प्रेरित 13
13
बारनाबास आउँ साउललाइ चुन्ल
1एन्टिओखिया बाज्ल सहरक् मन्डलिमा अगमबक्तालक् आउँ सिखालाहार मानुसलक् रैल्हुहुन्। उखर्ह्वालक् बारनाबास, काल्या बाज्ल सिमियोन, कुरेनिक्भटे आइल लुकियस, राजा हेरोदक्सङ्हिं हुर्कल मनेन आउँ साउल रैल्हुहुन्। 2उखर्ह्वाइ बर्त बसिबानाइ पर्भुक् भक्ति कर्ल बेलाइ पबित्र आत्माइ उखर्ह्वानि बोल्लाहा, “बारनाबास आउँ साउललाइ मुँइ जुन् कामक् लागि चुन्ल धरम्ना, उखर्ह्वानि उहे कामक् लागि छुट्याहाखान।”
3तसौ उखर्ह्वाइ फेरि बर्त बसिहिन् पाराथ्ना करिबानाइ उ दुइजेनाक् उप्रै आफ्निक् हाथ धर्लुहुन् आउँ उखर्ह्वानि बिदाबारि करिबानाइ पर्भुक् कामै पाठालाहा।
बारनाबास आउँ साउल साइप्रसै
4तसौ पबित्र आत्माइ पाठालय बमजिम बारनाबास आउँ साउल एन्टिओखियाक्भटे सिलुकिया बाज्ल सहरै जाइलुहुन्। ओछिसौ उखर्ह्वा पानिजाहाज चर्हिबानाइ साइप्रस टप्पुक्पाखा जाइलुहुन् 5उखर्ह्वा सलामिस सहरै पुग्नेसौ यहुदिलकक् सभाघरलकै जाइबानाइ परमेस्वरक् बचन सुनाबा ठाल्लुहुन्। उ काम साघाबाक् लागि उखर्ह्वाइ मर्कुस बाज्ल यहुन्नालाइ आको सङ्हिं लेगालिहिंक्।
6जब उखर्ह्वा पुराय साइप्रस टप्पुलाइ यात्रा करिहिन् पाफोस बाज्ल सहरै आइपुग्लुहुन्, तसौ ओछि उखर्ह्वाइ एकजेना बार-येसु बाज्ल यहुदि जादु कर्लाहार झुट्ठा अगमबक्तालाइ भेंटालिहिंक्। 7उ जादु कर्लाहार साइप्रस टप्पुक् बारा-हाकिम सर्गियस पौलुसक् घरै घरि-घरि जाओइ। सर्गियस पौलुससेहे बुद्धिगर मानुस रैल्हक्। ओहिं साउल आउँ बारनाबासलाइ हाँख्राइबानाइ परमेस्वरक् बचन सुन्बाक्नि मन कर्लक्। 8तर उ जादु कर्लाहार एलुमासे (गिरिक भासाइ एलुमासक् अर्थ जादुगर भेला), सर्गियस पौलुसलाइ बिस्वासक्भटे फर्काबाक् खोजिबानाइ उखर्ह्वालाइ रोक्बाक् खोज्लक्। 9तर साउले, (जक्रालाइ पावल बाज्ल रहेला), ओहिं पबित्र आत्माइ पुराय रुपै चालाहिन् एलुमासलाइ एकेहोरि दिठाहिन् यन्हिं बोल्लोकुन्, 10“तुँइ सैतानक् छाउरा, सेब्भ्रोउ राम्रो कहिनक् सत्रु, जम्माथरिक् छल आउँ दुस्ट कहिनलके भोर्लोस्! किस् तुँइ पर्भुक् सोझो पैंदालाइ बङ्ग्याबा कख्नुहुँ नाछारस्? 11असौ दिठाउ, पर्भुक् साजाइ तोराउप्रै पोर्लो रहेस्ला, आउँ तुँइ अन्धा भेइबानाइ किच्छु समइसम्मक् लागि लहुरक् उँजतौ देख्बा नहिंपार्लाहार भेस्ला।”
तसौ उहेटाकै कार्दो बादरक्परौ आइबानाइ ओक्राक्नि झाँकालकुन्, आउँ आँखे देख्बाय नहिंपार्लाहार भेलक्, तसौ ओहिं आफ्निक् हाथ कुन्-कुने गर्थिदेबुहुना ना बाजिहिन् यर्साक्-ओर्साक् छामिबानाइ साहारा खोज्बा ठाल्लक्।
12पर्भुक् सिच्छाइ भेल सक्ति देखिहिन् बारा-हाकिम छक्क पोर्लोक्, तसौ ओहिं पर्भुक्लाइ बिस्वास कर्लक्।
पिसिदिया इलाकाक् एन्टिओखिया सहरै
13तसौ पावल आउँ ओक्राक् सङेकलक् पाफोस सहरक्भटे पानिजाहाज चर्हिबानाइ पामफिलियाक् पर्गा बाज्ल सहरै पुग्लुहुन्। ओछिसौ मर्कुस बाज्ल यहुन्नासेहे उखर्ह्वाक्भटे छुट्टिबानाइ यरुसलेम फर्कलक्। 14ओक्राक्पाछु पावल आउँ बारनाबाससेहे पर्गा बाज्ल सहरक्भटे निस्किबानाइ पिसिदियाक् एन्टिओखिया सहरै जाइलुहुन्। तसौ बिसारिक दिनै उ दोहोजेना सभाघरभिट्रै जाहिन् बस्लुहुन्। 15तसौ मोसाइ देल नियम आउँ अगमबक्तालके लेख्ल किताप पर्हिबानाइ सिधानेसौ सभाघरक् सासकलके उखर्ह्वालाइ यरङ् खभर पाठालुहुन्, “ए बाबुहेलक्, तोहोराठालाइ हाम्रा मानुसलकक् लागि हौसला देलाहार किच्छु कहिन् रहेर्ला भेनेमा बाजह।” 16ओट्का कहिन् पाइनेसौ पावले उठिहिन् हाथ बाताहिन् यन्हिं बाज्बा ठाल्लक्,
“अ इस्राएलक् मानुसेहेलक् आउँ परमेस्वरक् डर मान्लाहारेहेलक्, मोरा कहिन् सुनहँ। 17इस्राएलि जातक् परमेस्वरे हाम्रे बाज्या-बाराजुलकलाइ चुन्लक्, आउँ मिस्रदेसै रैल्ह टाकै उखर्ह्वाक् सङ्ख्या थुप्रोय बार्हाइदेलाहा। आउँ ओक्राक् बर्के सक्तिक्भटे परमेस्वरे उखर्ह्वानि उ देसेसौ निस्काहिन् आन्लाहा।#प्रस्थान १:७; १२:५१ 18उखर्ह्वा उखास लाग्दो ठाँओइ रैल्ह टाकै परमेस्वरेहि चालिस बर्ससम्म उखर्ह्वाक् रेखदेख कर्लक्।#गन्ति १४:३४; ब्यबस्था १:३१ 19तसौ ओहिं कनान देसक् सातगोटा जातलकलाइ नास करिबानाइ उ देस हाम्रे बाज्या-बाराजुलकलाइ अधिकार चालाबा देलक्।#ब्यबस्था ७:१; यहोसु १४:१ 20उ बेलासम्म चार सइ पाचास बर्स जट्का बितिहिन् सिधाल रैल्हकुन्।
“ओक्राक्पाछु परमेस्वरे उखर्ह्वाक् माझै नियाँ कर्लाहार नियाँधिसलक् खटालाहा। उ नियाँधिसलके एक्टाइसौ ओर्को करिहिन् समुएल अगमबक्ताक् पालासम्मयँ काम कर्लुहुन्।#न्यायकर्ता २:१६; १ समुएल ३:२० 21ओक्राक्पाछु उखर्ह्वाइ राजाक् माङ् कर्लुहुन्, आउँ परमेस्वरे बेन्यामिन खलकक् किस बाज्ल मानुसक् बेटायक साउललाइ राजा बानालुहुन्। साउले चालिस बर्ससम्म राज्जे कर्लक्।#१ समुएल ८:५; १०:२१ 22तसौ परमेस्वरे ओक्रानि हटाइबानाइ दाउदलाइ राजा बानालकुन्। परमेवस्वरे ओक्राक् बिसइमा यन्हिं बाजिहिन् बाज्लक्, ‘मुँइ यिसैक् बेटायक दाउदलाइ मोरा भिट्रक् हिर्दायाहिसौ मन पोर्लो मानुस पाइल धरम्ना। ओहिं मोरा इच्छा बमजिम सेब्भ्रोउ काम पुरा कर्बगे।’#१ समुएल १३:१४; १६:१२; भजनसङ्ग्रह ८९:२० 23यिहे मानुसक् सन्तानक्भटे परमेस्वरे पर्तिग्या कर्ल बमजिम ओहिं इस्राएलिलकक् लागि दाउद राजाक् बङ्सक्भटे एकजेना मुक्ति देलाहार येसुलाइ पाठालक्। 24येसुइ आफ्निक् काम सुरु कर्बाइसौ आगारि बप्तिस्मा देलाहार यहुन्ना आइल रैल्हक्। ओहिं इस्राएलक् जम्मा मानुसलकलाइ आफ्नि-आफ्निक् पापलाइ मानिलेहिन् परमेस्वरक्पटि फर्कह आउँ बप्तिस्मा लेहो बाजिहिन् पर्चार कर्लक्।#मर्कुस १:४; लुका ३:३ 25आउँ यहुन्नाइ आफ्निक् काम सिधाबाक् लाग्लटाकै यन्हिं बाज्लक्, ‘तोहोराखर्ह्वाइ मोरानि कुन्ग्वा बाजिबानाइ ठान्हँहला? मुँइ तोहोराखर्ह्वाइ अस्याल मानुस ता बोइने। तर मोरापाछु एकजेना आइतिहि रहैस्, जक्राक् जुत्ताक् टुना फोक्लाबाहुँकलाइ मुँइ ता नाँसोहाम्।’#मत्ति ३:११; मर्कुस १:७; लुका ३:१६; यहुन्ना १:२०; १:२७
26“दिठाहो, दाजु-भाइहेलक्, हामि चाहे अब्राहामक् सन्तान भेहुँक्, चाहे परमेस्वरक् डर मान्लाहार अर्जाति मानुसलक् किसा बुन् भेहुँक्, यि मुक्ति पाइलाहार खभर परमेस्वरे हाम्राठालाइ पाठाल धरैस्। 27यरुसलेमक् मानुस आउँ उखर्ह्वाक् सासकलके येसुलाइ नहिं चिन्ल्हिहिंक्। आउँ साँद्धाउ बिसारिक दिनै अगमबक्तालके लेख्ल कहिन् पर्हेटौसुधा उखर्ह्वाइ नहिं बुझ्लुहुन्। येसुलाइ मार्बाक् साजाइ देइबानाइ उखर्ह्वाइ अगमबक्तालके ओक्राक् बिसइमाहा लेख्ल कहिन् पुरा कर्लुहुन्। 28तसौ मार्बाक् साजाइ देबाक् किच्छु दोस नहिं पाहिन् उखर्ह्वाइ येसुलाइ मार्बाय पोर्लाहार बाजिहिन् बारा-हाकिम पिलातुसक्ठालाइ बिम्ति कर्लुहुन्,#मत्ति २७:२२-२३; मर्कुस १५:१३-१४; लुका २३:२१-२३; यहुन्ना १९:१५ 29यरङ् करिहिन् येसुक् बिसइमा लेख्ल जम्मा कहिन् पुरा करिबानाइ उखर्ह्वाइ ओक्रानि कुरुसक्भटे झारिबानाइ चिहानै धर्लिहिंक्।#मत्ति २७:५७-६१; मर्कुस १५:४२-४७; लुका २३:५०-५६; यहुन्ना १९:३८-४२ 30तर परमेस्वरे ओक्रानि मोर्लोक्भटे जिउँटो पार्लकुन्। 31आउँ गालिलक्भटे ओक्राक्सङ्हिं यरुसलेमै आइलाहारलके थुप्रोय दिनसम्म येसुलाइ देख्लिहिंक्। उहेखर्ह्वाय अख्नि इस्राएलक् मानुसलकक् लागि ओक्रानि देख्लाहार साछिलक् भेल रहट्थ्ला।#प्रेरित १:३ 32तसौ परमेस्वरे बाज्या-बाराजुलकलाइ देल उहे पर्तिग्याक् बिसइमा यि खुसिक् खभर हामि अख्नि तोहोराठालाइ लेहिन् आइल धरुहुँक्ला। 33परमेस्वरे येसुलाइ मोर्लोक्भटे जिउँटो पारिहिन् उ पर्तिग्या उहेखर्ह्वाहिक् सन्तान हाम्रा लागिय पुरा कर्ल धरैस्। येसुक् बिसइमा भजनसङ्ग्रहक् दोस्रो भजनै यन्हिं लेख्ल रहेला–#भजनसङ्ग्रह २:७
“‘तुँइ मोरा छाउरा हो,
आजु मुँइ तोरा बाप्पो भेल रहम्ना।’
34परमेस्वरे खिरिस्टलाइ कख्नुहुँ मोर्बा नहिंपोर्लाहार करिहिन् मोर्लोक्भटे जिउँटो पार्ल बिसइमाहा यन्हिं बाज्ल धरैस्,#यसैया ५५:३
‘मुँइ तोहोरानि दाउदक्लाइ पर्तिग्या करिहिन् देल
पबित्र आउँ नहिं बद्ललाहार आसिक् देमेहेंर्ला।’
35अज्झ ओर्को भजनै दाउद राजाइ यन्हिं बाजिहिन् लेख्ल धरैस्,
‘तुँइ आफ्निक् पबित्र जनक् देहिलाइ कुहिबानाइ जाबा नाँदेस्।’
36यि कहिनसेहे दाउदे आफ्निक् बिसइमाहा बाज्ल बोइने किसाबुने परमेस्वरक् इच्छाबमजिम काम करिहिन् सक्नेसौ दाउद मोर्लोक्। तसौ आफ्निक् बाज्या-बाराजुलकक्सङ्हिंय दाउदुहुलाइ गार्लिहिक्, आउँ ओक्राक् देहि कुहिबानाइ जाइलकुन्, 37तर परमेस्वरे जक्रालाइ मोर्लोक्भटे जिउँटो पार्लक्, ओक्राक् देहिसेहे नहिंकुहलकुन्। 38उहेसिहिरे दाजु-भाइहेलक्, उहे येसुक्भटे पाप-छेमा देइस् बाजिहिन् यि खुसिक् खभर तोहोराखर्ह्वाक्ठालाइ पर्चार भेल रहेला बाजिहिन् असौ तोहोलेके बुझ्बा पोर्लाहार। 39येसुलाइ बिस्वास कर्लाहारलक् जम्माहिं पापक् साजाइक्भटे छुट्कारा पाट्थ्ला, जुन् कामसेहे मोसाक् नियमक्भटे तोहोराखर्ह्वाक् लागि पुरा भेबा नहिं पार्लाहार रैल्हकुन्। 40उहेसैर्हे होस्यारो भेहो, नाटेन् ता अगमबक्तालकक् कितापै लेख्ल उ कहिनलक् तोहोराखर्ह्वाक् उप्रै आइपोरेहेर्ला–
41‘अ गिल्ला कर्लाहारेहेलक्, दिठाहो आउँ छक्क पोरोहो,
तसौ नास भेहो
किसाबुने तोहोराखर्ह्वाक् समइमा मुँइ यरङ् एक्टा काम कर्बम्बे,
जुन् कामक् बिसइमाहा कुन्हुँहि तोहोरालाइ जानायटौ तोहोलेके बिस्वास कर्बा नाप्पारह।’”#हबकुक १:५
42पावल आउँ बारनाबास सभाघरक्भटे निस्किबानाइ जाबा ठाल्लटाकै मानुसलके बाज्लुहुन्, फेरि ओर्को बिसारिक दिनुहुँमा आइबानाइ यिहे कहिनलकक् बिसइमा हाम्रानि सुनाबेहे बाजिहिन् बिम्ति कर्लुहुन्। 43तसौ सभा सकिहिन् पाछु थुप्रोय यहुदिलक् आउँ यहुदि धर्म मान्लाहार अर्जातिक् मानुसलक् पावल आउँ बारनाबासक् पाछु लाग्लुहुन्। पावल आउँ बारनाबासे उखर्ह्वाक्सङ्हिं कहिन् करिहिन् सटौघरि परमेस्वरे देल अनुग्रहइ भरसा करिहिन् बसह बाजिहिन् हौसला देलाहा।
44ओर्को बिसारिक दिनै परमेस्वरक् बचन सुन्बाक्नि सहरक् झन्ने जम्मायँ मानुसलक् उल्किबानाइ आइलुहुन्। 45यहुदिलके मानुसलकक् ओट्काकुर हुल देखिबानाइ पावल आउँ बारनाबासक् उप्रै एकदमे डाहा कर्बा ठाल्लुहुन्। आउँ पावले बाज्ल कहिनै बिरोध करिबानाइ उखर्ह्वाइ ओक्रानि अपमान कर्लिहिंक्। 46भेटौ पावल आउँ बारनाबासे झन् कुन्हुँहिंक् डर नहिंमानिहिने अज्झ यन्हिं बोल्लाहा, “परमेस्वरक् बचन पैल्हा तोहोरेखर्ह्वालाइ सुनाबा पोर्लाहार रैल्हकुन्। तर तोहोराखर्ह्वाइ सेहे सुन्बाक् असुइकार कर्लेहे। तोहोलेके आफ्निलाइ अजम्मरि जिबन पाबाक् अयोग्य तुलाल धरहला। उहेसिहिरे हामि असौ अर्जाति मानुसलकक्ठालाइ जाहुँक्ला। 47किसाबुने पर्भुइ हाम्रालाइ यहेरङे आग्या देल धरैस्,#यसैया ४२:६; ४९:६
“‘पिर्थिबिक् ओर्साक् छेंउसम्मक् मानुसलके मुक्ति पाउस् बाजिहिन्
मुँइ तोहोराखर्ह्वालाइ अर्जाति मानुसलकक् माझै उँजत फिंझाबालाइ पाठाल धर्मेहेर्ला।’”#यसैया ४२:६; ४९:६
48जब अर्जाति मानुसलके यि कहिन् सुन्लुहुन् आउँ उखर्ह्वा एकदमे खुसि भेइबानाइ यन्हिं बाज्बा ठाल्लुहुन्, “परमेस्वरक् बचन कट्का राम्रो रहेला!”
यरङ् करिहिन् अजम्मरि जिबनक् लागि परमेस्वरे चुन्ल जट्का जम्माहिं येसु खिरिस्टक् उप्रै बिस्वास कर्लुहुन्।
49तसौ परमेस्वरक् बचन ओस्कोक् जम्मा इलाकाभोरिय फिंझ्ते जाइलकुन्। 50तर पावल आउँ बारनाबासलाइ साताउस् बाजिहिन् यहुदि अगुवालके परमेस्वरक् भक्ति कर्लाहार आउँ नाउँ चल्ल अइमाइलक् आउँ सहरक् बारा-बारा मानुसलकलाइ उस्कालाहा, आउँ उखर्ह्वानि आफ्निक् साँर्ह् सिमानक्भटे बाहार काटालाहा। 51तसौ पावल आउँ बारनाबासे उ मानुसलकलाइ परमेस्वरेहि नियाँ करैस् बाज्बाक् कहिन् चेताउनि देहिन् उखर्ह्वाइ आफ्निक् टाङक् धुरलक् टक्टकाइबानाइ, आइकोनियन बाज्ल सहरक्पटि जाइलुहुन्।#मत्ति १०:१४; मर्कुस ६:११; लुका ९:५; १०:११ 52तसौ एन्टिओखियाइ भेल बिस्वासिलकसेहे पबित्र आत्माइ पुराय रुपै चालाहिन् आनन्दइ भोर्लोहुन्।
Currently Selected:
प्रेरित 13: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
