मर्कुस 14
14
येसुके मारे दाउ खोज्लो
(मति २६:१-५; लुका २२:१-२)
1छुटकाराको चाड र अखमिरि रोटिको चाड आए दुइ दिन बाकि रहिक्। मुख्य पुजारिहान र धर्म गुरुहान्इ येसुके कस्के झुक्याइकनि छोपि मार्हुँ कलार दाउमा रहाइ। 2तर उनहान्इ कलो रहाइ, “चाडको बेलामा नाहो, नत्र मानिसहान्मा हुलदङ्गा मच्चेबि।”
एउटा बेटिइ येसुको कपारमा सेन्ट खन्यालो
(मति २६:६-१३; युहन्ना १२:१-८)
3ओइबेरामा येसु बेथानिया गाउँमा सिमोन नाउँ होख्लो एक जना कुस्टरोगिको घरमा जाइक्। उथि ओइ खाए बिस्तेखेरि एउटा बेटि सुद्द जटामसिको महङ्गो सेन्ट सिङमरमरको सिसिमा लिहिकनि आइक, र फुटाइकनि मिठो गन्धाइलार जटामसिको सेन्ट ओख्रो कपारमा खन्याइदिहिक।#लुका ७:३७-३८ 4इ देखिकनि उथि होख्लो कुनुहुँ कुनुहुँ रिसाइकनि एक आर्कोके कहे लाग्वाइ, “यस्नो महङ्गो मिठो गन्धाइलार सेन्ट क्यारे ओसिहि खेर हुर्यालो? 5बरु इ सेन्ट तिन सय चाँदिको सिक्का कते धेरेमा बेच्लो होख्नि उ पइसा गरिबहान्के देहे सक्हेलारिक।” अनि उनहान्इ उ बेटिके हप्कावाइ।
6तर येसुइ उनहान्के कहिक्, “ओख्राइ छाड्देहो, क्यारे ताहान ओख्राइ सताताओ? एइ त मोरो लागि जारे नाम्रो धन्दा गर्लाटि। 7क्यारेकनिसिन गरिबहान त ताहान्सिन सधइ रतात् र इच्छा लाग्लो समयमा ताहान उनहान्को भलाइ गरे सक्ताओ। तर मइ त ताहान्सिन सधइ नारतिन।#ब्यवस्था १५:११ 8इ बेटिइ ज्या गरे सक्ताइ ओइ गर्लाटि। एइ मोरो जिउ गड्काए कते आघु ज मिठो गन्धाइलार सेन्ट लगाइकनि तयार पार्लाटि। 9साच्चि, मइ ताहान्के कतिन, सन्सारभरि जाहाँ जाहाँ इ नाम्रो खबर पर्चार गरेताइ, ओइथि पनि एइ बेटिइ ज्या गर्लाटि एख्रो सम्झनामा इ धन्दाको चर्चा गरेताइ।”
येसुके छोपाइदेहे दाउ खोज्लो
(मति २६:१४-१६; लुका २२:३-६)
10तब बार चेलाहानमध्ये एक जना यहुदा इस्करियोत कलारइ येसुके मुख्य पुजारिहान्ठुँ छोपाइदेहेके लागि उनहान्ठुँ जाइक्। 11ओख्रो कुरा सुनिकनि उनहान खुसि होख्वाइ, र पइसा देहे कबुल गर्वाइ। अनि ओइ येसुके कस्के छोपाइदेहे कहि नाम्रो समयको दाउ खोजे लागिक।
चेलाहान्सिन येसुको अन्तिम भोज
(मति २६:१७-३०; लुका २२:७-२३)
12अखमिरि रोटिको चाडको सुरुको दिन आउलो रहिक्। ओइदिनमा यहुदि जातको मानिसहान्इ छुटकाराको चाडमा भेडाको पाठा बलि चढातराइ। येसुको चेलाहान आइकनि ओख्राइ सुध्यावाइ, “तोरो इच्छा क्या बाटि? हामि काहाँ जाइकनि तोरो लागि छुटकारा चाडको भोज तयार गरे?”
13तब येसुइ आफ्नो चेलाहानमध्ये दुइ जनाके यस्के कहिकनि येरुसलेममा पठाइक्, “सहरमा जाओ, र गाग्रिमा पानि बोकिकनि जाइधार्लो एउटा मानिसइ ताहान्के भेट्ताइ। ओख्रो पाछु लाग्हेउ। 14र उ मानिस जुन घरमा पिस्ताइ, ओइ घरको मालिकके कहेउ, ‘गुरुइ कताइ, मइ आफ्नो चेलाहान्सिन छुटकाराको चाडको भोज खइतिन, उ पहुनाको कोठा काहाँ बाटि?’ 15अनि ओइ ताहान्के सजाइकनि तयार पार्लो उप्रो तल्लाको एउटा बड्को कोठा देखाताइ र ओइथि ताहान्इ हाम्रो लागि भोज तयार गर्हेउ।”
16तब चेलाहान गेहाइ, र सहरमा पिस्वाइ, अनि ओइ उनहान्के कलो जस्ने भेटावाइ र उनहान्इ छुटकाराको चाडको भोज तयार गर्वाइ।
17जब ब्यारो होखिक, तब येसु बारे जना चेलाहान्सिन ओइ घरमा आइक। 18भोज खइतिहिगर्ते येसुइ उनहान्के कहिक्, “साच्चि मइ ताहान्के कतिन, ताहानमध्यभि मइसिन खइलार एक जनाइ मर्हाइ धोखा देताइ।”#भजनसङग्रह ४१:९
19इ कुरा सुनिकनि उनहान दुखि होख्वाइ, अनि पल्हापल्हि गरि ओख्राइ सुध्याए लाग्वाइ, “क्या उ मइ हो?”
20ओइ उनहान्के कहिक्, “ताहान बार जना मध्यभि जुन्को मइसिन थरियामा रोटि डोबिधार्लाटि। 21क्यारेकनि मानिसको छउनाको बारेमा धर्मसास्त्रमा कलो जस्ने मोरे पर्ताइ, तर धिक्कार उ मानिसके जख्रोभि मइ मानिसको छउनाके धोखा देताइ। उ मानिसको त जर्मे नाहोख्लो होख्नि नाम्रो होख्लारिक।”
22उनहान खाइधार्लो बेरा येसुइ रोटि लिहिकनि परमेस्वरके धन्येबाद दिहिक् र रोटि टुक्राइकनि उनहान्के देतिहि कहिक्, “लेओ, इ मोरो जिउ हो।”
23ओख्रोपाछु ओइ बोट्को लिहिकनि धन्येबाद दिहिकनि उनहान्के दिहिक्, र उनहान सभइ जनाइ बोट्कोभि खावाइ। 24अनि येसुइ उनहान्के कहिक्, “इ त धेरे जनाइ मुक्ति पाउस् कहिकनि बगाहेलार मोरो रकत हो। परमेस्वरइ मानिसहान्सिन गर्लो नयाँ करारके एइ रकतइ काम लाग्लार बनाताइ।#प्रस्थान २४:८; यर्मिया ३१:३१-३४ 25साच्चि, मइ ताहान्के कतिन, परमेस्वरको राज्येमा उ नयाँ किसिमको अङ्गुरको जाँड नाखाउनज्यालसम्म मइ फेरि अङ्गुरको जाड नाखइतिन।”
26अनि एउटा भजन गित गाइकनि सभइ जना निस्किकनि जइतुन डाडापट्टि जावाइ।
पतरुसइ असुइकार गर्लार बारेमा
(मति २६:३१-३५; लुका २२:३१-३४; युहन्ना १३:३६-३८)
27येसुइ उनहान्के कहिक्, “ताहान सभइ जना पाछु हटिकनि जिताओ, क्यारेकनि धर्मसास्त्रमा यस्नो लेखेलाटि, ‘मइ चरुवाके मार्तिन, र भेडाहान इतेउते छित्रेतात्।’#जकरिया १३:७ 28तर मइ मर्लोभि जिउते होख्लोपाछु ताहानकते पहिलिहि गालिल इलाकामा जितिन।”#मति २८:१६
29पतरुसइ ओख्राइ कहिक्, “सभइ जनाइ छाड्ने पनि मइ चाहि तोर्हाइ नाछाड्तिन।”
30तब येसुइ पतरुसके कहिक्, “साच्चि, मइ तोर्हाइ कतिन, आज राति भाल्या दुइ पल्ट चिच्याए कते आघु तइ मर्हाइ चिने नाचिन्तिन कहिकनि तिन चोटि असुइकार गर्तेर।”
31तर पतरुसइ झन जोस्सिकनि कहिक्, “तइसिन मरे पर्नि पनि मइ तोर्हाइ कन्हुँ पनि असुइकार नागर्तिन।”
अनि अरु चेलाहान्इ पनि ओस्ने कहाइ।
गेतसमनि ठउँमा येसुको पर्थना
(मति २६:३६-४६; लुका २२:३९-४६)
32ओख्रोपाछु उनहान गेतसमनि नाउँ होख्लो ठउँमा गेहाइ, र ओइ आफ्नो चेलाहान्के कहिक्, “मइ पर्थना गरुनज्याल सम्म ताहान एइथि बिस्हेउ।” 33तब ओइ पतरुस, याकुब र युहन्नाके साङ्हे लेगिक्, र येसु बेस्के दुखि र खिन्न होखे लागिक। 34ओइ उनहान्के कहिक्, “मोरो मन बेस्के दुखि होख्लाटि कि मर्बिन जस्ने होख्लाटि। ताहान एइथि बिसो र जाग्गे रहेउ।”
35अनि आलि दुसि जाइकनि येसु भुइमा घुडा टेकि “होखे सक्ताइकनि आए लाग्लो दुखको समय मइभि हटोस्” कहिकनि पर्थना गरिक्। 36ओइ कहिक्, “ए बुबइ, बुबा, तोरो लागि सभइ कुरा सम्भब बाटि। इ दुखको बोट्को मइभि हटाइदे। तर मोरो इच्छा जस्ने नाहो, तोरो इच्छा जस्ने होखुस्।”
37अनि येसु फर्किकनि आउते चेलाहान्के निदाइधार्लो भेटिक। ओइ पतरुसके कहिक्, “सिमोन, क्या तइ निदाइधार्लाटेर? क्या तइ एक घन्टा पनि जाग्गे बिसे नासेकर? 38जाग्गे रहेउ, पर्थना गर्हेउ र ताहान पापमा फसालार जाँचमा झिन पर्हेउ। साच्चि, मन त तयार बाटि, तर जिउ कमजोर बाटि।”
39र फेरि उ जाइकनि दोर्हयाइकनि पर्थना गरिक्। 40अनि फेरि येसु फर्किकनि आउते चेलाहान्के निदाइधार्लो भेटाइक, क्यारेकनिसिन उनहान्को आँखि निन्द्राइ लठ्ठ होख्लो रहिक्। र ओख्राइ क्या जबाफ देलार हो, उनहान्इ नाजान्वाइ।
41येसु तेस्रो चोटि आइक र उनहान्के कहिक्, “क्या ताहान अझइ निदाइधार्लाटो र थकाइ मारि धार्लाटो? आब होखिक, समय नजिक आइसकिक्। चाहो, मइ मानिसको छउना पापिहान्को हातमा छोप्हे लाग्लाटिन। 42उठो, आब जाहुँ। चाहो, मर्हाइ धोखा देलार मानिस नजिके बाटि।”
येसुके छोप्लो
(मति २६:४७-५६; लुका २२:४७-५३; युहन्ना १८:३-११)
43येसु बोल्तिहि गर्ते बार जना चेलाहानमध्येको यहुदा इस्करियोत एक्कासि उथि आइक। ओख्रोसिन मुख्य पुजारिहान, धर्म गुरुहान र अगुवाहान्इ पठालो एउटा समुह तरवार र लठ्ठि लिहिकनि उथि आवाइ। 44येसुके धोखा देलारइ उनहान्के यस्नो कलो रहिक्, “जख्राइ मइ चुम्मा खइतिन, ओइ ज येसु हो, ओख्राइ छोप्हेउ र नाम्रोसिन लेग्हेउ।”
45अनि यहुदा पुग्ले बित्तिके येसुठुँ जाइकनि “ए गुरु” कतिहिँ चुम्मा खाइक्। 46तब उनहान्इ येसुके छोप्वाइ। 47तर उथि नजिके ठेडाइधार्लारहान मध्यमा एउटा चेलाइ तरवार निस्काइकनि बड्को पुजारिको नोकरके हिर्काइकनि ओख्रो कान च्वाट्ट काटिदिहिक। 48येसुइ उनहान्के कहिक्, “क्या मइ गुन्डा हो र? ताहान्इ मर्हाइ छोपे तरवार र लठ्ठि लिहिकनि आउलो? 49मइ दिन्के मन्दिरमा सिखातिहि ताहान्सिन रहिन, ताहान्इ मर्हाइ नाछोपो। तर धर्मसास्त्र पुरा होखुस्।”#लुका १९:४७; २१:३७
50अनि सभइ चेलाहान येसुके छाडिकनि भाग्वाइ।
51उथि एउटा तन्नेरि छउडा येसुको पाछु लाग्लो रहिक्। ओइ आफ्नो जिउमा च्यादर मात्रे ओढ्लो रहिक्। उनहान्इ ओख्राइ पनि छोपे खोज्वाइ। 52तर उ आफ्नो च्यादर छाडिकनि नाङ्गे भागिक।
येसु माहासभाको आघु
(मति २६:५७-६८; लुका २२:६६-७१; युहन्ना १८:१२-१३,१९-२४)
53तब उनहान्इ येसुके बड्को पुजारिठुँ लेग्वाइ। उथि मुख्य पुजारिहान, धर्म गुरुहान र अगुवाहान बट्टेलो रहाइ। 54पतरुसचाहिँ दुस्सिभि येसुके पछ्याले बड्को पुजारिको घरको अङनमा जाइक्, अनि उथि सिपाहिहान्सिन बिसिकनि आगि तापे लागिक। 55मुख्य पुजारि र माहासभाको सभइ जनाइ चाहिँ येसुके मारेके लागि ओख्रो बिरुध सबुत खोजे लाग्वाइ, तर उनहान्इ केइ नापावाइ। 56धेरे जनाइ ओख्रो बिरुधमा सत्य नाहोख्लो गबाहि देहाइ। तर कुन्हुँको पनि गबाहि नामिलिक।
57कुनुहुँ कुनुहुँइ उठिकनि ओख्रो बिरुधमा यस्के कतिहिँ गलत गबाहि देहाइ, 58“इ मानिसइ यस्के कलो हामिइ सुन्हुँ, ‘मानिसको हातइ बनालो इ मन्दिरके भत्काइदेतिन, र मानिसको हातइ नाबनालो आर्को मन्दिर मइ तिन दिनमा बनातिन।’”#युहन्ना २:१९ 59अझि पनि उनहान्को गबाहि नामिलिक।
60तब बड्को पुजारि माझोमा ठेडाइकनि येसुके सुध्याइक्, “क्या तइसिन केइ जबाफ नाटि? इ मानिसहान्इ तोरो बिरुधमा गबाहि देलो क्या हो?”
61येसु लाभि ज बिसिक र केइ जबाफ नादिहिक। फेरि बड्को पुजारिइ ओख्राइ सुध्याइक्, “क्या तइ जयजयकार पाउलार योग्य परमेस्वरको छउना खिरिस्ट हो?”
62येसुइ कहिक्, “अ, मइ हो, ताहान्इ मइ मानिसको छउनाके सभइकते सक्तिसालि परमेस्वरको दाहिन्या हातपट्टि बिसिधार्लो र आकासभि बद्रिमा आइधार्लो देख्ताओ।”#दानिएल ७:१३
63इ कुरा सुनिकनि बड्को पुजारिइ आफ्नो लुगा च्याथिकनि कहिक्, “आब हाम्राइ अरु क्या सबुत चाहिक र? 64ताहान्इ परमेस्वरको खिसि गर्लो सुनिघालो। ताहान्को बिचार क्या बाटि?”
अनि उनहान सभइ जनाइ येसु मर्लार योग्यको बाटि कहाइ।#लेबि २४:१६
65अनि कुनुहुँ कुन्हुँइ ओख्राइ थुके लाग्वाइ र आँखिमा लुगा बाधिकनि झप्पड हिर्कातिहि कहाइ, “अगमबाडि कहइ।” अनि सिपाहिहान्इ पनि छोपिकनि ओख्राइ मुड्कि हिर्कावाइ।
पतरुसइ असुइकार गर्लो
(मति २६:६९-७५; लुका २२:५६-६२; युहन्ना १८:१५-१८,२५-२७)
66पतरुसचाहिँ अङनमा तर बिसिधार्लो रहिक्, ओइबेरा बड्को पुजारिको नोकरनिहान मध्यको एउटा नोकरनि उथि आइक, 67र पतरुसके आगि तापि धार्लो देखिकनि एकटक लगाइकनि चाहातिहि कहिक्, “तइ पनि नासरतको येसुसिन रहेर्।”
68तर पतरुसइ यस्के कतिहिँ असुइकार गरिक्, “थाहा नाटि मर्हाइ, तइ क्या कतिहिँ बाटेर, मइ केइ नाजान्तिन, नाबुझ्तिन।” अनि पतरुस अङनको दइलपट्टि जाइक् र ओइबेला कुख्रा चिच्याइक्।
69ओइ नोकरनिइ फेरि पतरुसके दइलको नजिक बिसिधार्लो देखिकनि उथि ठेडाइलार मानिसहान्के कहे लागिक, “इ मानिस त उनहानमध्येको एउटा हो।” 70तर पतरुसइ फेरि असुइकार गरिक्।
केइ समयपाछु उथि ठेडाइलार मानिसहान्इ पतरुसके कहाइ, “साच्चि, तइ उनहानमध्येको एक जना हो, क्यारेकनि तइ गालिलको मानिस ज हो।”
71तर पतरुसइ आफिके धिक्कारले कसम खइतिहि कहिक्, “जख्रो बारेमा ताहान कतिहिँ बाटो, उ मानिसके मइ चिने नाचिन्तिन।”
72अनि तुरुन्ते दोस्रो चोटि कुख्रा चिच्याइक, र येसुइ कलो कुरा पतरुसइ सम्झिक्, “दुइ चोटि कुख्रा चिच्याएकते पहिलि तइ मर्हाइ तिन चोटि नाचिन्तिन कहि असुइकार गर्तेर।” अनि ओइ कुराके सम्झिकनि पतरुस घ्वाँ घ्वाँ रोइक।
Currently Selected:
मर्कुस 14: BOTE
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
