मर्कुस 6
6
नासरतयँ येसुके इन्कार कर्ल
(मति १३:५३-५८; लुका ४:१६-३०)
1उपाछु येसु उसे ठाउ छाडिकुन आफ्नेन् हुर्कल नासरतयँ जाइकेभइल, चेलासब पुनु ओनेन्कइ पाछु लाग्ल। 2हसे नात्लिक दिनयँ येसु सभाघरयँ जाइकुन सिछ्या देइके थालिकेभइल। ओनेन्क कुरा सुन्लाहारसब धेरइ जेना छक्कइ पोर्तिन कहिके थाल्ल, “इहाइ इसे कुरासब कुछिकमाटे पाउल? इख्राके देल बुद्धि कस्न हखइ? इक्र हाथकमाटे कस्के यस्न अचम्मक काम करिके सकित? 3किति उसे मरियमक छाहोक् सिकर्मि नइजे से? इसे त याकुब, योसेफ, यहुदा र सिमोनक दाजुक् नइजे र? किति इक्र बइनिसब पुनु हाम्र साहिन नइजेबाटत र?” यस्के उसबेइ येसुके इन्कार कर्ल।
4उपाछु येसुइ उसब्के कहिकेभइल, “अगमबक्तासब्के आफ्न गाउयँ, घरयँ र नातेदारयँ बाहेक अरु ठाउयँ इन्कार नाकरत्।”
5उहइगुनेइ येसुइ उछिका कोलोउ-कोलोउ मन्देलसब्के हाथ राखिकुन निक पारिके बाहेक, ओनेनेइ केहाउ पुनु अचम्मक काम करिके नइजे सकिकेभइल। 6उसे मानुससबेइ बिस्वास नइजेकर्ल देखिकुन येसु छक्क पोरिकेभइल। हसे ओनेन् चारिओरक गाउ-गाउयँ सिछ्या सिखातिन जाइकेभइल।
येसुइ बाह्र जेना चेलाके पाठाइकेभइल
(मति १०:५-१५; लुका ९:१-६)
7हसे येसुइ आफ्न बाह्र जेना चेलासब्के आफ्नेनलघि बोलाइकुन, उसब्के भुत आत्मा निस्कालाहार सक्ति र अधिकार देइकेभइल। र दुइ-दुइ जेना करिकुन छुट्टा छुट्टइ ठाउयँ सिखाइके लागि पाठाइकेभइल। 8ओनेनेइ उसब्के यस्न आग्या देइकेभइल, “तोहेसब यात्रा कर्तेखना आफ्नसाङ थेगिके लउह्रि बाहेक झोला, पटुकायँ पइसा हसे खइलाहार कुरा पुनु झुनलेजउ। 9जुत्ता लागाओ तर फेरिके लागि दुक्टा लुगा झुनबोकउ।” 10येसुइ चेलासब्के यस्के कहिकेभइल, “जब तोहेसब कोक्रउ घरयँ पोस्ताहाउ, तब उसे ठाउ नइजेछाड्लसमन उहइ घरयँ बोसउ। 11यदि कोलोउ ठाउक मानुससबेइ तेउह्रासब्के मानमन्ता नाकरत् र तेउह्रसब्क बचन पुनु सुनिके नामानत कने, उछिकमाटे निस्कतेखना गवाहिक लागि उसब्क बिरोधयँ आफ्न पइतलाक धुलो झारिदेओ।”
12हसे चेलासब उछिकमाटे जाइकुन मानुससब्के आफ्न पाप छाडउ कहतिन् प्रचार करिके थाल्ल। 13उसबेइ धेरइ भुतसब्के निस्काल, हसे धेरइ मन्देलसब्के पुनु जइतुनक तेल लागाइकुन#६:१३ तेल लागाइकुन कोलोउ-कोलोउ अनुबादयँ अबिसेक कइकुन लेख्ल बाटइ निक पार्ल।
बप्तिस्मा देलाहार युहन्नाके मार्ल
(मति १४:१-१२; लुका ९:७-९)
14येसुक नाउ चारिओर फइलिल कुरा राजा हेरोदेइ पुनु सुन्ल। कोलोउ-कोलोउयेइ यस्के कहतिन् रहत, “बप्तिस्मा देलाहार युहन्ना मोर्लकमाटे जिउल काहा! उहइगुनेइ त उक्रमाटे यस्न अचम्मक सक्तिसालि कामसब भइतिन् बाटइ।”
15तर कोलोउयेइ यस्के कहल, “इसे त एलिया हबाहाइ।”
हसे कोलोउ-कोलोउयेइ चाहिँ यस्न पुनु कहल, “इसे त आघुहिँक धेरइ अगमबक्तासब जस्नइ एक्टा अगमबक्ता रलाहाइ।”
16जब इसे कुरासब राजा हेरोदेइ सुन्ल, तब उहाइ कहल, “इसे त युहन्ना हखइ, जोक्र मुड मोइ नइ काटिके लागाल रहम, उसे फेरि मोर्लकमाटे जिउल काहा!” 17राजा हेरोदेइ आफ्निक भाहिक् फिलिपक दुलिहिक् हेरोदियासके बिहा कर्ल रहइ, उहाइ हेरोदियासक लागि युहन्नाके धरिके पाठाइकुन झेलखानायँ घाल्ल रहइ। 18किकेकने बप्तिस्मा देलाहार युहन्नाइ राजा हेरोदके यस्न कहल रहइ, “तेउह्राके आफ्न भाइक दुलिहिसाङ बिहा करिके कानुनेइ नादेओइ।”
19उहइगुनेइ हेरोदियासेइ इख राखिकुन युहन्नाके मारिके खोज्लि रहि, तर उहाइ मारिके कने नइजेसक्लि, 20किकेकने युहन्ना धर्माति र पबित्र मानुस हखइ कइकुन राजा हेरोद उक्रसाङ डाराइकुन, हेरोदेइ युहन्नाके सुरछ्या देइकुन राख्ल रहइ। जब हेरोदेइ उक्र कुरा सुन्ते रहइ, तब हेरोदक मन खल्बलाते रहइ, तइपुनु खुसि भइकुन सुन्ते रहइ।
21तर अन्तिमयँ एक्टा मउका अइल। हेरोदेइ आफ्निक जन्मदिनयँ उक्र आफ्न हाकिमसब, फउजि कप्तानसब र गालिलक मुक्खे-मुक्खे मानुससब्के बोलाइकुन भोज देल। 22जब भोजयँ हेरोदियासक छाहिक् भितर आइकुन नाच्लि, तब राजा हेरोद र उक्र पहुनासब्के खुसि बानालि। हसे राजाइ उसे छउडिके कहिकेभइल, “तोइ मेह्रासे जिति माङ्तस, मोइ तेह्राके देतम।” 23राजा हेरोदेइ किरिया खइतिन फेरि कहल, “आधा राज्जे माङ्ने पुनु मोइ तेह्राके देतम।”
24उहइगुनेइ उसे छउडि बाहार जाइकुन उइयाके पुछ्लि, “मोइ किति माङ्गिके?”
उक्र उइयाइ कहलि, “बप्तिस्मा देलाहार युहन्नाक मुड।”
25हसे ओख्निहिँ उसे छउडि दुघ्रते भितर जाइकुन राजासाङ यस्के कइकुन माङ्लि, “मोइ इच्छा कर्तम कि, तोहे यख्निहिँ बप्तिस्मा देलाहार युहन्नाक मुड थरेयँ राखिकुन मेह्राके देओ।”
26ओस्न कहलपाछु राजा धेरइ दुखि भइल, तर उहाइ आफ्नि खइल किरिया र भोजयँ अइल पहुनासब्क लागि भइने पुनु उसे छउडिके देल बचन तोडिके नइजेसक्ल। 27उहइगुनेइ राजाइ ओख्निहिँ सिपाहिके पाठाइकुन युहन्नाक मुड काटिकुन आनिके आदेस देल, उसे झेलखानायँ जाइकुन युहन्नाक मुड काट्ल, 28र उक्र मुडके थरेयँ राखिकुन छउडिके देल, हसे उसे छउडि चाहिँ आफ्निक उइयाके लेजिकुन देलि। 29जब युहन्नाक चेलासबेइ उख्राके झेलखानायँ मार्ल कुरा सुन्ल, तब उसब आइकुन युहन्नाक लासके लेजिकुन चिहानयँ गाडिदेल।
येसुइ पाँच हजार मानुसके खावाइकेभइल
(मति १४:१३-२१; लुका ९:१०-१७; युहन्ना ६:१-१४)
30येसुक बाह्र जेना प्रेरितसब फर्किकुन ओनेन्कलघि जम्मा भइल, हसे उसबेइ कर्ल काम र मानुससब्के सिखाल कुरासब ओनेन्के सुनाल। 31हसे येसुइ चेलासब्के कहिकेभइल, “आओ हामे सुनसान ठाउयँ जाहुँ र एकछिन थाकाइ मारउ।” किकेकने उछिका धेरइ मानुससब अइलाहार जइलाहार करिराख्ल गुनेइ चेलासब्के खाइके पुनु फुर्सद नइजे रहइ। 32उहइगुनेइ ओनेन्सब डोङायँ चढिकुन सुनसान ठाउयँ जइल।
33तर ओनेन्सब्के धेरइ मानुससबेइ जाइराखिकेभइल देखिकुन उसबेइ चिन्ल, हसे सभइ बजारकमाटे ओनेन्सब दुघ्रतिन ओनेन्सबकते आघु उसे ठाउयँ पुग्ल। 34जब येसु डोङासे छेओ उत्रिकेभइल, तब ओनेनेइ मानुससब्क बड्क भिड देखिके भइल। उसे देखिकुन ओनेन् दयाइ भरिके भइल, किकेकने ओनेन्सब चरुहा नइजेभइल भेडासब जस्नइ रहत। हसे ओनेनेइ उसब्के धेरइ कुरा सिखाइके थालिकेभइल। 35हसे रात पोरिलाल देखिकुन चेलासबेइ आइकुन येसुके कहल, “आबे त ब्यार भइसक्ल, इसे सुनसान ठाउ बाटइ, 36उहइगुनेइ इसब्के बिदा देओ, ताकि इसब छेउछाउक गाउयँ जाइकुन केहाउ खइलाहार कुरा किनिकुन खाउस्।”
37हसे येसुइ चेलासब्के कहिकेभइल, “तोहेसब नइ इसब्के केहाउ खाइके देओ।”
तर चेलासबेइ ओनेन्के कहल, “किति हामे इसब्के चान्दिक दुइ सय सिक्काक रोटि किनिकुन खाइके देइके र?”
38हसे ओनेनेइ चेलासब्के कहिकेभइल, “तेउह्रासब्से कत्का रोटि बाटइ? जाइकुन चाहउ।”
उसबेइ पत्ता लागाइकुन कहल, “पाँचोटा रोटि र दुक्टा माछ।”
39उपाछु ओनेनेइ मानुससब्के हरिय जमारयँ हार लागाइकुन बोसिके आग्या करिकेभइल। 40उहइगुनेइ उसब कोलोउ समुहयँ सय जेना त कोलोउ समुहयँ पचास जेनाक हार लागाइकुन बोस्ल। 41हसे येसुइ पाँचोटा रोटि र दुक्टा माछ लेइकुन सोर्गपटि चाहिकुन धन्यबाद देइकेभइल। उपाछु उसे रोटिसब टुक्रेइकुन मानुससब्के बाटिके चेलासब्के कहिकेभइल र दुक्टा माछके पुनु टुक्रा-टुक्रा पारिकुन बाटिके लागाइके भइल। 42हसे सभइ जेना खाइकुन आघाल। 43उपाछु चेलासबेइ रोटि र माछक उब्रल टुक्रासब बोटेतेखना बाह्र ढकिया उठाल। 44उछिका रोटि खइलाहार बेटा मानुससब मत्रइ पाँच हजार जेना रहत।
येसु पानिउप्र हिठिकेभइल
(मति १४:२२-३३; युहन्ना ६:१५-२१)
45उपाछु येसुइ ओख्निहिँ आफ्नेन्क चेलासब्के डोङायँ चढिकुन ताल ओपारक बेथसेदा सहरयँ आफ्नेन्कते आघु जाइके आह्राइके भइल, र आफ्नेन् चाहिँ उसे भिडसब्के बिदा करिके उछिन् बोसिकेभइल। 46उसब्के बिदा करिसक्लपाछु, ओनेन् चाहिँ पार्थाना करिके डाँडायँ जाइकेभइल। 47हसे रात पोर्ल बेलाके ओनेन् अस्करि पाखाहिँ रहत कने, डोङाचाहिँ तालक माझयँ रहइ। 48उछिका बातास उल्टा चल्लगुनेइ येसुइ चेलासब्के आपतयँ पोर्ल देखिकेभइल, हसे बेहेनक तिन चार बजेपटि आन्धारघुसिहिँ ओनेन् तालयँ हिठ्ते आइकेभइल, र उसब्के जितिकुन जाइके लाग्तेखना, 49ओनेन्के तालउप्र हिठिराख्ल देखिकुन उसबेइ, “भुत अइल!” कहतिन् चिच्चेल। 50किकेकने ओनेन्के देखिकुन उसब सभइ जेना बेस्के डारालगुनेइ ओख्निहिँ ओनेनेइ कहिकेभइल, “आँट करउ, मोइ हखम, झुनडाराओ!”
51हसे ओनेन् जाइकुन डोङायँ चढिकेभइल र बातास पुनु रोकिहाल्ल, उसे देखिकुन चेलासब छक्कइ पोर्ल। 52येसुइ पाँच हजार जेनाके रोटि खावाल पुनु उसबेइ उक्र अर्थ नइजे बुझ्ल रहत, किकेकने उसब्क मन कठोर रहइ।
गनेसरेतयँ मन्देलसब निक भइल
(मति १४:३४-३६)
53जब ओनेन्सब ताल तरिकुन गनेसरेत कलाहार ठाउयँ पुगिकेभइल, तब डोङाके पाखा लागाल। 54हसे ओनेन्सब डोङासे निस्कल बिथिकइ, मानुससबेइ येसुके चिनिहाल्ल। 55उहइगुनेइ उसब चारिओर दुघ्रते जाइकुन येसु आइकेभइल खबर देल। हसे मानुससबेइ मन्देलसब्के ठावाँसाहिन बोकिकुन येसुकलघि आनिके थाल्ल। 56हसे येसु जोनो-जोनो गाउ, बजार र बस्तियँ जाइकेभइल, उछिक मानुससबेइ बोकिकुन आन्ल मन्देलसब्के, ओनेन्क लुगाक फुर्का मत्रइ छिइके देओ कइकुन बिन्ति चाढाल, हसे जत्का जेनाइ ओनेन्के छिउल उसब निक भइल।
Currently Selected:
मर्कुस 6: DRY
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
