लुका 6
6
नात्लिक-दिनक बारेयँ प्रस्न
(मति १२:१-८; मर्कुस २:२३-२८)
1नात्लिक-दिनयँ#६:१नात्लिक-दिनयँ काम नइजे कर्लाहार दिन येसु गहुँबालि भइल पायडकमाटे जइतेरहत। ओनेन्क चेलासबेइ गहुँक बाला टोर्ते, हाथेइ माडिकुन खाइके थाल्ल।#बेब २३:२५ 2इसे देखिकुन चेलासब्के फरिसिसबमद्ध्ये कोलोउ-कोलोउयेइ कहल, “नात्लिक-दिनयँ परमप्रभुक कानुनयँ काम करिके नाभओइ कते पुनु तोहेसब किति करिके कर्ताहाउ?”
3येसुइ उसब्के कहिकेभइल, “किति तोहेसब नइजे पढ्ल, जोख्नि दाउद राजा हसे उक्रसाङ भइल मानुससब भुखाल बेलाके उहाइ किति कर्ल रहइ? 4#१ समु २१:१-६#लेबि २४:९परमेसोरक मन्दिरभितर पसिकुन, दाउदेइ परमेसोरके चाढाल रोटि खइल र आफ्नसाङ भइल मानुससब्के पुनु खाइके देल, जोख्निके मोसाक कानुन#६:४ मोसाक कानुन परमेसोरेइ मोसाके देइकेभइल कानुन। नेपालि बाइबलयँ उख्राके “ब्यबस्था” पुनु कताहिँ। अनुसार पुजेहेरि बाहेक अरुइ उसे रोटि खाइके नइजे भइते रहइ।”
5हसे येसुइ कुरा टुङगेइकुन कहिकेभइल, “मोइ मानुसक छावा नात्लिक-दिनक प्रभु हखम।”
हात सुखाल मानुस निक भइल
(मति १२:९-१४; मर्कुस ३:१-६)
6फेरि अर्क नात्लिक-दिन येसुइ सभाघरयँ जाइकुन अर्ति देतेरहत। उछिका एक जेना दाइने हाथ सुखाल मानुस पुनु रहइ। 7येसुके धर्मगुरुइ र फरिसिसबेइ कस्के दोस लागाइके कइकुन खोज्ते रहत, उहइगुनेइ येसुइ हात सुखाल मानुसके नात्लिक-दिनयँ निक पार्ताहात् कि कइकुन उसबेइ ढुकिराख्ते रहत। 8येसुइ उसब्क मनक कुरा थाहा पाइकुन हाथ सुखाल मानुसके कहिकेभइल, “तोइ इछि आइकुन ठोडेउक!” तुरुन्तइ उसे मानुस येसुकलघि ठोडेल। 9येसुइ उसब्के कहिकेभइल, “आबे कओसब, मोसाक कानुनेइ नात्लिक-दिनयँ किति कर्ने ठिक हखइ कहित? राम्र करिके कि निजराम्र करिके? परान बाचाइके कि मारिके कोनचाहिँ ठिक भइत?” 10हसे ओनेनेइ चारइपटि उसब्के चाइकुन उसे मानुसके कहिकेभइल, “तेर हाथ पस्राउक!” उहाइ ओसिन कर्ल, र उक्र हात निक भइहाल्ल।
11इसे देखिकुन उसब रिसेइ चुर भइकुन येसुके किति करिकेपोरित कइकुन एक-अर्कसे सल्लाहा करिके थाल्ल।
येसुइ बाह्र जेना चेला छानिकेभइल
(मति १०:१-४; मर्कुस ३:१३-२९)
12येसु एक दिन पाहाडयँ जाइकुन रातइभरि परमेसोरसाङ पार्थाना करिकेभइल। 13ओनेनेइ बेहेन भइलपाछु आफ्नेन्क चेलासब्के बोलाइकेभइल र उछिका भइल धेरइ जेनाकमाटे बाह्र जेनाके छानिकुन उसब्के प्रेरित कइकुन नाउ देइकेभइल। 14सिमोन (जोख्राके येसुइ पत्रुस नाउ राख्देइकेभइल), सिमोनक भाइक अन्द्रियास, याकुब, युहन्ना, फिलिप, बारथोलोमाइ, 15मति, थोमा, अल्फयसक छाहोक् याकुब, देसके माया कर्लाहार सिमोन। 16र याकुबक छाहोक् यहुदा हसे यहुदा इस्करियोत, जोनेइ पाछुजाइकुन येसुके धोका देल।
येसुइ धेरइ मानुससब्के निक पारिकेभइल
(मति ४:२३-२५)
17येसु मुख्या चेलासबसाङ डाँडासे तर झरिकुन ओनेन्सब चउरयँ ठोडेइकेभइल। उछिका धेरइ चेला र अरु मानुससब्क पुनु बड्क भिड लाग्ल रहइ। उसब यहुदियासे, यरुसलेमसे, समुद्र छेओ भइल टुरोस र सिदोन सहरसे गनिकेनइ निजसक्लार मानुससब जम्मा भइल रहत। 18ओनेन्क अर्ति सुनिके र आ-आफ्न रोगसे निक भइके लागि उसब अइल रहत। उछिका भुत लागिकुन दुख पाउल मानुससब पुनु निक भइल। 19उछिका ओनेन्के मानुसक भिडेइ छिइके खोज्ल किकेकने ओनेन्कमाटे निस्कल सक्तिइ सभइ जेनाके निक पार्तेरहइ।
येसुइ अर्ति देइकेभइल
(मति ५:१-१२)
20येसुइ आफ्न चेलासब्के चाइकुन कहिकेभइल,
“ए गरिबसब! तोहेसब धेरइ आसिक पाउलाहार हखउ
किकेकने परमेसोरक राज्जे तेउह्रसब्कइ हखइ।
21ए भुख्लसब!
तोहेसब आसिक पाउलारसब।
किकेकने तोहेसब आघाताहाउ। ए रोउलाहारसब!
तोहेसब आसिक पाउलारसब किकेकने तोहेसब होस्लाहार भइताहाउ।
22“तोहेसब आसिक पाउताहाउ, जब मोइ मानुसक छावाके बिस्वास कर्ल गुनेइ तेउह्रासब्के मानुससबेइ हेला कर्ने, समाजसे निस्काइदेने, गिल्ला कर्ने र निजराम्र सोचिकुन तेउह्रसब्क बदनाम कर्नेपार,#१ पत्रु ४:१४ 23उसे बेलायँ खुसि भइकुन नाच्तिन रामाओसब किकेकने तेउह्रसब्क लागि सोर्गयँ बड्क इनाम राख्ल बाटइ। आघुहिँक अगमबक्तासब्के पुनु तेउह्रासब्के सातालारक पुर्खासबेइ ओसिनकरिकुन साताल रहइ।”#२ इति ३६:१६; प्रे ७:५२
24“तर धिक्कार बाटइ, जोनो यख्नि धनि बाटसब!
किकेकने तोहेसब सुखक जिबन बिताइसक्ल
25तेउह्रासब्के धिकार बाटइ जोनो यख्नि आघाल बाटसब!
किकेकने तोहेसब भुख्लइ भइताहाउ।
हसे तेउह्रासब्के धिक्कार, यख्निके होस्लाहारसब,
तोहेसब दुख पाइकुन रोउताहाउ।
26“तेउह्रासब्के धिक्कार, यख्नि मानुसक प्रसम्सा पाउलारसब किकेकने यस्न प्रसम्सा त उसब्क पुर्खासबेइ फटाहा अगमबक्तासब्के पुनु देल रहइ।
सत्रुसब्के पुनु माया करिकेपोरित
(मति ५:३८-४८; ७:१२)
27“तर मेर अर्ति सुन्लारके मोइ इसे कुरा कहतम्, सत्रुसब्के पुनु माया करुक् हसे हेला कर्लारके चाहिँ राम्र बेभार करुक्। 28सराप्लाहारके आसिक देउक्, जोनेइ तेउह्रासब्के नइजेराम्र कर्ताहात् उसब्क लागि पार्थाना करुक्। 29जोनेइ तेह्राके एक्टा गालुयँ चड्काइत, उक्र आघु अर्क गालु पुनु थापिसाइ; तेर कोट लुटिकुन लेजिके खोज्लारके दउरा पुनु लेजिके देउक्। 30तेरासे माग्लारके देउक्, लुटिकुन लेज्लारसे फिर्ता झुन् माङुक्। 31हसे तेउह्रासब्के अरु मानुसेइ जिति कर्ल चाहाताउ, तोहेसब पुनु ओसिन करुक्।#मति ७:१२
32“माया कर्लारके मत्रइ माया कर्ताहाउ कने, तोहेसब बड्क काम कर्ल भइत र? यस्न काम त पापिसबेइ पुनु कर्ताहात्। 33यदि राम्र कर्लारके मत्रइ तोहेसब राम्र कर्ताहाउ कने, तोहेसब बड्क काम कर्ल भइत र? ओस्न त पापिसबेइ पुनु करिहालित नि! 34हसे तिरिके सक्लारके मत्रइ तोहेसब रिन देताहाउ कने तोहेसब किति बड्क काम कर्ल भइत? ओस्न त पापिसबेइ पुनु, तिरिके सक्लाहार पापिके रिन देइत! 35तर आफ्न सत्रुके माया करुक्; उसब्के राम्र करुक्। फिर्ता पाउलाहार आस नराखिकुन उसब्के रिन दिउक, हसे तोहेसब बड्क इनाम पाउताहाउ, र परमेसोरक सन्तान भइताहाउ, किकेकने परमेसोरेइ बइगुनि र दुख देलारके पुनु माया कर्ताहात्। 36तेउह्रसब्क परमेसोर बुबा जस्न दयालु बाटत ओस्नइ दयालु भओसब।
अरुके दोस नालागाइके
(मति ७:१-५)
37“अरुक गल्ति नाइखोजिके, परमेसोरेइ पुनु तेउह्रसब्क गल्ति नाखोजत; अरुके दोस नालागाइके, हसे परमेसोरेइ पुनु तेउह्रासब्के दोस नालागाओत; तोहेसब अरुके माफ देनेपार परमेसोरेइ पुनु तेउह्रासब्के माफ देताहात्। 38अरुके देओ, परमेसोरेइ पुनु तेउह्रासब्के देताहात्। ओनेनेइ खाधि-खाधि झुसि बानाइकुन, धेरइ देताहात्। जन नापेइ तोहेसब अरुके देताहाउ, उहइ नापेइ तेउह्रासब्के पुनु देताहात्।”#मति ७:२; मर्कु ४:२४
39हसे येसुइ उसब्के एक्टा काथा कहिकेभइल, “कि आँखि निजदेख्लाहार मानुसेइ अर्क आँखि निदेख्लाहार मानुसके डोरेइके सकित र? यदि डोरेइ हाल्नेपार दुहइ जेना खाल्टायँ पर्तात्।#मति १५:१४ 40कइह्याउ पुनु चेला आफ्न गुरुकते बड्क नाभओइ, तर पुरइ सिख्नेपार गुरुजस्नइ भइत।#मति १०:२४-२५; युह १३:१६; १५:२०
41“भाइक आँखिक घुर देख्लारइ आफ्न आँखिक मोढा किति करिके नादेखस? 42आफ्न आँखिक मोढा निजदेख्लारइ कस्के आफ्न दाजुभाइके कहिके सक्तस? ‘खइ-खइ तेर आँखिक घुर निस्काइ देतम।’ ए झुक्केलार मानुस! पइला आफ्न आँखिक मोढा निस्काउक, हसे बल्ल अरुक आँखिक घुर निस्काइके छर्लङगइ देखिके सक्तस।
रुख र उक्र फोर
(मति ७:१६-२०; १२:३३-३५)
43“सप्रल रुखयँ निजराम्र फोर नाफोरइ न त निजसप्रल रुखयँ राम्र फोर फोरिके सकित। 44सभइ रुख उक्र फोरसे चिन्ताहि। काटोक झाङसे नेभारा नाटोरिहि न त उछिसे अङ्गुर नइ बोटेताहि।#मति १२:३३ 45राम्र बानिबेहोरक मानुसेइ आफ्न मनक राम्र कुरा नइ निस्काइत; तर निजराम्र मानुसेइ चाहिँ आफ्न मनयँ भइल निजराम्र कुरा नइ निस्काइत किकेकने उक्र मनयँ जे कुरा बाटइ उहइ नइ बोराइत।#मति १२:३४
दुइ खालक जग
(मति ७:२४-२७)
46“यदि मोइ कहल कुरा नामानउ कने, तोहेसब मेराके किति करिके ‘प्रभु, प्रभु’ कताहाउ? 47मोइ तेउह्रासब्के कतेबाटम, मेरलघि आइकुन मेर कुरा सुन्लार, हसे मोइ कहल मान्लाहार मानुस कस्न भइत। 48उसे घर बानालाहार मानुस जस्नइ भइत, जोनेइ गइह्र जग खनिकुन आफ्न घर पाथर उप्र बानाइत। बेस्के पानि पोरिकुन बाढि अइल हसे घरयँ ठोकिल तर पुनु घर नइजे भत्कल, किकेकने घरक जग बलिय रहइ। 49तर जोनेइ मेर कुरा सुनिकुन निजमान्लार चाहिँ जग नघालिकुन घर बानालाहार मानुस जस्नइ भइत; बाढि अइतेखना उक्र घरयँ ठोकिल र घर भत्कल।”
Currently Selected:
लुका 6: DRY
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
