प्रेरित 2
2
पेन्तिकोस पाब्नियँ पबित्र आत्मा आइकेभइल
1जब पेन्तिकोसक दिन अइल, तब प्रभु येसुके बिस्वास कर्लाहार सभइ मानुससब एकइ ठाउयँ जम्मा भइल रहत। 2उछिका अन्चक्लइ सोर्गकमाटे बड्क हुरि बातास जस्नइ एक्टा आबाज अइल र उसब बोस्ल घर पुरइ घन्किल। 3हसे उसब्कलघि आगिक जिभि जस्नइ लप्कासब देखार पोर्ल। उपाछु भाग-भाग भइकुन सभइ मानुसउप्र बोस्ल। 4सभइ जेना पबित्र आत्माइ भरिकुन, पबित्र आत्माइ देइकेभइल सक्ति अनुसार उसबेइ अरु भासायँ बोराइके लाग्ल। 5उसे बेला सोर्गहेठ भइल सभइ देसकमाटे परमेसोरक भक्त यहुदिसब यरुसलेमयँ अइल रहत। 6जब उसबेइ बड्क आबाज सुन्ल, तब मानुससब्क भिड जम्मा भइल। हसे बिस्वासिसबेइ बोराल कुरासब उछिका जम्मा भइल यहुदिसबेइ आ-आफ्न भासायँ सुनिकुन छक्कइ पोर्ल। 7उसब छक्कइ पोरिकुन कहिके लाग्ल, “किति इसे बोरालाहार मानुससब गालिलि नइजे से? 8तर कस्के इसबेइ बोराल कुरा हाम्र आ-आफ्न भासायँ हामे सुन्ते बाटिहिँ? 9हामे त पार्थि, मादि, एलामि, मेसापोटामिया, यहुदिया, कापाडोकिया, पोन्टस र एसियाक बासिन्दा हखिहिँ। 10हसे फ्रिगिया, पामफिलिया, मिस्र, कुरेनियँ पोर्लाहार लिबियाक ठाउसब, रोमकमाटे अइल यहुदि र यहुदि धर्म मान्लाहार अरु जातसब, 11क्रेट टप्पु र अरब देसकमाटे यहुदि र यहुदि धर्म मान्लाहार मानुससब अइल बाटिहिँ। उसबेइ त परमेसोरक बड्क कामक बारेयँ चर्चा करिराख्ल हाम्रइ भासायँ सुन्ते बाटिहिँ।” 12उसब छक्कइ पोर्ल, हसे अलमलइ भइकुन एक-अर्कसाङ “इक्र अर्थ किति हखइ?” कइकुन पुछिके लाग्ल। 13तर कत्का जेनाइ त खिसि कर्तिन कहल, “उसब त कलिल अङ्गुरक मोद खाइकुन मात्ल बाटत काहाँ!”
पत्रुसक प्रचार
14तर पत्रुसेइ एघार जेना प्रेरितसबसाङ ठोडेइकुन बड्क सोरेइ उसब्के कहल, “हे यहुदि र यरुसलेमयँ बोस्लाहार जम्मइ बासिन्दासब, मेर कुरा सुनउ, इछिका किति भइल रहइ मोइ सभइ कहतम्। 15तोहेसब सोच्ल जस्नइ इसब नइजे मात्ल बाटत, किकेकने एख्नि बेहेनक नउ मत्रइ बज्ल बाटइ। 16तर इसे त योएल अगमबक्ताकमाटे बोराल बचन हखइ,
17“‘परमेसोरेइ अन्तक दिनयँ यस्न भइत कहिकेभइल बाटत,
मोइ सभइ मानुसउप्र मेर आत्मा खनेतम,
हसे तेउह्रसब्क छावासबेइ अगमबानि बोराताहात्,
र तन्धेरिसबेइ दर्सन देख्ताहात् कने,
बुढोपाकोइ चाहिँ सपना देख्ताहात्।
18हँ, उसे दिनयँ मोइ आफ्न नोकर र नोकरनिउप्र मेर आत्मा खनेतम,
हसे उसबेइ अगमबानि बोराताहात्।
19मोइ आकासउप्र अचम्मक काम,
हसे हेठ पिर्थिबियँ अचम्मक चिनासब देखातम,
उछिका रकत, आगि र धुवाँक बाद्रि देखार पोरित।
20हसे परमप्रभुक माहान र राम्र दिन आइकेकते आघु,
घामेइ उजुङ देइके छाडित र धवरचाहिँ रकतयँ परिबर्तन भइत।
21र परमप्रभुक नाउ जोनेइ लेइत, उहाइ मुक्ति पाइत।’”
22“हे इस्राएलक मानुससब, मेर कुरा सुनउ, नासरतक येसुके त राम्र र सक्तिसालि काम हसे अचम्मक चिनाकमाटे तेउह्रसब्क आघु परमेसोर आफ्नेन् नइ पाठाइकेभइल हखत कइकुन पर्मानित करिकेभइल। तेउह्रासब्के थाहा नइ बाटइ कि, तेउह्रसब्क माझयँ इसे कामसब ओनेन्कमाटे करिकेभइल हखइ। 23परमेसोरेइ आघुहिँसे तयार पार्ल आफ्न योजना र ग्यान अनुसार तेउह्रसब्क हाथयँ उहइ येसुके देइकेभइल, हसे तोहेसब ओनेन्के दुस्ट मानुससब्क हाथयँ सोपिकुन क्रुसयँ मारिके समेत लागाइकेभइल। 24तर परमेसोरेइ ओनेन्के मिर्तुकमाटे छुट्कारा देइकुन जिउत पारिकेभइल, किकेकने ओनेन्के मिर्तुइ पुनु रोकिके नइजेसक्ल। 25राजा दाउदेइ पुनु ओनेन्क बारेयँ यस्के कहल रहइ,
“‘मोइ परमप्रभुके सद्देहुन मेर आघु देख्तम,
किकेकने मोइ डग्मगाइके झुन् पोरुस कइकुन ओनेन् मेर दाइनेपटि बाटत।
26उहइगुनेइ मेर मन रामाइत,
र मेर जिभिइ खुसिक गित गिदाइत,
मेर देहि मोर्ने पुनु मोइ फेरि बाच्तम कलाहार आसयँ जिउतम।
27किकेकने तोहे मेह्राके पातालयँ नाछाडउ,
न त तोहे आफ्न पबित्रजनक देहिके कुहिके देताहाउ।
28तोहे मेह्राके जिबनक पइडा देखाल बाटउ,
तेउह्र उपस्थितियँ मेर मन खुसिइ रामाइत।’”
29“हे मेर दाजुभाइसब, हाम्र पुर्खा दाउदक बारेयँ मोइ तेउह्राके ढुक्कसे कहिके सक्तम। उसे मोर्ल र मानुससबेइ गाड्ल, आजुक दिनसमन उक्र चिहान हाम्रसाङ बाटइ। 30तर दाउद अगमबक्ता रहइ हसे उक्र आफ्नइ सन्तानकमाटे उसे जस्नइ राजा बानातम कइकुन परमेसोरेइ किरिया खाइकेभइल उख्राके थाहा रहइ। 31दाउदेइ पाछु भइलाहार कुरा आघुहिँ नइ देख्लगुनेइ येसु ख्रिस्ट मोर्लकमाटे जिइकेभइल बारेयँ यस्के कहल रहइ, ‘ओनेन् न पातालयँ छाडिल, न त ओनेन्क देहि नइ कुहुल।’ 32उहइ येसुके परमेसोरेइ जिउत बानाइकेभइल, जोनो कुराक साछि हामे सभइ जेना बाटिहिँ। 33उहइगुनेइ परमेसोरेइ येसुके उच्च पारिकुन आफ्न दाइनेपटि राखिके भइल र ओनेनेइ बुबाकमाटे पबित्र आत्माक प्रतिग्या पाइकुन यख्नि हाम्राके खनेल हखत, जोनो कुरा तोहेसब आफइ देख्तिन र सुन्तिन बाटउ। 34दाउद राजा देहिसुन्धाइ सोर्गयँ नइजेजइल भइने पुनु, उहाइ यस्के कहल बाटइ,
“‘परमप्रभुइ मेर प्रभुके कहिकेभइल,
तोइ मेर दाइने हाथपटि बोसुक्,
35जबसमन मोइ तेर सभइ सत्तुरसब्के तेर पइतलाहेठ नापुरेम।’”
36“उहइगुनेइ इस्राएलक सभइ घरानसबेइ इसे कुरा पक्का हखइ कइकुन बुझिके पोरित कि, तोहेसबेइ क्रुसयँ टाँगिकुन मार्ल उहइ येसुके परमेसोरेइ प्रभु र ख्रिस्ट दुहइ बानाइकेभइल बाटत।”
37इसे कुरा सुनिकुन उसब्क मन छियाछिया भइल। हसे उसबेइ पत्रुस र अरु सभइ प्रेरितसब्के पुछ्ल, “हे दाजुभाइसब, आबे हामे किति करिके सक्ताहिँ त?”
38पत्रुसेइ उसब्के कहल, “छेमा पाइके लागि तोहेसब आ-आफ्न पाप छाडिकुन परमेसोरपटि फर्कउ। र येसु ख्रिस्टक नाउयँ बप्तिस्मा लेओ, हसे तोहेसब पबित्र आत्माक बरदान पाउताहाउ। 39किकेकने इसे प्रतिग्या तोहे र तेउह्र सन्तानसब्क लागि हसे टाढो-टाढो भइल सभइक लागि हखइ, जोख्राके परमप्रभु परमेसोरेइ बोलाताहात्।”
40पत्रुसेइ अरु धेरइ कुरा कइकुन उसब्के गवाहि र अर्ति देल, “इसे दुस्ट पुस्ताक मानुससबेइ पाउलाहार दन्डकमाटे तोहेसब आफइके बाचाओ।” 41हसे जोनेइ-जोनेइ पत्रुसेइ बोराल परमेसोरक बचनके सुइकार्ल, उसबेइ बप्तिस्मा पुनु लेल। उहइ दिन तिन हजार जत्का मानुससब थपिल। 42उपाछु उसब प्रेरितसाङ सिछ्या सिखिके, सङ्गति बोसिके, प्रभु-भोज खाइके र पार्थाना करिके सद्देहुन लागिरहल।
बिस्वासिसब्क सङ्गति
43जब सभइ मानुससबेइ परमेसोरके मानमन्ता कर्ल, तब प्रेरितसबेइ धेरइ चिनासब र अचम्मक कामसब करिके थाल्ल। 44प्रभुके बिस्वास कर्लाहार सभइ मानुससब एकइ ठाउयँ भेला भइतेरहत र उसब्क सभइ थोक साझे रहइ। 45उसबेइ आफ्न जग्घा-जिमिन र सर-सामान बेचिकुन अइल पइसा खाँच पोर्ल सभइ मानुससब्के बाड्तेरहत। 46एकइ मनक भइकुन उसब दिन-दिनइ मन्दिरयँ जम्मा भइतेरहत, हसे रामातिन एक-अर्कसे मिलिकुन राम्र मनसे घर-घरयँ प्रभु-भोज खइतेरहत्, 47र उसब सद्देहुन परमेसोरक प्रसम्सा कर्तेरहत, अरु मानुससबेइ पुनु उसब्के राम्र ठान्तेरहत्। हसे मुक्ति पाउलाहार मानुससब्क सङ्ख्या प्रभुइ दिन-दिनइ बाढाइकेभइल।
Currently Selected:
प्रेरित 2: DRY
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
