लुका 3
3
बप्तिस्मा देलाहार युहन्नाको प्रचार
(मति ३:१-१२; मर्कुस १:१-८; युहन्ना १:१९-२८)
1रोमि राज्येको बड्को राजा तिबेरिअसइ राज गर्लो पन्र बर्स होख्लो रहिक्। ओइबेरामा पन्तियस पिलातस यहुदिया ठउँको रोमि बड्को हाकिम रहिक्, रोमि राजाको अधिनमा हेरोदइ गालिल ठउँरिमा राज गर्तरहिक्, र ओख्रो भइयाक फिलिपइ इतुरिया र तारखोनितिस ठउँरिमा राज गर्तरहिक्। अबिलेने ठउँरिमा लुसानियास कलाहार मानिस राज गर्तरहिक्। 2ओइबेरा बड्ढो पुजारिहान चाहि हन्नास र कइयाफा रहाइ। ओइबेरा सुनसान ठउँरिमा परमेस्वरको खबर जकरियाको छउना युहन्नाठुँ आइक। 3युहन्नाइ यरदन खोलाको चारेउपट्टि ठउँरिमा जाइकनि मानिसहान्के इसिगरिकनि प्रचार गरे लागिक्, “आफ्नो आफ्नो पाप मानिकनि परमेस्वरपट्टि मन फर्काओ र बप्तिस्मा लेहो, परमेस्वरइ ताहान्इ गर्लो पाप माफ गर्देताइ।” 4इसिगरिकनि यसइया अगमबक्ताइ#३:४ अगमबक्ता परमेस्वरभि पाउलो बोलि कलाहार मानिस धर्म सास्त्रमा लेखेलो बोलिहान पुरा होखिक्,
“सुन्हेउ, सुनसान ठउँरिमा एक जनाइ बड्को सोर निस्काइकनि यस्नो कतिहिँ बाटि
‘पर्भु आउलाहार बाट बनाइधारो
उ भउलार बाटहान सोझो बनाहेउ!
5सभइ खोल्सा खोल्सि पुरेपर्ताइ,
डाडा पाहाड सम्याए पर्ताइ।
घुमाइरि बाट सोझो बनाए पर्ताइ,
र अप्ठ्यारो बाट सझिलो बनाए पर्ताइ।
6तब सभइ मानिसहान्इ परमेस्वरको मुक्ति देख्तात्!’”#यसइया ४०:३-५
7धेरे मानिसहान बप्तिस्मा लेहे युहन्नाठुँ आवाइ। उनहान्के युहन्नाइ कहिक्, “ए साँपको बच्चाहान हो, परमेस्वरइ गर्लार दन्डभि हामि भागे कहिकनि ताहान्के कुनि सिखाइक्?#मति १२:३४; २३:३३ 8ताहान्इ साचिके आफ्नो आफ्नो पाप मानिकनि परमेस्वरपट्टि मन फर्कालो हो कनिसिन ओस्ने नाम्रो धन्दा गर्हेउ। ताहान अबराहामको सन्तान हो कहि बाच्ताहुँ कहिकनि झिनसोचेउ। मइ ताहान्के कतिन, परमेस्वरइ एइ पाथरभि पनि अबराहामको सन्तान जर्माए सक्तात्।#युहन्ना ८:३३ 9रुखको फेद्रामा बन्चर परिसकिक्। नाम्रो फर नाफर्लार सभइ रुखहान काटिकनि आगिमा हुर्राहेताइ।”#मति ७:१९
10मानिसहान्इ युहन्नाके सुध्याइक, “उसिकनि हामि क्या गरे पर्ताइ?”
11ओइ उनहान्के कहिक्, “दुइटा भोटो होख्लारहान्इ नाहोख्लारके एउटा देउस्, ओस्ने गरि खइलाहार चिज होख्लोइ नाहोख्लोके देउस्।”
12कर उठालाहारहान पनि युहन्नाठुँ बप्तिस्मा लेहे आवाइ, र ओख्राइ सुध्याइक, “गुरु, हामि क्या गरे पर्ताइ?”#लुका ७:२९
13युहन्नाइ उनहान्के कहिक्, “सरकारइ तोक्लोकते धेरे कर झिनउठाहेउ।”
14सिपाहिहान्इ पनि सुध्याइक, “हामि क्या गरे पर्लार हो?”
उनहान्के युहन्नाइ कहिक्, “आफ्ने तलपमा चित्त बुझाहेउ। कुन्हुँसिन जबरजस्ति गरिकनि, र ननारो दोस लगाइकनि पइसा झिनलेहेउ।”
15मानिसहान मुक्ति देलाहार राजा खिरिस्टको आसमा रहवाइ, र उनहान्इ मनइ युहन्ना ज खिरिस्ट हो कि कहिकनि सोचेलाग्वाइ। 16उसिगर्ते युहन्नाइ सभइके कहिक्, “मइ ताहान्के पानिइ बप्तिस्मा देतिन, तर मइ कते बड्को एक जना आउतिहि बाटि, मइ ओख्रो जुत्ताको तुना खोलेके नास्वाहेतिन। ओइ ताहान्के पबित्र आत्मा र आगिइ बप्तिस्मा देताइ। 17चाहेउ, अन्न फड्कलाहार सुप्पा ओइ हातमा लिहिसक्लाटि। अन्न फट्किकनि भखारिमा थनक्याताइ, तर भुसहान कन्हुँ नाबुताइलार आगिमा जराताइ।”
18यस्ने अझि धेरे अरतिहान देतिहि युहन्नाइ मानिसहान्के परमेस्वरको नाम्रो खबर सुनाइक। 19राजा हेरोदइ आफ्ने भइयाको दुल्हि हेरोदियाससिन बिहा गर्लो र ओइ अरु धेरे ननारो धन्दा गर्लो कारनइ युहन्नाइ ओख्राइ हप्काइक।#मति १४:३,४; मर्कुस ६:१७,१८ 20उसिगर्ते युहन्नाके झ्यालखानामा थुनिकनि ओइ आफ्नो सभइ ननारो धन्दामा अझइ एउटा ननारो धन्दा थपिक्।
येसुइ बप्तिस्मा लिहिक्
(मति ३:१३-१७; मर्कुस १:९-११; युहन्ना १:३२-३४)
21सभइ मानिसहान्इ बप्तिस्मा लेतेखेरि, येसुइ पनि बप्तिस्मा लिहिक्। येसुइ पर्थना गरिरते स्वर्ग खोलिहिक, 22र पबित्र आत्मा ढुकुरको रुपमा ओख्रो उप्रो ओघ्रिकनि आइक। अनि स्वर्गभि यस्नो बोलि आइक, “तइ मोरो प्यारो छउना हो। तइसिन मइ जारे ज खुसि बाटिन्।”#भजनसङग्रह २:७; यसइया ४२:१; मति ३:१७; मर्कुस १:११; लुका ९:२५
येसुको पुर्खाहान
(मति १:१-१७)
23येसुइ आफ्ने सेवा गर्लार धन्दा सुरु गर्ते लगभग तिस बर्सको होख्लो रहिक्। ओख्राइ योसेफको छउना हो कहि मानिसहान्इ कतरहाइ, योसेफको बुबाक एलि रहिक्, 24एलि मतातको छउना, मतात लेबिको छउना, लेबि मल्किको छउना, मल्कि यान्नाको छउना, यान्ना योसेफको छउना, 25योसेफ मताथियासको छउना, मताथियास आमोसको छउना, आमोस नहुमको छउना, नहुम इसलिको छउना, इसलि नग्गइको छउना, 26नग्गइ माथको छउना, माथ मताथियासको छउना, मताथियास सेमइनको छउना, सेमइन योसेखको छउना, योसेख योदाको छउना, 27योदा योआननको छउना, योआनन रेसाको छउना, रेसा यरुबाबेलको छउना, यरुबाबेल सालतिएलको छउना, सालतिएल नेरिको छउना, 28नेरि मल्किको छउना, मल्कि अद्दिको छउना, अद्दि कोसामको छउना, कोसाम एलमादमको छउना, एलमादम एर्को छउना, 29एर् यहोसुको छउना, यहोसु एलिएजरको छउना, एलिएजर योरिमको छउना, योरिम मतातको छउना, मतात लेबिको छउना, 30लेबि सिमियोनको छउना, सिमियोन यहुदाको छउना, यहुदा योसेफको छउना, योसेफ योनानको छउना, योनान एल्याकिमको छउना, 31एल्याकिम मलेआको छउना, मलेआ मिन्नाको छउना, मिन्ना मत्ताथाको छउना, मत्ताथा नातानको छउना, नातान दाउदको छउना, 32दाउद इसइको छउना, इसइ ओबेदको छउना, ओबेद बोअजको छउना, बोअज सल्मोनको छउना, सल्मोन नहसोनको छउना, 33नहसोन अम्मिनादाबको छउना, अम्मिनादाब आरामको छउना, आराम हेस्रोनको छउना, हेस्रोन फारेसको छउना, फारेस यहुदाको छउना, 34यहुदा याकुबको छउना, याकुब इसहाकको छउना, इसहाक अबराहामको छउना, अबराहाम तेरहको छउना, तेरह नाहोरको छउना, 35नाहोर सरुगको छउना, सरुग रउको छउना, रउ पेलेगको छउना, पेलेग एबेरको छउना, एबेर सेलहको छउना, 36सेलह केनानको छउना, केनान अर्पछदको छउना, अर्पछद सेमको छउना, सेम नोआको छउना, नोआ लेमेखको छउना, 37लेमेख मतुसेलहको छउना, मतुसेलह हनोकको छउना, हनोक येरेदको छउना, येरेद महलालेलको छउना, महलालेल केनानको छउना, 38केनान एनोसको छउना, एनोस सेतको छउना, सेत आदमको छउना, आदम परमेस्वरको छउना रहिक्।
Currently Selected:
लुका 3: BOTE
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
