लुका 5
5
प्रथम सिस्यान
(मत्ति ४:१८-२२; मर्कुस १:१६-२०)
1एक दिन इसु गालिल तालका किनारमि कल्लिरइथ्या परमेस्वरको बचन सुन्नाइलाइ भउत मान्सको भिड लागिरइथ्यो।#५:१ गालिल तालका किनारलाइ अर्खो नाउँ दिइयाथ्यो, जो गनेसरेत ताल थ्यो। 2इसुले तालका किनारमि दुइ डुङ्ङा धेक्या, जालहारि डुङ्ङा छाणिबर जाल धुन्नाथ्या। 3एक डुङ्ङा सिमोनको थ्यो। इसु तइ डुङ्ङामि चण्या रे सिमोनलाइ भुन्यो डुङ्ङा किनारबटहइ थोक्काइ पल्तिर लइजा, इसु डुङ्ङामि बसिबर भिडलाइ सिछ्या दिन लाग्या।
4सिछ्या दिसक्या पाछा इसुले सिमोनलाइ भुन्यो कि, “डुङ्ङा गइला ठउँरतिर लइजा रे माछा माद्दाइलाइ जाल हाण।”
5यो कुरा सुनिबर सिमोनले इसुखि भुन्यो, “गुरुज्यु, हामले रातभरि मिहिनत अर्या तबलइ एक माछो फेला पणेन रे तम भुन्नछउ भुन्या मु जाल हान्नउ।” 6जाल हाणन्ज्या भउत माछा पण्या रे तिनरा जाल चिरिन लाग्या। 7रे तिनुनले अर्खा डुङ्ङामि भया साझेदारलाइ हातका इसारा अरिबर बोलायो तिनुन आया रे माछा निकाल्ल लाग्या निकाल्ला निकाल्लाइ दुयेइ डुङ्ङा डुब्द लाग्या। 8त्यो धेकिबर सिमोन पत्रुसले इसुका खुट्टामि घोप्टिबर भुन्यो, “हे प्रभु, मु पापि हुँ मुबटहइ निजा।”
9भउत माछा पड्या धेकिबर सिमोन रे तिनसङ भया सप्पइले अचम्म माण्यो। 10रे सिमोनका साझेदार जब्दियाका चेला याकुब रे युहन्ना लइ अचम्म पड्या। तिनुन सिमोनसित साझेदार थ्या। इसुले सिमोनलाइ भुन्यो, “जनडराइ आब तु माछा हइन रे मान्सलाइ छोप्द्या रे मेरा वाँ ल्याउन्या हुन्याछइ।”
11रे तिनुनले डुङ्ङा किनारमि राख्यो तइपाछा आफना सप्पइ कुरा छाणिबर इसुका पाछा लाग्या।
इसुले कोड लाग्या मान्सलाइ निको पाण्यो
(मत्ति ८:१-४; मर्कुस १:४०-४५)
12इसु एक सहरिमि हुन्ज्या तइ सहरमि सरिलभरि कोड रोग लाग्या एक मान्स थ्यो। रे तइले इसुलाइ धेकिबर उनरा खुट्टाइनि पणिबर बिन्ति अद्दलाग्यो, “हे प्रभु तमले इछ्या अर्याले मुलाइ निको पाड्ड सकन्छउ।”
13इसुले तइमि हात राकिबर भुन्यो, “तु निको होइजा भन्या मु इछ्या अद्उ” तनज्याइ तइको कोड निको भयो। 14रे इसुले तइलाइ आदेस दियो, “यो कुरडि कसइलाइ जनभणेइ रे पुजारिका वाँ जाइबर आफुलाइ धेका मोसाले भन्या जसेरि बलि चणाइबर सप्पइलाइ तु निको भया प्रमाण दिनाइलाइ भेटि चडा।”
15रे इसुको चर्चा झिग चारइतिर फिजियो, ठुलो भिड उनरा कुरा सुन्न रे आफना रोगबटहइ निको हुनाइलाइ उनरा वाँ जमा हुन्थ्या। 16रे उन सुनसान ठउँरमि जाइबर प्रार्थना अरनथ्या।
इसुले झाड्डु पड्यालाइ निको पाण्यो
(मत्ति ९:१-८; मर्कुस २:१-१२)
17एक दिन इसु मान्सनलाइ सिछ्या दिन्नाथ्या कोइ कोइ फरिसि रे धर्म-गुरु उनरा नजिक बसिरइथ्था। तिनुन गालिल रे यहुदिया छेत्रका सप्पइ गाउँ बटहइ यरुसलेम सहर बटहइलइ आइरइथ्या। इसुसङ बिमारिनलाइ निको पाड्या परमप्रभुको सक्ति थ्यो। 18मान्सनले एक जनो झाड्डुपण्या बिमारिलाइ खाटमि बोकिबर लेया रे तिनुनले उइलाइ भित्र इसुका वाँ ल्याउन खोज्यो। 19मान्सका भिणले अरनज्या तइलाइ इसुका वाँ पुर्याउनाइलाइ बाटो नपाइबर तिनुनले तइलाइ घरको पाखो उचेणिबर खाटसङइ इसुका अगाडि ओराल्दियो।#५:१९ तन दिनमि इज्राएलिनका घरको पाखो आज भोल धेकिन्या कद्बइ तला घरजसा हुन्थ्या। तबइलाइ तिन फराकिला हुन्थ्या। 20तिन मान्सको यसो बिस्वास धेकिबर इसुले तइ बिमारिखि भुन्यो, “ए मान्स तेरा पाप छिमा भया।”
21इसुले भुन्या सुनिबर धर्म-गुरु रे फरिसिनले एक अर्खासित भन्न लाग्या, “परमेस्वरको निन्दा अद्या यो को हो? परमेस्वरले मात्तरइ पाप छिमा अद्दाहान।”
22तिनरा मनइनिका कुरा बुजिबर इसुले भुन्यो, “तमु क्याकि यसो सोचन्छउ। 23त्यो झाड्डु पड्या मान्सलाइ ‘तेरा पाप छिमा भया’ भुन्नु रे ‘उठ्बर हिट्’ भुन्नुमि कि निको छ भुण? 24रे हेर यइ धर्तिमि मान्सको चेलोलाइ पाप छिमा अद्या अधिकार छ भन्या कुराको प्रमाण मु तमुलाइ दिनउ।” रे इसुले तइ बिमारिलाइ भुन्यो, “मु तु लाइ भुन्नउ, आब उठ रे आफनो खाट बोकिबर घर जा।”
25त्यो मान्स तनज्याइ, उठ्यो रे आफनो खाट बोकिबर परमेस्वरको बडाइ अदोइ आफना घर गयो। 26तिनुन सप्पइ अचमम्मि पड्या रे डर मान्नाइ परमेस्वरको प्रसम्सा अद्दाइ भुन्यो, “आज हामले कसो अचम्मको कुरा धेक्या!”
लेबिको बोलावट
(मत्ति ९:९-१३; मर्कुस २:१४-१७)
27रे यिन कुरा पाछा इसु बाइर गया, रे लेबि नाउँ भया एक जनो कर उठाउन्या ठउँरमि बसिरया धेक्यो। रे तन कर उठाउन्थ्या इसुले तनलाइ भुन्यो कि, “मेरा पाछा लाग।”#५:२७ उनलाइ मत्ति भनिबरलइ चिनिन्थ्यो। 28तबइ तिनले सप्पइ कुरा छाड्या रे उठिबर इसुका पाछा लाग्या।
29तइपाछा लेबिले उनरि निउति आफना घरमि ठुलो भोजको आयोजना अर्यो। ताँ कर उठाउन्या रे अउर कद्बइ मान्स इसुसित भोजमि बसिरइथ्या। 30फरिसि रे तिनुनसितका धर्म-गुरुनले उनरा सिस्यानका बिरुद्मि कचकच अद्लाग्या “तमु क्याकि कर उठाउन्या रे पापिसित खानपिनमि बसन्नछउ?” #५:३० यहुदि धर्मका अगुवानले इसुसित बसिबर खन्नारया मान्सनलाइ असुद् पापिन भनि सोचन्थ्या। तबइलाइ उनुनसित बसिबर खान्यालाइ लइ तसोइ सोचन्थ्या।
31रे इसुले तिनुनलाइ भुन्यो, “बइदि निरोगिलाइ हइन, रोगिलाइ चाइन्छ। 32इसेरि मु धर्मिनलाइ हइन रे पापिनलाइ पस्यातापकि निउति बचाउनालाइ आया हुँ।”
उबास बस्या बारेमि सोध्यो
(मत्ति ९:१४-१७; मर्कुस २:१८-२२)
33तिनुनले इसुखि भुन्यो, “बप्तिस्मा दिन्या युहन्नाका सिस्यान त भउत जसो उबास बस्हान् रे प्रार्थना अद्दाहान् फरिसिका सिस्यान लइ तसोइ अद्दान, रे तमरा सिस्यान खान्या रे पिन्या मात्तरइ अद्दाहान्।”
34इसुले तिनुनखि भुन्यो, “क्या ब्याउलो सङइ हुन्ज्या बरेतिनलाइ उबास बस्स लाउनछउ ब? 35रे इसा दिनलइ आउन्याछन्, कि ब्याउलो तिनुन बटहइ छुटाइन्या छ तबइ तिनुन तइ दिनमि उबास बस्याछन्।”
36इसुले अज अर्खो उखानलइ भुन्यो, “कसइ मान्सले नयाँ लत्ता चिरिबर पुरानो लत्तामि टालो हाल्लइन् रे हाल्यो भन्या लइ नयाँ लत्ता बिगणन्छ रे नयाँ लत्ता पुरानो लत्ता सित मिल्लइन्। 37नयाँ दाखमध्य लइ पुराना छलाका मसकमि कसइले लइ हाल्लाइन् रे हाल्यो भन्या लइ नयाँ दाखमध्यले छालाको मसक फाटन्छ रे दाखमध्य पोखिन्छ रे छालाको मसक नास हुन्छ।#५:३७ तिन दिनमि मान्सनले इसा मध्यजसा झोललाइ इसा छालाका थइलामि राख्द्या अरन्थ्या। 38नयाँ दाखमध्य नयाँ छालाका मसकमि राख्दुपणन्छ। 39कसइ मान्सले पुरानो दाखमध्य खाइबर नयाँ दाखमध्य निको मान्नाइन् रे तइले भुणन्छ ‘पुरानोइ निको थ्यो।’”
Currently Selected:
लुका 5: DOTY
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
