्, “ताचु-बाबुहेलक्, मोरा कहिन् सुनह, 14परमेस्वरे आफ्निहिं दाया करिबानाइ अर्जाति मानुसलकक्भटे आफ्निक् मानुस बानाबाक्लाइ छान्लक्, यि कहिन् ता सिमोनें भर्खरे जानाल धरैस्। 15यिहे कहिनक्सङ्हिं अगमबक्तालकक् बचनौ मिल्बा जायला, जहरङ् धर्मसास्ट्रै लेख्ल रहेला,
16“‘यक्राक्पाछु मुँइ फर्किहिन् आम्ना,
आउँ दाउदक् भत्कल घर फेरि बानाम्ना,
ओक्राक् भाँच्ल टुक्रल चिंजलाइ मुँइ फेरि लौओ बानाइदेमिना,
आउँ ओक्रानि फेरि खरा कर्मिना,#आमोस ९:११-१२
17उहेरङ् करिहिन् बाँकि मानुसलके परमपर्भुलाइ खोज्बा पारुस् आउँ जम्मा अर्जाति मानुसलके आको,
जक्रालाइ मुँइ आफ्निहिंक् मानुस भेबाक्लाइ हाँख्राल धरम्ना।
18यि कहिन् परमपर्भुइ यन्हिं बाज्ल धरैस्, जैहिं उबेर्कोक् समइहिंसौ यि कहिनलक्, ओहिं सिरिस्टिक् सुरुहिंसौ जानाल धरैस्।’
19“उहेसिहिरे मोरा फैसला यिहे रहैस्, कि परमेस्वरक्पटि फर्किबानाइ आइलाहार अर्जाति मानुसलकलाइ हामि दुक्ख बुन् देहुँक्। 20तर उखर्ह्वाइ ‘मुर्तिलाइ चार्हाल असुद्ध थोकलक् बुन् खाउस्, बेबिचारक्भटे अलग बसुस्, घेंरसुरि निम्थिबानाइ मार्ल पसुक् मास आउँ किच्छुहिंक् रकटौ बुन् खाउस्’ बाजिहिन् हामि एक्टा चिठि लेखि देहुँक्।#प्रस्थान ३४:१५-१७; लेबि १७:१०-१६; १८:६-२३ 21किसाबुने मोसाइ देल नियम धेरे पैल्हाकोक् पुस्तालकिहिंसौ जम्मा सहरलकै पर्चार भेइतिहि रहेला, आउँ साँद्धाउनि बिसारिक दिनै जम्मा सभाघरलकै पर्हिजाइल रहेला।”
बिस्वास कर्लाहार अर्जाति मानुसलकलाइ लेख्ल चिठि
22ओक्राक्पाछु प्रेरितलक्, एल्डरलक् आउँ मन्डलिक् जम्मा बिस्वासिलक् मिलिबानाइ उहेखर्ह्वाक् माझक्भटे कुन्हुँ मानुसलकलाइ छानिबानाइ पावल आउँ बारनाबासक्सङ्हिं एन्टिओखियाइ पाठाबाक् राम्रो लाग्लाहा। तसौ उखर्ह्वा पर्भुक्लाइ बिस्वास कर्लाहार दाजु-भाइलकमध्ये दुइजेना मुख्य अगुवा मानुसलक् बारसाबास बाज्ल यहुदा आउँ सिलासलाइ चुन्लुहुन्। 23आउँ उहेखर्ह्वाक् हाथै उखर्ह्वाइ उ चिठि देइपाठालुहुन्,
“एन्टिओखिया, सिरिया आउँ किलिकियामाहा भेलाहार अर्जाति बिस्वासि दाजु-भाइलकलाइ प्रेरितलक् आउँ एल्डरलकक्भटे सालाम्। 24हाम्रा बिचक्भटे जाइल कुन्हुँ-कुन्हुँ मानुसलके उल्टा सिच्छा देहिन् तोहोराखर्ह्वाक् मन छिटि-पिटि पारिबानाइ तोहोराखर्ह्वालाइ दुक्ख देल बाज्बाक् कहिन् हामि सुन्ल धरुहुँक्ला। 25उहेसिहिरे हामि जम्माहिं साल्हा करिबानाइ हाम्रा कहिन् तोहोराखर्ह्वाक् ठालाइ लेगाबाक्नि हाम्रा माझक्भटे कुन्हुँ-कुन्हुँ दाजु-भाइलकलाइ छानिबानाइ हाम्रा पियारो पावल आउँ बारनाबासक् सङ्हिं पाठाबाक्नि निर्नय कर्ल धरुहुँक्ला। 26पावल आउँ बारनाबास यरङ् मानुसलक् रैल्हुहुन्, जैहिं हाम्रा पर्भु येसु खिरिस्टक् खातिरै आफ्निक् ज्यानसुधा झन्ने-झन्ने गुमाल धर्लुहुन्। 27यिहे दोहोजेनाक्सङ्हिं हामि यहुदा आउँ सिलासलाइ पाठाल धरुहुँक्ला। उखर्ह्वाइ आको हामि लेख्ल कहिनलक् आफ्निक् मुखिहि सुनाहेर्ला। 28पबित्र आत्मा आउँ हाम्रालाइ यछि लेखिहिन् पाठाल कहिनलकेसौं अज्झ बर्के-भारा तोहोरानि बोकाबा नाभेक् बाजिहिन् ठिक लाग्ल रहेला। 29तोहोराखर्ह्वा मुर्तिलाइ चार्हाल असुद्ध थोकलक्, घेंरसुरि निम्थिबानाइ मार्ल पसुक् मास आउँ किच्छुहिंक् रकटौ बुन् खाहो, आउँ बेबिचारक्भटे टार्हो बसह। तोहोलेके यट्का कहिनलक् मानिबुनेमा तोहोरा लागि एकदमे राम्रो भेहेर्ला। अख्निकोक् लागि बिदा भेहुँक्।”
30यरुसलेमेसौ बिदाबारि भेहिनपाछु उखर्ह्वा चारौजेना चिठि लेहिन् एन्टिओखिया सहरै जाइलुहुन्, ओछि उखर्ह्वाइ मन्डलिक् मानुसलकलाइ एके ठाँओइ जउर काराइबानाइ उ चिठि देलाहा। 31जख्नि उ चिठिमाहा भेल अर्तिक् कहिनलक् पर्हिहिन् सुन्लुहुन्, उखर्ह्वा हौसला पाहिन् एकदमें खुसि भेलुहुन्। 32यहुदा आउँ सिलास आफ्निऔ परमेस्वरक्भटे सारालाहार अगमबक्ता रैल्हुहुन्। उखर्ह्वाइ दाजु-भाइलकलाइ हौसलाक् बचन देइतिहि उखर्ह्वाक् बिस्वासलाइ बल्यो बानाइदेलाहा। 33ओछि चुटेक् दिन बस्नेसौ उखर्ह्वानि ओस्कोक् बिस्वासि दाजु-भाइलके “राम्रोइसम् जाहा” बाजिहिन् बिदा करिहिन् फर्कालाहा। 34[तर सिलासलाइ सेहे ओच्छिहि बस्बाक् राम्रो लाग्लकुन्।]
35पावल आउँ बारनाबाससेहे चुटेक् समइसम्म एन्टिओखियाहिमा बस्लुहुन्, तसौ उखर्ह्वाइ ओर्को थुप्रोयजेनाक् सङ्हिं मिलिहिन् पर्भुक् बचन सिखाटे बुल्लुहुन्।
पावल आउँ बारनाबास छुट्ल
36चुटेक् दिनपाछु पावले बारनाबासलाइ यन्हिं बोल्लोकुन्, “चो, असौ हामि जुन्-जुन् सहरै पर्भुक् बचन पर्चार कर्ल धर्लुहुँक्, उ जम्मा सहरलकै फेरि फर्किबानाइ जाहुँक्, आउँ ओछि रैल्ह पर्भुक्लाइ बिस्वास कर्लाहार दाजु-भाइलकलाइ भेंटाहुँक्, उखर्ह्वा किवा कर्तिहि रहट्थ्ला, दिठाहुँक्।” 37बारनाबासे मर्कुस बाज्ल यहुन्नालाइ आफ्निक् सङ्हिं लेगाबाक्नि खोज्लोकुन्। 38तर पावलेसेहे मर्कुसलाइ सङ्हिं लेग्बाक्नि राम्रो नहिंलाग्लकुन्, किसाबुने मर्कुससेहे पामफिलियाक्भटे उखर्ह्वाक्सङ्हिं छुटिबानाइ जाइल रैल्हक्, आउँ उखर्ह्वाक्सङ्हिं कामै नहिंलाग्ल रैल्हक्।#प्रेरित १३:१३ 39उहे कहिनै पावल आउँ बारनाबासक् बिचै बर्के मनमुटाब भेलाहा, आउँ उखर्ह्वा एक्टा-ओर्कोक्भटे छुट्लुहुन्। तसौ बारनाबाससेहे मर्कुसलाइ आफ्निक् सङ्हिं लेइबानाइके पानिजाहाज चर्हिबानाइ साइप्रस टप्पुइ जाइलक्। 40पावलेसेहे सिलासलाइ सङ् बानालक्, आउँ पर्भुक्लाइ बिस्वास कर्लाहार दाजु-भाइलके उखर्ह्वालाइ परमेस्वरे अनुग्रह करुस् बाजिहिन् सोंप्लाहा, तसौ उखर्ह्वा हिंठ्लुहुन्। 41पावल आउँ सिलासे सिरिया आउँ किलिकिया इलाका भेहिन् जाइलटाकै ओछि रैल्ह मन्डलिलकक् बिस्वासिलकलाइ बिस्वासै बल्यो बानाटे जाइलुहुन्।
Currently Selected:
प्रेरित 15: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
